PAXAGUENAXAT 40
¿ʼEetec ishet ra qomiʼ quiʼitta chigoqchigui ra lmejnaxanaxac ñi Dios?
ʼAcuennataxana aca nateʼe huotaxanaqtaqai maye ỹaqataxanaiʼ ca llalec yaqtoʼ tauʼa añi escuela. Asomaye yoqta imeten ra nachelta qataq ra quiʼitta caua logol. Reʼera nqaʼen noʼoita taq ỹachaxana na laỹipi lcata ra caua ltaʼal ỹoqochaʼa somaye. Ñi Jehová, maye Qartaʼa huotaxanaqtaqaic ra qomiʼ ỹauotec, taqaʼen lyaxa ra quiʼitta ra qarʼoquiaxac taq qarataxac. Ra qomiʼ quiʼitta, nache qomiʼ nʼonaxat qataq ỹachaxan ra noʼon lataxac ñi Dios.
1. ¿ʼEetec ra quiʼitta ra qarʼoquiaxac?
Ñi Jehová qomiʼ ʼenapega: «Qamiʼ ỹataqta quiʼitta qome da qadataxaqui» (1 Pedro 1:16, TBSNT). Yaqtoʼ qomiʼ quiʼitta iuen ra quiʼitta ra qarʼoquiaxac qataq qarataxac. Sachaxanaq ra quiʼitta ra qarʼoquiaxac ra saxaỹet ñachelaq qataq ra queta ñaqaʼenaq quiʼitta qataq ỹaỹamaqchiguiñi na qorogoxot, ca qarmaʼ qataq ca qannotaxalaʼ. Taqaʼen setauanaxanaq ra qaiỹo ca Laponaxaqui. Ra qomiʼ quiʼitta, ishet ra ỹoʼot ra na laỹipi ỹiʼoxoren ñi Jehová (2 Corintios 6:3, 4).
2. ¿Négueʼt ca nʼonataguecpi iuen ra sevitaqaʼaguet yaqtoʼ qomiʼ quiʼitta?
Aye la Biblia qomiʼ ỹanem ra lqataxac «sa ishit qome da huoʼo ca ishipaxanaqchit da qadʼoquiaxac qataq dam saq chaʼa qanachaalataxac ʼenauac nam ishit da deshipaxanaqtaxan» (2 Corintios 7:1, TBSNT). Ỹoqoʼoye ñaʼañaxataq ra sevitaqaʼaguet camachaqca maye naʼaqchet ra qarʼoquiaxac qataq na qarcuennataxac. Qataq ra sauoqtaique ra ñi Jehová ỹaỹamaxareeta na qarcuennataxacpi, ỹataqta ñipogoxoinaqpegueʼ ra saq ñashenaxaguet na nshepaxan ncuennataxacpi (Salmo 104:34). Taqaʼen ñaʼañaxataq ra ʼenauac na ñasaxasoxouecpi quiʼitta (ʼautaxaỹaxan Colosenses 3:8, TBSNT).
¿Négueʼt ca lỹa ishet ra nshepaxanaqchet na qarʼoquiaxac taq qarataxac? Huoʼo nam laỹipi ishet ra nshepaxanaqchet ra qarʼoquiaxac. Huaiye nache, qaỹaloqnaxana saishet ra soʼogoxonaxa na nasherec, ra ntaigui na qarap ca laue ana coca, taqaʼen saishet ra ỹapaqauec na nataʼpi qoʼ ra sasheugaq na droga. Ra sevitaqaʼaguet reʼera, nache seloxoʼogue ra qarʼoquiaxac qataq sachaxanaq ra huoʼo naq naigui ra lachetaqtaxanaxat achaalataxac. Taqaʼen yaqtoʼ ra quiʼitta ra qarataxac, ñaʼañaxataq ra saishet ra soʼotaq na nʼonataguecpi na shiỹaxauapi ra hueguet na maiche logoxoshet taq luogoxoqte qoʼ ra imeten na pornografía (Salmo 119:37; Efesios 5:5). Ishet petaʼa ra qalaqaic ra ñapaxaqlec camachaqca neʼena qauem nʼonataguec, qalaxaye ñi Jehová lhuotta ra qomiʼ itauan (ʼautaxaỹaxan Isaías 41:13).
ÑIMITAQ RA PAXAGUENAXAT
Semetenaq ʼeetec ra ỹoʼot ra lliʼoxoyec ñi Jehová, ra quiʼitta nʼoquiaxac qataq ʼeetec ishet ra sañoxotaq ra ñapaxaqlec na qauem nʼonataguecpi.
3. Ra quiʼitta nʼoquiaxac ỹoʼot ra lliʼoxoyec ñi Jehová
Ra setaxaỹaxanaq so lamaxasoxonaxacpi ỹanem ñi Jehová so Israel lʼecpi coʼollaxa, saỹatenaqteguet ra ñimaye huoʼo naq naigui nqaʼen ra qomiʼ quiʼitta. Qautaxaỹaxañi Éxodo 19:10 taq 30:17-19, qataq qaumalligui neʼena:
¿Négueʼt ca qomiʼ ỹapaxaguenec neʼenaua versículos ra lmejnaxanaxac ñi Jehová ra quiʼitta nʼoquiaxac?
¿Négueʼt ca noʼon nʼonataguecpi qomiʼ itauan yaqtoʼ saxaỹet ra qomiʼ quiʼitta?
Seuenaq na nraqaʼ taq nañaxataxaq yaqtoʼ qomiʼ quiʼitta. Qalaq ishet ra sañoxotaq naiʼctaxa huáʼague ca qonactaña qoʼ ra qomiʼ sallaxanec qoʼ choxoraq. Qaumichiñi na VIDEO qataq qaumalligui neʼena:
Ra na shiỹaxauapi saʼaqtaxanemaq ra nʼaqtac ilaʼa ra quiʼitta na qaralamaxatpi, ¿ishet ra itauan ra nquiguec ra ʼenec nqaʼen ñi Jehová? ¿Táʼaencoʼ?
4. ʼAuañoxot ra ʼanapacalec na qauem nʼonataguecpi
Ñi Jehová ishet ra qomiʼ itauan ra sañoxotaq ra ñauegac camachaqca namanaxanaxa.
Ra ʼauasheraxatac, ra ỹapaqauec na nataʼpi qoʼ ra ʼauʼogoxona na droga, nache ra ʼauaỹaten ra qalaqaic ra qaỹalat reʼera namanaxanaxa. Ishet ra ʼam itauan ra ʼacuennataxana ʼeetec reʼera naʼaqchettac ra ʼanachaalataxac. Qautaxaỹaxañi Mateo 22:37-39 [TBSNT], qataq qaumalligui ʼeetec na nasherec taq ra qaỹoʼogoxona na drogapi naʼaqchet ra...
... nauochaxac ñi Jehová ca shiỹaxaua.
... na lhuoʼ lʼecpi ca shiỹaxaua taq na laỹipi.
ʼAcuenataxana na ishet ra ʼauʼot yaqtoʼ ʼaxañe ca namanaxanaxa.a Qaumichiñi na VIDEO.
Qautaxaỹaxañi 1 Corintios 10:13 qataq qaumalligui neʼena:
¿ʼAuʼamaqten ra ỹanem ca nʼañaxac ca shiỹaxaua yaqtoʼ nauec na namanaxanaxapi ra saxaỹet ra natamen, napaxaguena ana la Biblia taq tauaʼa na naponaxacpi? ¿Táʼaencoʼ ra nache ʼeetec ra ʼarcuennataxac?
5. ʼAnʼañaxateguet na nʼonataguecpi taq ncuennataguecpi nshepaxan
Qautaxaỹaxañi Colosenses 3:5 qataq qaumalligui neʼena:
¿ʼEetec ra saỹatenaq ra ñi Jehová nqaʼen nʼonataguecpi nshepaxan ra qaimeten na pornografía, sextear* taq hueguet na maiche logoxoshet taq luogoxoqte?
*Sextear naigui ra qaỹoʼogoxona na celular, computadora qoʼ ca lỹa dispositivo ra qaỹamaq na foto, mensaje qoʼ video maye ỹachaxan ra nquishiguetaxac.
¿ʼAuʼamaqten ʼam ra ỹaỹamaqchiguiñi ra ñi Jehová qomiʼ ỹaxanot ra quiʼitta ra qarataxac? ¿Táʼaencoʼ?
ʼAuanata ʼeetec ra qanʼañaxateguet na nshepaxan ncuennataxacpi. Qaumichiñi na VIDEO.
So Jesús roʼogoxona so naloqnaxanaxat yaqtoʼ qomiʼ ỹapaxaguenec négueʼt ca itchiguiñi iuen ra soʼotaq ra sauoqtaique ra quiʼitta ra qarataxac. Qautaxaỹaxañi Mateo 5:29, 30 qataq qaumalligui neʼena:
So Jesús saishet ra ʼenapec ra sequemaqchetaq ra qarʼoquiaxac, ndaʼ ra iuen ra itchiguiñi ra huoʼo ca soʼotaq. ¿Négueʼt ca itchiguiñi ra soʼotaq yaqtoʼ sevitaqaʼaguet na nshepaxan ncuennataxacpi?b
Ra masheye ʼauataỹaʼaguet na nshepaxan ncuennataxacpi ishet ra itchiguiñi ra ʼauʼamaqten ra ñi Jehová huoʼo naq naigui nqaʼen ra ʼarʼañaxataxac. Qautaxaỹaxañi Salmo 103:13, 14 qataq qaumalligui neʼena:
Ra masheye ra ʼauataỹaʼaguet na nʼonataguec nshepaxan, ¿ʼauʼamaqten ra neʼenaua versículos ishet ra ʼam ỹanem ca nʼañaxac yaqtoʼ queta ra nʼañaxataq? ¿Táʼaencoʼ?
¡ʼAnʼañaxat! Ra ỹeʼeguelaxa ra ʼauʼot saishet ra nache ʼaqaulle!
Saq alaq ra qarcuennataxac «ỸoItaxa soʼot yeʼeye, saxaañi ra ñaʼañaxatac». Qalaxaye ʼacuennataxana neʼena: ra ca nqalegoqtac ipogolaxañe, saishet ra naigui ra masheye qanauec qoʼ ra ỹoltaxa ỹeʼeguelaxa ca chigoqchiguiña yaqtoʼ ỹoltaxa nqalego. ʼEnaʼam ʼam, ra ỹeʼeguelaxa ra ʼauʼot ca qauem, saishet ra naigui ra mashe ỹañoxot ra ʼam nauec ca namanaxanaxa. Chaʼaye reʼera saishet ra ỹaqataqchet ʼenauac so ʼauañoxot. Ishet petaʼa ra ỹoltaxa ʼaviʼeguelaxalec ra ʼauʼot queʼeca; qaica camachaqca, iuen ra qoqueta saishet ra ʼaqaulle. ¡Ỹoqoʼoye ʼanʼañaxat! Ra ʼam itauan ñi Jehová, nache ishet ra ʼauañoxot ra ʼaualat camachaqca nʼonataguec nshepaxan.
HUOʼO NA NASAXAUEC RA: «Chaʼaye namanaxanaxa saq ishet ra salat».
¿Négueʼt ca texto huetalec aye la Biblia ʼauʼogoxona yaqtoʼ ʼauachaxana queʼeca shiỹaxaua, ra huetoʼot ra lʼañaxac ñi Jehová, ishet ra qaỹañoxot ra qaỹalat camachaqca namanaxanaxa?
NA ʼAMAQTAQAIC
Ñaqaʼenac machiguiñi ñi Jehová ra queta ra quiʼitta ra qarʼoquiaxac, ra qarcuennataxac taq ra qarataxac.
ʼAntoueetaʼac
¿Táʼaencoʼ ra ỹataqta ʼamaqtaqaic ra qomiʼ quiʼitta?
¿Négueʼt ca iuen ra soʼotaq yaqtoʼ quiʼitta ra qarʼoquiaxac?
¿Négueʼt ca iuen ra soʼotaq yaqtoʼ ra na qarataxac taq qarcuennataxacpi saxaỹet ra quiʼitta?
ʼAUANATA CA LỸA
Naiʼctaxa ra qomiʼ choxoraq, ¿négueʼt ca ishet ra soʼotaq yaqtoʼ qomiʼ quiʼitta?
ʼAuloʼogue ra ʼarʼoquiaxac: Ñiỹoxonaxac naua nhuaxaye (3:01)
ʼAutaxaỹaxan naua nqataxacpi maye ishet ra ʼam itauan yaqtoʼ ʼaualat ra ʼarasheraxanaxac.
«ʼEetec ra qaỹalat ra nasheraxanaxac» (¡Despertad!, mayo de 2010)
ʼAmeten nam huaigui ca imeten na pornografía.
«Na pornografía: ¿qomiʼ naʼaqchet qoʼ saishet?» (La Atalaya, 1 de agosto de 2013)
ʼAmeten so ỹoʼot so ỹale yaqtoʼ ỹalat ra namanaxanaxa ra imeten na pornografía.
«Naiʼctaxa ra sheʼeguelaxa ra soʼot, saishet ra seqaulle» (La Atalaya, núm. 4 de 2016)
a ʼAmeten «ʼEetec ra qaỹalat ra nasheraxanaxac», huetaigui ye «ʼAuanata ca lỹa» neʼena paxaguenaxat, iʼaxat na noʼon nqataxacpi yaqtoʼ ʼanauec na namanaxanaxapi.
b Yaqtoʼ qaỹaỹaten ʼeetec ra qaỹaxaañi na nʼonataguec hueguet na maiche logoxoshet taq luogoxoqte, ʼameten ye Paxaguenaxat 25 ye nere Lo que los jóvenes preguntan. Respuestas prácticas (volumen 1), lʼenaxat «¿Ishet ra sañoxot ra ñauec na nʼonataguec hueguet na maiche logoxoshet taq luogoxoqte?».