So esclavo ỹalaxaguet ñi Dios

So José nache lỹa nasa llalec so Jacob. Soua lqaỹatpi ỹe nanomtaalo ra so ltaʼa ỹataqta ỹauotec so José. ¿Ca ʼeetec ca nanomaxa soua maye? Ỹataqta nquiỹalo so José. Huoʼo so naʼaq so maye huoʼo so ỹoxosa lchoxonaxacpi nache raqtaxanema soua lqaỹat. Soua mayepi lcuennataxac ra seʼeso lchoxonaxacpi naigui ra qomchiye huoʼo ca naʼaq soua mayepi ỹaʼalroto naua l-llectel so maye. Ỹoqoʼoye ỹataqta nquiguec ra qanquiaʼa so maye.

Huoʼo so naʼaq, soua lqaỹañecpi so José ilotegue so qaguetapi netaña ye saqaỹa ye ciudad ye Siquem. Nache so Jacob ỹamaq so José ra nqonalo soua lqaỹanecpi ra yaqtoʼ ỹaỹaten ra huoʼo ca iuenaique soua mayepi. Nache soua mayepi ilotaguet ñaq qaỹoqteguet so maye nache nasaxauec ʼeeta: «ʼEnachaʼaguet na choxonaxaic. ¡Salauataq na maye!». Nache ỹaqonalo so maye taq ỹasaxangui aso nshere qaỹoqchiguingui. Qalaxaye so lqaỹa Judá, ʼenapec: «Saishet ra qaualauachi. ʼOnaxaic taxa ra semenaq yaqtoʼ ñigui ra esclavo». Nache ipacchigui ra ỹoʼot reʼera. Nache nateugueye so nmenaxaicpi Madianitapi maye taỹalo ye Egipto nache qaimenot qaỹahuotaʼa 20 piezas na plata ra lasheue.

Lqopague so lqaỹañecpi ỹaqona so logoxot so José nache ỹapapiaxat ỹahuotaʼa na ltagoʼq so quetac llalec, nache qairoỹa so ltaʼa taq qainat so maye ʼeeta: «¿Neʼena petaʼa lalamaxat so aỹalec?». So Jacob ipetaʼa ra huoʼo ca animal ra ỹalauat so José, nache ỹataqta ỹaqtec huoʼo ra nquiʼic. Qaica ca ishet ra iqochac so maye.

Qaq coʼollaq iviraʼa ye Egipto huoʼo so oficial ỹataqta ʼamaqtaqaic lʼenaxat Potifar nache ishenaxana ra yaqtoʼ esclavo so maye. Ñi Jehová saishet ra ỹalat so José. So Potifar ỹalletaʼa ra so José ỹaỹamaqchiguiñi ʼenauac na ỹoʼotaqpi taq ishet ra piʼiỹa so maye. Nache ỹoʼot ra ipataxalec so maye ʼenauac na lalamaxat.

Aso lhua so Potifar ỹalletaʼa ra so José ỹataqta ʼonaxaiqolec, nalochiguiñi ra lataxac taq añaxaic ỹoqoʼoye dequictoʼot ra lauañiʼ aso maye. ¿Négueʼt ca ỹoʼot so José? So maye saq nashenguet taq ʼenapega: «Saishet, reʼera saq ỹaỹamaxañi. So ñaqoʼ aỹem piʼiỹa taq ʼam arhua so maye. Ra soʼot reʼera nache sachoʼot ca ỹasouaxashet ñi Dios».

Qalaxaye huoʼo so naʼaq, aso lhua so Potifar ỹataqta nllañi so José ra yaqtoʼ lauañe aso maye ỹaconeuaʼalo soua logoxot qalaq so maye paʼauec nache ratauec. So ivireʼuo so Potifar ye lmaʼ nache aso maye ratenataxan, ʼenapec ra so José huotaique lauañe aso maye. So Potifar ỹataqta ralemata nache icoñe so maye. Ñi Jehová saishet ra icouai so José.