So israelitapi ỹan ra ỹachaxanapec ñi Jehová

Lcopague petaʼa soua dos qagoxoica so israelitapi qaʼai ye Egipto, iviraʼa ye qasoxonaxa Sinaí nache netaña yeʼeye. Nache ñi Jehová ʼenapega so Moisés ra tasheguemec aso qasoxonaxa nache raʼaqtaxanem: «Aỹem ñeqalaxateguesop so israelitapi. Ca mayepi ra ỹataqta aỹem ỹalaxaguet taq ipacchigui na ỹamaxasoxonaxacpi nache soʼot ra ỹalamaxat ʼamaqtaqaic». So Moisés huenotec aso qasoxonaxa nache raʼaqtaxanem so israelitapi so lʼaqtac ñi Jehová. ¿Négueʼt ca nasaxauec? So mayepi ỹachaxanapec: «Soʼotaq ʼenauac ca lʼaqtac ñi Jehová».

So Moisés ltaxa tasheguemec aso qasoxonaxa. Huaña yeʼeye ñi Jehová ʼenapega: «Lcopague caua tres naʼaxaʼte nache semalle ca ỹalamaxatpi. Asoxon ca mayepi ra saishet ra tasheguemec ana qasoxonaxa Sinaí». So Moisés huenotec nache raʼaqtaxanem so israelitapi ra naỹamaxatigueñe yaqtoʼ naxaỹaxana ñi Jehová.

So yaqtaʼa ra yoʼoxoñe so naʼaq tres so israelitapi ilaʼa ra huoʼo so nqashelgaxa taq so loʼoc napañe imattalec aso qasoxonaxa. Taqaʼen ỹataqta ltaʼaraic ra alam so trueno taq ra l-lamaxa aso nasheere. Ñi Jehová huenotec añi qasoxonaxa nache nactaigui so norec. So israelitapi ỹataqta ltaʼaraic ra l-lliaxa. Aso qasoxonaxa nchisheguem na lmalaʼq taq ʼenauac ra racholaxan. Ra l-lamaxa aso nasheere nquitasheguem. Nache Jehová ʼenapec: «Aỹem nachaỹem Jehová. Saishet ra qavioxoriñi ca laỹipi diospi».

So Moisés ltaxa iguelaxasheguem, nache ñi Jehová ỹanem so lqataxacpi yaqtoʼ iaʼaqtaxanem so pueblo. Neʼena lqataxacpi iaʼaxat ʼeetec ra ỹioʼoxoren ñi maye taq ʼeetec iuen ca lataxac so mayepi. So Moisés ỹiriñe nache lqopague iataxaỹaxan ra raʼaqtaxanem so israelitapi. Nache so mayepi ỹachaxanapec: «Soʼotaq ʼenauac na qomiʼ ỹamaxalec ñi Jehová». So mayepi ỹan ra ỹachaxanapec ñi Jehová. Qalaq, ¿ipacchigui petaʼa reʼera?