Soua 12 qaỹamaq ra imeten ye ʼalhua

So israelitapi ỹalat ye qasoxonaxa Sinaí. Quetalec ye tojlec ye ʼalhua Paraán nache iviraʼa ye ʼalhua Cadés. Huaña yeʼeye ñi Jehová ʼenapega so Moisés: «Auamaq caua 12 ỹaleʼt, ñi ʼoonolec maye lataxala na maiche luolecpi, ra yaqtoʼ remejnaxara ye ʼalhua Canaán. Queʼeca ʼalhua maye sanem qome na israelitapi». Nache so Moisés lcaʼaua soua 12 ỹaleʼt nache ʼenapega: «Qanqoñia ye ʼalhua Canaán nache qaumichiñita ca ʼeetec ye ʼalhua ra qaỹanaxalec. Taqaʼen qaumichiñi na shiỹaxauapi maye netalec yeʼeye ra añaxaicpi qoʼ qaica ca laʼañaxac, ra lmaʼ na npeʼl qoʼ na ciudadpi». Soua 12 ỹaleʼt taỹa ye ʼalhua Canaán taqaʼen ỹalectauo so Josúe taq Caleb.

Soua ỹaleʼt ñiguelac lcopaʼague so 40 naʼaxaʼte. Nachetaq na higopi, granadapi taq uvapi nache nasaxauec: «Ye Canaán ỹataqta ʼonaxai ʼalhua, qalaxaye na shiỹaxauapi lmaʼ yeʼeye ỹataqta añaxaicpi taq ye ciudadpi huoʼo na lpaqtaxat ỹataqta logoraic». Nache so Caleb ʼenapec: «¡Ishet ra ñauexac! Qolac nagui». ¿Táʼaencoʼ apetaʼa ra nasaxauec so Caleb reʼera? Chaʼaye so maye taq so Josué piʼiỹa ñi Jehová. Qaq soua lỹa ỹaleʼt nasaxauec: «Saishet ra saxaỹa. Chaʼaye na shiỹaxauapi lmaʼ yeʼeye ỹataqta logoraic. Ra ñaloqnaxaguet ye mayepi nache ỹataqta qomiʼ qapioʼolqa shenaqtaʼam ana shiquioxoi».

So israelitapi qaica ca naquitaxac nache queteguelec nasacteguec: «Qalqagui ca lỹa yaqtoʼ qarataxala nache shiguilaxasoxogue ye Egipto. ¿Táʼaencoʼ ra ñeconaxa ye ʼalhua Canaán? ¿Yaqtoʼ qomiʼ qaỹalauat? So Josué taq Caleb ʼenapec: «ʼOnaxaic taxa ra salaxasoxoguet ñi Jehová. Ñi maye qomiʼ npaxalguete. Saishet ra qayiʼiitac». Qalaxaye so israelitapi saishet ra ỹalaxaguet. So mayepi huotaique ỹalauat so Josué taq Caleb.

¿Négueʼt ca ỹoʼot ñi Jehová? Ñi maye raqtaxanem so Moisés: «Ỹataqta qalota so ʼonaxaic soʼoteque so israelitapi..., qalaxaye ñaq ʼeetalec saq aỹem ỹalaxaguet. Ỹoqoʼoye ñonaxatalec neʼena ʼalhua tojlec iviʼi 40 viʼiyel tachiguiña ra ileu. Ndotec ca llalacpi nonañe, so Josúe taq Caleb nalec ye ʼalhua maye sachaxanapeguem ra sanem so israelitapi».