Watchtower LAỸAMAQTAXAQUI ANA NEREPI YE INTERNET
Watchtower
LAỸAMAQTAXAQUI ANA NEREPI YE INTERNET
toba
  • AYE LA BIBLIA
  • MEJNAPI
  • REUNIONES
  • lff paxaguenaxat 58
  • Saxaỹet ra saq ʼaxaneec ñi Jehová

No hay ningún video disponible para este elemento seleccionado.

Lo sentimos, hubo un error al cargar el video.

  • Saxaỹet ra saq ʼaxaneec ñi Jehová
  • ¡ʼAntonatan ca ncaʼalaxa chochaq tateec! ʼAmeten ra ʼenapec aye la Biblia
  • Subtítulos
  • Paxaguenaxatpi Nache Enʼam
  • ÑIMITAQ RA PAXAGUENAXAT
  • NA ʼAMAQTAQAIC
  • ʼAUANATA CA LỸA
  • Na nʼamaqtenaxac saq ʼeesa nshepaxanaqchet ra lataxac ñi Dios
    ¡ʼAntonatan ca ncaʼalaxa chochaq tateec! ʼAmeten ra ʼenapec aye la Biblia
  • ¿Négueʼt ỹapaxaguen aye la Biblia ye qomchiye ra nʼamaqtenaxacpi?
    Noʼon nʼaxaỹaxac chigoqoʼot ñi Dios
  • Sañashenaxaguet cam saq ‘eesa N’amqajnataxanaxac
    Ishet ra qanauochaxaua Ñim Dios
  • ¿ʼEetec ishet ra sachaxanqot ñi Jehová ra sauotaxac?
    ¡ʼAntonatan ca ncaʼalaxa chochaq tateec! ʼAmeten ra ʼenapec aye la Biblia
¡ʼAntonatan ca ncaʼalaxa chochaq tateec! ʼAmeten ra ʼenapec aye la Biblia
lff paxaguenaxat 58
Paxaguenaxat 58. Naua nhuo nlectot na shiỹaxauapi lʼenaxat apóstatas maye iʼeetac na lỹa shiỹaxauapi ivirua na laponaxaqui ltaʼaraic na testigopi de Jehová.

PAXAGUENAXAT 58

Saxaỹet saq ʼaxaneec ñi Jehová

Edición impresa
Edición impresa
Edición impresa

Qomiʼ na ʼeesa cristianopi itchiguiñi ra llicaʼaxauʼa ra qaica ca naxateguet ra shiʼoxorenaq ñi Jehová. Saishet ra seqolguetaq ra ʼam nache ʼeetec ra ʼarquiyaqteỹaxac qataq ñi Jehová ỹataqta ỹauoʼo ra naigui ra ʼam saq ʼaxaneec ñimaye (ʼautaxaỹaxan 1 Crónicas 28:9). ¿Négueʼt ca aloicpi ishet ra ỹeʼeguen ra saq ʼaxaneec ñi Dios? ¿Qataq ʼeetec ishet ra ʼauataỹaʼaguet namayepi?

1. ¿ʼEetec na laỹipi ishet ra ỹeʼeguen ra saq saxanaxauec ñi Jehová?

Huoʼo na shiỹaxauapi huotaique ra saxanaxauec ra soʼonataxanqot ñi Jehová. ¿Négueʼt cam ishet ra ỹoʼot reʼera? Qaỹaloqnaxana, huoʼo na ỹalat ra ʼeesa qaq nache nagui nasaqteguet na natenataxanaxac nam pueblo ñi Dios chaʼaye huotaique ra salataq ra qarpiʼiỹaxac. Neʼena shiỹaxauapi qaiỹaxana ra apóstatas. Taqaʼen huoʼo na lataxalaʼpi na nʼamaqtenaxacpi qomiʼ ỹasaxalec na saq ʼeesa yaqtoʼ na qaica ca ỹaỹajnapec ỹalat na ʼeesa. Ỹataqta chaqaic ra ñicotaqaỹapegueʼ nam npaʼaguenaxauapi nam pueblo ñi Dios, setaxaỹaxanaq na lerepi, nam página na internet qoʼ semetenaq nam videopi. Souaxat nam huotaique ra salataq ra qaryaxa ra saq saxanaxauec ñi Jehová, so Jesús ʼeeta: «Saishet qome da qauqocheetega [...], chaʼaye namayepi ʼeetaʼam ca sanauaañi da ỹauectaʼaguet ca lỹa sanauaañi, qaq cam sanauaañi da huoʼotaq ỹauectaʼaguet cam ʼeetaʼam sanauaañi, nache caamaye ishet da ʼenauaque da tayingui aca nshere» (Mateo 15:14).

2. ¿Négueʼt ca maiche llicaʼaxauʼa ra soʼotaq ishet ra ỹeʼeguen ra saq saxanaxauec ñi Jehová?

Ye sauotaxac ñi Jehová saishet ra sauoqtaique ra saxauʼa na nʼamaqtenaxacpi saq ʼeesa. Ca qarʼonataxanaxac qoʼ ca organizacionpi ñaneractauaʼa qoʼ camachaqca soʼotaq, huanna ra naʼattaguet na nʼamaqtenaxacpi saq ʼeesa. Qaỹaloqnaxana, huoʼo na escuelapi qoʼ na comedorpi ỹaconguet ra ltaunaxanaxac na nʼamaqtenaxacpi saq ʼeesa. Ñi Jehová iquiyeguen nam pueblo ʼeeta: «Qoquiỹaʼai» anamaye, nachana Nam ỹataqta ʼamaqtaqaic Babilonia (Apocalipsis 18:2, 4).

ÑIMITAQ RA PAXAGUENAXAT

ʼAnapaxaguena négueʼt ca ishet ra ʼauʼot ʼam yaqtoʼ qaica ca ishet ra nqaʼen ʼaualat ra saq ʼaxaneec ñi Jehová. Taqaʼen ʼameten táʼaencoʼ ra ʼauachaxan ra saq ʼaxaneec ñi Jehová ra qocaʼai Nam ỹataqta ʼamaqtaqaic Babilonia.

3. Maxatchaxa na paxaguenataxanaxaicpi saq ʼeesa

¿Négueʼt ca iuen ra soʼotaq ra iviraʼa ra saʼaxasoqchigui na qauem nʼaqtaguec qaỹasaxalec na organización ñi Jehová? Qautaxaỹaxañi Proverbios 14:15 qataq qaumalligui neʼena:

  • ¿Táʼaencoʼ ra iuen ra qomiʼ ỹajnaxanaxaiqa taq saishet ra saʼamaqtenaq ʼenauac na saʼaxasoqchigui?

Qautaxaỹaxañi 2 Juan 9-11 [TBSNT], qataq qaumalligui neʼena:

  • ¿ʼEetec iuen ca qarmejnaxanaxac na apóstatas?

  • Petaʼa saishet ra ñimittaqaique ra ñaxaỹaxanaxa na apóstatas, qalaxaye naiʼctaxa reʼera, ¿ʼeetec ishet ra qomiʼ iviroʼot na lcuennataxacpi?

  • Ra seqochaqaʼa na qauem nʼaqtacpi qaỹasaqteguelec ñi Jehová qoʼ na nʼorganización, ¿ʼeetec ra lquiyaqteỹaxac ñimaye?

4. Saq ʼaxaneec ñi Dios naiʼctaxa ra ca nqaỹa huoʼo ca lasouaxashet

Ra qaraʼaxaỹaxac ra huoʼo ca añi la congregación ỹoʼot ca lasouaxashet ltaʼaraic, ¿négueʼt ca qomiʼ qaipataxalec ra soʼotaq? ʼAnapaxaguena na ʼoonolec nqataxac sanataxa na lamaxasoxonaxacpi ñi Dios maye ỹanem so Israel coʼollaxa. Qautaxaỹaxañi Levítico 5:1.

ʼEnaʼam na iʼaxat neʼena versículo, ra qaraʼaxaỹaxac ra huoʼo ca ỹoʼot ca lasouaxashet ltaʼaraic iuen ra saʼaqtaxanemaq na ancianopi ca saỹatenaq. Ajá, qalaxaye huaʼauñe ra soʼotaq reʼera qomiʼ huotaxanaqtaqaiqa ra saʼañaqchetaq ca shiỹaxaua maye ỹoʼot ca lasouaxashet ltaʼaraic ra remalli na ancianopi taq iʼaxat so ỹoʼot. Qalaxaye ra saishet ra ỹoʼot reʼera, nache qomiʼ souaxat ra saq saxanaxauec ñi Jehová nache saʼaqtaxanemaq na ancianopi. ¿Táʼaencoʼ ra qaỹoʼot neʼenapi ỹachaxan ra nauotaxanaqtaic taq saq qaỹaxaneec...

  • ... ñi Jehová?

  • ... ca shiỹaxaua huoʼo ca lasouaxashet?

  • ... ʼemaʼa añi la congregación?

Na imagenpi: So qarqaỹa itauan so lỹa qarqaỹa maye qauem so ỹoʼotac. 1. So qarqaỹa iʼaalac som imeten so celular. 2. So qarqaỹa ỹachaxana som celular so lỹa qarqaỹa, qalaxaye so lỹa qarqaỹa sa nashenguet na nqataxac. 3. So qarqaỹa ỹachaxana so celular naua dos ancianos qataq remalleto naua maye.

Ra ca nqaỹa ỹoʼot ca lasouaxashet ltaʼaraic, ¡ʼautauan!

5. Qocaʼai Nam ỹataqta ʼamaqtaqaic Babilonia

Qaumichiñi na VIDEO.

VIDEO: ¡Qocaʼai Nam ỹataqta ʼamaqtaqaic Babilonia! (5:06)

Na imagen huetaigui na video: «¡Qocaʼai Nam ỹataqta ʼamaqtaqaic Babilonia!». Aso napaxaguenatac aye la Biblia caʼai so sacerdote chaʼaye asomaye ỹalat so nʼonatac añi iglesia.

Qautaxaỹaxañi Lucas 4:8 taq Apocalipsis 18:4, 5, qataq qanmichi neʼena nntaxacpi:

  • ¿Ñaq nanetauʼa ca iʼenaxat ca nʼamaqtenaxac saq ʼeesa?

  • ¿Ñanetauʼa camachaqca organización naʼattaguet na nʼamaqtenaxac?

  • ¿Itauan na nʼamaqtenaxacpi saq ʼeesa ca iʼonataxanaxac?

  • ¿Iuen ra secaʼai na nʼamaqtenaxacpi saq ʼeesa ye ỹottaʼaʼt lataxac ra ñachaalataxac?

  • Ra «ajá» ca ỹasataxac camachaqca neʼena nnataxacpi nache, ¿négueʼt ca ñiqochenaxat iuen ra soʼot?

Camachaqca aloicpi ca ʼalcaʼauʼa ra ʼauʼot ishet ra nqaʼen noʼon ye ʼantounaxac qataq ỹachaxan ra saq ʼaxaneec ñi Jehová.

Aso qarqaỹa taq so llalec pauec añi supermercado nlectot aso ʼalo maye rashelaxatac nachetaqtaxanatpi ra itauan na organización nateeteguet añi iglesia.

¿Négueʼt ca ʼauʼot ra huoʼo ca ʼam iỹaxanot ra ʼan aca ʼarachetaqtaxanaqte aca organización naʼattaguet ca nʼamaqtenaxac?

HUOʼO NA NASAXAUEC RA: «Qalaxaye ra saq saỹaten nam nasaxauec na apóstatas souaxat na testigopi de Jehová, ¿ʼeetec taxa ra seuejlec na ʼeesa?».

  • ¿Ỹajnaxanaxaic reʼera? ¿Táʼaencoʼ?

NA ʼAMAQTAQAIC

Ra sauoqtaique saq saxanaxauec ñi Jehová, nache iuen ra sevitaqaʼaguet ra qanauochaxaua nam huotaique ra qomiʼ ỹatenachet.

ʼAntoueetaʼac

  • ¿Táʼaencoʼ ra saishet ra iuen ra ñaxaỹaxanaxa na lcuennataxacpi na apóstatas?

  • ¿Ra qaraxaỹaxac ra ca qarqaỹa huoʼo ca lasouaxashet ltaʼaraic, ¿néguet ca iuen ra soʼotaq?

  • ¿Négueʼt ca iuen ra soʼotaq yaqtoʼ salaxasoxoguet na nqataxac ra imaʼaʼt ra salataq na nʼamaqtenaxacpi saq ʼeesa?

Na maiche ra ʼauʼot

ʼAUANATA CA LỸA

ʼAuanata négueʼt ca ʼauʼot ra na laỹipi nasaxauec na saq ʼeesa na testigopi de Jehová.

«¿Ỹataqta ñaloqtenaq ʼenauac?» (La Atalaya, agosto de 2018)

¿ʼEetec ishet ra saỹatenaq ra ca organización qoʼ ca qaỹoʼot itauan na Babilonia ʼamaqtaqaic?

«Qolaqtoʼot ra soʼotaqtac ra qaroʼonataxanaxac na paʼatec laỹe naua paʼatrec naʼaxaʼte» (La Atalaya, octubre de 2019, parrafopi 16-18)

¿Négueʼt ca ỹoʼot na laỹipi npaʼaguenaxauapi ra ʼeesa chaʼaye huotaique ra salataq ra qarpiʼiỹaxac?

Seloʼoxoguet na natenataxanaxacpi (9:32)

ʼAutaxaỹaxan ʼeetec so sacerdote maye sintoísta ỹalat na nʼamaqtenaxacpi saq ʼeesa ye nʼaqtaguec «Ñimittaique ñi Dios chigoqchigui so aỹem nogotolec».

«Aye la Biblia naralaxat ra achaalataxac» (La Atalaya, 1 de julio de 2011)

    Mejnapi na Qom Lʼaqtac (2009-2025)
    Cerrar sesión
    Iniciar sesión
    • toba
    • Compartir
    • Na qalauela
    • Copyright © 2025 Watch Tower Bible and Tract Society of Pennsylvania
    • Términos y Condiciones de Uso
    • Política de Privacidad
    • Configuración de privacidad
    • JW.ORG
    • Iniciar sesión
    Compartir