So Adán taq aso Eva saỹalaxaguet ñi Dios

Huoʼo so naʼaq so ndotec aso Eva huoʼo so naraxanac inat aso maye: «¿ʼEesa ra ñi Dios saishet ra qamiʼ ỹasherema ra qolliqui ʼenauac ana frutapi?». Nache aso Eva ʼenapec: «Ishet ra sacheguenaq camachaqca, qalaxaye ndotec aca ʼoonole fruta saishet ra sacheguenac. Chaʼaye ra sacheguenac, nache seleuac». Aso naraxanac ʼenapec: «Saishet ra qaullivi. Ra qolliqui nache qoñitaʼam ñi Dios». ¿ʼEesa so nasaxauec? Saishet. Reʼera natenataxanaxac, qalaxaye aso Eva piʼiỹa so maye. Ra nquictauec ra ỹalletagui nache nquiguec ra lyaxa ra chec. Nache iviraʼa ra chec taq ỹanem so Adán. So maye ỹaỹaten ra saỹalaxaguet ñi Dios nache ileu, naicʼtaxa reʼera chec aso fruta.

Nache seʼeso huaigui naʼaq ñi Jehová inat so Adán taq aso Eva táʼaencoʼ soua maye saỹalaxaguet ñi maye. Eva nmaxalec so naraxanac qaq so Adán nmaxalec aso Eva. Ñi Jehová nqatec soua maye so nanaxanqaʼ chaʼaye saỹalaxagueta ñi maye. Ỹoqoʼoye ỹanalec so laiñe so angelpi taq lainec ltaʼaraic ra ilotegue yaqtoʼ saishet ra ltaxa inoxoneuo soua maye.

Ñi Jehová ʼenapec ra nhuaxanaguec so tenataxanaxaic remaltegue aso Eva. Qalaxaye saishet ra nacheso naraxanac. Chaʼaye ñi Jehová saishet ra ỹoʼot na naraxanac ra remalle. So ángel yiloxoic nacheso so ỹoʼot ra remalle so naraxanac. So maye huotaique ỹatenachet aso Eva. Seʼeso ángel lʼenaxat Satanás, so Diablo. Qomchiye ñi Jehová nlaxajñe so Satanás. Yaqtoʼ saishet ra queta ra ỹatenachet na shiỹaxauapi taq ra ỹoʼot na qauem.