NEREC 2
Qaỹolrauec ye Nmataqaʼ
So piguem lʼec npaʼaguenaxaua Ñi Dios ỹatenachet so Adán qataq aso Eva yaqto sanaxaỹaxana Ñi Dios. Yoʼoq ra nasouaxashet qataq ra nleuaxa
SO SAXANAXA qaỹoʼot na shiỹaxauapi nache Ñi Dios mashe lʼena ra ỹoʼot na lamaxashecpi piguem lʼecpi. Qalaxaye so ʼonolec, qomchi qaỹaxana Satanás huoʼotaq Diablo, ỹatenachet aso Eva yaqto chec aso ʼepaq ala saỹashen Ñi Dios.
So Satanás rogoxona so araxanac coʼolloxoche nactaxateguec aso Eva, nache ʼenaʼamso ra icoʼ ʼenapec ra huoʼo ca ỹoxotapiguiñe Ñi Dios. Taqaʼen ʼenapec ra cheʼec asaʼaso ʼepaq ala nache sa ishet ra ileʼu, so Satanás ỹoʼot reʼera chaʼaye huotaique ra qaicoleguet so lʼaqtac ñi Dios. So Satanás ỹaỹamaxachiguiñe so lʼaqtac chaʼaye huotaique ra ỹamacteʼn ra ishet ra ʼeetaʼama Ñi Dios, nache qaica ca ʼeetegalo ra huoʼotaq huoʼo ca ỹoʼoʼt. ʼEnauac reʼera coʼolloxoche nache chigoqchiguiña ra natenataxanaxac. Qalaxaye ram ỹataqta huotaique so Satanás ʼeetaʼ: ¿nachaqñitoʼ Ñi Dios ra qaỹalaxaguet? ¿Ỹaỹamaqchiguiñoʼ na lamaxasoxonacpi Ñi maye? ¿Huoʼo cam naigui ra salaxasoxoguet na lamaxasoxonacpi?
Aso Eva ỹamacten ra lʼaqtac so Satanás. Ỹoqoʼoye chec aso ʼepaq ala, nataqaʼen ỹami so lhua. Reʼera ỹoʼoʼt soo maye ʼenaʼam ra icoʼ qaica ca naigui qalaxaye naigui ra sanashenegueta ra lamaxasoxonaxac ñi Dios. Seʼeso ỹoʼoʼt soo maye ỹataqta naigui ra nasouaxashet. Soo maye ỹataqta ỹaỹateeteʼ ra saỹaỹamaxañe so ỹoʼoʼt.
Ra maye “Pigui na ʼaraqaic, qaq ʼam ʼanaigui ana lliʼaxa.” (Génesis 3:15 LÑI)
Ñi Dios sa ishet ra sochaq ỹaxaateec so lasouaxasheʼt so mayepi, nache iaʼaxataʼa qome ra huoʼo ca laxamashec yaqto ỹalauat so Satanás. Nataqaʼen iaʼaxat ra ileu qome so Adán qataq aso Eva qalaxaye ncuaʼaguec ra huaʼauriñe ra rcoʼoi, qalaxaye ¿huoʼo ra naquitaxac qome nam llalacpi soo maye? Ñi Jehová ʼenapecoʼ queʼeca lamaxashec nache ỹapalaxat ra nasouaxashet. Qalaxaye ¿chaxan negueʼt queʼeca lamaxashec qataq cam ʼeeteco ra ỹoʼot ram ʼeetapeguec ñi Dios? Nache sa ishet ra nacta ra qaỹaỹaten, mashe lcopaʼague coʼolloxoche ra qoiriñe aye la Biblia nache nacta ra qaỹaỹaten reʼera.
Ñi Dios iʼorauec so Adán qataq aso Eva ye nmataqaʼ, nache nagui ra huotaique ca aloq nache ỹataqta naʼañaxat. Aso Eva nache ñiguiñe so huaʼuchiguiñe llalec lʼenaxat, Caín. Nataqaʼen ñiguiñe so llalacpi laỹipi, nache huoʼo so Abel qataq so Set som chigoxoigui so Noé.
(Qaỹachigoxotaña ye Génesis capítulo 3 nache ivitaʼa ye capítulo 5, qataq ye Apocalipsis [Revelación] 12:9.)