Ñi Jehová ỹañaqchet so Elías

Aso Jezabel laxaỹaxac so huaigui coʼollaxa so lʼaqtaxanaxanecpi so Baal nache reʼera ỹoʼot ra ỹataqta ralemata. Nache ỹamaq so lamaxashec ra ʼenapega so Elías: «Qonte aleu, ʼam seʼenaqteeteguet ra qonetec so lʼaqtaxanaxanecpi so Baal». So Elías ỹataqta ñiʼi taq ratauec taỹa ye ʼalhua tojlec. Qaq huaña yeʼeye nache natamen: «Jehová mashe saq ñaʼaloguet, sauotaique seleu». So Elías ỹataqta nasamñi nache roʼochañi huetoʼot aso qoipac.

Qalaxaye huoʼo so ángel nquetoxon so Elías taq ỹahuotaʼa nchetaq na lʼaqtac: «Qoñisheguem nache auqueʼe». Nache so Elías ilaʼa aso nauole ratoxoi taq aso naquipiaxaqui huetangui so ʼetaxat. So maye requeʼe taq ñomgui, ỹoltaxa ỹeʼeguelaxañi ra roʼoche. So ángel ỹoltaxa nquetoxon taq ʼenapega: «Auqueʼe, auen ca arañaxac chaʼaye qaỹoqojlec na nqaʼaic qom qojec». Nache so Elías ỹoltaxa requeʼe. Lcopague jec queuoigui so 40 naʼaxaʼte taq 40 pe nache ivitaʼa ye qasoxonaxa Horeb. Huaña yeʼeye nache taigui so auac ra roʼoche. Nache ñi Jehová remalle: «¿Négueʼt ca auoʼottac ra qouetaʼa neʼena?». So Elías ỹasateguet: «So israelitapi saishet ra ipacchigui so ʼam ỹachaxanapeguem. Nlaxajñe aso nqatoxonaxalatepi taq ỹalauat so ʼaraʼaqtaxanaxanecpi. Qaq nagui taqaʼen huotaique aỹem qaỹalauat».

Ñi Jehová ʼenapega so Elías: «Ampauec na auac taq nache qonetaña». Nache huoʼo so laʼat ltaʼaraic lqopaʼague huoʼo so nacholaxanaxa taq anac so norec. Qaq coʼollaq ime seʼeso nache huaʼachigui so navilỹaxac qapioʼoñic ra l-lamaxa. Nache so maye ỹapolec na lashec ỹahuotaʼa so lapoʼ taq ñaq nachatañi. Ñi Jehová inat so maye táʼaencoʼ ra ratauec. So Elías ỹasateguet: «Aỹem ʼoonolec ra ñoʼonañi ra ʼam shioxoretac». Qalaxaye ñi Jehová ỹasateguet: «Saishet ra ʼam ʼoonolec. Ñaq huoʼo na 7.000 shiỹaxauapi ye Israel ñaq queʼeta ra aỹem ỹioʼoxoretac. ʼAue qojec taq qonapega ca Eliseo ra ca maye icaguishec yaqtoʼ ỹaqtaxanaxanec lcopague ʼam nmenguet». So Elías ỹoʼot so ỹamaxalec ñi Jehová. ¿ʼAm apetaʼa ra ñi Jehová taqaʼen ʼam itauan ra aualaxaguet ñi maye? Aja, nache ʼeetec. Semetenac so huaigui coʼollaq qaica ca auot.