Soua ocho shiỹaxauaʼ iguelaxalec ra ỹoʼot ralaxaic ʼalhua

So Noé, so lauolecpi taq so animalpi huenoxonoigui aso arca. Ñi Jehová ỹapogui so lasom nache anac auot ltaraʼaic. Qaq ltaʼaraic so ʼetaxat nache aso arca ñishiguem nache huaỹoxootapiguiʼ. Iviraʼa na ʼetaxat ỹapolec ana ʼalhua. ʼEnauac na shiỹaxauapi yiloxoicpi paỹauec aso arca nache ileu. Ndotec so Noé taq so lauolecpi ncaʼaldec chaʼaye paʼatauo aso arca. ¿Ca ʼeetec ca arcuennataxac soua maye ỹataqta machiguiñe chaʼaye ỹalaxaguet ñi Jehová?

Ỹataqta ltaʼaraic so auot huaigui so 40 naʼaxaʼate taq 40 peʼ ra anactac. Qaq coʼollaq viʼiguet so auot nache nquictañe. Aso arca viʼiguet nache netalec aso qasoxonaxa. So Noé taq so lauolecpi saishet ra inoxorec chaʼaye ỹaguec na ʼetaxat na pauec.

Quetaʼ na naʼaxaʼte nache nquictañe na ʼetaxat iviraʼa ra reqaqa. Ỹoqoʼoye so Noé taq so lauolecpi petaʼa iviraʼa so ʼoonolec viʼi netaigui aso arca. Qaq coʼollaq ñi Jehová ʼenapega ra ishet ra pauec. ¡ʼEnauac na ỹalletagui ʼenaʼam ca icoʼ na ralaxaic ʼalhua! Ỹataqta ltaʼaraic ra nachiquiaxac souaxat ñi Jehová ra ncaʼalaxateguesop soua maye, nache ỹoʼot na lachetaqtaxanaxat.

Ñi Jehová ỹataqta lauela seʼeso ỹoqoʼoye nasaxauec ra saishet ra ltaxa nlaxajñe na netalec ana ʼalhua ra roʼogoxona na auot ltaʼaraic. Ra yaqtoʼ ntoueetaʼac seʼeso ỹachaxanapec ñi Jehová nache ỹoʼot ra huenoxonic aso arcoíris. ¿ʼAm auauaton ana arcoíris?

Taqaʼen ñi Jehová ỹamaxalec so Noé taq so lauolecpi ra huoʼo ca llalaqpi nache nlaxatelec ana ʼalhua.