Qalota caaỹopi taq nnaigonapi nalaataxaquipi ʼeetaigui

So ntaʼa Ben-Hadad ye Siria mashe nalattegue ye Israel. Qalaxaye so nʼaqtaxanaxanec Eliseo saxaỹet isoxon so ntaʼa ye Israel yaqtoʼ rataueguesop. Ỹoqoʼoye so Ben-hadad huotaique ỹaconeua so Eliseo. So maye qaiaqtaxanem ra netaña ye ciudad Dotán taq ỹamaq so nalleppi ra qaỹaconeua so maye.

Coʼollaq so Siriopi, mashe pe, iviraʼa ye Dotán. So nteʼetom so lỹa naʼaq, so lamaxashec so Eliseo pauec nache ilaʼa ye ciudad ra qaicoleguesop na qalota alleppi. So maye ỹataqta ñiʼi taq naʼalaxañe: «Eliseo, ¿négueʼt ca soʼotaq nagui?». So Eliseo ỹasateguet: «Qalota na alleppi qomiʼ huetaʼagueta napacalec nam huetaʼaguet na mayepi». Huaña nache, ñi Jehová ỹoʼot ra so ltaua so Eliseo ishet ra ilaʼa so qasoxonaxapi huaqtaʼai ye ciudad imattalec na qalota caaỹopi taq nnaigonapi nalaataxaquipi ʼeetaigui.

Coʼollaq so alleppi siriopi huotaique ra ỹaconeua so Eliseo, nache so maye natamenot ñi Jehová yaqtoʼ itauan soua maye. Nache ñi Jehová isomaxarache ỹoqoʼoye soua alleppi saq ỹaỹaten ca huetaʼague. So Eliseo ʼenapega so mayepi: «Queʼeca shiỹaxaua qanmichitaique saishet ra huetaʼa neʼena. Aỹem qauqachigue nache qamiʼ sachaxanalo». So mayepi qategue so Eliseo iviraʼa ye Samaria, maye huetaña ye lmaʼ so ntaʼa ye Israel.

Nagui so siriopi nanomtaʼa ye huetaña, qalaxaye mashe ye qaica ca ishet ra ỹoʼot. So ntaʼa ye Israel inat so Eliseo: «¿Qaq nagui salauat?». So siriopi huotaique ỹalauat so Eliseo nache, ¿petaʼa iguelaxateguet so mayepi? Saishet. So maye ỹasateguet so ntaʼa: «Saishet ra aualauat. Ndaʼ ra aquiaxan taq ra ime nache axanec ra jec». Nache so ntaʼa iqataxanai so lquiaxac ltaʼaraic taq ime nache iguelaxat so mayepi.