Aso templo taỹot ñi Jehová

Coʼollaq so Salomón chetaʼague ra ramaxasoxon ye Israel, nache ñi Jehová inat so maye: «¿Négueʼt cam auaỹaxanaique, ʼam sanem?». So Salomón ỹasateguet: «Ñaq aỹem nsoqolec taq saxanaxa huoʼo ca saỹaten. Ỹoqoʼoye ʼam seỹaxanot ra aỹem ỹajnaxanaxaic yaqtoʼ ishet ra seloʼogue na anpueblo». Ñi Jehová ỹasateguet: «Aỹem soʼot ra ỹaqtec ra ʼam ỹajnaxanaxaic ʼenauac ana ʼalhua. Taqaʼen ʼam sanem ra nsallaxa qaq ra aỹem aualaxaguet nache qaỹoqtec ra anachaalataxac».

So Salomón noxosheguem aso templo. Rogoxona na oro, plata, ʼepaq taq na ỹataqta ʼonaxai comaʼ. ʼEnauac seʼeso lʼonataxanaxat ỹataqta ʼonaxaic. Qalota so ỹalleppi taq ʼalpi ỹataqta saq nqalan ra ỹoʼot na ỹottaʼaʼt nʼonatacpi. Aso templo iviʼi siete viʼiyel nache ime. Nache qaỹanem ñi Jehová aso templo, qaỹanalec aso nqatoxonaxalate nachetaqtaxanaxat. Huaña aso nqatoxonaxalate, nache so Salomón ỹaʼalyiñi naua l-llectel taq natamen: «Qomiʼ ỹataqta saỹatenac ra ʼam Jehová aiguet ra ʼam qaỹanem ca ỹataqta ltaraʼaic taq ʼonaxaic templo napaqalec neʼena. Qalaxaye ishettaxa ra auaqonguet na qanatamnaxac taq ra ʼam shioxorenac». ¿Ca ʼeetec ca arcuennataxac? ¿Lauela ñi Jehová aso templo? ¿Naxaỹaxana so natamnaxac so Salomón? Nache ñi Jehová namaq so norec chegoqoʼot na piguem taq ỹavigaxat so nachetaqtaxanaxat. Reʼera ỹachaxan ra ñi maye lauela aso templo. Coʼollaq so israelitapi ilaʼa reʼera nache ỹataqta machiguiñe.

So ntaʼa Salomón qaỹauaton ʼenauac ye Israel taq na ỹottaʼaʼt ʼalhua chaʼaye ỹataqta ỹajnaxanaxaic. So shiỹaxauapi nqona so maye yaqtoʼ ishet ra qaitauan ra ỹaỹamaxajñe na lqalaiguesat. Aso nateʼe ye ʼalhua Saba namaqtega so maye ra iguen ỹauotaʼa na qalaqaic nnataxanaxacpi. Aso maye naxaỹaxana na lasataxacpi, taq ʼenapec: «Seqcolguet reʼera saqtapeguelec, qalaxaye nagui selaʼa ra ỹataqta ʼeesa na araỹajnecpi. Ñi anatamnaxala, Jehová, ʼam ỹanem ʼenauac neʼena». Na shiỹaxauapi huetaʼa ye Israel ỹataqta machiguiñe. Qalaxaye reʼera yaqtaʼa ra nqochen.