Aso npeʼl yaqtoʼ qaỹioʼoxoren ñi Dios

Coʼollaxa so Moisés netaña aso qasoxonaxa Sinaí, nache ñi Jehová ʼenapega ra nogoxosheguem aso npeʼl ltaʼaraic. Neʼena npeʼl ỹataqta ʼamaqtaqaic chaʼaye huaña ishet so israelitapi ra ỹioʼoxoren ñi Dios. Taqaʼen ishet ra nqochenaxat ra qamachaqca ca taỹa.

Ñi Jehová ʼenapec: «Qonapega na pueblo ra aỹem ndouaʼa ca lachetaqtaxanaqte yaqtoʼ qanoxosheguem aca npeʼl». So israelitapi ndouaʼa na lqat oro, plata, ỹottaʼaʼt comapi ỹataqta ʼonaxaic taq joyapi. Taqaʼen ndouaʼa lana, noʼon hualoq, na loʼoc na ỹottaʼaʼt animalpi taq qalota so laỹipi. So mayepi ỹataqta chetaqtaxanaxaicpi qalota so ỹaneuo, ỹoqoʼoye so Moisés ʼenapec: «Nache tachiguiña mashe nalotaʼa saishet ra huoʼo ca qandoiuo».

Qalota ỹalleppi taq aso ʼalpi ʼonataxanaxaicpi retaunaxan ra yaqtoʼ qanoxosheguem aso npeʼl. Ñi Jehová ỹanem ra laỹajnataxanaxac ra yaqtoʼ qaỹaỹamaqchiguiñi so nʼonatac. Huoʼo so hilaban, rogoxonaxataq taq bordaban. Taq so laỹipi ronataxataxa na oro, ʼonaxaic comaʼ taq ʼepaq.

So npueblo noxosheguem so npeʼl ipacchigui so lʼaqtac ñi Jehová. Ỹoʼot so ʼonaxaic napoxonaxat hualoxolaỹi yaqtoʼ dos soua cuarto: Ndaqa quiʼita taq ndaqa sa qaishetapec. So ndaqa sa qaishetepec netaña aso arca maye laỹi ra naỹamaxataxac ra qaỹoʼot ra qaỹoxona so ʼepaq acacia taq oro. So ndaqa quiʼita netaña so ncoỹaraxanaxaqui oro, nquiaʼaxalaʼ taq lcaʼatoxolate ca nchenaxanaxat. Qaq so qasoxoc netaña so nỹoxonaxaqui na cobre taq lcaʼatoxolate laterai. So israelitapi ỹachaxanapec ñi Jehová ra ỹalaxaguet ñi maye. Aso arca maye laỹi ra naỹamaxataxac itauan so mayepi ra ntouetac so ỹachaxanapec.

Ñi Jehová lcaʼaua so Aarón taq so llalacpi yaqtoʼ ntaxaỹaxanecpi taq roʼonataxan huaña aso npeʼl. Iuen ra ilogue taq ỹoʼot nachetaqtaxanaxac ỹanem ñi Jehová huaña yeʼeye. Ndotec so ntaxaỹaxanec, Aarón, ishet ra pauo so ndaqa sa qaishetapec. Ishet ra pauo ʼoonolec na viʼiyel yaqtoʼ ỹoʼot so nachetaqtaxanaxac souaxat na lasouaxashetpi, so lasouaxashetpi so lauolecpi taq so lasouaxashetpi ʼenauac so israelitapi.

So israelitapi imat ra noxosheguem aso npeʼl lcopague ʼoonolec viʼi so ỹalat ye Egipto. Nagui nache huoʼo ye huaña yaqtoʼ ỹioʼoxoren ñi Jehová.

Ñi Jehová ỹachaxan ra lauela seʼeso npeʼl ỹoqoʼoye ỹoʼot so loʼoc ỹataqta imattalec. So loʼoc ra netaña ra imatalec aso npeʼel nache so israelitapi iuen ra nache netaña yeʼeye. Qalaq seʼeso loʼoc ra naỹoxoosheguem nache ỹaỹaten ra iuen ra caʼai taỹa ca lỹa. Nsoxoñi so npeʼl nache qategue seʼeso loʼoc.