Ỹataqta ltaʼaraic ra lalemataic nache ỹalauat so lqaỹa

Lqopague so Adán taq Eva qaỹolrauec ye nanaxanqaʼ ye Edén nache huoʼo so qalota llalacpi. So huaʼauchiguiñe llalec lʼenaxat Caín. So maye doʼonataxalec na ʼalhua ỹaañi na verdurapi taq frutapi. So lỹa llalec lʼenaxat Abel so maye ilotegue na qagueta.

Huoʼo so naʼaq so Caín taq Abel ỹoʼot so lachetaqtaxanaxatpi ỹanem ñi Jehová. Ñi Jehová lauela so lachetaqtaxanaxat so Abel qalaxaye saishet ra lauela so lachetaqtaxanaxat so Caín. Ỹoqoʼoye so Caín ỹataqta ralemata nache ñi Jehová ʼenapega so maye ʼeeta: «Ra qoqueta ra aualemata nache ivira ra auoʼot ca saỹaỹamaxañe». Qalaq so Caín saỹalaxaguet.

Nache so Caín ʼenapega so abel: «Aỹem aqategue saxauaxa ye campo». Qaq coʼollaq mashe netrauga nache so Caín iuaxan so lqaỹa iviraʼa ra ỹalauat so maye. ¿Négueʼt so ỹoʼot ñi Jehová? Ñi maye ỹasaxalec so qauem taq qoỹoqta so ỹamaxague ra ỹalat so lauolecpi. Saishet ra ltaxa iguelaxa so netaña so mayepi.

¿Négueʼt ca ñapaxaguenaxa? Ra huoʼo ca huotaique soʼotaq nache ra saishet ra ipacchigui nache ishet ra salematac. Na laỹipi ra qomiʼ ỹalletagui ỹataqta ltaʼaraic ra qaralemataic nache iuen ra ñaralaxatac. Chaʼaye ra qaica ca soʼotaq nache ishet ra qomiʼ nauec qaq reʼera saỹaỹamaxañi.

So Abel ỹataqta ʼonaxaic ra lataxac chaʼaye ỹataqta ỹauotec ñi Jehová. Ñi Jehová saishet icouai so maye ỹoqoʼoye ỹoltaxa iguelaxatem ra nachaalataxac qomchiye ana ʼalhua mataqaʼ.