PAXAGUENAXAT 12
¿Négueʼt ca ʼam itauan yaqtoʼ queta ra ʼanapaxagueetega aye la Biblia?
Ra paxaguenaxac aye la Biblia enaʼam ca ʼonaxaic ñiquiaxac. Qalaxaye reʼera saishet ra saq alaq. Huoʼo ye huaña petaʼa ʼannajlaʼt ra ishet ra queta ra ʼanapaxagueetega ana la Biblia. Qalaq, ¿táʼaencoʼ ra huoʼo ra naigui ra ʼanʼañaxat? ¿Négueʼt ca ʼam itauan ra qoqueta naiʼctaxa ra huoʼo ra nqalanaxacpi?
1. ¿Táʼaenco raʼ huoʼo ra naigui ra ñapaxaguenaxa aye la Biblia?
Ra lʼaqtac ñi Dios «huoʼo da laʼañaxac qataq ncaʼaltauec» (Hebreos 4:12). Aye la Biblia huoʼo ra lyac, chaʼaye huetalec na lhuennataxacpi ñi Dios qataq na nanomaxapi souaxat ʼam. Saishet ra ndotec ra ỹoʼot ra nquictashiguem ra ʼarauattonaxanaxac, taqaʼen ʼam itauan ra noʼon ca ʼalcauaʼa qataq ra huoʼo ra ʼanaquitaxac ca qomchiye. Qaq ra ỹactec huoʼo ra naigui ra aye la Biblia ʼam itauan ra ʼaviraʼa ra ʼanauochaxaua ñi Jehová. Ra ʼanapaxaguena nache ʼauasheetec ra laʼañaxac anamaye ỹataqta ʼam itauan ra ʼarmariaxac.
2. ¿Táʼaencoʼ ra ỹataqta ʼamaqtaqaic ra saỹatenaq ra naigui na ʼeesa huetalec aye la Biblia?
Na ʼeesa huetalec aye la Biblia enaʼam ca tesoro ỹataqta ltaʼaraic ra lyac. Ỹoqoʼoye qomiʼ iỹaxanalo: «ʼAnmitaique qome da ʼeesa lataxac, […] ¡qalaxaye saishet qome daʼaumen!» (Proverbios 23:23). Ra secuennataxanaxa ra ỹataqta huoʼo ra lyac na ʼeesa huetalec aye la Biblia, ñaʼañaxataq ra queta ra ñapaxaguenaqtega naiʼctaxa ra huoʼo ca qanqalanaxacpi (ʼautaxaỹaxan Proverbios 2:4, 5).
3. ¿Négueʼt ca ʼam ỹanem ñi Jehová yaqtoʼ queta ra ʼanapaxagueetac?
Ñi Jehová Lʼonatacna qaica ca Ỹaqalanapec qataq ʼanauochaxaua, ỹataqta ʼam ỹauatton qataq huotaique ra ʼam itauan yaqtoʼ queta ra ʼauauatton ñimaye. Ñi Dios ishet ra ʼam ỹanem «ca nyaxa qataq ca nʼañaxac yaqtoʼ ʼauʼot» (ʼautaxaỹaxan Filipenses 2:13, NWT). Ỹoqoʼoye, ra huoʼo ca huaña ra ʼauen ca ʼarʼañaxac yaqtoʼ ʼanapaxaguen qoʼ ra ʼaualaxaguet na ʼanapaxagueetega, ñimaye ʼam itauan. Ñimaye ʼam ỹanem ca nʼañaxac yaqtoʼ ʼanapacalec ca nqalanaxac qoʼ ca nqanaguec. Saxaỹet ʼaquiguiỹot ñi Jehová ra ʼam itauan yaqtoʼ queta ra ʼanapaxagueetega aye la Biblia (1 Tesalonicenses 5:17).
ÑIMITAQ RA PAXAGUENAXAT
Semetenaq négueʼt ca ishet ra ʼauʼot yaqtoʼ queta ra ʼanapaxagueetega aye la Biblia naiʼctaxa ra ỹataqta ʼamelat qoʼ ra huoʼo ca laỹipi ʼam naxateguet. Qaq ime semetenaq négueʼt ca ỹoʼot ñi Jehová yaqtoʼ ʼam itauan ra queta ra ʼanapaxaguetac.
4. Huoʼo ra naigui ʼanqaʼen ra ʼanapaxaguena aye la Biblia
Huoʼo ye huaña ỹaguec na soʼotaq, ỹoqoʼoye qalaqaic ra soʼotaq ca qalraqaʼ yaqtoʼ ñapaxaguenaxa aye la Biblia. ¿Négueʼt ca ishet ra soʼotaq? Qautaxaỹaxañi Filipenses 1:10 qataq qaumalligui neʼena:
ʼEetec ca ʼarcuennataxac, ¿négueʼt ca «ỹataqta noʼon»?
¿Négueʼt ca ishet ra ʼauʼot yaqtoʼ ʼauauaxañi na ʼanapaxaguenaxac aye la Biblia?
Ra ʼacoringui na arena ca arena laỹi, ime nache ʼauachangui ca comaʼpi, ca comaʼpi qaica ca lmaʼ.
Qalaxaye ra ʼauauaxañi so comaʼpi, nache ʼenauac so arena naloqchigui so laỹi. ʼEnaʼam ra ʼauauaxañi nam «ỹataqta noʼon», nache ishet ra ʼapaquejlec qataq taqaʼen huoʼo ca ʼalraqaʼ ra ʼauʼot ca huotaique ra ʼauʼot.
Seuenaq ñi Dios, qaq ra ñapaxaguenaxa aye la Biblia nache npaxajlec ra qarhuenaxanaxa ra sauattonaq ñi Dios qataq shiʼoxorenaq. Qautaxaỹaxañi Mateo 5:3 [TBSNT], qataq qaumalligui neʼena:
Ra sauaxanaxañi ra paxaguenaxat aye la Biblia, ¿négueʼt ca saconaxaguet?
5. Queta ra ʼanapaxagueetac naiʼctaxa ra huoʼo ca ʼancanaguec
Huoʼo ye huaña petaʼa ca laỹipi huotaique ra ʼanañaxañi ra ʼanapaxagueetega aye la Biblia. ʼAmeten so naloqnaxanaxat Francesco. Qaumichiñi na VIDEO qataq qaumalligui neʼena:
¿ʼEetec ra nanomaxa so lauoʼ lʼecpi qataq nauochaxauapi so Francesco so daʼaqtaxanem ra napaxagueetac?
¿Táʼaencoʼ ra huoʼo ra naigui ra saishet ra nañaxañi somaye?
Qautaxaỹaxañi 2 Timoteo 2:24, 25 qataq qaumalligui neʼena:
¿ʼEetec ra lcuennataxac na ʼarhuo lʼecpi qataq na ʼanauochaxauapi na ʼanapaxagueetega?
Souaxat neʼenaua versículos, ¿négueʼt ca iuen ra ʼauʼot ra huoʼo ca saq lauela ra ʼanapaxaguena aye la Biblia? ¿Táʼaencoʼ?
6. ʼAupiʼiỹaʼa ra ñi Jehová ʼam itauan
Ra queta ra saʼañaqchetaq ra qanauochaxac ñi Dios, nache nquictauec ra huoʼo ca qaryaxa ra ñaqaʼenaq machiguiñe. Qalaxaye, petaʼa huoʼo ca huaña qalaqaic ra ñaralaxataq ra qarataxac yaqtoʼ salaxasoxoguet na lamasoxonaxacpi. Ra huoʼo ca huaña nachi ʼeetec ra ʼananomaxa, saishet ra ʼanasamñi, chaʼaye ñi Jehová ʼam itauan. Qaumichiñi na VIDEO qataq qaumalligui neʼena:
Souaxat so video, ¿négueʼt so iuen ra naralaxat so Jim yaqtoʼ ñi Jehová ỹaỹamaxareeta?
Ra nʼaqtaguec somaye, ¿négueʼt ca ỹactec ra ʼauʼaalac?
Qautaxaỹaxañi Hebreos 11:6 qataq qaumalligui neʼena:
¿Négueʼt ca ỹanem ñi Jehová nam nʼañaxat ra ỹauatton qataq ra ỹaỹamaxareeta ñi maye?
Souaxat ye texto, ¿lauela ñi Jehová ra ilaʼa ra ʼanʼañaxat ra ʼanapaxaguena aye la Biblia? ¿Táʼaencoʼ ra ʼauʼamaqten ra ajá?
HUOʼO NA RENATAXAN RA: «ʼAm, ¿táʼaencoʼ ra ʼanapaxagueetega aye la Biblia?».
¿ʼEetec ca ʼarasataxac?
NA ʼAMAQTAQAIC
Naiʼctaxa sa ishet ra saq alaq ra ʼanapaxaguena aye la Biblia, reʼera ʼam itauan ra ʼantonatan ca ʼancaʼalaxa chochaq tatec. Ra queta ra ʼaupiʼiỹaʼa ñi Jehová, ñi maye ʼam ỹanem ca ʼanshiitenaguec.
ʼAntoueetaʼac
¿Táʼaencoʼ ra ʼauʼot ra naigui na ʼeesa huetalec aye la Biblia?
Ime ra ʼauaỹaten «cam ỹataqta noʼon», ¿négueʼt ca iuen ra ʼauʼot?
¿Táʼaencoʼ ra iuen ra ʼaquiguiỹot ñi Jehová ra ʼam itauan yaqtoʼ queta ra ʼanapaxagueetega aye la Biblia?
ʼAUANATA CA LỸA
ʼAmeten caua cuatro lataxaco itauaatac na shiỹaxauapi ra naloqchiiñe ye lraqaʼ.
«ʼEetec ishet ra qanaloqchiiñe ca nraqaʼ» (¡Despertad!, febrero de 2014)
Aso ʼalo huotaique ra ñi Dios ỹaỹamaxareeta, qalaxaye so lhua saishet ra ỹaỹatenguet na ỹoʼot asomaye yaqtoʼ ỹañoxot reʼera. ʼAmeten ʼeetec ñi Jehová itauan.
Ñi Jehová qomiʼ ỹanem ra nʼañaxac yaqtoʼ ñaʼañaxataxaguet na nqalanaxacpi (5:05)
ʼAmeten ʼeetec ra lʼañaxataxac aso ʼalo itauan so lhua.
Huoʼo ye huaña qanmaxalec na testigopi de Jehová ra ilaxachigui na nhuoʼ lʼecpi. Qalaxaye, ¿ʼeesa reʼera?