Jehová ỹachaxana ra lhualaxavic so Jonás

Coʼollaxa huoʼo ye ciudad lʼenaxat Nínive huaña ye Asiria, na shiỹaxauapi lmaʼ yeʼeye ỹataqta yiloxoicpi. Ñi Jehová ỹamaq so nʼaqtaxanaxanec Jonás ra nqoʼona ye Nínive taq iaʼaxatem ra iuen naralaxat ra lataxac. Qalaxaye so Jonás rataueguesop taỹa ye lỹa taq huenongui aso notaxaqui taỹaʼague ye Tarsis.

Coʼollaq aso notaxaqui mashe netangui ye auaxai nache anac so auot ltaʼaraic taq so loʼopi aso notaxaqui ỹataqta ñiʼi. Ñi ʼoonolec so mayepi, natamenot so natamnaxalapi taq nnataxateguelat: «¿Táʼaencoʼ qomiʼ huaigui neʼena?». Nache so Jonás ʼenapega: «Aỹem ỹasouaxashet neʼena. Chaʼaye sataueguesop na aỹem ỹamaxalec ra soʼot ñi Jehová. Aỹem qauasaqainigui na ʼetaxat yaqtoʼ viʼiguet ana auaxai». So loʼopi aso notaxaqui saishet ra huotaique ỹasaxangui qalaxaye so maye requiqtoʼot. Nache so mayepi ỹoʼot reʼera qaq so auot ltaʼaraic viʼiguet.

So Jonás ipitaxatega ra ileu. Coʼollaq so maye mashe imolec na qaỹoqochiguiña ana auaxai nache natamenot ñi Jehová. Ỹoqoʼoye ñi Jehová ỹamaq aso nỹaq lateʼe ra imatañe so Jonás qalaq saishet ra ỹalauat. Na pauo aso nỹaq lateʼe so Jonás natamenot ñi Jehová: «San na ỹaqtac ra saxaỹet ʼam salaxaguet». Ñi Jehová ỹoʼot ra ncaʼaltauec so Jonás ra netaigui aso nỹaq lateʼe queuoigui soua tres naʼaq. Lcopague ỹoʼot ra aso nỹaq lateʼe nolec na loigue aso auaxai.

Ñi Jehová nqaʼalaxatec so Jonás taq ỹoltaxa ỹamaq qaq nagui so Jonás ỹalaxaguet. Taỹa yeʼeye taq ʼenapega so shiỹaxauapi yiloxoicpi: «Ivildec caua 40 naʼaxaʼte ñi Jehová nlaxajñe neʼena ciudad». ¿Négueʼt ca huaigui so mayepi? So ninivitapi ỹalac taq naralaxat na lataxac. So ntaʼa ye Nínive ʼenapega so npueblo: «Qaviaxañiot ñi Dios taq qanaralaxachi na qarataxaqui, petaʼa ñi maye saishet ra qomiʼ nlaxajñe». Coʼollaxa ñi Jehová ilaʼa so shiỹaxauapi ntogotac, nache saishet ra nlaxajñe.

So Jonás ỹataqta ralemata chaʼaye ñi Jehová saishet ra nlaxajñe yeʼeye ciudad. Acuennataxalec neʼena: Ñi Jehová ỹachaxana ra lhualaxavic taq ichoxoren so Jonás. Qalaxaye so maye saishet ra ichoxoren so shiỹaxauapi lmaʼ ye Nínive. So maye saỹaỹamaxaren nache pauec ye ciudad nache taỹot so lpaqal aso nsheʼela. Lcopague aso nsheʼela reqaqa qaq so Jonás ỹataqta ralemata. Ỹoqoʼoye ñi Jehová ʼenapega: «ʼAm ỹataqta arauoche aso nsheʼela qalaxaye saishet na shiỹaxauapi lmaʼ ye Nínive. Aỹem huoʼo ra ichoxonataxanaxac so mayepi ỹoqoʼoye ñicaʼalaxateguesop». Ñi Dios, ¿négueʼt ca huotaique ỹapaxaguenec so Jonás? So shiỹaxauapi lmaʼ ye Nínive ỹataqta ʼamaqtaqaic napaqalec ca machaqca.