So Jacob ỹaconguet so qanonaxataguet

So Isaac mashe iviʼi soua 40 viʼiyel coʼollaq huaronguet aso Rebeca. So maye ỹataqta ỹauotec aso Rebeca. Lcopaʼague huoʼo soua dos llalqa huaya.

So llalec ỹe lʼenaxat Esaú qaq so naʼasa lʼenaxat Jacob. So Esaú ỹataqta nmeten ra netaigui na aviac taq ỹataqta ỹaỹaten ñiʼipiaxac. Qalaxaye so Jacob lauela ra huetaʼa ye lmaʼ.

Coʼollaxa seʼeso naʼaxaʼate ca ñalec huaʼauñe ra ñiguiñi nache qalota ỹaconguet ʼalhuapi taq na alom lcopague ileu ca ltaʼa. Seʼeso qaỹamataʼac qanonaxataguet. Seʼeso lauolecpi so Isaac na qanonaxataguet taqaʼen ỹalectauo na ỹachaxanapecpi taq achiquiaxacpi ñi Jehová ỹanem so Abrahán. So Esaú qaica ca naigui nqaʼen. Qalaxaye so Jacob ỹaỹaten ra ỹataqta ʼamaqtaqaic reʼera.

Huoʼo so naʼaq, so Esaú ivireuo ye lmaʼ ỹataqta nasamñi chegaqauga so aviac ra neʼeptac. Nache nqoỹaxana ra amaʼ na laita lhuoshec so Jacob nache ʼenapec: «¡Huotaique selem na ỹoqouaxa! ¡Aỹem auanem ca laỹe reʼera ʼarhuoshec togaxaraic!». So Jacob ʼenapec: «Huaʼ qalaxaye huaʼauñe aỹem auanem na ʼam qanonaxataguet». So Esaú ỹasateguet: «¡Qaica ca sa naigui ñaqaʼen! ʼAm sanem na aỹem qanonaxataguet. Aỹem ndotec sauotaique sequeʼe. ¿Apetaʼa ra ỹaỹamaqchiguiñe so ỹoʼot so Esaú? Saishet. So maye iqataqchet so ỹataqta ʼamaqtaqaic ra choche ndotec lcauaʼa so nhuoshec.

So Isaac mashe iviraʼa ra ỹaxaiquiolec nache iuen ra ỹanem ra nachiquiaxac so llalec ỹe. Qalaxaye aso Rebeca itauan so naʼasa llalec Jacob ra yaqtoʼ so ltaʼa ỹanem so nachiquiaxac so maye. So Esaú laxaỹaxac reʼera nache ỹataqta ralemata nache huotaique ra ỹalauat so lqaỹa huaya. So Isaac taq aso Rebeca huotaique npaxajlec so Jacob nache ʼenapega: «Qojec anqona ca huetaʼa ca antesoqo Labán, lqaỹa ara arateʼe, nache qonetoʼot iviraʼa nañaxañi ra lalemataic so arqaỹa». So Jacob ỹalaxagueta soua ltaʼal nache ratauec yaqtoʼ so lqaỹa saishet ra ỹalauat.