Huoʼo aso ashena remalle

So israelitapi netaña ye ʼalhua tojlec 40 viʼiyel. Mashe qalota so ciudadpi ʼamaqtaqaic ỹacona ra lalamaxat. Nagui nache netaña ye nalochiguiñe ʼalhua ye Moab, paỹaʼague ra nalaʼ ye Jordán, taq yaqtaʼa ra iviraʼa ye ʼAlhua Qaỹachaxanapeguem. So Balac, maye ntaʼa ye Moab, so maye huoʼo l-lliaxa ra so israelitapi ỹacona so lalamaxat ʼalhua. Nache iaʼaxanot so ỹale lʼenaxat Balaam ra taỹa ye Moab yaqtoʼ ỹasaxalec so israelitapi ca qauem lʼaqtac.

Qalaxaye ñi Jehová ʼenapega so Balaam: «Saishet ra auasaxalec ca israelitapi ca qauem ʼaraqtac». Nache so Balaam saq nashen ra taỹa ye Moab. So ntaʼa Balac ỹoltaxa ỹaxana nache ỹachaxanapeguem ra ỹanem machaqca ca ỹaxanaique qalaxaye so Balaam ñaq ʼeetalec ra sanashen. Ñi Dios ʼenapega: «Ishet ra aỹa, qalaxaye ndotec ra anasaxauec na ỹaqtac».

So Balaam jec taỹa ye Moab netalec aso lalo ashena. So maye huotaique ra ỹasaxalec ca qauem lʼaqtac, naicʼtaxa ñi Jehová ʼenapega saishet ra ỹoʼot reʼera. Nache so ángel ñi Jehová nachaxana tres veces huaña ye nqaʼaic. So Balaam saishet ra ilaʼa so ángel qalaxaye aso lalo ashena ilotaʼa. Huaʼauñe aso ashena dashelec so nqaʼaic nache taigui campo. Lcopague aso ashena taỹot seʼeso npactaxanaxac comaʼ nache ipataxaguet na lapia so Baalam. Nache aso ashena nasoolaʼt na nqaʼaic laiñe. So Balaam iuaxaatalec aso ashena irotaʼa so ʼepaq.

Ñi Jehová ỹoʼot ra aso ashena remalle. Aso ashena inat so Balaam: «¿Táʼaencoʼ ra aỹem auaxaatac?». So Balaam ỹasateguet: «Souaxat ra aỹem ʼaueʼenaiʼ. Taxa ra ñasoqta ca ỹainec nache ʼam salauat». Aso ashena ʼenapec: «Aỹem qonetalec ʼenauaque na naʼaxaʼte. ¿Petaʼa huoʼo ca huaña ra ʼam soʼotec ca ʼeetaʼam reʼera?».

Nache ñi Jehová ỹaxanec so Balaam ra ilaʼa so ángel. Nache so ángel ʼenapec: «Ñi Jehová ʼam ʼenapega ra saishet aỹa ye israelitapi ra auasaxalec ca qauem ʼaraqtac». So Balaam ỹasateguet: «Semalqauec sheʼeguelaxa ye imaʼ». So ángel ʼenapega: «Ishet ra aỹa ye Moab, qalaxaye ndotec ra anasaxauec na lʼaqtac ñi Dios».

ʼAm ʼeetec ca arcuenataxac, ¿petaʼa so Balaam huoʼo ca nqatec ra ỹapaxaguenec? Saisheto, chaʼaye ỹoltaxa huotaique tres veces ra ỹasaxalec so qauem lʼaqtac. Qalaxaye ñi Jehová ỹoʼot ra soua tres veces nasaxauec so nachiquiaxac nmenguet so qauem lʼaqtac. Nache so israelitapi ỹacona ye Moab taq so Balaam ileu. ʼOnaxaic taxa ra so Balaam saxaỹet ra ỹalaxaguet ñi Jehová, ¿nache ʼeetec?