So Josías ỹauotec na lamaxasoxonaxac ñi Dios

So Josías iviʼi soua ocho viʼiyel ra nachaalataxac ỹaqolec ra lʼonataxanaxac ye Judá. Seʼeso naʼaxaʼte so shiỹaxauapi rogoxona na magia taq ỹioʼoxoretac na nqolacpi. Coʼollaq iviʼi 16 viʼiyel ra nachaalataxac huotaique napaxaguena ra ỹioʼoxoren ñi Jehová maye ỹaỹamaxareta ñi maye. Lcopague soua 20 viʼiyel ra nachaalataxac nqateua so atamnaqapi taq so nqolacpi maye huetaʼa ʼenauac ye país. Qaq so iviʼi 26 viʼiyel ra nachaalataxac iqataxanai ʼenauac yaqtoʼ ỹaỹamaxajñe añi templo ñi Jehová.

So ntaxaỹaxanec Hilquías ilalec huaña añi templo aso nere maye huetalec na lamaxasoxonaxac ñi Dios. Petaʼa aso nere liriguishec so Moisés. So Safán, lamaxashec so ntaʼa, irouaʼa aso nere so Josías taq itaxaỹaxan ỹauotaʼa alam na lʼaqtac. So Josías naxaỹaxana so maye nache ỹaỹateteguet ra so pueblo saq ỹalaxaguet ñi Jehová queuoigui so qalota viʼiyel. Nache so ntaʼa Josías ʼenapega so Hilquías: «Ñi Jehová ỹataqta qomiʼ ralemataỹa. Amalle ñi maye yaqtoʼ qomiʼ iaʼaxatem ca soʼotaq». Ñi Jehová ỹanem so lʼaqtac aso naʼaqtaxanaxana Huldá: «Na pueblo ye Judá aỹem ỹalat. Sauoʼo ca nhuaxanaguec, qalaxaye saishet nagui chaʼaye ñaq ntaʼa ñi Josías, chaʼaye ñi maye huesota».

Coʼollaq so ntaʼa Josías huaqchigui seʼeso nʼaqtac nache taỹa añi templo taq laỹonaʼt so pueblo ye Judá. Lcopague, naxanec ra itaxaỹaxan na lamaxasoxonaxac ñi Jehová. So Josías taq so pueblo ỹan ra lʼaqtac ra ỹalaxaguet ñi Dios ʼenauac ra lquiyaqteỹaxac.

So Pueblo ye Judá mashe qoỹoqtegue ra saishet ra ỹoʼot na Pascua. Qalaxaye so Josías itaxaỹaxatac na namaxasoxonaxac ra iuen ra qaỹoʼot na Pascua ʼenauac na viʼiyel, nache ʼenapega so pueblo: «Soʼotaq ca naashaxac na Pascua yaqtoʼ taỹoʼot ñi Jehová». Lcopague so Josías ramaxasoxolec ra qaiqataxanai ca qalota nachetaqtaxanaxat taq ra huoʼo ca ʼonaxanaxaicpi netaña añi templo. Nache qaỹoʼot aso Pascua taq so ime nache huoʼo so naʼashaxac aso Nauole Qaica ca lalegue ra Ỹasheraxachigui queuoigui so siete naʼaxaʼte. Huanna qaỹoʼot reʼera chegotaʼa so Samuel ñaq ncaʼaltauec. So Josías ỹataqta ʼeesa ra ỹauotec na lamaxasoxonaxac ñi Dios. ¿Ñaq ʼam? ¿Taqaʼen arauela ra anapaxaguena ñi Jehová?