Saishet ipacchigui so ỹan ra ỹachaxanapec

Ñi Jehová ʼenapega so Moisés: «Qoquisheguemec na sotaña ana qasoxonaxa. ʼAm sanema caua comaʼ maye settaguelete naua iqataxaco taq naua ỹamaxasoxonaxaco». So Moisés tasheguemec nache netaña iviʼ soua 40 naʼaxaʼte taq 40 pe. So ñaq netaiye nache ñi Jehová ỹiʼirelec soua comaʼ so Diez Lamaxasoxonaxac taq ỹanema so maye.

So lcopague soua israelitapi ipettaʼa so Moisés ỹalat so mayepi. Ỹoqoʼoye qoỹienapega so Aarón: «¡Seuenac ra huoʼo ca qomiʼ ilotalguete! ¡Auoʼot ca qanatamnaxalaʼ!». Nache so Aarón ỹasateguet: «Ra soʼot reʼera nache seuen ca lcat oro». Nache so maye ỹoʼot ra quiguiñi so oro nache ỹoʼot so neʼenaqtac huaca llalec. Na shiỹaxauapi nasaxauec: «¡Neʼena huaca llalec nachena na qanatamnaxalai maye qomiʼ nqateeguesopa ye Egipto!». So mayepi ỹoʼot so lashaxac taq ỹioʼoxoretac so neʼenaqtac huaca llalec. ¿Seʼeso petaʼa sasaỹamaxañi? Ajaʼ, chaʼaye so mayepi ỹan ra ỹachaxanapec ra ndotec ñi Jehová ra ỹioʼoxoren. Qalaxaye saishet ra ipacchigui so ỹan ra ỹachaxanapec.

Ñi Jehová ỹalletaigui na ỹoʼotaq so mayepi, nache ʼenapega so Moisés: «ʼAunotec, chaʼaye na israelitapi ỹataqta saỹalac. Ỹioʼoxoretac ñi dios saq ʼeesa». Nache so Moisés ñeʼeguelaxañi ỹachetape soua dos comaʼ.

So Moisés mashe nayeetauo nache huaʼaqtega so shiỹaxauapi ra roʼonaxatacpi. So ivireuo nache ỹalletaʼa ra so mayepi rasottaguipi taq ỹioʼoxoretac so neʼenaqtac huaca llalec. So Moisés ỹataqta ralemata nache nasaxañi soua comaʼ nache rolaguilo. Nache taỹa ra nlaxajñi so neʼenaqtac, nache inat so Aarón: «¿Cam ʼeetec ra auañoxot ra auoʼot neʼena?». Nache so Aarón ỹasat: «Saishet ra aualemata, ʼam mashe auauatton na mayepi. Na mayepi huotaique ca natamnaxalaʼ nache soʼot ra quiguiñi so oro nache yoʼoq neʼena neʼenaqtac huaca llalec». So Aarón saishet taxa ra ỹoʼot neʼena. So Moisés ltaxa tasheguemec aso qasoxonaxa nache nachoxorenot ñi Jehová ra ichoxoren so npueblo.

Ñi Jehová ichoxoren so israelitapi maye huotaique ỹalaxaguet ñi maye. Ỹataqta ʼamaqtaqaic ra iuen ỹalaxaguet ñi Jehová taq so Moisés, ¿ʼeesa?