Ỹataqta chochaq tateec ra qanauochaxaua Ñi Dios

Ỹataqta huo’o ra lvic ra sanataxac ca qanauochaxaua. Huo’o ra lvic ra qanauochaxaua Ñi Dios qalaxaye ra ỹataqta ñaañaxatac nache ñi maye nataqa’en qomi ỹanema ra lqouaxanaqtaic. So Jesús ‘enapeco’: “Qaq de’eda ‘eesa lataxac, nachida da ỹataqta qami’ huesochiyiñi naq’en” (Juan 8:32 DNS). ¿Negue’t ca naigui re’era l’aqtac so Jesús?

Nagui ishet ra qomi huesochiyiñi. Ra sauattonac Ñi Jehová nache qomi isoueguesopa ra lapaxaguenataxanaxac qataq ra latenataxanaxac so Satanás. Nataqa’en qomi ỹanema ra qanaquitaxac (Romanos 8:22). Na nauochaxauapi Ñi Dios sa ishet ra ñeetexa ra “lcolanaxa da nleuaxa” (Hebreos 2:14, 15 DNS).

Nache qomi huesochiyiñi ye Mataqa’. ¡Ỹataqta ‘onaxaic qome re’era qarmariaxac! Cha’aye ye mataqa’ nache sauaxaỹapexa qome ra huo’o ca laataxac, huo’otaq ra huo’o ca sa no’on qataq sa ala’a qome ca nachoxoyec qataq sauaxaỹapexa ra huo’o ca icouat. Nataqa’en imeuec qome ra nqueroxo qataq ra nleuaxa, qataq qaica qome ca ñeetapigui. Cha’aye ‘enapec Ñi Dios: ‘so’ot cam nshetaique nam ‘enauac ra huo’o ye nachaalataxac’ (Salmo 145:16).

Na nauochaxaupi Ñi Dios nache chochaq tateec ra nachaalataxac. Nache re’era qome chochaq tateec qa’nachaalataxac nache maiche lachetaqtaxanaxac Ñi Dios. Ñi maye nache ỹanem na maiche nauochaxauapi (Romanos 6:23). Nagui ra avita ne’ena nache qaica ra anaqtaxane ye maiche arcuennataxac cam ỹataqta naigui re’era lachetaqtaxanaxac Ñi Dios.

Huo’o qome ye qaraca ra huo’o ca so’otaq. Nache ishet qome ra ‘au’ot qataq ra anapaxaguena ca maiche ancopitexa, ra ancopita ra arvicnaxanaxac nache ishet ra anapaxaguena aca nvique, huo’otaq ra ancopita ra noxonaxanaxac, huo’otaq ca qamachaqca ca ancopitexa ra ‘au’ot. Nataqa’en qome ishet ra auauana nam a’lhua laỹipi nache anauattone na shiỹaxauapi lma’ na ‘alhuapi saxanaxa auauana. ‘Enauac re’era qaỹaxatac nache ishet qome ra so’otaq cha’aye chochaq tateec ca qanachaalataxac.

Huo’o qome ye qaraca ra sauotaique ca qanauochaxauapi. Cha’aye chochaq tateec qome ra anachaalataxac nache ishet taqa’en ra ñauatonaxai nam laỹipi nauochaxaua Ñi Dios. Qataq ñapaxaguenaxa cam laỹajnec qataq ye lataxac nache nataqa’en ivira’a ra qanauochaxaua na mayepi. Nache ‘enauac na shiỹaxauapi ỹauoteq ca lỹa (1 Corintios 13:8). Nache ishet ra anauochaxauapi ‘enauac na huetalec ana a’lhua. Nache re’era qarauoche Ñi Jehová qataq ra lauoche qomi ñi maye nache nquictauec nache qaica ca loga’t qome. ¡Nache ỹoqta chochaq tateec ra qanauochaxaua Ñi Dios!