Saq amaqtac so npagueneʼ ñi Jehová

Lcopague ñaq netaña ye ʼalhua tojlec, so Coré, Datán, Abiram taq so 250 ỹalleppi mpagueneʼ so Moisés. So mayepi ʼenapec: «¡Nachaʼaye taxa, saishet ra qauapaquiteguec qamiʼ! ¿Táʼaencoʼ ra ndotec ʼam qarataxala? ¿Táʼaencoʼ so Aarón ra ntaxaỹaxanec? Ñi Jehová saishet ra ndotec netaguet ʼam taq so Aarón, taqaʼen ʼenauac qomiʼ netaguet». Ñi Jehová salauela seʼeso qanasaxauec chaʼaye nanoma ra qanpagueneʼ ñi maye.

So Moisés ʼenapega so Coré taq so laỹipi ỹalleppi: «Qauanaiua qonte nteʼeta añi npeʼl ñi Dios nache qandoiuo aca laỹi ca nchenaxanaxat nlaqchigui na incienso. Ñi Jehová qomiʼ ỹachaxana ca lqateua».

So nteʼeta, so Coré taq so 250 ỹalleppi nmitaique so Moisés huaña ye npeʼl ñi Dios. Huaña yeʼeye nache ỹavigaxat na incienso icoʼ ʼenaʼam ca ntaxaỹaxanec. Nache ñi Jehová ʼenapega so Moisés taq Aarón: «Qoquiỹaʼaisalo ra Coré taq ra ỹalleppi».

So Coré taỹa so netaña so npeʼl ñi Dios maye huetaʼa so Moisés. Qalaxaye so Datán, Abiram taq so lauolecpi saishet ra jec. Ñi Jehová ʼenapega so israelitapi: «Qoquiỹaʼaisalo naua lpeleʼete ra Coré, Datán taq Abiram». So israelitapi nache qaʼaisalo. So Datán, Abiram taq so lauolecpi patauec nachattrañi aso lpeleʼete. Nache nauachigui ana ʼalhua taq ỹoxorañi so mpagueneʼ ñi Dios. Nache huaña ye npeʼl ñi Dios chegaqasheguemec na piguem so norec nache nlaxajñe so Coré taq so 250 shiỹaxauapi.

Ñi Jehová ʼenapega so Moisés: «ʼEnauac ca lataxala na maiche luolecpi ndoua aca lashelte. ʼErelec na maiche lʼenaxat ñi ʼoonolec nataxala aca lashelte. Qalaxaye na lauolecpi so Leví ʼerelec ca lʼenaxat ra Aarón. Auachaigui ʼenauac na nasheltepi añi npeʼl ñi Dios. Aca lashelte queʼeca shiỹaxaua iqateuaʼa nache ñaxat na lauoxopi».

So lỹa naʼaq so Moisés nqatec ʼenauac so nasheltepi nache ỹachaxana so nataxalapi. Aso lashelte so Aarón ñaxatac na lauoxopi taq huoʼo na almendrapi mashe ỹe. Reʼera ỹataqta ỹachaxan ra ñi Jehová lcaʼaua so Aarón ra ntaxaỹaxanec.