So nʼonataxanaxac qaicolaxarache

Coʼollaq ye Israel huoʼo ra nlaxayec, chaʼaye so Salomón ỹioʼoxoren ñi Jehová. Qalaxaye so maye huaronguet so qalota ʼalpi chegaqauecpi taq ỹioʼoxoren na nqolacpi. So maye nquictauec ra ỹashaxanec ra lquiyaqteỹaxac nache taqaʼen ỹioʼoxoren so nqolacpi. Ñi Jehová ralemata taq ʼenapega: «Nagui seuotaxanec ra nʼonataxanaxac ye Israel huetoʼot so arhuelecpi taq seqolaraxache sauotaʼa ra dos. Nache sanem ca ltaʼaraic ca ʼoonolec na aramaxashecpi qaq ca arhuolecpi nonaguet ca saq ʼamaqtac».

Ñi Jehová huoʼo so ỹoʼot yaqtoʼ ʼenauac ishet ra qaỹaỹateeteguet so nasaxauec. Huoʼo so lamaxashec so Salomón lʼenaxat Jeroboán, natenaguet huangui na nqaʼaic so nʼaqtaxanaxanec Ahíya. Nache so nʼaqtaxanaxanec nqat so lapoʼ taq nqolaxajñe nache ỹauotaʼa 12 naqaʼen, taq ʼenapega so Jeroboán: «Ñi Jehová iuotaxanec ra nʼonataxanaxac ye Israel huetoʼot so luolecpi so Salomón taq iqolaxarache ỹauotaʼa ra dos. Auaqona na 10 laỹipi neʼena ipoʼ chaʼaye ʼam ntaʼa caua 10 tribus». So ntaʼa Salomón laxaỹaxac reʼera nache huotaique ỹalauat so Jeroboán. Ỹoqoʼoye so maye ratauec taỹa ye Egipto. Lcopague, so Salomón ileu nache so llalec lʼenaxat Rehoboam qoỹanagui ra ntaʼa. Nache so Jeroboán lcuennataxac ra mashe qaica ca machaqca nache iguelaxa ye Israel.

So nqueroxonecpi ye Israel ʼenapega so Rehoboam: «Ra auloʼoguet na pueblo nache na mayepi saishet ra ʼam ỹalat». Qalaq so nauochaxauapi maiche naloxouapi ʼenapega so maye: «Qapaʼatteguet na ʼaraqtac taq auamaxalec na qapata nʼonatacpi». So Rehoboam ỹalaxaguet so nauochaxauapi taq saq iyaqnapec. Ỹoqoʼoye so shiỹaxauapi npaxaguene taq qoỹanagui ra ntaʼa so Jeroboán soua 10 tribus. Seʼeso nʼonataxanaxac seʼesoua 10 tribus lʼenaxat Israel. So lỹa nʼonataxanaxac seʼesoua 2 tribus lʼenaxat Judá, ntaʼa so Rehoboam. ʼEra nache ʼeetec ra qaicolaxarache soua 12 tribus ye Israel.

So Jerusalén huetaʼa so lʼonataxanaxac so Rehoboam. Ỹoqoʼoye so Jeroboán salauela so maiche npueblo ra taỹa yeʼeye yaqtoʼ ỹioʼoxoren ñi Jehová. ¿Auaỹaten táʼaencoʼ? Chaʼaye huoʼo ra l-lliaxa ra saq qanashenguet taq qaỹalaxaguet so Rehoboam. Ỹoqoʼoye nache ỹoʼot soua dos huaca llalec ỹauotaʼa na oro taq ʼenapega so npueblo: «Ye Jerusalen ỹataqta qaỹoqta ʼonaxaic taxa ra qoñitaina taq qavioxoriñi naua huaca llalec». So shiỹaxauapi ỹoltaxa icouaʼai ñi Jehová.