Ca Nʼonataxanaxac chochaq tateec

Huoʼo so pe, so ntaʼa Nabucodonosor huoʼo so lchoxonaxac ỹoxosaʼa. Qaq souaxat reʼera ỹaguec ra lachetataic taq saishet ra roʼoche. Nache ramaxasoxoneuga ʼenauac na magopi taq ʼenapega: «Aỹem qauaxachem ca naigui so ichoxonaxac». So mayepi ʼenapega: «ʼAm ntaʼa, qomiʼ auaqtaxanem négueʼt so auchoxotega». Qalaxaye so Nabucodonosor ʼenapec: «¡Saishet! Aỹem qauactaxañim so ichoxonaxac. Ra saishet ra qauaxachi nache qamiʼ salauat». So mayepi ỹoltaxa ʼenapec: «Qomiʼ auaqtaxanem so archoxonaxac taq lcopague ʼam saʼaqtaxanaxam ca naigui». So maye ỹasateguet: «Qamiʼ huotaique aỹem qauatenache. ¡Aỹem qauactaxañim so ichoxonaxac!». So mayepi ỹasateguet: «Ana ʼalhua qaica ca ishet ra ʼam iaʼaxatem so auchoxotega, neʼena saishet ra qaỹañoxot».

So Nabucodonosor ỹataqta ralemata nache ramaxasoxolec ra qaỹalauat ʼenauac na ỹajnaxanaxaicpi huetaʼa ye país. Taqaʼen ỹalectauo so Daniel, Sadrac, Mesac taq Abednego. Qalaxaye so Daniel ỹaxanot ca lraqa so ntaʼa. Nache so maye taq soua nauochaxauʼ natamenot ñi Jehová yaqtoʼ itauan. ¿Négueʼt ca ỹoʼot ñi Jehová?

Ñi Jehová ỹachaxana so Daniel so lchoxonaxac so Nabucodonosor, ỹauotaʼa so visión taq iaʼaxatem so naigui. So lỹa naʼaq so Daniel nqoneuaʼa so lamaxashec so ntaʼa taq ʼenapega: «Saishet ra qaualauachi ʼenauac na ỹajnaxanaxaicpi. Aỹem ishet ra saqtaxanem ʼenauac ra naigui so lchoxonaxac». So namaxashec ỹauegueuaʼa so Daniel ra remalle so ntaʼa Nabucodonosor. So Daniel ʼenapega so ntaʼa: «Ñi Dios ʼam ỹachaxana ca qomchiye. ʼEna na archoxonaxac: Alaʼa so ltaʼaraic nenaqtac na lqaic imauec na oro, na ltogue taq naua lhuaʼq na lcat plata, qaq na daʼam taq naua lteltaye ʼenauac ra cobre, naua lchel ʼenauac hierro qaq naua lapiaʼate hierro taq ỹaleguet na nshaxa. Lcopague so coma chegoqotcheguema aso qasoxonaxa tachiguilo naua lapiaʼate seʼeso nenaqtac taq ilaxachigui. Seʼeso nenaqtac rolachigui nache ndaʼat lsoche nache na laʼat ỹaỹonaqchet na lviʼ. Aso coma ñigui ra lateʼerai qasoxonaxa imattalec ʼenauac ana ʼalhua».

Lcopague so Daniel ʼenapega: «So archoxonaxac ʼeeta: ra aronataxanaxac maye ʼam nqaic ndaʼat na oro. Qaq na plata nʼonataxanaxac qom ime reʼera aronataxanaxac. Na lcat cobre naigui ca lỹa nʼonataxanaxac ca maye ilogue qome ʼenauac ana ʼalhua. Anac ca lỹa nʼonataxanaxac maye ỹataqta añaxaic ʼeetaʼam na lcat hierro. Qaq pateʼec huoʼo ca nʼonataxanaxac qolaxagui ra huoʼo na huaña na laʼañaxac na lcat hierro taq ỹaleguet ʼeetaʼam na nshaxa sa daʼañi. Qaq so coma ñigui aso qasoxonaxa, naigui ra lʼonataxanaxac ñi Dios, ca maye nlaxajñe ʼenauac na laỹipi nʼonataxanaxacpi taq ca maye chochaq tateec».

So Nabucodonosor ỹaʼaroto naua l-llectel so Daniel taq nqollemñi taq ʼenapega: «Ñi anatamnaxala Dios ʼam ỹachaxana so nchoxonaxac. Qaica ca lỹa dios ʼenaʼam ñi maye». Nache so ntaʼa saishet ra ỹalauat so Daniel, ndaʼa ra ỹanem ra nataxala ʼenauac so ỹajnaxanaxaicpi taq ra ilogue so ʼoonolec provincia ye Babilonia. ¿Alaʼa ʼeetec ñi Jehová ỹasateguet so natamnaxac so Daniel?