Ye Jerusalén qanlaxajñe

So pueblo ye Judá qalota ra caʼai ñi Jehová taq ỹioʼoxoren na dios saq ʼeesa. Queuogui seʼeso viʼiyel, ñi Jehová huotaique itauan so mayepi ra ỹamaxa na qalota lʼaqtaxanaxanecpi. Qalaxaye so shiỹaxauapi saishet ra ỹalaxaguet taq isheuen so mayepi. Ñi Jehová huotaique ra so mayepi ỹalat ra ỹioʼoxoren na dios saq ʼeesa. ¿ʼEetec ra ỹoʼot?

So ntaʼa ye Babilonia, Nabucodonosor, mashe ỹacona na qalota nacionpi. So huaʼauchiguiñe ra ỹacona ye Jerusalén nache loxonec so ntaʼa Joaquín, so nataxalapi, so alleppi taq so artesanopi nache qaỹauega ye Babilonia. Taqaʼen ỹacona ʼenauac so nogoxoshetpi ʼamaqtaqaicpi netaigui aso ntemplo ñi Jehová. Lcopague so Nabucodonosor ỹoʼot ra so Sedequías ntaʼa ye Judá.

So huaʼauchiguiñe, so ntaʼa Sedequías ỹalaxaguet naxa so Nabucodonosor. Qalaxaye so nʼaqtaxanaxanecpi saq ʼeesa taq so ʼalhuapi lauoreua qoỹetega so Sedequías ra mpaguene ye Babilonia. So Jeremías ʼenapega: «ʼAm ra ampaguene nache huoʼo ca nleuaxa, nqouaxa taq nalolaxapi huaña na Judá».

Lcopague soua ocho viʼiyel, so ntaʼa Sedequías mpaguene ye Babilonia ỹoqoʼoye ỹaxanot ra ntaunaxanaxac so alleppi ye Egipto. Nache so Nabucodonosor ỹamaq so lalamaxat nalleppi ra iloquiaxan ye Jerusalén. So mayepi naña so naloteuga ra nauatalec ye ciudad. So Jeremías ʼenapega so Sedequías: «Ñi Jehová ʼenapec ra, anañanot na babiloniopi, ʼam taq na ciudad nqaʼalec qome. Qalaxaye, ra saishet ra anañan so mayepi ỹavigaxat ye Jerusalén taq ʼam qaỹache ra qaicoñerai». So Sedequías ỹasateguet: «¡Aỹem saishet ra ñañan!».

Coʼollaq lcopague ʼoonolec viʼi taq soua seis qagoxoica, so babiloniopi itagoxotec so laỹi lpaqtaxanaxat ye Jerusalén. Huaña yeʼeye llegueuec ra pauo ra ỹavigaxat ye ciudad taq aso templo. Qaỹalauat so qalota shiỹaxauapi taq qaỹache so qalota ra qaiqoñerai.

So Sedequías rataueguesop ye Jerusalén qalaxaye so babiloniopi icaalec nache qaiviʼi ye saqaỹapeque ye Jericó, taq qaỹauegueuaʼa so ntaʼa Nabucodonosor. So ntaʼa ỹauotaʼa so Sedequías ỹauachigui ra qaỹalauat so llalacpi. Nache qanqaʼt naua laʼaiʼte taq qaiqoñerai. Huaña yeʼeye nache ileu so Sedequías. Qalaxaye ñi Jehová ichaxanapeguem so pueblo ye Judá: «Lcopague qom iviʼi soua 70 viʼiyel, qamiʼ shiguelaxatalo ye maiche qarmaye ye Jerusalén».

¿Négueʼt ca huaigui so nsoxoppi qaỹauega ye Babilonia? ¿Queta ỹioʼoxoretac ñi Jehová?