PAXAGUENAXAT 14
¿Négueʼt ca iuen ra soʼotaq yaqtoʼ ñi Dios ỹaconguet ra qaryoʼoxonnataxanaxac?
So lỹa paxaguenaxat ñapaxaguenaqtega ra ñi Dios saishet ra ỹaỹamaxareeta ʼenauac na nʼamaqtenaxacpi. Qalaxaye ishet ra qolaxague ra lataxac ra ñiʼoxonataxanaxac ỹaỹamaxareeta qataq nqaʼen machiguiñi ñi Qartaʼa. ¿Négueʼt queʼeca nʼamqajnataxanaxac ỹaconguet ñimaye? (Santiago 1:27, TBSNT). Semetenaq ra ʼenac ana la Biblia.
1. ¿Huáʼague ca iʼaxat ra ʼeetec iuen ra qaỹiʼoxoren ñi Dios?
Ram lataxac ra shiʼoxorenaq ñi Dios huetalec aye la Biblia. So Jesús ʼenapeco ñi Dios: «Dam ʼaraʼaqtac maye ỹataqta ʼeesa» (Juan 17:17). Huoʼo na nʼamaqtenaxacpi saishet ra quegue ra ʼeesa huetalec ye lʼaqtac ñi Dios, la Biblia. Ndaʼ ra lcaʼauʼa ra quegue na lapaxaguenataxanaxac qataq nʼonataxaco na shiỹaxauapi. Qalaxaye ñi Jehová saq lauela ra qaỹamaqaʼaguet na lamaxasoxonaxacpi (ʼautaxaỹaxan Marcos 7:9). Nataqaʼen ñimaye machiguiñi ra qolaxague ra ʼenapec aye la Biblia qataq ra salaxasoxoguet na lqataxacpi.
2. ¿ʼEetec iuen ra shiʼoxorenaq ñi Jehová?
Iuen ra shiʼoxorenaq ndotec ñi Jehová, chaʼaye ñimaye qomiʼ lʼonataqa (Apocalipsis 4:11). Reʼera naigui ra iuen ra sauotaxac qataq shiʼoxorenaq ndotec ñimaye, saishet ca nʼenaqtacpi qoʼ nqolacpi (ʼautaxaỹaxan Isaías 42:8).
Yaqtoʼ shiʼoxorenaq ñi Dios seuenaq ra «qomiʼ quiʼitteʼ» qataq «ỹaỹamaxareeta ñimaye» (Romanos 12:1; 2 Corintios 7:1). Reʼera naigui ra seuenaq ra salaxasoxoguet na lamaxasoxonaxacpi. Qaỹaloqnaxana, nam ỹauotec ñi Jehová ỹauotec qataq ỹalaxaguet na lamaxasoxonaxacpi na namoxouʼ. Taqaʼen saishet ra ỹaconguet nam qauem ʼonataguec. Saloqnaxana ana droga taq nasherec qataq nam saq icherapec ra nỹomgui na lataxa.a
3. ¿Táʼaencoʼ iuen ra shiʼoxorenaq ñi Jehová salegaqtaigui nam ỹalaxaguet ñimaye?
Na qaraponaxacpi na la semana qomiʼ itauan yaqtoʼ shiʼoxorenaq ñi Jehová salegaqtaigui «ca laponaxac na shiỹaxauapi maye noʼon da lataxac» (Salmo 111:1, 2). Saloqnaxana ra sonaxanaqtoʼot na nʼonec ñi Dios (ʼautaxaỹaxan Salmo 104:33). Ñi Jehová qomiʼ ỹamaxalec ra llaponaqtega chaʼaye qomiʼ ỹauoteque qataq ỹaỹaten ra na naponaxac qomiʼ itauan ra ñitonaqtapeguec ra achaalataxac chochaq tateec. Ra llaponaqtega qomiʼ saʼañaqchetaq ca lỹa qataq namayepi qomiʼ iʼañaqchet.
ÑIMITAQ RA PAXAGUENAXAT
Semetenaq táʼaencoʼ ñi Jehová saishet ra huotaique ra soʼogoxonaxa na nqolacpi ra shiʼoxorenaq ñimaye. Ñapaxaguenaxa ʼeetec ishet ra shiʼoxorenaq ñi Dios.
4. Sa ỹaỹamaxañi ra soʼogoxonaxa na nqolacpi ra qaryoʼoxonnataxanaxac
¿ʼEetec ra saỹatenaq ra saỹaỹamaxaren ñi Dios reʼera? Qaumichiñi na VIDEO qataq qaumalligui neʼena.
¿Négueʼt ca huaigui som npueblo ñi Dios coʼolloxochiye ỹiʼoxoren ñi Jehová ỹauotaʼa so nʼenaqtac?
Huoʼo na shiỹaxauapi iʼamaqten ra nquigot ñi Dios ra ỹiʼoxoren ỹauotaʼa na nʼenaqtacpi. Qalaxaye, ¿petaʼa nquigaxatoʼot ñimaye ra ỹoʼot reʼera? Qautaxaỹaxañi Éxodo 20:4-6 taq Salmo 106:35, 36, qataq qaumalligui neʼena:
Ca qonetaña, ¿négueʼt ca nʼenaqtacpi ỹiʼoxoreetac na shiỹaxauapi?
¿ʼEetec ra lhuennataxac ñi Jehová ra qaỹiʼoxoren na nʼenaqtacpi?
¿ʼEetec ca ʼarcuennataxac ʼam ra qaỹiʼoxoren na nʼenaqtacpi?
5. Ra ndotec shiʼoxorenaq ñi Jehová nache qomiʼ huesoueguesopa na nʼamaqtenaxacpi saq ʼeesa
Semetenaq táʼaencoʼ ra ñiʼoxonataxanaxac ỹaỹamaxareeta ñi Jehová ishet ra qomiʼ isoueguesop na nʼamaqtenaxacpi saq ʼeesa. Qaumichiñi na VIDEO.
Qautaxaỹaxañi Salmo 91:14 qataq qaumalligui neʼena:
Ra shiʼoxorenaq ndotec ñi Jehová nache sachaxanaq ra sauotaxac ñimaye. Ỹoqoʼoye, ¿négueʼt ca qomiʼ ỹachaxanapecot ra ỹoʼot?
6. Shiʼoxorenaq ñi Dios huaigui na naponaxacpi añi congregación
Ra soʼonaxanac qataq sanaq ra qarʼaqtac naponaxacpi añi congregación, shiʼoxorenaq ñi Jehová qataq qomiʼ iʼañaqchet. Qautaxaỹaxañi Salmo 22:22 qataq qaumalligui neʼena:
¿ʼArauela na lʼaqtacpi ỹan na qarqaỹa na naponaxacpi?
¿ʼArauela ra ʼanaỹamaxatta yaqtoʼ ʼan ca ʼarʼaqtac na naponaxacpi?
7. Ñi Jehová lauela ra saʼaqtaxanaxam na laỹipi ra ñapaxaguenaqtega
Huoʼo na ỹottaʼaʼt nataxaco na ishet ra saʼaqtaxanaxam na laỹipi ra iʼaxat aye la Biblia. Qauataxaỹaxañi Salmo 9:1 taq 34:1, qataq qaumalligui neʼena:
ʼEnauac na mashe ʼauaỹaten ra huetalec aye la Biblia, ¿négueʼt ca ʼarauela ra ʼauʼaqtaxanem ca laỹipi?
HUOʼO NA NASAXAUEC RA: «Ñi Dios ỹaỹamareeta ʼenauac na nʼamaqtenaxacpi, ỹoqoʼoye saishet ra ʼamaqtaqaic ʼeetec ra shiʼoxorenaq ñimaye».
¿ʼEetec ca ʼarcuennataxac?
NA ʼAMAQTAQAIC
Ñim Loʼonatac ʼEnauacna machiguiñi ra shiʼoxorenaq ndotec ñimaye, ra shiʼoxorenaq huaña añi laponaxaqui qataq ra saʼaqtaxanaxam na laỹipi ra ñapaxaguenaqtega.
ʼAntoueetaʼac
¿Huáʼague ca iʼaxat ra ʼeetec iuen ra qaỹiʼoxoren ñi Dios?
¿Táʼaencoʼ ra iuen ra shiʼoxorenaq ndotec ñi Jehová?
¿Táʼaencoʼ ra iuen ra shiʼoxorenaq ñi Jehová ra salegaqtaigui nam ỹalaxaguet ñimaye?
ʼAUANATA CA LỸA
ʼAutaxaỹaxan na nʼaqtaguec «Saishet ra aỹem nlatac na nqolacpi», ra ỹachaxan ʼeetec aso ʼalo nsoueguesop na nqolacpi.
«Aye la Biblia naralaxat ra achaalataxac» (La Atalaya, 1 de julio de 2011)
ʼAuanata négueʼt ca ʼam itauan yaqtoʼ ʼan ca ʼarʼaqtac añi laponaxaqui.
«Shiʼoxorenaq ñi Jehová huaña añi la congregación» (La Atalaya, enero de 2019)
ʼAmeten ʼeetec ra so nsoqolec itauan na naponaxacpi naiʼctaxa ra qalaqaic ra tauaʼa.
Qalota na shiỹaxauapi iʼamaqten ra na cristianopi iuen ra roʼogoxona na cruz. Qalaxaye, ¿ỹaỹamaqchiguiñi ra soʼogoxonaxa yaqtoʼ shiʼoxorenaq ñi Dios?
«¿Táʼaencoʼ saishet ra roʼogoxona na cruz na testigopi de Jehová?» (Paxaguenaxat ye jw.org)
a Neʼena semallaxaqtapigui semetenaq ca lỹa paxaguenaxatpi.