So Jacob taq so Esaú nchoxonaʼt

Ñi Jehová ỹachaxanapeguem so Jacob ra npaxajlec ʼenaʼam coʼollaxa npaxajlec so Abrahán taq so Isaac. Nache so Jacob lmaʼ ye ʼalhua lʼenaxat Harán. Huaʼaña yeʼeye nache huaron taq huoʼo so qalota llalaqpi taq nquiguec ra lsallaxa.

Lcopague ñi Jehová ʼenapega so Jacob: «ʼAviguelaxa ye na ʼalhua caua artaʼal». Nache so Jacob taq so lauolecpi ỹalaxaguet ñi maye. Nache huaʼaña na nqaʼaic huoʼo soua lamaxashe nache raʼaqtaxanem: «So arqaỹa Esaú mashe anacta ra ʼam ncaʼataʼaguet, nnaictagueʼ na 400 nalleppi». So Jacob huoʼo ra lliaxa ra so Esaú ỹoʼotec ra saỹaỹamaxañe so maye taq so lauolecpi. Ỹoqoʼoye natamenot ñi Jehová: «Aỹem ʼarqouaguec qome ra aỹem ʼanacaʼalaxateguesop na ỹaqaỹa». So lỹa naʼaq nache so Jacob ỹamaxa so Esaú lachetaqtaxanaxat: qalota so qaguetapi, huacapi, camellopi taq ʼashenapi.

Seʼeso pe nache so Jacob ndotec nache ilaʼa so ángel. So Jacob nlletañe nasoqchiguiñe so ángel ivitaʼa ra yoʼoxoñi. Naicʼtaxa so Jacob quemac saishet ra nasamñe. So ángel ʼenapega: «Aỹem axanec». Qalaxaye so Jacob ỹasateguet: «Saishet ra ʼam saxanec, huaʼauñe aỹem auanem ra archoxonnataxanaxa».

Qaq huaña nache so ángel ỹanem so lchoxonnataxanaxa. Nagui nache so Jacob ỹaỹaten ra ñi Jehová npaxajlec so maye yaqtoʼ so Esaú sa ishet ra huoʼo ca ỹoʼoteque.

Nache seʼeso naʼaq so Jacob ỹalletaguet so Esaú taq so 400 ỹalleppi. Nache huaʼautic qataʼaguet so mayepi, qaq coʼollaq iviraʼa nache ỹaʼalyiñi naua l-llecte iviʼ siete veces. Nache so Esaú nqalgoqta so Jacob nache nqapaleʼ ʼenauaque soua maye nguitaʼape nache ỹoʼot ra nmaneʼ. ¿ʼAm auamaqten ra ñi Jehová lauela na ỹoʼot so Jacob?

Nache lcopague seʼeso nache so Esaú iguelaxa ye lmaʼ qaq so Jacob queta ra quetague so nqaʼaic. So Jacob huoʼo soua 12 llalqa: so Rubén, so Simeón, so Leví, so Judá, so Dan, so Neftalí, so Gad, so Aser, so Isacar, so Zabulón, so José taq so Benjamín. Lcopague ñi Jehová ncaʼalaxateguesop so npueblo roʼoxona so José, som llalec so Jacob. ¿Auotaique auaỹaten ʼeetec? Nache semetenaq.