So llalec aso paʼai ỹoltaxa ncaʼalec

Queuoigui so qaica na auot, ñi Jehová ʼenapega so Elías: «Anqoʼona ye ʼalhua Sarepta. Huaña yeʼeye huoʼo aca paʼai ra ʼam ỹanem ca ʼoq». Coʼollaq ivireuaʼa so ñegueuo ye ciudad so Elías ilaʼa aso paʼai maye laỹootegaʼt so ʼepaqpi ra l-leʼ lashecpi, nache iỹaxanot ca laquip ʼetaxat. Coʼollaxa aso maye ỹeʼeguenauaʼa so ʼetaxat, so Elías ʼenapega: «Aỹem ʼanqouaguec taqaʼen ca nauole laỹolec». Qalaxaye aso paʼai ỹasateguet: «Qaica ca nauole. Ndotec yetaiʼ ñaʼayiiña taq aceite laỹi, ra yaqtoʼ soʼot ca nauole ra requeʼe ñi ỹalec taq aỹem». So Elías ʼenapega: «Ñi Jehová ỹachaxanapec ra auoʼot aca nauole taq aỹem andouga, nache saimeuo ca aceite taq ʼayiiña queuoigui ra qaica na auot».

Aso paʼai ỹoʼot so ỹamaxalec so nʼaqtaxanaxanec Elías nache ỹoʼot aso nauole. Queuoigui so qaica na auot, aso paʼai taq llalec huoʼo na aloq, ipacchigui so lʼaqtac ñi Jehová. Aso laỹi so ʼayiiña taq aceite saimeuo.

Lcopague huoʼo so huaigui ra ỹataqta nquic. So llalec aso paʼai ỹataqta ralola nache ileu, aso maye nqouaxaunot so Elías ra itauan. Nache so Elías nsoxouo so llalec aso maye, taq irosheguema na pasheguem so noỹic. Nache ỹachalec so lmala taq natamen: «Jehová ʼam ñachoxonnot ra auguilaxatem ra nachaalataxac neʼena nogotolec». ¿Auaỹaten táʼaencoʼ reʼera qaỹaxanaique ỹataqta qaỹalac? Chaʼaye seʼeso naʼaxaʼte, ca mashe ileu saishet ra ỹoltaxa ncaʼalec. Taqaʼen aso paʼai taq llalec saishet ra israelitapi.

Nache so nogotolec anac naua laʼaʼche taq ncaʼalec. So Elías ʼenapega aso paʼai: «¡Ten na aỹalec ncaʼalec!». Aso maye ỹataqta machiguiñe taq ʼenapega so Elías: «Nagui saỹateʼeta ra qouetaguet ñi Dios. Na anasaxauec chegoqoʼot ñi Jehová ỹoqoʼoye saxaỹet ipacchigui».