So ntaʼa David huoʼo so lasouaxashet

Coʼollaq so Saúl mashe ileu nache so David ralaxaic ntaʼa. So maye mashe iviʼ 30 viʼiyel ra lañaxataxac. Lcopague soua qalota viʼiyel, nache huoʼo so pe so maye netaña na paʼasheguem ye lmaʼ ltaʼaraic nache ilaʼa aso ʼalo ỹataqta ʼonaxai. So David ramaxasoxon yaqtoʼ ỹaỹaten ca lʼenaxat aso maye. Aso maye lʼenaxat Bat-Seba taq lhua so soldado lʼenaxat Urías. Nache so David ramaxasoxolec ra qaỹeʼeguenauga aso Bat-Seba, taq lauañe qaq aso maye nache hualaxai. So David huotaique ỹoxojñi so ỹoʼot. Nache raʼaqtaxanem so lataxala so nalleppi yaqtoʼ ỹoʼot ra huaʼautic ỹalegoigui so alleppi taq lcopague nache qaỹalat so maye. So Urías ileu huaña so alaataxac, lcopague so David huaronguet aso Bat-Seba.

Qalaxaye ñi Jehová masheye ilotaʼa ʼenauac seʼeso qauem. ¿Négueʼt ca ỹoʼot ñi Jehová nagui? Ỹamaq so nʼaqtaxanaxanec Natán ra remalle so David. So Natán ʼenapega: «Huoʼo so ỹale sallaxanec ỹataqta qalota aso laloʼ qaguetapi, taq so ỹale choxorac qalaq ʼoonole aso laloʼ qagueta maye ỹataqta ỹauotec. So ỹale sallaxanec ỹacona aso ʼoonole laloʼ so ỹale choxorac». Nache so David ỹataqta ralemata taq ʼenapec: «¡Queʼeca shiỹaxaua sallaxanec iuen ra qaỹalauat!». Nache so Natán ʼenapega: «¡Seʼeso ỹale nache ʼam!». So David ỹataqta itoxoñi taq ʼenapega so Natán: «Aỹem sachoʼot ra ỹasouaxashet ñi Jehová». Seʼeso lasouaxashet ỹahuoʼo ra qalota lqalaiguesat so David taq so lauolecpi. Ñi Jehová ỹoʼot so nhuaxanaguec so David, qalaxaye ỹoʼot ra ncaʼalec chaʼaye so maye ỹataqta huesota taq nasheeteguet ra nlaxanec ñi maye.

So David huotaique ra noxosheguem aso templo ñi Jehová. Qalaxaye ñi Jehová lcaʼagui so llalec Salomón yaqtoʼ noxosheguem. Nache so David ỹaqataxanai ʼenauac yaqtoʼ ishet ra ỹoʼot reʼera taq ʼenapec: «Aca templo ñi Jehová iuen ra ỹataqta ʼonaxai. Ñi Salomón ñaq nsoqolec, qalaxaye aỹem setauan ra seqataxanai ʼenauac». So David iqataxanai aso qalota anom yaqtoʼ tachigui ra qanoxosheguem. Nmitaique na onataxanaxaicpi, laỹonat na oro taq plata, taq iỹaxanaique na ʼepaq cedro chigaqaʼague ye Tiro taq Sidón. Coʼollaq yaqtaʼa ra ileu so David nache ỹanem so Salomón so huetalec so lataxac ra nʼonataguec ra qanoxosheguem aso templo taq ʼenapega: «Ñi Jehová aỹem ỹanem ra seỹiʼiriñe neʼena ra lataxac ra nʼonataguec yaqtoʼ ʼam sanem. Ñi maye ʼam itauan. Saishet ra ʼayiʼi iuen ra anañaxat taq auaqolec ra auoʼot».