Aso qoipacqole huoʼo ana le ʼettaigui

So Moisés 40 viʼiyel ra lmaʼ ye Madián. Huaña yeʼeye nache huaron taq huoʼo so llalacpi. Huoʼo so naʼaq ilotegue aso qaguetapi saqaỹa aso qasoxonaxa Sinaí nache huoʼo so ilalec ỹataqta ʼamaqtaqaic. Aso qoipacqole huoʼo ana le ʼettaigui, ¡qalaxaye saishet ra ỹavic! So Moisés nquigueua ra huotaique imeten chaq táʼaencoʼ reʼera, nache huaqchigui so navilỹaxac chegaqaigui aso maye. So navilỹaxac ʼenapega: «¡Moisés! Saishet ra yoqtaʼ anquigueuo. Ancat naua arapelaʼate chaʼaye ana ʼalhua ʼauapetalec ỹataqta quiʼitta». So navilỹaxac nacheñi ñi Jehová. Ñi maye rogoxona ángel yaqtoʼ remalle so Moisés.

So Moisés huoʼo ra l-lliaxa nache ỹapolec na lashec. So navilỹaxac iaʼaxatem: «Semetetac ra ltaʼaraic nquejnaxac so israelitapi. Aỹem ñeqalaxateeguesop ye egipciopi nache sauega ye ʼalhua ỹataqta ʼonaxaic taq sauotaique ra ʼam anqateeguesop ca ỹalamaxatpi ye Egipto». ¿Petaʼa so Moisés iaʼalaq seʼeso?

So Moisés inat: «¿Négueʼt ca ñasaxauec ra aỹem qainat, négueʼt ca aỹem namaq?». Ñi Dios ỹasateguet: «Qonapega, ñi Jehová maye Natamnaxala Dios so Abrahán, Isaac taq Jacob ñi maye aỹem namaxalo qamiʼ». So Moisés ʼenapec: «¿Qaq ra saishet ra aỹem ỹalaxaguet ca aralamaxatpi?». Ñi Jehová ỹachaxanapeguem so maye ra itauan. ʼEnapega ra ỹasaxauec aso lashelte nache so ỹoʼot reʼera, ¡aso lashelte ñigui ra naraxanac! So Moisés ỹacona na laʼaralaxashet aso naraxanac nache ỹoltaxa ñigui ra lashelte. Nache ñi Jehová iaʼaxatem: «Ra ʼauʼot neʼena nache auachaxan ra aỹem ʼam samaq».

Qalaxaye so Moisés ʼenapec: «Seqalan ra soʼot ca ỹaʼaqtaqa ra setaqa». Ñi Jehová ỹachaxanapeguem: «ʼAm saqtaxanem ca anasaxauec, taqaʼen ariatac ca arqaỹa Aarón yaqtoʼ ʼam itauan». So Moisés ỹaỹaten ñi Jehová ishet ra itauan nache iguelaxa ye Egipto l-llataq aso lhua taq so llalacpi.