ʼAuachaxan ra ʼauʼot ra naigui so ỹoʼot ñi Jehová qataq Jesús souaxat ʼam

¿ʼEetec ca ʼarquiyaqteỹaxac ra ca ʼanauochaxaua ʼam ỹanem ca ʼonaxaic lachetaqtaxanaxat? Yoqta ra ỹataqta ʼauamaqchiguiñi, qataq huotaique ra ʼauachaxana so nauochaxaua ra ỹataqta auʼot ra naigui so lachetaqtaxanaxat. Ñi Jehová qataq Jesús qomiʼ ỹanem so nachetaqtaxanaxat qaica ca ʼenaʼam ra saconaxaguet: aso lashiue ra lcaʼalaxa. Semetenaq ʼeetec ishet ra sachaxanaq ra qanaʼachec.

1. ¿Négueʼt ca ʼoonolec lataxac ra sachaxanaq ra soʼotaq ra naigui so ỹoʼot ñi Dios qataq Cristo souaxat qomiʼ?

Ana la Biblia ỹachaxanapec ra «nam ỹaʼamaqten namaye» (naigui so Jesús) ishet ra huoʼo ca lcaʼalaxa chochaq tateec (Juan 3:16). ¿ʼEetec ra soʼotaq reʼera? Seuenaq ra sachaxanaq ra qarpiʼiỹaxac ʼenauac na llecaʼaxagui qataq camachaqca soʼotaqpi (Santiago 2:17). Ra na soʼotaq qataq ca ñasaxasoxouec ỹachaxan ra huoʼo ra qarpiʼiỹaxac nache saʼañaqchetaq ra qanauochaxac ñi Jesús qataq ñi Ltaʼa, Jehová (ʼautaxaỹaxan Juan 14:21).

2. ¿Négueʼt ca naponaxac ltaʼaraic ishet ra sachaxanaq ra qanʼachiquiaxac ñi Jehová taq Jesús?

So pe yaqtaʼa ra ileu, so Jesús ʼenapegalo soua lapaxaguenataqa ca lỹa lataxac ishet ra ỹoʼot ra ỹachaxan ra nʼachiquiaxac souaxat ra l-leuaxa somaye. Ỹoʼot qataq iʼoxon so ʼamaqtaqaic naponaxac ra aye la Biblia ỹamataʼac «da nquiʼaxac [...] so Qarataxalaʼ», qataq taqaʼen qaỹamataʼac ra Qaicuennate ra l-leuaxa so Cristo (1 Corintios 11:20). So Jesús lapaxañi reʼera yaqtoʼ soua lapaxaguenataqa—qataq huaiye nache ʼenauac na ʼeesa cristianopi—icuennate ra l-leuaxa somaye ra ỹan ra nachaalataxac souaxat na shiỹaxauapi. Nateeteguet neʼena naponaxac, so Jesús ỹan ra namaxasoxonaxac: «Qaq qauoʼocheetacoʼ qome damaye, yaqtoʼ saishet da Aỹem qaucoviỹaʼai» (Lucas 22:19). Ra ʼaualectauaʼa ra Qaicuennate, ʼam ishet ra ʼauachaxan ra ʼauauoʼo ra naigui ra ltaʼaraic lsoxoyec ñi Jehová taq ñi Jesús qomiʼ ỹachaxanalo.

ÑIMITAQ RA PAXAGUENAXAT

3. ¿Négueʼt ca ishet ra soʼotaq yaqtoʼ sachaxanaq ra qanʼachiquiaxac?

ʼAcuennataxana ra huoʼo ca ʼam ncaʼalaxateguesop. ¿Pasaʼaguet ra ʼaucouaʼai so ỹoʼot seʼeso shiỹaxaua? ¿Qoʼ ʼanmittaique camachaqca lataxac yaqtoʼ ʼauachaxana ra ʼanʼachiquiaxac?

Souaxat ñi Jehová huoʼo ra qanachaalataxac. Qautaxaỹaxañi 1 Juan 4:8-10 qataq qaumalligui neʼena:

• ¿Táʼaencoʼ so nʼañanaxac so Jesús nachetaqtaxanaxat ʼamaqtaqaic?

• Ra ʼacuennate so ỹoʼot ñi Jehová qataq so Llalec souaxat ʼam, ¿ʼeetec ca ʼarquiyaqteỹaxac?

¿ʼEetec ishet ra sachaxanaq ra sauoqoʼo ra naigui so ỹoʼot ñi Jehová qataq Jesús souaxat qomiʼ? Qautaxaỹaxañi 2 Corintios 5:15 qataq taqaʼen 1 Juan 4:11 taq 5:3. Ime ra qautaxaỹaxañi ñi ʼoonolec versículo, nache qaumalligui neʼena:

• ¿ʼEetec ishet ra sachaxanaq ra qanʼachiquiaxac?

4. Sheʼenaxataq so Jesús

Ca lỹa soʼotaq yaqtoʼ sachaxanaq ra qanʼachiquiaxac nachera ra sheʼenaxataq so Jesús. Qautaxaỹaxañi 1 Pedro 2:21 [TBSNT], qataq qaumalligui neʼena:

• ¿Négueʼt ca ỹottaʼaʼt ʼauʼotpi yaqtoʼ ishet ra itchiguiñi ra qoquelec ra lliquiaxac so Jesús?

5. Salegaqtauoʼo ra Qaicuennate ra l-leuaxa so Cristo

Yaqtoʼ qaỹaỹaten négueʼt so qaỹoʼot so huaʼauñe Nquiʼaxac so Qarataxalaʼ, qautaxaỹaxañi Lucas 22:14, 19, 20 [TBSNT]. Ime nache qaumalligui neʼena:

• ¿Négueʼt so qaỹoʼot so Nquiʼaxac so Qarataxalaʼ?

• ¿Négueʼt ca naigui aso pan qataq so lataxa? (Qaumichiñi yeua versículo 19 qataq 20).

So Jesús huotaique ra na lapaxaguenatacpi ỹoʼot ra Nquiʼaxac so Qarataxalaʼ na ʼoonolec naʼaq na viʼi, so naʼaq maye ileu somaye. Ỹoqoʼoye, na testigopi de Jehová llaponaxaʼt ʼenauac naua viʼiyel yaqtoʼ secuennataxana ra l-leuaxa so Cristo, qataq sheʼenaxataq so lataxac ra ỹoʼot somaye. Yaqtoʼ qaỹaỹaten ʼeetec ra lataxac neʼena naponaxac ʼamaqtaqaic, qaumichiñi na VIDEO. Ime nache qaumalligui neʼena:

VIDEO: Qaicuennate ra leuaxa so Cristo (1:41)

• ¿Négueʼt ca qaỹoʼot ra Qaicuennate ra l-leuaxa so Cristo?

So pan qataq so lataxa naloqnaxanqate. So pan naigui so lʼoquiaxac nalochiguiñi so Jesús maye ỹan souaxat qomiʼ. Qaq so lataxa naigui so ltagoʼq.

NA ʼAMAQTAQAIC

Sauoqoʼo ra qanʼachiquiaxac so ỹoʼot so Jesús souaxat qomiʼ ra sachaxanaq ra sepiʼiỹaqaʼa somaye qataq ra salegaqtauo ca Qaicuennate so nleuaxa.

ʼAntoueetaʼac

• ¿ʼEetec ra qaỹachaxan ra qaipiʼiỹaʼa so Jesús?

• ¿Huotaique ra ʼauachaxana ñi Jehová qataq Jesús ra ʼauauoʼo ra naigui so ỹoʼot ñiua maye souaxat ʼam? ¿ʼEetec ra ʼauotaique ʼauʼot reʼera?

• ¿Táʼaencoʼ ra ỹataqta ʼamaqtaqaic ra salegaqtauo ca Qaicuennate ra l-leuaxa so Cristo?

ʼAUANATA CA LỸA

ʼAnaxaỹaxana na qomiʼi iraxan ra soʼotaq so l-leuaxa so Cristo.

So Jesús ỹauotaʼa so lʼoquiaxac yaqtoʼ ỹiʼoxoren ñi Jehová (9:28)

Nquiguec ra ʼanapaxaguena ra npiʼiỹaxac qataq ʼeetec ishet ra qaỹachaxan.

«Sauoqoʼo ra qarpiʼiỹaxac na ỹachaxanapecpi ñi Jehová» (La Atalaya, octubre de 2016)

Aso ʼalo naralaxat so nachaalataxac souaxat ra ỹaỹateeteguet ra naigui so nʼañanaxac so Jesús. ʼAutaxaỹaxan so lliquiaxac ye nʼaqtaguec «Ñanoma ra aỹem quiʼitta, huoʼo ra naigui ra ñachaalataxac qataq huoʼo ra ilagaxayec».

«Aye la Biblia naralaxat ra achalaataxac» (La Atalaya, 1 de agosto de 2011)

ʼAmeten táʼaencoʼ ra saq amaqtac na chec aso pan taq nỹomgui so lataxa na Qaicuennate ra l-leuaxa so Cristo.

«¿Táʼaencoʼ na testigopi de Jehová npeʼenguet na laỹipi nʼamaqtenaxac ra ỹoʼot so Nquiʼaxac so Qarataxalaʼ?» (Paxaguenaxat ye jw.org)