Sa ishet ra qancachiitegaʼt

Ñi Jehová rquictaique ra sa nalaraʼt ca namoxoʼu (Malaquías 2:​16). Ra qaỹalaxaguet, nache nʼamaqtenaʼt. Qataq ra nʼamaqtenaʼt nquiguec ra nqopicheʼ ye nhuaỹaxac, ỹoqoʼoye ỹataqta ʼamaqtaqaic.

Nagui qalota na aloicpi ỹasauaxattac na nhuaỹaxac. Ra ʼantelaʼa ye ʼarhuaỹaxac, nache ʼauen ra ʼaulotelguete yeua dos ra ʼauʼot.

1 HUAʼAUÑI RA ʼALCAʼAUAʼA YE ʼARHUAỸAXAC

NA ʼENAC AYE LA BIBLIA: «Qalcaʼaiuaʼa ca ỹataqta ỹaỹamaqchiguiñi» (Filipenses 1:10, DNS). Ye ʼarhuaỹaxac nachiye ye ỹataqta ʼamaqtaqaic ra ʼanachaalataxa. ¡ʼAuen ra ʼantelaʼa!

Ñi Jehová nshetaique ra ʼarqopichaxayec ndotec huetalec ca ʼaramoxoua taq qamiʼ machiguiñi (Eclesiastés 9:9). Ñi maye ỹataqta ỹamaq ra saxaỹet ra ʼaloʼogue ca ʼaramoxoua, taq ʼanmitaique naxa ra ntootapec (1 Corintios 10:24). ʼAuʼot ca ʼaramoxoua ra nanomteguet ra ʼauen qataq ra ʼauauoʼo.

RA ISHET RA ʼAUʼOT:

• Saxaỹet ra ʼauauoʼo ca ʼarraqaʼ yaqtoʼ ishet ra ʼauachalec ca ʼaramoxoua ʼenauac ra ʼarqochoxo

• Sa ishet ra ʼamta ra ʼauennataxan. Taqaʼen ʼaualecneuo ca ʼaramoxoua

2 ʼANTELAʼA AÑI ʼARQUIYAQTE

NA ʼENAC AYE LA BIBLIA: «Da huoʼo ca choche ilotaʼa aca ʼalo, qaq huoʼo da lqopiche, nache camaye sogote da ʼeetaʼam da mashe ncacheỹaʼaiʼ acamaye dam lquiyaqteỹaxac» (Mateo 5:28). Ra huoʼo ca queta ra sa ỹaỹamaq ca lcuennataxa, nache ʼecoʼ mashe icachitapeguelec ca lamoxoua.

Ñi Jehová ʼenac ra ʼauen ra ʼantelaʼa añi ʼarquiyaqte (Proverbios 4:​23; Jeremías 17:9). Ra ʼauʼot reʼera, nache ʼauen ra ʼantelaʼa na ʼameten (Mateo 5:​29, 30). ʼAviʼinaxat so patriarca Job. Ỹoʼot so laỹamaxataxac ñiua lʼaiʼte yaqtoʼ huanna ra ilogui aca ʼalo lỹa ra lapaxauo ra lyaxa ra hueguet (Job 31:1). Ỹataqta ʼanʼañaxat ra huanna ra ʼameten na pornografía. Qataq qaica ra ʼanshapque ra ñaxat na nqopitaxanaqtaic ca sa ishet ra ʼaramoxoua.

RA ISHET RA ʼAUʼOT:

• Yoqta ʼauachaxana na ʼaraỹipi ra ỹataqta ʼanaỹamaxatteʼ ca ʼaramoxoua

• ʼAloʼoguet na lhuennataxacpi ca ʼaramoxoua, qaq ra huoʼo ca ʼalo qoʼ ỹale sa ỹalemaxat ye lcuennataxa, nache ʼalhuotta ra ʼaxaañe