So nʼaqtacpi qaỹerelec so pared

Lcopague so Belsasar ralaxaic ntaʼa ye Babilonia. Huoʼo so pe ỹoʼot so ltaʼaraic lquiaʼaxac taq icoyeguen so mil ʼamaqtaqaicpi yeʼeye ʼalhua. Ramaxasoxoneuga ra qandouo aso ỹomaxaquipi oro coʼollaxa so Nabucodonosor ỹachegoxotaʼa aso ntemplo ñi Jehová. So Belsasar taq so shiỹaxauapi rogoxona aso ỹomaxaquipi taq ỹioʼoxoretac soua maiche lalamaxat diospi. Nache huaña so nquiaqa yoʼoq so lhuaq so ỹale nache chigoqchiguiña ra ỹerelec so pared so nʼaqtacpi saq qaỹaỹateʼeteguet.

So Belsasar ỹataqta ñiʼi. Iỹaxaneuga so magopi taq ỹan ra lʼaqtac: «Ca ishet ra aỹem raʼaqtaxanem ca naigui nache soʼot ra tercer shiỹaxaua ʼamaqtaqaic na Babilonia». Qalaxaye ʼenauac so mayepi qaica ca ishet ra ỹañoxot ra iaʼaxat ca naigui. Nache nvireuo aso nateʼe taq ʼenapec: «Huoʼo ca ỹale lʼenaxat Daniel, maye coʼollaq iaʼaxatem na naigui so lchoxonacpi so Nabucodonosor. Ca maye ishet ra ʼam raʼaqtaxanem ca naigui neʼena nʼaqtacpi.

So Daniel tauaʼa so ntaʼa. Qaq coʼollaq nvireuo, so Belsasar ʼenapec: «Ra ishet ataxaỹaxan taq auaxat ca naigui neʼena nʼaqtacpi nache ʼam sanem ca nqolac oro taq soʼot ra ʼam tercer shiỹaxaua ʼamaqtaqaic na Babilonia». So Daniel ỹasateguet: «ʼAm huetoʼot ca auotaique ra ñeme. Qalaxaye ʼam saʼaqtaxanem ca naigui neʼena nʼaqtaqa. So artaʼa Nabucodonosor so maye ñoxonaxaic qaq ñi Jehová ỹapaxaguenec ra huesota. Ñaq ʼam mashe auaỹaten ʼenauac so huagui coʼollaxa qalaxaye naicʼtaxa reʼera saishet ra auoʼo ra ʼenec ñi Jehová. Auogoxona aso ỹomaxaquipi oro lalamaxatpi añi templo, ra añomgui na lataxa. Ỹoqoʼoye ñi Dios ilyiñe naua nʼaqtaqa: MENÉ, MENÉ, TEQUEL taq PARSÍN. Reʼera naigui na medopi taq persapi ỹaqona na Babilonia taq ʼam saishet ra ntaʼa».

Qaica ca petaʼa ishet ra ỹañoxot ye Babilonia. Ye ciudad ỹataqta npaqtaxalguete so ltaʼaraic lpataxanaxacpi taq so tala qaỹoqochiguiñi. Qaq seʼeso pe so medopi taq persapi ỹaqona ye Babilonia. So Ciro, ntaʼa persa, ỹashaxanec so tala yaqtoʼ so alleppi ishet ra ivirataʼa soua lasom ye ciudad. Qaq coʼollaq ivirataʼa, ¡soua lasom nauatauec! So alleppi ỹalauat so ntaʼa taq ỹaqona ye ciudad. Nagui so Ciro ralaxaic ntaʼa ye Babilonia.

So huaʼauchiguiñe viʼiye ra lʼonataxanaxac so Ciro ʼenapec: «Ñi Jehová aỹem iaʼaxatem ra saỹamaxajñe aca templo huaña ye Jerusalén. Ca judiopi huotaique retaunaxan nache iuen ra jec». Ỹoqoʼoye qalota so iguelaxa ye lmaʼ lcopaʼague soua 70 viʼiyel coʼollaq qanlaxajñe ye Jerusalén. Nache reʼera ipacchigui so ỹachaxanapec ñi Jehová. Taqaʼen so Ciro iguelaxat so ñomaxaquipi na oro taq plata taq so laỹipi coʼollaq so Nabucodonosor ỹachegotaʼa aso templo. ¿Alaʼa ʼeetec ñi Jehová rogoxona so Ciro yaqtoʼ itauan so npueblo?