PAXAGUENAXAT 51
¿ʼEetec ra lataxac caua qarʼaqtaqa ỹaỹamaxareeta ñi Jehová?
So qomiʼ ỹoʼot, ñi Jehová qomiʼ ỹanem ra ʼamaqtaqaic lachetaqtaxanaxat: ra ishet ra huoʼo naua qarʼaqtaqa. ¿Ỹoqochaʼa ñimaye ʼeetec ra soʼogoxonaxa reʼera lachetaqtaxanaxat? ¡Ajá, nache ʼeetec! (ʼAutaxaỹaxan Santiago 1:26). Nache, ¿ʼeetec ishet ra lataxac naua qarʼaqtaqa ỹaỹamaxareeta ñi Jehová?
1. ¿ʼEetec ishet ra noʼon ra soʼogoxonaxa neʼena lachetaqtaxanaxat ñi Jehová?
Ana la Biblia qomiʼ ʼenapegalo: «qantauñiỹaʼt, qataq ñi ʼoonolec ỹaʼañaqchet ca lỹa» (1 Tesalonicenses 5:11). ¿Huoʼo ca ʼauauatton ra iuen ca naʼañaqtaxanaxac? ¿Ishet ra huoʼo ca ʼauʼot yaqtoʼ ʼauʼañaqchet camaye? ʼAuʼaqtaxanem ra ỹataqta ʼauʼot ra naigui ʼanqaʼen camaye. Petaʼa ishet ra ʼauʼaqtaxanem négueʼt caua noʼon lataxac ʼaulaʼa camaye. ¿ʼAntoueetaʼac ca texto huetalec aye la Biblia maye ishet ra iʼañaqchet ca ʼauauatton? Qalota na ishet ra ʼalcaʼauʼa. Taqaʼen ʼantoueetaʼac ra lataxac ra huoʼo ca ʼanasaxauec ishet ra iʼañaqchet na laỹipi ʼenaʼam caua ʼauʼogoxona ʼarʼaqtaqa. Ỹoqoʼoye ʼanʼañaxat ra caua ʼarʼaqtaqa saxaỹet ra nmooñi taq huotaxanaqtaqaiqa (Proverbios 15:1).
2. ¿ʼEetec ra lataxac naua nʼaqtaqa seuenaq ra sevitaqaʼaguet?
Ana la Biblia ʼenapec: «Saishet da qauema naua qaraʼaqtaqalliʼ» (ʼautaxaỹaxan Efesios 4:29). Reʼera naigui ra saishet ra soʼogoxonaxa naua nshepaxan nʼaqtaqa qoʼ ñasaxasoxouec na qauem ra ishet ra iquemaqchet na laỹipi. Qataq seuenaq ra sevitaqaʼaguet ra qomiʼ nʼaqtaqa loʼo qoʼ ra saʼasaxasoxolec ca sa ỹaỹamaxañi ca lỹa (ʼautaxaỹaxan Proverbios 16:28).
3. ¿Négueʼt ca qomiʼ itauan yaqtoʼ naua qarʼaqtaqa iʼañaqchet na laỹipi?
Huoʼo ye huaña na ñasaxasoxouecpi ỹachaxan négueʼt na huetaigui na qarcuennataxacpi taq añi qarquiyaqte (Lucas 6:45). Ỹoqoʼoye iuen ra saxaỹet ra secuennataxanaxalec na nalochiguiñi, nam ỹataqta ʼeesa, cam ishet ra ỹoʼot ra ñiʼoxonnataxanaxac taq na ỹachaxan ra nauotaxanaqtaic (Filipenses 4:8). Ra sañoxotaq reʼera, seuenaq ra noʼon ra llicaʼaxauʼa na qaraʼashaxacpi taq ñimittaqaique na noʼon auochaxauapi (Proverbios 13:20). Taqaʼen huoʼo ra naigui ra qaicuennataxalec huaʼauñe ca qanasaxauec. ʼAnʼañaxat ra ʼacuennataxalec négueʼt ca iʼotec na laỹipi naua ʼarʼaqtaqa. Ana la Biblia ʼenapec: «Huoʼo na shiỹaxaua dequeʼemaqtaxaʼn naua laʼaqtaqa, qaq naua laʼaqtaqa ca ỹaanaxanaxaic qalaq datannaxaʼn» (Proverbios 12:18).
ÑIMITAQ RA PAXAGUENAXAT
Semetenaq négueʼt ca lataxac caua nʼaqtaqa ỹaỹamaxareeta ñi Jehová taq iʼañaqchet na laỹipi.
4. ʼAuloʼogue na ʼanasaxauec
ʼEnauac qomiʼ huoʼo ye huaña ra ime ra huoʼo ca ñasaxasoxouec, nache ñitounaxac (Santiago 3:2). Qautaxaỹaxañi Gálatas 5:22, 23 [TBSNT], qataq qaumalligui neʼena:
Yaqtoʼ ʼauloʼogue ca ʼanasaxauec qataq ʼeetec ra ʼanasaxauec, ¿négueʼt ca neʼena nataxacpi ʼaỹaxanot ñi Jehová? ¿ʼEetec ishet ra ʼam itauan neʼena nataxacpi?
Qautaxaỹaxañi 1 Corintios 15:33 qataq qaumalligui neʼena:
¿Ishet ra huoʼo ca iʼotec naua ʼarʼaqtaqa na auochaxauapi taq naʼashaxacpi ʼalcaʼauʼa? ¿ʼEetec ra ỹoʼot reʼera?
¿Négueʼt nam ishet ra huoʼo ca iʼotec ra lataxac naua ʼarʼaqtaqa?
Qautaxaỹaxañi Eclesiastés 3:1, 7 qataq qaumalligui neʼena:
¿Lágui ra ỹajnaxanaxaic ra qaica ca ñasaxasoxouec qoʼ seuataqaʼa ca noʼon laloqoʼ ra huoʼo ca ñasaxasoxouec?
5. Noʼon naua ʼarʼaqtaqa ra ʼauʼaxattegue na laỹipi
¿ʼEetec ishet ra sevitaqaʼaguet ra ñasaxasoxouec nam ỹoʼot ra nquiʼic qoʼ na qaica ca ỹanaigui na laỹipi? Qaumichiñi na VIDEO qataq qaumalligui neʼena:
¿Táʼaencoʼ huotaique so qarqaỹa so video ra naralaxat ra lataxac naua lʼaqtaqa ra iʼaxat na laỹipi?
¿Négueʼt so ỹoʼot yaqtoʼ ỹañoxot reʼera?
Qautaxaỹaxañi Eclesiastés 7:16 qataq qaumalligui neʼena:
¿Négueʼt ca iuen ra ñitouenaqtaʼat ra qaryaxa ra huoʼo ca qauem ñasaxasoxouec na laỹipi?
Qautaxaỹaxañi Eclesiastés 7:21, 22 qataq qaumalligui neʼena:
Ra huoʼo ca lỹa huoʼo ca qauem ʼam ỹasaxalec ra ʼam iʼaxat, ¿ishet ra ʼam itauan neʼenaua versículos ra ʼauloʼogue ca ʼauʼot? ¿Táʼaencoʼ?
6. ʼAm huotaxanaqtaqaic ra ʼamalle ca ʼarhuoʼ lʼec
Ñi Jehová huotaique ra sachaxanaq ra nauotaxanaqtaic ra semallaxai na qarhuoʼ lʼec. Qaumichiñi na VIDEO qataq qaumalligui neʼena:
¿Négueʼt ca ʼam itauan yaqtoʼ ʼauachaxan ra nauotaxanaqtaic ra ʼamalle ca ʼarhuoʼ lʼec?
Qautaxaỹaxañi Efesios 4:31, 32 qataq qaumalligui neʼena:
¿ʼEetec ra lataxac caua nʼaqtaqa ỹoʼot ra nlagaxayec ca nmaʼ?
Ñi Jehová saishet ra ỹoxottiguiñe ra lquiyaqteỹaxac souaxat so llalec, Jesús. Qautaxaỹaxañi Mateo 17:5 qataq qaumalligui neʼena:
¿ʼEetec ishet ʼam ra ʼauʼenaxatchigui ra lataxac ñi Jehová ra ʼamalle ca ʼarhuoʼ lʼec?
ʼAnmittaique ca laloqoʼ yaqtoʼ ʼauʼaqtaxanem ca ʼantootapeguec ra lataxac qoʼ ỹoʼot ca laỹipi.
HUOʼO NA NASAXAUEC RA: «Neʼena ñasaxauec. Maiche ca iueteguet na iʼaqtac».
¿ʼAuaỹamaxareeta ʼam reʼera nhuennataxac? ¿Táʼaencoʼ?
NA ʼAMAQTAQAIC
Naua qarʼaqtaqa ishet ra iʼañaqchet qoʼ iquemaqchet ca laỹipi. Seuenaq ra huaʼauñe secuennataxanaxalec na ñasaxasoxouec, lágui ra ñasaxasoxouec taq ʼeetec ra ñasaxasoxouec.
ʼAntoueetaʼac
¿ʼEetec ishet ra ʼauʼogoxona naua ʼarʼaqtaqa yaqtoʼ ʼautauan na laỹipi?
¿ʼEetec ra lataxac naua nʼaqtaqa seuenaq ra sevitaqaʼaguet?
¿Négueʼt ca qomiʼ itauan yaqtoʼ saxaỹet ra naua qarʼaqtaqa iʼañaqchet na laỹipi taq huotaxanaqtaqaiqa?
ʼAUANATA CA LỸA
¿Négueʼt ca ishet ra qomiʼ itauan yaqtoʼ caua qarʼaqtaqa iʼañaqchet na laỹipi?
ʼAuanata négueʼt ca ishet ra ʼam itauan ra ʼavitaʼaguet na qauem nʼaqtaqa.
«¿Qaica camachaqca ra qanasaxauec na qauem nʼaqtaqa?» (Paxaguenaxat ye jw.org)
ʼAuanata nam ishet ra ʼauʼot yaqtoʼ ʼavitaʼaguet na nʼaqtaqa loʼoʼ.
ʼAutaxaỹaxan ʼeetec ñi Jehová itauan so ỹale ra lʼañaxataxac ra ỹaxaañi ra nasaxauec na qauem nʼaqtaqa.
«Secuennataxateguelec ram taỹaʼague ra ñachaalataxac» (La Atalaya, 1 de agosto de 2013)