Ñi Jehová ỹamaq so Jeremías ra iaʼaxat ra lʼaqtac

Ñi Jehová lcaʼagui so Jeremías yaqtoʼ lʼaqtaxanaxanec ñi maye huaña ye ʼalhua Judá. Ỹamaxalec ra raʼaqtaxanem na shiỹaxauapi lmaʼ yeʼeye taq ʼenapega ra ỹalat na ỹoʼotaq qauem. Qalaxaye so Jeremías ỹasateguet ñi Jehová: «Aỹem ñaq nsoqolec saq saỹaten ra itaxaỹaxac». Ñi Jehová ỹachaxanapeguem: «Saishet ra ayiʼi aỹem ʼam setauan taq ʼam saʼaqtaxanem ca anasaxauec».

Ñi Jehová ʼenapega so Jeremías ra iỹaxanalo so ancianopi ye pueblo taq huaña nache ilaxachigui aca nacoʼoña ʼalhua taq qonapec: «ʼEna nache ʼenaʼam ca huaigui ye Jerusalén». Coʼollaq so Jeremías ỹoʼot seʼeso, na ancianopi ỹataqta ralemata. So ntaxaỹaxanec lʼenaxat Pasjur iuaxan so Jeremias, taq ỹanagui so nqoñetaxanaxat ʼepac iqoñerai naua lhuaq taq lchel, ỹauotaʼa saishet ra nraxan ʼenauac so pe. So lỹa naʼaq, so Pasjur isouec. Nache so Jeremías ʼenapec: «Mashe saq ñaloguet, saxañe ra saʼaxat na nʼaqtac». Qalaxaye, ¿ʼeesa ra ỹoʼot seʼeso? Saishet. So Jeremías recuennataxalec taq ʼenapec: «Na lʼaqtac ñi Jehová maye aỹem netaiguilo ỹeʼeguelaxa ra ʼeetaʼam ca norec. Saishet ra saxanec ra saʼaxat na nʼaqtac». So Jeremías quetaʼ ra iaʼaqtaxanem so shiỹaxauapi.

Lcopague soua viʼiyel, huoʼo so ralaxaic ntaʼa ramaxasoxon ye Judá. So ntaxaỹaxanecpi taq so saq ʼeesa nʼaqtaxanaxanecpi ỹataqta nquiʼa na iaʼaxattac so Jeremías. Ỹoqoʼoye ʼenapega so nataxalapi: «ʼEra ỹale iuen ra qaỹalauat». So Jeremías ʼenapec: «Aỹem qaica ca ỹasouaxashet. Aỹem saʼaxat na aỹem ỹamaxalec ñi Jehová ra saʼaxat saishet na maiche shetapeguec». Coʼollaq so nataxalapi huaxaỹa reʼera, nache ʼenapec: «Neʼena ỹale saishet iuen taxa ra qaỹalauat».

So Jeremías quetaʼ ra iaʼaxattac, qalaxaye nagui so nataxalapi ỹataqta ralemata nache qaỹaxanot so ntaʼa ra qaỹalauat. So ntaʼa ʼenapega so mayepi, ra maiche ỹoʼot ca ʼeetapeguec. Nache qaỹaconeuaʼa so maye taq qaỹasaxangui aso nshere nlaqchigui na nshaxa yaqtoʼ huangui ra ileu. So Jeremías lhuotañi so nshaxa.

So Ébed-Mélec, maye lamaxashec so ntaʼa, ʼenapega: «So nataxalapi ỹasaxangui so Jeremías aso nshere. Ra nache huetangui ishet ra ileu». So ntaʼa ỹamaq so Ébed-Mélec taq so 30 ỹalleppi yaqtoʼ nqatsheguem so maye. So Jeremías quetaʼ ra iaʼaqtaxanem so shiỹaxauapi naicʼtaxa huoʼo ra nqalanaxac. ¿ʼEesa ra auotaique qonaʼam so maye?