So ángel ñi Jehová mpaxajlec so Ezequías

Coʼollaq so Asiria mashe ỹaqona ra lalamaxat so nʼonataxanaxac soua 10 tribus ye Israel. Nagui so ntaʼa ye Asiria lʼenaxat Senaquerib, taqaʼen huotaique ỹaqona so nʼonataxanaxac soua 2 tribus ye Judá. Nache ỹaqoneua na ciudadpi ỹauotaʼa nquiỹaxatañi ye Judá. Qalaxaye ye ciudad ỹauotegueua nache ye Jerusalén. Qalaq so Senaquerib saỹaỹaten ra ñi Jehová mpaxatalec.

So ntaʼa ye Judá lʼenaxat Ezequías isheten so Senaquerib qalota anom yaqtoʼ saishet ra ỹaqona ye Jerusalén. So Senaquerib ỹaconeguet aso anom, naicʼtaxa reʼera ỹamaq so nalleppi. So shiỹaxauapi lmaʼ ye ciudad ỹataqta ñiʼi chaʼaye mashe nayeʼetauo so asiriopi. Nache so Ezequías ʼenapega so mayepi: «Saishet ra qayiʼiitac. Na asiriopi añaxaicpi qalaxaye ñi Jehová ỹoʼot ra qomiʼ ỹataqta añaxaicpi».

So Senaquerib ỹamaq so lamaxashec qaỹamataʼac rabsaqué, yaqtoʼ isheuen so shiỹaxauapi lmaʼ ye Jerusalén. So rabsaqué nachatoʼot na pauec ye ciudad taq nalaxañi: «Ñi Jehová saq ishet ra qamiʼ itauan. Saishet ra qamiʼ ỹatenachet ca Ezequías. Qaica ca lỹa dios ishet ra qamiʼ ncaʼalaxateguesop».

So Ezequías inat ñi Jehová négueʼt ca iuen ra ỹoʼot, ñi maye ỹasateguet: «Saishet ra ayiʼi souaxat na nasaxauec ra rabsaqué. Ca Senaquerib saishet ỹaqona ra lalamaxat na Jerusalén». Lcopague, so Ezequías ỹaconeguet so lere lalamaxat so Senaquerib: «Qaica ca ishet ra qauoochi, ñi Jehová saishet ra qamiʼ ncaʼalaxateguesop». Nache so Ezequías natamen: «Jehová ishet petaʼa ra qomiʼ ancaʼalaxateguesop yaqtoʼ ʼenauac ỹaỹaten ra ʼam ʼoonolec ʼeesa Dios». Qaq ñi Jehová ỹasateguet: «So ntaʼa ye Asiria saishet ra pauo ye Jerusalén. Aỹem ñipaxajlec ye ỹalamaxat ciudad».

So Senaquerib ipetega ra yaqtaʼa ỹaqona ye Jerusalén. Qalaxaye huoʼo so pe ñi Jehová ỹamaq so ángel ye lanataqa so alleppi asiriopi. ¡So ángel ỹalauat so 185.000 alleppi! So ntaʼa Senaquerib reqat so lalamaxat alleppi añaxaicpi taq qaica ca ishet ra ỹoʼot nache iguelaxa ye lmaʼ. Nache ʼeetec ñi Jehová ra mpaxajlec so Ezequías taq ye Jerusalén, ipacchigui so lʼaqtac. ʼAm ra qouetaña ye Jerusalén, ¿taqaʼen aupiʼiỹa ñi Jehová?