Soua cuatro nsoxoppi ỹalaxaguet ñi Jehová

So Nabucodonosor ỹache ñalaqpi maye chegoxoguet so ntaʼalpi ye Judá ra ỹauega ye Babilonia. Nache ỹamaxalec ra ilogue so roʼonataxategueua ye lmaʼ lʼenaxat Aspenaz. Taqaʼen ỹamaxalec so maye ra nmitaique ca nsoxoppi nalochiguiñi ra lataxac taq ỹajnaxanaxaic. Queʼeca nsoxoppi iuen ra qaỹapaxaguen queuoigui tres viʼiyel yaqtoʼ huoʼo ca lʼonataxanaxac ʼamaqtaqaic ye Babilonia. Iuen ra napaxaguena ra ltaxaỹaxanaxac, ra leraxanaxac taq ra remalligui na maiche lʼaqtac ye Babilonia. Taqaʼen iuen ra chec na nallec maye qoỹataʼam so ntaʼa. Cuatro seʼesopi nsoxoppi lʼenaxat Daniel, Hananías, Misael taq Azarías. Qalaxaye so Aspenaz ỹanagui na lʼenaxat na babiloniopi: Beltsasar, Sadrac, Mesac taq Abednego. ¿Apetaʼa ra seʼeso qaỹapaxaguenec ishet ra nqaʼen ỹalat ñi Jehová?

Neʼenaua cuatro nsoxoppi huotaique ỹalaxaguet ñi Jehová. So mayepi ỹaỹaten ra huoʼo na cheqtac so babiloniopi saỹaỹamaxaren ñi Jehová ỹoqoʼoye saq nashenguet. Nache qaỹaxanot so Aspenaz: «Ishet petaʼa ra saishet qomiʼ auamaxaleguete ra sacheguenac na nallec maye qoỹataʼam so ntaʼa». Qalaxaye so Aspenaz ʼenapec: «Ra saishet ra qauquiʼi taq ca ntaʼa ra qamiʼ ỹalletaʼa ra qaica ca qarañaxaqui, nache aỹem ỹalauat».

So Daniel huoʼo so lcuennataxac nache ʼenapega so maye: «Ishet petaʼa ra qomiʼ auanem ndotec na verdurapi, legumbrepi taq ʼetaxat queguoigui caua 10 naʼaxaʼte. Taq lcopague analoqneguet ca laỹi nsoxoppi maye cheqtac ʼenaʼam na aloq so ntaʼa». Nache so maye ỹaỹamaxareta reʼera.

Qaq coʼollaq iviric soua 10 naʼaxaʼte so Daniel taq soua tres nauochaxauʼ soua maye ʼonaxaiqa taq sansatteʼ saishet ra ʼenaʼam soua laỹipi nsoxoppi. Ñi Jehová ỹataqta ỹaỹamaxarete soua maye chaʼaye ỹalaxaguet. Taqaʼen ỹanem so Daniel ra laỹajnec ra ỹaỹateʼeteguet ra naigui na visionpi taq nchoxonaxacpi.

Coʼollaq iviric soua tres viʼiyel nache so Aspenaz ỹauegueuaʼa so Nabucodonosor. So ntaʼa retaxaỹapegueto soua maye taq nanomtaʼa ra so Daniel, Hananías, Misael taq Azarías ỹactec ra laỹajnec saq ʼenaʼam so laỹipi nsoxoppi. Nache lcauaʼa yaqtoʼ roʼonataxanot so maye. Lcopague so ntaʼa ỹaxanot ra qaitauan taq qaỹanem nqataxacpi. Ñi Jehová ỹanem soua maye ỹactec naỹajnec napaqalec so laỹipi maye roʼonataxatecot so ntaʼa.

So Daniel, Hananías, Misael taq Azarías saishet ra huetaʼa ye maiche lmaʼ, qalaxaye saxaỹet ntoueʼetac ra ỹalectaigui so npueblo ñi Jehová. ¿Ñaq ʼam? Ra saishet ra aualectaguet caua artaʼal, ¿taqaʼen saxaỹet antoueʼetac ñi Jehová?