Nateʼe yiloxoi huoʼo nhuaxanaguec

So ntaʼa Acab ỹalletavigui so nalloxoqui netaña ye lmaʼ ltaʼaraic huaña ye Jezreel nache ỹalletagui so lanaxanqa uva lmaʼ so ỹale lʼenaxat Nabot. So Acab ỹoqoʼoye huotaique ishenaxana. So lamaxasoxonaxac ñi Jehová iaʼaxat ra saishet ra qaimen na ʼalhuapi qanonaxatañi chegoqoʼot na ntaʼalpi. Ỹoqoʼoye so Nabot saishet imen, so maye ỹoʼot so ỹaỹamaqchiguiñe. ¿Apetaʼa so Acab ỹaỹamaxareta so ỹoʼot so Nabot? Saishet, so maye ỹataqta ralemata, saq requeʼe taq saq mpauec.

Aso lhua so Acab nachaso aso nateʼe yiloxoi Jezabel. Aso maye ʼenapega: «ʼAm nache ʼam ntaʼa na Israel, ishet ra qamachaqca auaqona. Aỹem sañoxot ra aralamaxat». Nache aso maye ỹoʼot aso lere ỹamaxa so ỹalleppi ʼamaqtaqaicpi ye ciudad. Aso lere netalec ramaxasoxolec ra qaỹalauat qairotaʼa na coma chaʼaye so maye isheuen ñi Dios. Seʼeso ỹalleppi ỹoʼot so ramaxasoxolec aso Jezabel. Lcopague, aso maye ʼenapega so Acab: «So Nabot mashe ileu, nagui ishet ra auaqona ye lanaxanqa uva lmaʼ».

So Nabot saishet ra nacheso so ʼoonolec shiỹaxaua soxoraic ra aso Jezabel ỹalauat. Aso maye qalota so laỹi ỹalauat maye taqaʼen ỹauotec ñi Jehová. Taqaʼen aso maye ỹioʼoxoretac na nqolacpi taq ỹoʼot na saỹaỹamaxañi. Qalaxaye ñi Jehová ỹalletagui ʼenauac seʼeso. Ñi Jehová, ¿négueʼt ca ỹoʼoteq aso Jezabel?

Coʼollaq so ileu so Acab, lcopague nache ramaxasoxon so llalec Jehoram. Nache ñi Jehová ỹamac so ỹale lʼenaxat Jehú yaqtoʼ ỹauoʼo ca nhuaxanaguec aso Jezabel taq so lauolecpi.

So Jehú huenosheguem aso nnotaxaqui nache taỹa ye Jezreel maye lmaʼ aso Jezabel. So Jehoram taqaʼen huenosheguem aso nnotaxaqui yaqtoʼ natenaguet so Jehú. Qaq coʼollaq ilaʼa so Jehoram inat so maye: «¿Huoʼo ra nlagaxayec?». So Jehú ỹasateguet: «Qaica ra huoʼo ca nlagaxayec, chaʼaye aso arateʼe Jezabel, quetoʼot ra ỹoʼotaq na qauem». So Jehoram nconnaxaañi aso nnotaxaqui ra jec, nache so Jehú ỹaỹen ỹauotaʼa so lchenec nache ỹalauat.

Lcopague so Jehú taỹa ye lmaʼ ltaʼaraic aso Jezabel. Aso maye laxaỹaxac ra anaqta so maye nache ỹoʼot so lloxoraxat na laue, ỹaʼameʼn naua laʼaiʼtel taq iuataʼaguet netaña so nalloxoqui na paʼasheguem ye lmaʼ. So ivireuo nache aso Jezabel ỹietalec so maye. So Jehú ỹallesheguema soua lamaxashecpi taq ʼenapegalo: «¡Qauamaqaiuec na paguiñi!». Nache soua maye ỹamaxarec aso Jezabel nqaʼen tachiviigui so nalloxoqui taq ileu.

Lcopague seʼeso, so Jehú ỹalauat so 70 llalacpi so Acab taq nqatec ra ñioxonataxanaxac so Baal. ¡Ten ameten! Ñi Jehová ỹaỹaten ʼenauacna taq ra ivi ye laloqoʼ nache ỹahuoʼo na nhuanaxaguec na ỹoʼotaq ye qauem.