So Daniel netangui aso nshere so llonpi

So Darío medo lʼec lỹa ntaʼa ye Babilonia. So maye nanomtaʼa ra so Daniel saq ʼenaʼam so laỹipi taq huoʼo ra laỹajnataxanaxac. Ỹoqoʼoye ỹanem ra nauatalec so nataxalapi ʼamaqtaqaic yeʼeye país. Seʼeso ỹalleppi ỹataqta nquiaʼa so Daniel souaxat reʼera huotaique qaỹalauat so maye. So mayepi ỹaỹaten ra so Daniel natamenot ñi Jehová iviraʼa tres ye ʼoonolec naʼaq. Nache qoinapega so Darío: «ʼAm ntaʼa iuen ra auoʼot ca qalapaxañi yaqtoʼ ʼenauac ana ʼalhua ndotec ʼam ỹaxateqot. Qaq ca saq ỹalac nache qaỹasaxangui añi nshere laỹi na llonpi». So Darío lauela nache nanerelec seʼeso.

Coʼollaq so Daniel laxaỹaxac seʼeso ralaxaic qalapaxañi nache taỹa ye lmaʼ. Huaña yeʼeye nache ỹaʼalyiñi naua l-llectel ratateguet ñi nalloxoquiʼ taq natamenot ñi Jehová. Seʼeso ỹalleppi ỹataqta nquiaʼa so maye, paʼaigui so lmaʼ taq qailalec ra natametac. Nache qancaloxoqtaua ra qaỹaqtaxanem so Darío: «So Daniel saq ʼam ỹalaxaguet. Natamenot ñi lalamaxat Dios iviraʼa tres ye ʼoonolec naʼaq». So Darío ỹaỹamaxareta so Daniel taq saishet ra huotaique ra qaỹalauat. Ivitaʼa ra inoxoñi aso nalaʼ ra nmittaique ca lataxac ra ncaʼalaxatec qalaxaye saq ishet ra naralaxat so qalapaxañi maye nanerelec coʼollaxa. Nache ramaxasoxolec ra qaỹasaxangui aso nshere maye laỹi so llonpi.

Seʼeso pe, so Darío saq roʼoche ỹataqta qochetaique so Daniel. So nteʼeta, nqaloxoqtauga aso nshere, ỹallingui taq iỹaxanaique: «¡Daniel! ¿ʼAm ncaʼalaxateguesop ñi aralamaxat Dios?».

So Darío huaxaỹa so navilliaxac. Nacheso so Daniel ra ỹasateguet: «So ángel ñi Jehová ỹapogui na alap na llonpi taq saishet ra aỹem qaiqueʼemaqchet». So Darío ỹataqta machiguiñe taq ramaxasoxolec ra qanqatsheguem so maye. So Daniel qaica ca lqueʼemaxa. Nache so ntaʼa ramaxasoxolec: «¡Iuen ra qaỹasaxangui aca nshere so ỹalleppi maye ỹahuoʼo so lasouaxashet so Daniel!». Qaq so qaỹasaxangui nache so llonpi parenaxaneguet so mayepi.

So Darío ʼenapega so npueblo: «ʼEnauac qamiʼ iuen ra huoʼ naq ʼenec ñi lalamaxat Dios so Daniel. Ñi maye ncaʼalaxateguesop so Daniel na llonpi».

¿Ñaq ʼam? ¿Taqaʼen anatamenot ñi Jehová ʼenauac na naʼaxaʼte, ʼenaʼam so Daniel?