So huaigui huaña ye qasoxonaxa Carmelo

So nʼonataxanaxac seʼesoua 10 tribus ye Israel huoʼo so qalota ntaʼalpi qauem, qalaq so Acab napacalec so mayepi. So maye huaroneguet aso ʼalo, yiloxoi, lʼenaxat Jezabel. Aso maye ỹioʼoxoretac so dios Baal. So Acab taq aso Jezabel ỹoʼot ra qalota so shiỹaxauapi taqaʼen ỹioʼoxoren so Baal. Taqaʼen ỹalauat so qalota lʼaqtaxaxanaxanecpi ñi Jehová. ¿Négueʼt ca ỹoʼot ñi Jehová? Ỹamaq so nʼaqtaxanaxanec Elías ra ỹanem ca lʼaqtac so Acab.

So Elías ʼenapega so Acab ra qaica qome ca auot chaʼaye so maye ntaʼa ỹataqta qauem. Queuogui soua tres viʼiyel, saishet ra ñaxat na nanguishecpi taq huoʼo na nqouaxa. Ñi Jehová ỹamaq so Elías ra ỹoltaxa remalle so Acab. So ntaʼa Acab ʼenapega so Elías: «Qache nache ʼam maye arasouaxashet ʼenauac neʼena». So Elías ỹasateguet: «Aỹem saishet ra ỹasouaxashet ra qaica ca auot. ʼAm avioxoren so Baal ỹoqoʼoye neʼena qaica ca auot. Alaỹonaʼt ʼenauac na pueblo taq ca lʼaqtaxanaxanecpi ca Baal huaña ye qasoxonaxa Carmelo. Shiguenac yaqtoʼ ỹachaxan négueʼt ca Dios ʼeesa».

ʼEnauac so pueblo laỹonqaʼ huaña añi qasoxonaxa, nache so Elías ʼenapega so mayepi: «Maiche qalcaʼaigui, ra ñi Jehová ʼeesa Dios qoʼ so Baal nache qoquigue. Soʼotaq ra shiguenac, caua 450 lʼaqtaxanaxanecpi ca Baal iuen ra iqataxanai ca lachetaqtaxanaxat taq iỹaxanaique ca maye. Aỹem taqaʼen seqataxanai taq seỹaxanaique ñi Jehová. Qaq cam dios ỹasat ra namaq ca norec nacheca ca ỹataqta ʼeesa». Nache ʼenauac seʼeso pueblo nasheeta.

Nache so lʼaqtaxanaxanecpi so Baal iqataxanai ca lachetaqtaxanaxat. Nache ʼenauac so nteʼeta ra iỹaxateqot so Baal: «¡ʼAm Baal qomiʼ auasategueta!». Qalaxaye saq ỹasat, nache so Elías ỹeʼetalec so maye: «Ỹataqta qanaʼaxanñic. Chaʼaye petaʼa roʼocheta taq iuen ra qanquetoxon». Mashe yaqtaʼa ra pe qaq saq ỹasat.

So Elías ỹasaxalec aso lcaʼatoxonaxalate so lachetaqtaxanaxat taq iqorelec na ʼetaxat. Lcopague nache natamen: «¡ʼAm Jehová, auoʼot na pueblo ilaʼa ra ʼam Dios ʼeesa!». Ñi Jehová namac so norec chegoqoʼot na piguem nache ỹavigaxat so nachetaqtaxanaxat. So shiỹaxauapi naʼaxannec ra laʼalaxac: «¡Ñi Jehová nacheñi ñi Dios ʼeesa!». Nache so Elías ʼEnapec: «Qauacoñiuaʼa na lʼaqtaxanaxanecpi so Baal». Seʼeso naʼaq qaỹalauat soua 450 lʼaqtaxanaxanecpi so Baal.

Lcopague huoʼo aso loʼoc qochoñi chegoqchiguingui aye auaxai, taq so Elías ʼenapega so Acab: «Mashe huotaique auot, aỹa ye armaʼ». Na piguem nauguelec so loʼoc nache ỹataqta napañi, huoʼo so laʼat taq anac na auot ltaraʼaic. Nache tachiguiña ra deqaqtaʼ na ʼalhua. So Acab huenongui aso nnotaxaqui nache nayaqchen. Ñi Jehová itauan so Elías ra ỹataqta naloxo napacalec aso notaxaqui. Qalaq, ¿nache tachiguiña na nqalaiguesatpi so Elías? Reʼera semetenac.