So nchoxonaxac souaxat aso loxorai qoipac

Huoʼo so pe, so Nabucodonosor huoʼo so lchoxonaxac ra ỹataqta ñiʼiỹa. Nache iỹaxana so ỹajnaxanaxaicpi yaqtoʼ qaỹaqtaxanem ca naigui so lchoxonaxac, qalaxaye so mayepi saishet ra ỹañoxot ra iaʼaqtaxanem ca naigui. Qaq pateʼec nache so ntaʼa remalle so Daniel.

So Nabucodonosor ʼenapega so Daniel: «So ichoxonaxac selaʼa aso qoipac ñaxatec nache iviraʼa ra ỹataqta laterai iviroʼot na piguem. Nache ishet ra qailaʼa ca ỹataqta qaỹoqtaʼa ana ʼalhua. Ana lauepi aso maye ỹataqta ʼonaxaic taq qalota na frutapi. Na animalpi huetoʼot lpaqal taq na qoỹopi ỹanagui na lpataʼcpi ana lcouepi aso maye. Lcopague so ʼoonolec ángel chegoqoʼot na piguem, naxanec ra retaqa: ‹¡Qauchiquiiuec ara qoipac taq qanqache ana lauepi! Qalaxaye ara lamo taq na lpaʼaʼpi qanoʼonaxachiñi. Taq qoỹanagui ca ncoñetaxanaxat lcat hierro taq cobre. Aca qoipac ncochen. Ra lquiyaqteỹaxac taq ra lcuennataxac ca shiỹaxaua nqochen nache iguelaxa ra ʼeetaʼam ca animal. Taq iviraxatec caua siete viʼiye. ʼEnauac ỹaỹaten ra ñi Dios nacheñi ñi Ramaxasoxon taq ñi maye ishet ra ỹanem ca nʼonataxanaxac qamachaqca lcaʼaua›».

Ñi Jehová iaʼaqtaxanem so Daniel ca naigui seʼeso nchoxonaxac. Coʼollaq so Daniel ỹaỹateeteguet seʼeso nchoxonaxac nache ỹataqta ñiʼi. ʼEnapec: «ʼAm ntaʼa ñaqtalec ʼenauac na ampaxaguenaxauapi neʼena nchoxonaxac qalaxaye nache ʼam huaʼagui reʼera. Aso loxorai qoipac maye qaicheguec qalaq nache ʼam. Qanqatec ca aronataxanaxac taq qollectac ana huoue qohuetaña na campo qonetaʼam na animal. Qalaxaye so ángel ʼenapec ra qanonaxatañi aca lamo taq na lpaʼaʼpi. Reʼera naigui ra qomchiye ʼam qaiguelaxatem ra ntaʼa».

Lcopague ʼoonolec viʼi, so Nabucodonosor qolegueteguele na pasheguem so lmaʼ ltaʼaraic taq imetetac ye Babilonia. So maye ʼenapec: «¡Na ciudad maye ỹoʼonataq ỹataqta ʼamaqtaqaic! ¡Ỹachaxan ra ỹamaqchec!». Qaq coʼollaq ñaq retaqtac, nache so navilliaxac chemqot na piguem: «¡Nabucodonosor! Ra aronataxanaxac mashe saishet ra aralamaxat».

Huaña nache so Nabucodonosor huoʼo ra aloic ʼenaʼam ra lataxac na animal. Nache qaiỹorauec ye lmaʼ ltaʼaraic, taq ỹalectaigui na animalpi. Huaña nache ñaxat na laue ʼeetaʼam na laue na águila, taq naua nnaʼache ʼeetaʼam naua nnaʼache na maỹopi.

Lcopague soua siete viʼiye, so Nabucodonosor iguelaxa ra ʼonaxaic na lataxac taq ñi Jehová iguelaxatem ra ỹoltaxa ntaʼa ye Babilonia. Nache so Nabucodonosor ʼenapec: «Shoxoren ñi Jehová Ntaʼa na piguem. Ñi maye ishet ra ỹoʼot ra qaica ca ʼenec naqaʼen nam ʼeetega ʼamaqtaqaicpi. Nagui saỹaten ra ñi Jehová nacheñi ñi Ramaxasoxon taq ñi maye ishet ra ỹanem ca nʼonataxanaxac qamachaqca lcaʼaua».