LEVITIKO

1 Yehova wangudana Mozesi ndipu wangulongoro nayu kutuliya muchihema chakukumanaku.+ Iyu wangumukambiya kuti: 2 “Longoro ndi Ayisirayeli* ndipu uŵakambiyi kuti, ‘Asani mukhumba kupereka chiŵetu chinu nge sembi kwaku Yehova, muperekengi ng’ombi, mbereri pamwenga mbuzi.+

3 “‘Asani munthu wakhumba kupereka ng’ombi nge sembi yakupiriza, waperekengi ng’ombi yinthulumi yambula kalema.+ Wayiperekengi mwakukhumba kwaki+ pa masu paku Yehova, pakhomu la chihema chakukumanaku. 4 Iyu waŵikengi janja laki pamutu wa nyama yo yiperekekengi nge sembi yakupiriza, ndipu Chiuta wayilondiyengi kuti yibenekere maubudi nga munthu yo.

5 “‘Pavuli paki, tholi* linthulumi libayikengi pa masu paku Yehova, ndipu ŵana anthulumi aku Aroni, asembi,+ atongi ndopa zaki ndipu aziwazengi mumphepeti mosi mwa guŵa la sembi,+ lo le pafupi ndi khomu la chihema chakukumanaku. 6 Nyama yo ayiperekengi nge sembi yakupiriza, ayifuŵengi ndi kuyidumuwa viŵaluviŵalu.+ 7 Ŵana anthulumi aku Aroni, asembi, aŵikengepu motu paguŵa la sembi+ ndi kuŵikapu nkhuni pachanya paki. 8 Ŵana anthulumi aku Aroni, asembi, atongi viŵalu va nyama yo,+ limoza ndi mutu waki kweniso mafuta ngakubwalu kwa sana ndipu avilalikengi pachanya pa nkhuni zo ze pamotu, paguŵa la sembi. 9 Asukengi matumbu ngaki kweniso viboda vaki ndipu wasembi waviwotchengi paguŵa la sembi nge sembi yakupiriza kuti visunkhi josi. Yeniyi ndi sembi yakotcha ya kafungu kamampha* kwaku Yehova.+

10 “‘Asani munthu wakhumba kupereka mbereri pamwenga mbuzi+ nge sembi yakupiriza, waperekengi mwana wa mbereri pamwenga mbuzi ndipu nyama yo yitenere kuja yinthulumi yambula kalema.+ 11 Nyama yo, ayibayiyengi kunkhondi* kwa guŵa la sembi pa masu paku Yehova, ndipu ŵana anthulumi aku Aroni, asembi, awazengi ndopa zaki mumphepeti mosi mwa guŵa la sembi.+ 12 Wadumuwengi nyama yo viŵaluviŵalu, ndipu wasembi watongi viŵalu vo, limoza ndi mutu waki kweniso mafuta ngakubwalu kwa sana ndipu wavilalikengi pachanya pa nkhuni zo ze pamotu, paguŵa la sembi. 13 Wasukengi matumbu kweniso viboda ndipu wasembi watongi nyama yosi ndi kuyiwotcha paguŵa la sembi kuti yisunkhi josi. Yeniyi ndi sembi yakupiriza, sembi yakotcha ndi motu ya kafungu kamampha* kwaku Yehova.

14 “‘Kweni asani wakhumba kupereka viyuni nge sembi yakupiriza kwaku Yehova, waperekengi njiŵa pamwenga viwunda.*+ 15 Wasembi wazengi ndi chiyuni paguŵa la sembi ndipu wachichekengi pakhosi.* Pavuli paki, wachiwotchengi paguŵa la sembi kuti chisunkhi josi, kweni ndopa zaki wazidirengi pasi mumphepeti mwa guŵa la sembi. 16 Watuzgengi chidukuluku chaki ndipuso wakunyuwengi mavungwa ngaki ndipu wavitayengi pafupi ndi guŵa la sembi, kuvuma,* kumalu ngakutayaku vyotu.*+ 17 Chiyuni cho, wachiphwatuwengi pamsana kwambula kuchidumuliya limu. Pavuli paki, wasembi wachiwotchengi paguŵa la sembi, pachanya pa nkhuni zo ze pamotu, kuti chisunkhi josi. Yeniyi ndi sembi yakupiriza, sembi yakotcha ndi motu ya kafungu kamampha* kwaku Yehova.

2 “‘Asani munthu wakhumba kupereka sembi ya mbewu+ kwaku Yehova, waperekengi ufwa wakusilirika, ndipu wadengeku mafuta kweniso libani.+ 2 Pavuli paki, wazengi nawu ku ŵana anthulumi aku Aroni, asembi, ndipu wasembi watongepu ufwa wakusilirika wakukwana janja limoza, wakudaku mafuta kweniso libani. Iyu wawotchengi ufwa wo paguŵa la sembi kuti usunkhi josi, kuti umiyi sembi yosi.*+ Yeniyi ndi sembi yakotcha ndi motu ya kafungu kamampha* kwaku Yehova. 3 Vosi vo vajaku pa sembi ya mbewu, vaku Aroni ndi ŵana ŵaki anthulumi.+ Ivi ndi vinthu vakupaturika ukongwa+ vo vatuliya pa sembi yakotcha ndi motu yakuperekeka kwaku Yehova.

4 “‘Asani mukhumba kupereka sembi ya mbewu yakotcha mu uvunu, yijengi ya ufwa wakusilirika. Muperekengi viŵandi vakuzunguliya vazenji pakati vambula chakutupisa kweni vakudiraku mafuta, pamwenga viŵandi vakupapatika vambula chakutupisa vakupakaku mafuta.+

5 “‘Asani mukhumba kupereka sembi ya mbewu yakukazinga padinga,+ yijengi ya ufwa wakusilirika. Muperekengi viŵandi vambula chakutupisa kweni vakudiraku mafuta. 6 Muvimenyengi kuti vije vimanavimana, ndipu mudengeku mafuta.+ Yeniyi ndi sembi ya mbewu.

7 “‘Asani mukhumba kupereka sembi ya mbewu yakubika mumumphika, yijengi yakupangika ndi ufwa wakusilirika kweniso mafuta. 8 Muzengi kwaku Yehova ndi sembi ya mbewu yakupangika mu nthowa yeniyi, ndipu muyiperekengi kwa wasembi yo walutengi nayu pafupi ndi guŵa la sembi. 9 Wasembi watongi yinyaki mwa sembi ya mbewu kuti yimiyi sembi yosi.*+ Ndipu wayiwotchengi paguŵa la sembi kuti yisunkhi josi. Yeniyi ndi sembi yakotcha ya kafungu kamampha* kwaku Yehova.+ 10 Vo vajaku pa sembi ya mbewu, vaku Aroni ndi ŵana ŵaki anthulumi. Ivi ndi vinthu vakupaturika ukongwa vo vatuliya pa sembi yakotcha ndi motu yakuperekeka kwaku Yehova.+

11 “‘Mungaperekanga cha kwaku Yehova sembi ya mbewu yakusazgaku chakutupisa,+ pakuti mukhumbika cha kupereka fulawu wakukasa wakusazgaku chakutupisa pamwenga uchi,* kuti viwotcheki ndi kusunkha josi nge sembi yakotcha ndi motu yakuperekeka kwaku Yehova.

12 “‘Mungapereka vinthu venivi kwaku Yehova nge sembi ya vipasu vakwamba.+ Kweni mukhumbika cha kuviwotcha paguŵa la sembi kuti vituzgi kafungu kamampha.*

13 “‘Mudengi mche ku sembi yeyosi ya mbewu yo mukhumba kupereka, ndipu muwonesesengi kuti ku sembi yinu ya mbewu mwadaku mche wa phanganu laku Chiuta winu. Asani mupereka sembi yeyosi muperekengi so mche.+

14 “‘Asani mukhumba kupereka kwaku Yehova sembi ya mbewu ya vipasu vakwamba kucha, muperekengi tirigu* wambula kumira, wakukazinga kweniso wambula kupulisa, kuti yije sembi ya mbewu ya vipasu vinu vakwamba kucha.+ 15 Ndipu ku tirigu yo, mudengeku mafuta kweniso muŵikengeku libani. Yeniyi ndi sembi ya mbewu. 16 Wasembi watongepu tirigu wambula kupulisa yo adaku mafuta kweniso kuŵikaku libani, ndipu wamuwotchengi kuti wasunkhi josi. Tirigu yo, wamiyengi sembi yosi.*+ Yeniyi ndi sembi yakotcha ndi motu yakuperekeka kwaku Yehova.

3 “‘Asani munthu wakhumba kupereka sembi ya chimangu,+ kwali wakhumba kupereka ng’ombi yinthulumi pamwenga yinthukazi, waperekengi nyama yambula kalema pa masu paku Yehova. 2 Iyu waŵikengi janja laki pamutu wa nyama yo, ndipu yibayikengi pafupi ndi khomu la chihema chakukumanaku. Pavuli paki, ŵana anthulumi aku Aroni, asembi, awazengi ndopa zaki mumphepeti mosi mwa guŵa la sembi. 3 Ku sembi ya chimangu, watongeku chigaŵa chinyaki kuti chiperekeki kwaku Yehova nge sembi yakotcha ndi motu.+ Watongeku mafuta+ ngakubwalu kwa matumbu, mafuta ngosi nga kumatumbu, 4 ndipuso sana zosi ziŵi ndi mafuta nga kusana zo, ngo nge pafupi ndi chiwunu. Watongeku so mafuta nga kuchiŵindi limoza ndi sana.+ 5 Ŵana anthulumi aku Aroni awotchengi vinthu venivi paguŵa la sembi kuti visunkhi josi. Aviŵikengi pachanya pa sembi yakupiriza yo yaŵikika pa nkhuni zo ze pachanya pa motu.+ Yeniyi ndi sembi yakotcha ndi motu ya kafungu kamampha*+ kwaku Yehova.

6 “‘Asani munthu wakhumba kupereka mbereri pamwenga mbuzi kwaku Yehova, waperekengi nyama yinthulumi pamwenga yinthukazi yambula kalema.+ 7 Asani wakhumba kupereka mwana wa mbereri munthulumi nge sembi, wazengi nayu pa masu paku Yehova. 8 Iyu waŵikengi janja laki pamutu wa nyama yo, ndipu yibayikengi panthazi pa chihema chakukumanaku. Pavuli paki, ŵana anthulumi aku Aroni, asembi, awazengi ndopa zaki mumphepeti mosi mwa guŵa la sembi. 9 Ku sembi ya chimangu, watongeku mafuta kuti ngaperekeki kwaku Yehova nge sembi yakotcha ndi motu.+ Wadumuwengeku muchiya wosi wa mafuta pafupi ndi chiwanga chapamsana, watongeku mafuta ngakubwalu kwa matumbu, mafuta ngosi nga kumatumbu, 10 ndipuso sana zosi ziŵi ndi mafuta nga kusana zo, ngo nge pafupi ndi chiwunu. Watongeku so mafuta nga kuchiŵindi limoza ndi sana.+ 11 Ndipu wasembi waviwotchengi paguŵa la sembi nge chakurya* kuti visunkhi josi. Yeniyi ndi sembi yakotcha ndi motu yakuperekeka kwaku Yehova.+

12 “‘Asani munthu wakhumba kupereka mbuzi nge sembi, wazengi nayu pa masu paku Yehova. 13 Iyu waŵikengi janja laki pamutu wa nyama yo, ndipu yibayikengi panthazi pa chihema chakukumanaku. Pavuli paki, ŵana anthulumi aku Aroni, asembi, awazengi ndopa zaki mumphepeti mosi mwa guŵa la sembi. 14 Vinthu vo waviperekengi kwaku Yehova nge sembi yakotcha ndi motu, ndi ivi: Mafuta ngakubwalu kwa matumbu, mafuta ngosi nga kumatumbu,+ 15 ndipuso sana zosi ziŵi ndi mafuta nga kusana zo, ngo nge pafupi ndi chiwunu. Waperekengi so mafuta nga kuchiŵindi limoza ndi sana. 16 Ndipu wasembi waviwotchengi paguŵa la sembi nge chakurya* kuti visunkhi josi. Yeniyi ndi sembi yakotcha ndi motu ya kafungu kamampha.* Mafuta ngosi ngaku Yehova.+

17 “‘Mungaryanga cha mafuta ngengosi pamwenga ndopa zezosi.+ Lenili ndi dangu lamuyaya mu migonezi yinu yosi, kwekosi ko muja.’”

4 Yehova wangulutirizga kulongoro ndi Mozesi ndipu wangukamba kuti: 2 “Kambiya Ayisirayeli kuti, ‘Asani munthu wabuda kwambula kuziŵa,+ mwakuchita chimoza mwa vinthu vo Yehova wakukaniza, muchitengi ivi:

3 “‘Asani wasembi yo wakusankhika*+ wabuda+ ndipu wachitiska kuti ŵanthu wosi aje ndi mulandu, wazengi ndi tholi* linthulumi lambula kalema kuti liperekeki kwaku Yehova nge sembi ya ubudi chifukwa cha ubudi wo wachita.+ 4 Tholi lo, wazengi nalu pakhomu la chihema chakukumanaku+ pa masu paku Yehova. Waŵikengi janja laki pamutu wa tholi lo, ndipu walibayengi pa masu paku Yehova.+ 5 Pavuli paki, wasembi yo wakusankhika*+ watongi zinyaki mwa ndopa za tholi lo, ndipu waserengi nazu muchihema chakukumanaku. 6 Wasembi yo wabizgengi chikumbu chaki mundopa+ zo, ndipu wazinthonyezengi pasi panthazi pa ketani ya mumalu ngakupaturika maulendu 7,+ pa masu paku Yehova. 7 Wasembi yo, wapakengi zinyaki mwa ndopa za tholi lo kumasengwi nga guŵa la sembi za vakununkhira,+ lo le pa masu paku Yehova muchihema chakukumanaku. Ndopa zinyaki zosi wazidirengi musina mwa guŵa la sembi zakupiriza+ lo le pafupi ndi khomu la chihema chakukumanaku.

8 “‘Pavuli paki, watongeku mafuta ngosi nga tholi linthulumi la sembi ya ubudi. Watongeku mafuta ngakubwalu kwa matumbu, mafuta nga kumatumbu, 9 ndipuso sana zosi ziŵi ndi mafuta nga kusana zo, ngo nge pafupi ndi chiwunu. Watongeku so mafuta nga kuchiŵindi limoza ndi sana.+ 10 Vinthu venivi viyananengi ndi vo vitoleka ku ng’ombi yinthulumi ya sembi ya chimangu.+ Ndipu wasembi waviwotchengi paguŵa la sembi zakupiriza kuti visunkhi josi.

11 “‘Kweni chikopa cha tholi lo, nyama yaki yosi limoza ndi mutu waki, viboda vaki kweniso mavi ngaki,+ 12 kung’anamuwa tholi losi, walutengi nalu kubwalu kwa msasa kumalu ngambula kufipiskika ko adira vyotu* ndipu waliwotchengi pamotu wa nkhuni.+ Watenere kuliwotche ko adira vyotu.

13 “‘Asani Ayisirayeli wosi ŵe* ndi mulandu chifukwa chakuti achita ubudi kwambula kuziŵa+ kweni mpingu* waziŵa cha kuti Ayisirayeli achita chinthu cho Yehova wakuŵakaniza,+ 14 ndipu pavuli paki ubudi wo waziŵika, mpingu* utongi tholi linthulumi la sembi ya ubudi ndipu ulutengi nalu panthazi pa chihema chakukumanaku. 15 Ŵara ŵa Ayisirayeli aŵikengi manja ngawu pamutu wa tholi lo pa masu paku Yehova ndipu tholi lo libayikengi pa masu paku Yehova.

16 “‘Pavuli paki, wasembi yo wakusankhika* walutengi ndi zinyaki mwa ndopa za tholi lo muchihema chakukumanaku. 17 Wasembi yo, wabizgengi chikumbu chaki mundopa zo ndipu wazinthonyezengi pasi panthazi pa ketani+ maulendu 7, pa masu paku Yehova. 18 Pavuli paki, wapakengi zinyaki mwa ndopa zo kumasengwi nga guŵa la sembi+ lo le pa masu paku Yehova muchihema chakukumanaku. Ndopa zinyaki zosi wazidirengi musina mwa guŵa la sembi zakupiriza lo le pafupi ndi khomu la chihema chakukumanaku.+ 19 Watongeku mafuta ngosi nga tholi lo ndipu wangawotchengi paguŵa la sembi kuti ngasunkhi josi.+ 20 Tholi ili wachiti nalu nge mo wanguchitiya ndi tholi lakwamba la sembi ya ubudi. Venivi ndivu wasembi wachitengi kuti wabenekere maubudi ngawu+ ndipu Chiuta waŵagowokiyengi. 21 Tholi lo walutengi nalu kubwalu kwa msasa ndipu waliwotchengi nge mo wanguwotche tholi lakwamba.+ Iyi ndi sembi ya ubudi ya Ayisirayeli wosi.+

22 “‘Asani mulongozgi+ wabuda kwambula kuziŵa, ndipu we ndi mulandu chifukwa chakuti wachita vinthu vo Yehova Chiuta waki wakukaniza, 23 pamwenga asani waziŵa kuti wabuda chifukwa chakuti waswa dangu, wazengi ndi mwana wa mbuzi munthulumi wambula kalema kuti yije sembi yaki. 24 Iyu waŵikengi janja laki pamutu wa mbuzi yo ndipu wayibayengi pa masu paku Yehova,+ pamalu ngo abayiyapu nyama yo yiperekeka nge sembi yakupiriza. Yeniyi ndi sembi ya ubudi. 25 Wasembi watongi zinyaki mwa ndopa za sembi ya ubudi ndi chikumbu chaki ndipu wazipakengi kumasengwi+ nga guŵa la sembi zakupiriza ndipu ndopa zinyaki zosi wazidirengi musina mwa guŵa la sembi zakupiriza.+ 26 Wawotchengi mafuta ngosi nga mbuzi yo paguŵa la sembi kuti ngasunkhi josi nge mo achitiya ndi mafuta nga sembi ya chimangu.+ Wasembi wabenekeriyengi ubudi wa mulongozgi yo ndipu Chiuta wamugowokiyengi.

27 “‘Asani munthu munyaki weyosi wabuda kwambula kuziŵa ndipu we ndi mulandu chifukwa chakuti wachita vinthu vo Yehova wakukaniza,+ 28 pamwenga asani waziŵa kuti wachita ubudi, wazengi ndi mwana wa mbuzi munthukazi kuti waperekeki nge sembi chifukwa cha ubudi wo wachita. 29 Iyu waŵikengi janja laki pamutu wa mbuzi yo yiperekekengi nge sembi ya ubudi ndipu wayibayengi pamalu ngo abayiyapu nyama yo yiperekeka nge sembi yakupiriza.+ 30 Wasembi watongi zinyaki mwa ndopa za mbuzi yo ndi chikumbu chaki ndipu wazipakengi kumasengwi nga guŵa la sembi zakupiriza ndipu ndopa zinyaki zosi wazidirengi musina mwa guŵa la sembi.+ 31 Watongeku mafuta ngosi nga mbuzi+ yo nge mo atuzgiyaku mafuta ku sembi ya chimangu,+ ndipu wasembi wangawotchengi paguŵa la sembi kuti ngasunkhi josi kuti yije sembi ya kafungu kamampha* kwaku Yehova. Wasembi wabenekeriyengi ubudi wa munthu yo ndipu Chiuta wamugowokiyengi.

32 “‘Kweni asani munthu yo wakhumba kupereka mwana wa mbereri nge sembi ya ubudi, wazi ndi mwana wa mbereri munthukazi wambula kalema. 33 Iyu waŵikengi janja laki pamutu wa mwana wa mbereri yo yiperekekengi nge sembi ya ubudi ndipu wayibayengi pamalu ngo abayiyapu nyama yo yiperekeka nge sembi yakupiriza.+ 34 Wasembi watongi zinyaki mwa ndopa za sembi ya ubudi ndi chikumbu chaki ndipu wazipakengi kumasengwi nga guŵa la sembi zakupiriza+ ndipu ndopa zinyaki zosi wazidirengi musina mwa guŵa la sembi zakupiriza. 35 Watongeku mafuta ngosi nga mwana wa mbereri yo nge mo atole mafuta ku mwana wa mbereri munthulumi yo waperekeka nge sembi ya chimangu, ndipu wasembi wawotchengi mafuta ngo paguŵa la sembi kuti ngasunkhi josi. Iyu wangawotchiyengi pachanya pa sembi zakotcha ndi motu zakuperekeka kwaku Yehova.+ Wasembi wabenekeriyengi ubudi wo munthu yo wachita ndipu Chiuta wamugowokiyengi.+

5 “‘Asani munthu wawona munthu munyaki wachichita ubudi pamwenga wavwa kuti wachita ubudi, ndipu wavwa chipharazgu kuti wakachitiyi ukaboni,*+ kweni waluta cha kuchikamba, mbwenu wabuda ndipu watenere kulangika chifukwa cha kunanga kwaki.

2 “‘Asani munthu wakwaska chinthu chechosi chakufipiskika, kwali ndi nyama yamudondu yakufwa, chiŵetu chakufwa pamwenga tividononu to titenda tinandi to nthakufwa, ndikuti wafipiskika+ ndipu we ndi mulandu chinanga kuti waziŵa cha. 3 Asani munthu kwambula kuziŵa, wakwaska vinthu vakufipiska vakutuliya ku munthu, chinthu chechosi chakufipiskika pamwenga munthu wakufipiskika,+ vo vingamuchitiska kuti wafipiskiki, ndipu pavuli paki waziŵa kuti wakwaska vinthu venivi, wajengi ndi mulandu.

4 “‘Asani munthu kwambula kuziŵa walapizga mwaliŵi kuti wachitengi chinthu chinyaki, kwali ntchamampha pamwenga ntchiheni, vilivi kanthu kuti ntchinthu wuli, kweni pavuli paki waziŵa kuti wangulapizga mwaliŵi, wajengi ndi mulandu.*+

5 “‘Asani munthu wasanirika ndi mulandu wakuti wachita chimoza mwa vinthu venivi, mbwenu wasumuwi+ mo wabudiya. 6 Ndipuso munthu yo, waperekengi sembi ya mulandu kwaku Yehova chifukwa cha ubudi wo wachita.+ Waperekengi mbereri pamwenga mbuzi yinthukazi, wangapereka mwana wa mbereri pamwenga mwana wa mbuzi munthukazi kuti yije sembi ya ubudi. Pavuli paki, wasembi wabenekeriyengi ubudi wo munthu yo wachita.

7 “‘Kweni asani wangafiska cha kupereka mbereri, waperekengi kwaku Yehova njiŵa ziŵi pamwenga viwunda* viŵi+ nge sembi ya mulandu chifukwa cha ubudi wo wachita. Chiyuni chimoza chijengi cha sembi ya ubudi ndipu chinyaki chijengi cha sembi yakupiriza.+ 8 Iyu wazengi ndi viyuni vo kwa wasembi. Chakwamba, wasembi yo waperekengi chiyuni cha sembi ya ubudi. Iyu wachichekengi pakhosi* kwambula kudumuliya limu mutu. 9 Pavuli paki, wanthonyezengi zinyaki mwa ndopa za sembi ya ubudi mumphepeti mwa guŵa la sembi, kweni ndopa zo zajaku wazidirengi musina mwa guŵa la sembi.+ Yeniyi ndi sembi ya ubudi. 10 Wasembi waperekengi chiyuni chinyaki nge sembi yakupiriza mwakulondo ndondomeku ya nyengu zosi.+ Wasembi wabenekeriyengi ubudi wo munthu yo wachita ndipu Chiuta wamugowokiyengi.+

11 “‘Asani munthu wangafiska cha kupereka njiŵa ziŵi pamwenga viwunda* viŵi, waperekengi ufwa wakusilirika wakukwana chigaŵa chimoza mwa vigaŵa 10 va mwesu wa efa*+ nge sembi ya ubudi. Ndipu wangasazgangaku mafuta cha pamwenga libani pakuti ndi sembi ya ubudi. 12 Wazengi ndi ufwa wo kwa wasembi. Wasembi watongepu ufwa wakukwana janja limoza kuti umiyi sembi yosi,* ndipu wawuwotchiyengi pachanya pa sembi zakotcha ndi motu zakuperekeka kwaku Yehova kuti usunkhi josi. Yeniyi ndi sembi ya ubudi. 13 Wasembi wabenekeriyengi ubudi wo munthu yo wachita. Wabenekeriyengi maubudi ngenanga, ndipu Chiuta wagowokiyengi munthu yo.+ Ufwa wo wajaku uperekekengi kwa wasembi,+ nge mo vijaliya ndi sembi ya mbewu.’”+

14 Yehova wangulutirizga kulongoro ndi Mozesi, ndipu wangukamba kuti: 15 “Asani munthu kwambula kuziŵa wachita vinthu mwambula kugomezgeka ndipu wabudiya vinthu vakupaturika vaku Yehova,+ wazengi kwaku Yehova ndi mbereri yinthulumi yambula kalema nge sembi ya mulandu.+ Mtengu wa mbereri yo mu masekeli* nga siliva, ujengi wakukoliyana ndi sekeli ya mumalu ngakupaturika.*+ 16 Walipiyengepu vinthu vo wananga mumalu ngakupaturika chifukwa cha ubudi wo wachita ndipuso wasazgiyengepu chimoza mwa vigaŵa vinkhondi va mtengu waki.+ Waziperekengi kwa wasembi, kuti wabenekere ubudi+ wa munthu yo ndi mbereri yinthulumi ya sembi ya mulandu ndipu Chiuta wamugowokiyengi.+

17 “Asani munthu munyaki wabuda mwakuchita vinthu vo Yehova wakamba kuti angachitanga cha, chinanga kuti munthu yo waziŵa cha, we ndi mulandu mbwenu ndipu watenere kulangika chifukwa cha kunanga kwaki.+ 18 Wazengi kwa wasembi ndi mbereri yinthulumi yambula kalema mwakukoliyana ndi mtengu wo ukujalikiskika kuti yije sembi ya mulandu.+ Pavuli paki, wasembi wabenekeriyengi ubudi wo munthu yo wanguchita kwambula kuziŵa ndipu Chiuta wamugowokiyengi. 19 Yeniyi ndi sembi ya mulandu. Munthu yo we ndi mulandu chifukwa chakuti wabudiya Yehova.”

6 Yehova wangulutirizga kulongoro ndi Mozesi, ndipu wangukamba kuti: 2 “Asani munthu wabuda ndipu wachita vinthu mwambula kugomezgeka kwaku Yehova+ mwakupusika munyaki pa vinthu vo wangumupaska kuti wamusungiyi+ pamwenga pa vinthu vo wangumupaska kuti wamukoleze, kwali wamubiya pamwenga kumuryiya, 3 pamwenga wasaniya chinthu cho munthu munyaki wangutaya kweni wakana kuti ndiyu watondo, ndipu asani walapizga mwaboza kuti wabuda cha,+ wachitengi ivi: 4 Asani wabuda ndipu we ndi mulandu, wawezengi chinthu cho wanguba, chinthu cho wanguphanga, chinthu cho wanguto mwachinyengu, chinthu cho wangupaskika kuti wasungi, chinthu cho wangutondo, 5 pamwenga chinthu chechosi cho wangulapizga mwaboza. Waweziyengepu mwakukoliyana ndi mtengu wa chinthu cho,+ ndipu wasazgiyengepu chimoza mwa vigaŵa vinkhondi va mtengu waki. Waperekengi ku mweneku pa zuŵa lo amusaniya ndi mulandu. 6 Wazengi ndi sembi ya mulandu kwa wasembi kuti wapereki kwaku Yehova. Ndipu waperekengi mbereri yinthulumi yambula kalema mwakukoliyana ndi mtengu wo ukuŵikika, kuti yije sembi ya mulandu.+ 7 Wasembi wabenekeriyengi ubudi wa munthu yo pa masu paku Yehova, ndipu Chiuta wamugowokiyengi chechosi cho wachita kuti wasaniriki ndi mulandu.”+

8 Yehova wangulutirizga kulongoro ndi Mozesi ndipu wangukamba kuti: 9 “Lamula Aroni ndipuso ŵana ŵaki anthulumi kuti, ‘Dangu la sembi yakupiriza ndi ili:+ Sembi yakupiriza yijengi pamotu wa paguŵa la sembi usiku wosi mpaka mlenji, ndipu motu ungazimwanga cha paguŵa la sembi. 10 Wasembi wavwalengi vakuvwala vasalu va asembi,+ ndipu wavwalengi so kabunthu wasalu*+ kuti wabisi liŵavu laki. Pavuli paki, watuzgengepu vyotu*+ va sembi yakupiriza yo yanyeka ndi motu, ndipu waviŵikengi pafupi ndi guŵa la sembi. 11 Pavuli paki, wazuwengi vakuvwala vaki+ ndi kuvwala vinyaki ndipu watongi vyotu ndi kuluta navu kumalu ngambula kufipiskika kubwalu kwa msasa.+ 12 Motu ulutirizgengi kukole paguŵa la sembi. Ungazimwanga cha. Wasembi wasonkhengepu nkhuni+ mlenji wewosi ndipu pachanya paki waŵikengepu sembi yakupiriza. Wasembi wawotchengi sembi za chimangu pamotu wo kuti zisunkhi josi.+ 13 Motu ulutirizgengi kukole paguŵa la sembi. Ungazimwanga cha.

14 “‘Sonu dangu la sembi ya mbewu ndi ili:+ Yimwi ŵana anthulumi aku Aroni muperekengi sembi yeniyi pa masu paku Yehova panthazi pa guŵa la sembi. 15 Yumoza waku yiwu watongi ufwa wakuzaza janja limoza wa sembi ya mbewu ndipuso mafuta ngaki nganyaki ndi libani losi lo le ku sembi ya mbewu. Iyu wawotchengi ufwa wo paguŵa la sembi kuti usunkhi josi. Yeniyi ndi sembi yakotcha ndi motu ya kafungu kamampha* yakumiya sembi yosi* kwaku Yehova.+ 16 Aroni ndi ŵana ŵaki anthulumi aryengi vo vajaku.+ Vinthu venivi apangiyengi viŵandi vambula chakutupisa ndipu aryiyengi mumalu ngakupaturika. Aryiyengi mubalaza la chihema chakukumanaku.+ 17 Pakupanga viŵandi vo, angasazgangaku chakutupisa cha.+ Ndaŵapaska nge chigaŵa chawu kutuliya pa sembi zangu zakotcha ndi motu.+ Chenichi ntchinthu chakupaturika ukongwa+ nge mo viliri ndi sembi ya ubudi kweniso sembi ya mulandu. 18 Munthulumi weyosi pa ŵana aku Aroni, waryengi vinthu venivi.+ Chenichi ntchigaŵa chawu chambula kumala mu migonezi yawu yosi chakutuliya pa sembi zaku Yehova zakotcha ndi motu.+ Chechosi cho chakwaska vinthu venivi* chijengi chakupaturika.’”

19 Yehova wangulongoro so ndi Mozesi kuti: 20 “Pa zuŵa lo Aroni waŵikikengi nge wasembi, iyu ndi ŵana ŵaki anthulumi aperekengi vinthu ivi kwaku Yehova nge sembi:+ ufwa wakusilirika wakukwana chigaŵa chimoza mwa vigaŵa 10 va mwesu wa efa*+ nge sembi ya mbewu ya nyengu zosi,+ hafu ya ufwa wo ayiperekengi ndi mlenji ndipu hafu yinyaki ayiperekengi ndi mazulu. 21 Yikazingikengi padinga ndi mafuta.+ Muzengi nayu yakusazgika umampha ndi mafuta ndipu muyiperekengi nge viŵandi vakumenyamenya va sembi ya mbewu kuti vije sembi ya kafungu kamampha* kwaku Yehova. 22 Yumoza wa ŵana anthulumi aku Aroni yo wazamusere mumalu mwaki nge wasembi+ waziyiperekengi. Yiziperekekengi kwaku Yehova nge sembi yakupiriza yamphumphu ndipu yiziwotchekengi kuti yisunkhi josi. Lenili ndi dangu lambula kumala. 23 Sembi yeyosi ya mbewu ya wasembi yijengi sembi yamphumphu. Yingaryikanga cha.”

24 Yehova wangulongoro so ndi Mozesi, ndipu wangukamba kuti: 25 “Kambiya Aroni ndi ŵana ŵaki anthulumi kuti, ‘Dangu la sembi ya ubudi ndi ili:+ Pamalu po mubayiya sembi yakupiriza ndipu mubayiyengi+ so sembi ya ubudi, pa masu paku Yehova. Chenichi ntchinthu chakupaturika ukongwa. 26 Wasembi yo wapereka sembi ya ubudi ndiyu waryengi sembi yo.+ Wayiryiyengi mumalu ngakupaturika, mubalaza la chihema chakukumanaku.+

27 “‘Chechosi cho chakwaska sembi yo chijengi chakupaturika. Ndipu asani munthu wanthonyeze ndopa za sembi yo pachakuvwala chaki, chakuvwala cho chichapikiyengi mumalu ngakupaturika.* 28 Chiyaŵi chadongu cho mwabikiyamu nyama yo muchiswengi. Kweni asani mwayibikiya muchiyaŵi chamkuŵa, muchikwenthengi ndi kuchisuka ndi maji.

29 “‘Munthulumi weyosi yo ngwasembi ndiyu waryengi sembi yo.+ Chenichi ntchinthu chakupaturika ukongwa.+ 30 Kweni asani ndopa za sembi ya ubudi asere nazu muchihema chakukumanaku kuti akazigwiriskiyi ntchitu pakubenekere maubudi mumalu ngakupaturika, nyama yaki yingaryikanga cha.+ Yiwotchekengi ndi motu.

7 “‘Dangu la sembi ya mulandu ndi ili:+ Yeniyi ndi sembi yakupaturika ukongwa. 2 Pamalu po abayiya sembi ya mulandu ndipu abayiyengi so sembi yakupiriza, ndipu ndopa zaki+ aziwazengi mumphepeti mosi mwa guŵa la sembi.+ 3 Wasembi waperekengi mafuta ngosi nga nyama yo.+ Waperekengi muchiya wamafuta, mafuta ngakubwalu kwa matumbu, 4 ndipuso sana zosi ziŵi ndi mafuta nga kusana zo, ngo nge pafupi ndi chiwunu. Waperekengi so mafuta nga kuchiŵindi limoza ndi sana.+ 5 Wasembi wawotchengi vinthu venivi paguŵa la sembi, kuti visunkhi josi nge sembi yakotcha ndi motu yakuperekeka kwaku Yehova.+ Yeniyi ndi sembi ya mulandu. 6 Munthulumi weyosi yo ngwasembi ndiyu waryengi sembi yo,+ ndipu wayiryiyengi mumalu ngakupaturika.* Chenichi ntchinthu chakupaturika ukongwa.+ 7 Dangu la sembi ya ubudi ligwirengi so ntchitu pa sembi ya mulandu. Ndipu nyama ya sembi yo, yijengi ya wasembi mweniyo wayigwiriskiya ntchitu pakubenekere maubudi.+

8 “‘Asani munthu waza ndi nyama ya sembi yakupiriza kwa wasembi kuti wamupereke, chikopa+ cha nyama yo chijengi cha wasembi.

9 “‘Sembi yeyosi ya mbewu yakotcha mu uvunu, yakubika mumumphika pamwenga yakukazinga padinga,+ nja wasembi yo wayipereka. Yijengi yaki.+ 10 Kweni sembi yeyosi ya mbewu yakudaku mafuta+ pamwenga yambula mafuta+ yijengi ya ŵana anthulumi wosi aku Aroni. Ndipu agaŵanengi mwakuyanana.

11 “‘Sonu dangu la sembi ya chimangu+ yo munthu wangapereka kwaku Yehova ndi ili: 12 Asani munthu wakhumba kupereka sembi yakulongo kuwonga,+ waperekengi sembi yo limoza ndi viŵandi vakuzunguliya vazenji pakati vambula chakutupisa kweni vijengi vakudiraku mafuta, viŵandi vakupapatika vambula chakutupisa vakupakaku mafuta, ndipuso viŵandi vakuzunguliya vazenji pakati va ufwa wakusilirika wakusazgika umampha ndi mafuta. 13 Pakupereka sembi za chimangu zakulongo kuwonga, waziperekengi limoza ndi viŵandi vakuzunguliya vazenji pakati vakusazgaku chakutupisa. 14 Pa mtundu wewosi wa viŵandi ivi, watongepu chiŵandi chimoza ndipu waviperekengi kwaku Yehova nge chigaŵa chakupaturika. Viŵandi venivi vijengi va wasembi yo wawaza ndopa za sembi za chimangu.+ 15 Nyama ya sembi ya chimangu yakulongo kuwonga yiryikengi pa zuŵa lo wayipereke. Angasunganga nyama yeyosi cha kuti yifiki mlenji.+

16 “‘Asani munthu wapereka sembi kuti wafiski vo wakulapizga+ pamwenga asani wapereka sembi mwakukhumba yija,+ sembi yo yiryikengi pa zuŵa lo yaperekeke, ndipu yo yajaku yingaryika so pa zuŵa lamawa laki. 17 Kweni asani nyama ya sembi yo, yafika pa zuŵa lachitatu yiwotchekengi ndi motu.+ 18 Asani nyama ya sembi ya chimangu yaryika pa zuŵa lachitatu, munthu yo wayipereka wayanjikengi cha ndi Chiuta. Sembi yo, wayanduwengi nayu cha. Nyama yo njakufipiskika ndipu munthu yo wayirya, watenere kulangika chifukwa cha kunanga kwaki.+ 19 Nyama yo yakwaska chinthu chechosi chakufipiskika yingaryikanga cha. Yiwotchekengi ndi motu. Munthu weyosi wambula kufipiskika wangarya nyama yambula kufipiskika.

20 “‘Kweni asani munthu weyosi wakufipiskika warya nyama ya sembi ya chimangu, yo njaku Yehova, wabayikengi kuti waleki kuja pakati pa ŵanthu a mtundu waki.+ 21 Asani munthu wakwaska chinthu chechosi chakufipiskika, kwali ndi vinthu vakufipiska vakutuliya ku munthu,+ pamwenga nyama yakufipiskika+ pamwenga chinthu chinyaki chechosi chakufipiskika kweniso chaukazuzi,+ ndipu pavuli paki warya nyama ya sembi ya chimangu, yo njaku Yehova, wabayikengi kuti waleki kuja pakati pa ŵanthu a mtundu waki.’”

22 Yehova wangulutirizga kulongoro ndi Mozesi, ndipu wangukamba kuti: 23 “Kambiya Ayisirayeli kuti, ‘Mungaryanga cha mafuta+ ngengosi nga ng’ombi, mbereri pamwenga mbuzi. 24 Mafuta nga nyama yo yafwa yija, pamwenga nyama yo yabayika ndi nyama yinyaki, ngangagwiriskikiya ntchitu pa vinthu vinyaki, kweni mungaryanga cha.+ 25 Pakuti weyosi yo warya mafuta nga nyama yo yaperekeka kwaku Yehova nge sembi yakotcha ndi motu, wabayikengi kuti waleki kuja pakati pa ŵanthu a mtundu waki.

26 “‘Mungaryanga cha ndopa+ zezosi kwekosi ko muja, kwali ndi ndopa za viyuni pamwenga ndopa za nyama. 27 Munthu weyosi yo warya ndopa zezosi, wabayikengi+ kuti waleki kuja pakati pa ŵanthu a mtundu waki.’”

28 Yehova wangulutirizga kulongoro ndi Mozesi, ndipu wangukamba kuti: 29 “Kambiya Ayisirayeli kuti, ‘Weyosi yo wapereka sembi ya chimangu kwaku Yehova, watongi chigaŵa chinyaki cha sembi yaki ya chimangu ndipu wachiperekengi kwaku Yehova.+ 30 Iyu wazengi ndi mafuta+ limoza ndi nganga mumanja mwaki nge sembi yakotcha ndi motu yakuperekeka kwaku Yehova. Ndipu waviyendesengi uku ndi uku pa masu paku Yehova nge sembi yakuzungunya.*+ 31 Wasembi wawotchengi mafuta ngo paguŵa la sembi+ kuti ngasunkhi josi, kweni nganga njaku Aroni ndi ŵana ŵaki anthulumi.+

32 “‘Pa sembi zinu za chimangu+ mutongepu chiŵa chakumaryi ndipu muchiperekengi kwa wasembi nge chigaŵa chakupaturika. 33 Mwana munthulumi waku Aroni yo wapereka kwaku Chiuta ndopa za sembi za chimangu kweniso mafuta, ndiyu wapaskikengi chiŵa chakumaryi nge chigaŵa chaki.+ 34 Pakuti ndito nganga ya sembi yakuzungunya* kweniso chiŵa cho ntchigaŵa chakupaturika chakutuliya pa sembi za chimangu zo Ayisirayeli apereka, ndipu nditivipereka kwaku Aroni wasembi ndipuso ku ŵana ŵaki anthulumi. Lenili ndi dangu lambula kumala lo Ayisirayeli atenere kulilondo.+

35 “‘Chenichi ntchigaŵa cha asembi chakutuliya pa sembi zakotcha ndi motu zakuperekeka kwaku Yehova, cho Yehova wangulamula pa zuŵa lo wanguŵikiya asembi, kuti chiperekekengi kwaku Aroni ndi ŵana ŵaki anthulumi.+ 36 Pa zuŵa lo Yehova wangusankhiya asembi,+ wangulamula Ayisirayeli kuti aperekengi chigaŵa chenichi kwa asembi. Lenili ndi dangu lambula kumala lo Ayisirayeli atenere kulilondo mu migonezi yawu yosi.’”

37 Lenili ndi dangu la sembi yakupiriza,+ sembi ya mbewu,+ sembi ya ubudi,+ sembi ya mulandu,+ sembi yakuŵikiya munthu pa udindu nge wasembi+ kweniso sembi ya chimangu,+ 38 nge mo Yehova wangukambiya Mozesi pa Phiri la Sinayi,+ pa zuŵa lo wangulamula Ayisirayeli kuti aperekengi sembi zawu kwaku Yehova muchipululu cha Sinayi.+

8 Yehova wangulutirizga kulongoro ndi Mozesi, ndipu wangukamba kuti: 2 “Uto Aroni ndi ŵana ŵaki anthulumi,+ vakuvwala,+ mafuta ngakuŵikiya munthu pa udindu,+ ng’ombi yinthulumi ya sembi ya ubudi, mbereri ziŵi zinthulumi ndipuso lipalu la viŵandi vambula chakutupisa,+ 3 ndipu uwunganisi Ayisirayeli wosi* pakhomu la chihema chakukumanaku.”

4 Mozesi wanguchita nge mo Yehova wangumulamuliya ndipu Ayisirayeli wosi anguwungana* pakhomu la chihema chakukumanaku. 5 Sonu Mozesi wangukambiya Ayisirayeli wosi* kuti: “Ivi ndivu Yehova watilamula kuti tichiti.” 6 Mwaviyo, Mozesi wanguza ndi Aroni kweniso ŵana ŵaki anthulumi ndipu wanguŵasambisa ndi maji.+ 7 Pavuli paki, wangumuvwalika mkhanju,+ wangumumanga lamba,+ wangumuvwalika mkhanju wapanthuwa,+ wangumuvwalika efodi+ ndipu efodi yo wangumumanga umamphaumampha ndi lamba wakuluka+ wa efodi. 8 Wangumuvwalika chakuvwala chapachifuŵa+ ndipu wanguŵikamu Urimu ndi Tumimu.+ 9 Pavuli paki, wangumuvwalika mphumphu+ kumutu ndipu panthazi pa mphumphu wanguŵikapu kachisulu kakung’anima kagolidi, ko ntchisimikizu chakupaturika cha kujipereka,+ nge mo Yehova wangulamuliya Mozesi.

10 Pavuli paki, Mozesi wanguto mafuta,* wangungadira pachihema ndipuso pa vinthu vosi vo venga mwenimo,+ ndipu wanguvitowesa. 11 Pavuli paki, wangunthonyeza nganyaki mwa mafuta ngo paguŵa la sembi maulendu 7 ndipuso wangungadira paviyaŵi vaki vosi, pabeseni ndi pachakuŵikapu chaki kuti wavitowesi. 12 Pakumaliya, wangudira nganyaki mwa mafuta ngakuŵikiya munthu pa udindu pamutu waku Aroni kuti wamutowesi.+

13 Pavuli paki, Mozesi wanguza ndi ŵana anthulumi aku Aroni ndipu wanguŵavwalika mikhanju, malamba ndipuso wanguŵavwalika* vakuvwala vakumutu,+ nge mo Yehova wangulamuliya Mozesi.

14 Sonu Mozesi wanguza ndi ng’ombi yinthulumi ya sembi ya ubudi,+ ndipu Aroni ndi ŵana ŵaki anthulumi anguŵika manja ngawu pamutu wa ng’ombi yo. 15 Mozesi wanguyibaya, wanguto ndopa+ ndi chikumbu chaki ndipu wanguzipaka kumasengwi ngosi nga guŵa la sembi. Venivi vinguchitiska kuti guŵa la sembi litoweseki ku ubudi. Kweni ndopa zinyaki zosi wanguzipunguliya musina mwa guŵa la sembi kuti litoweseki kweniso kuti wabenekere maubudi. 16 Pavuli paki, wanguto mafuta ngosi ngo ngenga kumatumbu, mafuta nga kuchiŵindi, sana zosi ziŵi ndi mafuta nga kusana zo, ndipu Mozesi wanguviwotcha paguŵa la sembi kuti visunkhi josi.+ 17 Mozesi wanguto ng’ombi yosi, chikopa chaki, nyama yaki ndi mavi ngaki, ndipu wanguchiviwotche kubwalu kwa msasa,+ nge mo Yehova wangumulamuliya.

18 Sonu wanguza ndi mbereri yinthulumi ya sembi yakupiriza, ndipu Aroni ndi ŵana ŵaki anthulumi anguŵika manja ngawu pamutu wa mbereri yo.+ 19 Pavuli paki, Mozesi wanguyibaya ndipu wanguwaza ndopa za mbereri yo mumphepeti mosi mwa guŵa la sembi. 20 Mozesi wangudumuwa mbereri yo viŵaluviŵalu ndipu wanguto mutu, viŵalu vo kweniso mafuta ngakubwalu kwa sana ndipu wanguviwotcha kuti visunkhi josi. 21 Mozesi wangusuka matumbu kweniso viboda, ndipu wanguwotcha mbereri yosi paguŵa la sembi kuti yisunkhi josi. Yeniyi yenga sembi yakupiriza ya kafungu kamampha.* Yenga sembi yakotcha ndi motu yakuperekeka kwaku Yehova, nge mo Yehova wangulamuliya Mozesi.

22 Pavuli paki, wanguza ndi mbereri yinthulumi yachiŵi, yo yenga mbereri yakuŵikiya munthu pa udindu nge wasembi,+ ndipu Aroni ndi ŵana ŵaki anthulumi anguŵika manja ngawu pamutu wa mbereri yo.+ 23 Mozesi wanguyibaya, ndipu wanguto zinyaki mwa ndopa za mbereri yo ndi kuzipaka kugutu lakumaryi laku Aroni, kuchikumbu chikulu cha kujanja laki lamaryi ndipuso kuchikumbu chikulu cha kuphazi laki lamaryi. 24 Pavuli paki, Mozesi wanguto ŵana anthulumi aku Aroni ndipu wangupaka ndopa kumakutu ngawu ngakumaryi, kuvikumbu vikulu va kumanja ngawu ngamaryi ndipuso kuvikumbu vikulu va kumaphazi ngawu ngamaryi. Kweni ndopa zinyaki zosi wanguziwaza mumphepeti mosi mwa guŵa la sembi.+

25 Pavuli paki, wanguto mafuta, muchiya wamafuta, mafuta ngosi nga kumatumbu, mafuta nga kuchiŵindi, sana zosi ziŵi ndi mafuta nga kusana zo ndipuso chiŵa chakumaryi.+ 26 Wanguto chiŵandi chakuzunguliya chazenji pakati,+ chiŵandi chakuzunguliya chazenji pakati chakudiraku mafuta+ ndipuso chiŵandi chakupapatika mulipalu la viŵandi vambula chakutupisa lo lenga pa masu paku Yehova. Viŵandi vo, wanguviŵika pachanya pa mafuta ndi chiŵa chakumaryi. 27 Wati wachita viyo, wanguŵika vinthu vosi venivi mumanja mwaku Aroni kweniso mumanja mwa ŵana ŵaki anthulumi ndipu anguviyendesa uku ndi uku pa masu paku Yehova nge sembi yakuzungunya.* 28 Pavuli paki, Mozesi wanguto vinthu vo mumanja mwawu ndipu wanguviwotcha paguŵa la sembi pachanya pa sembi yakupiriza kuti visunkhi josi. Vinthu vo venga sembi ya kafungu kamampha* yakuŵikiya munthu pa udindu nge wasembi. Yeniyi yenga sembi yakotcha ndi motu yakuperekeka kwaku Yehova.

29 Sonu Mozesi wanguto nganga ya mbereri ndipu wanguyiyendesa uku ndi uku pa masu paku Yehova+ nge sembi yakuzungunya.* Nganga yo, yingutoleka ku mbereri yinthulumi ya sembi yakuŵikiya munthu pa udindu nge wasembi ndipu yinguperekeka kwaku Mozesi kuti chije chigaŵa chaki, mwakukoliyana ndi vo Yehova wangulamula Mozesi.+

30 Ndipu Mozesi wanguto nganyaki mwa mafuta ngakuŵikiya munthu pa udindu+ kweniso zinyaki mwa ndopa zo zenga paguŵa la sembi, ndipu wanguvinthonyeza paku Aroni ndi pavakuvwala vaki kweniso pa ŵana ŵaki anthulumi+ ndi pavakuvwala vawu. Mwaviyo, Mozesi wangutowesa Aroni ndi vakuvwala vaki kweniso ŵana ŵaki anthulumi ndi vakuvwala vawu.+

31 Pavuli paki, Mozesi wangukambiya Aroni ndi ŵana ŵaki anthulumi kuti: “Bikani+ nyama, muyibikiyi pakhomu la chihema chakukumanaku ndipu muryiyi penipo limoza ndi viŵandi vo ve mulipalu lakugwiriskiya ntchitu pakuŵika munthu pa udindu nge wasembi, nge mo Chiuta wangundilamuliya kuti, ‘Aroni ndi ŵana ŵaki anthulumi ndiwu aryengi nyama yo.’+ 32 Asani nyama kweniso viŵandi vajaku, muviwotchengi ndi motu.+ 33 Mungatuwangapu cha pafupi ndi khomu la chihema chakukumanaku kwa mazuŵa 7 mpaka po mazuŵa ngakukuŵikiyani pa udindu nge asembi ngamaliya, chifukwa muŵikikengi pa udindu nge asembi+ kwa mazuŵa 7. 34 Yehova walamula kuti tichitengi vo tachita msanawale kuti maubudi nginu ngabenekereki.+ 35 Muje pafupi ndi khomu la chihema chakukumanaku, msana ndi usiku kwa mazuŵa 7+ ndipu muchitengi vo Yehova wakulamulani+ kuti muleki kufwa, pakuti venivi ndivu Chiuta wandilamula.”

36 Ndipu Aroni ndi ŵana ŵaki anthulumi anguchita vosi vo Yehova wangulamula kuziya mwaku Mozesi.

9 Pa zuŵa la 8,+ Mozesi wangudana Aroni ndi ŵana ŵaki anthulumi ndipuso ŵara ŵa Ayisirayeli. 2 Wangukambiya Aroni kuti: “Uto tholi* la sembi ya ubudi+ ndipuso mbereri yinthulumi ya sembi yakupiriza, zije nyama zambula kalema ndipu uzipereki kwaku Yehova. 3 Kweni ukambiyi Ayisirayeli kuti, ‘Toni phongu wa sembi ya ubudi, kweniso muto tholi ndi mwana wa mbereri munthulumi kuti vije sembi yakupiriza. Tholi ndi mwana wa mbereri vije va chaka chimoza ndipu nyama yeyosi yije yambula kalema. 4 Muto so ng’ombi yinthulumi ndi mbereri yinthulumi kuti vije sembi ya chimangu+ ndipu muvipereki pa masu paku Yehova ndipuso mupereki sembi ya mbewu+ yakudaku mafuta, pakuti Yehova wakuwonekiyeningi msanawale.’”+

5 Mwaviyo, Ayisirayeli anguto vinthu vo Mozesi wanguŵalamula ndipu anguza navu panthazi pa chihema chakukumanaku. Pavuli paki Ayisirayeli wosi anguza* ndi kuma pa masu paku Yehova. 6 Mozesi wanguŵakambiya kuti: “Venivi ndivu Yehova wakulamulani kuti muchiti, kuti unkhankhu waku Yehova ukuwonekiyeni.”+ 7 Pavuli paki, Mozesi wangukambiya Aroni kuti: “Luta paguŵa la sembi, ukapereki sembi yaku ya ubudi+ kweniso sembi yaku yakupiriza, ndipuso ukabenekere maubudi ngaku+ ndi maubudi nga ŵanthu a munyumba yaku. Ukapereki so sembi ya ŵanthu yaŵa+ ndi kubenekere maubudi ngawu,+ nge mo Yehova walamuliya.”

8 Nyengu yeniyo, Aroni wanguza pafupi ndi guŵa la sembi ndipu wangubaya tholi kuti yije sembi yaki ya ubudi.+ 9 Pavuli paki, ŵana ŵaki anthulumi angupereka ndopa+ za tholi lo kwaku iyu, wangubizga chikumbu chaki mundopa zo ndi kuzipaka kumasengwi nga guŵa la sembi. Ndipu ndopa zinyaki zosi wanguzidira musina mwa guŵa la sembi.+ 10 Pa sembi ya ubudi wangutopu mafuta, sana zosi ziŵi ndi mafuta nga kuchiŵindi ndipu wanguviwotcha paguŵa la sembi kuti visunkhi josi, nge mo Yehova wangulamuliya Mozesi.+ 11 Nyama ndi chikopa wanguchiviwotche kubwalu kwa msasa.+

12 Pavuli paki, Aroni wangubaya nyama ya sembi yakupiriza ndipu ŵana ŵaki angumupaska ndopa za nyama yo, iyu wanguziwaza mumphepeti mosi mwa guŵa la sembi.+ 13 Angumupaska viŵalu va nyama ya sembi yakupiriza limoza ndi mutu, ndipu wanguviwotcha ndi motu paguŵa la sembi kuti visunkhi josi. 14 Kweniso wangusuka matumbu ndi viboda ndipu wanguviwotcha paguŵa la sembi, pachanya pa sembi yakupiriza kuti visunkhi josi.

15 Pavuli paki, wangupereke ŵanthu sembi. Wanguto mbuzi kuti yije sembi ya ubudi ya ŵanthu, wanguyibaya ndipu wangupereka sembi ya ubudi, nge mo wanguchitiya ndi sembi ya ubudi yakwamba. 16 Wanguza ndi sembi yakupiriza ndipu wanguyipereka mwakulondo ndondomeku ya nyengu zosi.+

17 Pavuli paki, wangupereka sembi ya mbewu,+ wangutopu yakuzaza janja laki ndipu wanguyiwotcha paguŵa la sembi kuti yisunkhi josi, kusazgiyapu pa sembi yakupiriza ya mlenji.+

18 Sonu Aroni wangubaya ng’ombi yinthulumi kweniso mbereri yinthulumi kuti zije nyama za sembi ya chimangu ya ŵanthu. Pavuli paki, ŵana ŵaki angumupaska ndopa za nyama zo, ndipu wanguziwaza kuzunguliya mumphepeti mosi mwa guŵa la sembi.+ 19 Kweni mafuta nga ng’ombi yinthulumi,+ muchiya wamafuta wa mbereri yinthulumi, mafuta ngakubwalu kwa viŵalu vamukati, sana zosi ndipuso mafuta nga kuchiŵindi,+ 20 ŵana anthulumi aku Aroni anguvito ndipu anguviŵika pachanya pa nganga za nyama. Pavuli paki, Aroni wanguwotcha vinthu va mafuta venivi ndi motu paguŵa la sembi kuti visunkhi josi.+ 21 Kweni Aroni wanguyendesa nganga za nyama ndipuso chiŵa chakumaryi uku ndi uku pa masu paku Yehova, kuti vije sembi yakuzungunya,* nge mo Mozesi wangulamuliya.+

22 Pavuli paki, Aroni wangusoske manja ŵanthu, wanguŵatumbika+ ndipu wangutuwapu po waperekiyanga sembi ya ubudi, sembi yakupiriza ndipuso sembi za chimangu. 23 Pakumaliya, Mozesi ndi Aroni angusere muchihema chakukumanaku ndipu ŵati atuwamu, angutumbika ŵanthu.+

Sonu unkhankhu waku Yehova unguwoneke ku ŵanthu wosi,+ 24 ndipu motu ungutuwa kwaku Yehova+ ndi kwamba kotcha sembi yakupiriza kweniso vinthu va mafuta vo venga paguŵa la sembi. Ŵanthu wosi ŵati awona venivi, angwamba kudaniriza ndipu angujikama ndi kusindama mpaka visku vawu pasi.+

10 Pavuli paki, ŵana anthulumi aku Aroni, Nadabu ndi Abihu,+ anguto vakupaliya motu, weyosi chaki ndipu anguŵikamu motu kweniso vakununkhira.+ Yiwu angwamba kupereka motu wambula kuzomerezeka+ pa masu paku Yehova, wo Chiuta wanguŵalamula cha. 2 Mwaviyo, motu unguza kutuliya kwaku Yehova ndipu unguŵawotcha,+ mwakuti angufwa pa masu paku Yehova.+ 3 Pavuli paki, Mozesi wangukambiya Aroni kuti: “Yehova wakamba kuti, ‘Ŵanthu wo ŵe pafupi ndi ini,+ akumbukengi kuti nde mtuŵa ndipu ŵanthu wosi atenere kundikankhuska.’” Kweni Aroni wanguja ŵaka cheti.

4 Sonu Mozesi wangudana Mishayele ndi Elizafani ŵana anthulumi aku Uziyeli,+ awisi amana aku Aroni, ndipu wanguŵakambiya kuti: “Zani kunu kuti muzituzgepu abali ŵinu panthazi pa malu ngakupaturika, mukaŵaŵiki kubwalu kwa msasa.” 5 Mwaviyo anguza, ndipu anguŵanyamuwa kwambula kuŵazuwa mikhanju yawu, anguchiŵaŵika kubwalu kwa msasa, nge mo Mozesi wanguŵakambiya.

6 Pavuli paki, Mozesi wangukambiya Aroni ndi ŵana ŵaki anyaki anthulumi, Eliyazara ndi Itamara kuti: “Mungalekanga cha kuphwere sisi linu ndipuso mungakeruwanga cha vakuvwala vinu,+ kuti muleki kufwa kweniso kuti Chiuta waleki kukwiyiya Ayisirayeli wosi.* Abali ŵinu anyumba yosi yaku Isirayeli ndiwu aliyengi nyifwa ya ŵanthu wo Yehova waŵabaya ndi motu. 7 Mungatuwangapu cha pafupi ndi khomu la chihema chakukumanaku kuti muleki kufwa, chifukwa chakuti Yehova wakusankhani.”*+ Mwaviyo, yiwu anguchita nge mo Mozesi wangukambiya.

8 Pavuli paki, Yehova wangukambiya Aroni kuti: 9 “Asani yiwi ndi ŵana ŵaku anthulumi musere muchihema chakukumanaku,+ mungamwanga vinyu cha pamwenga vakumwa vinyaki vakuloŵeresa, kuti muleki kufwa. Lenili ndi dangu lambula kumala mu migonezi yinu yosi. 10 Muchitengi venivi kuti mupambanisengi pakati pa vinthu vakupaturika ndi vinthu vambula kupaturika kweniso pakati pa vinthu vakufipiskika ndi vinthu vambula kufipiskika,+ 11 ndipuso kuti musambizengi Ayisirayeli marangu ngosi ngo Yehova waŵakambiya kuporote mwaku Mozesi.”+

12 Pavuli paki, Mozesi wangukambiya Aroni ndi ŵana ŵaki wo angujapu, Eliyazara ndi Itamara kuti: “Toni vinthu va sembi ya mbewu vo vajapu pa sembi zakotcha ndi motu zakuperekeka kwaku Yehova, ndipu mupangi viŵandi vambula chakutupisa. Viŵandi vo muviryiyi pafupi ndi guŵa la sembi,+ chifukwa ndi vinthu vakupaturika ukongwa.+ 13 Mutenere kuviryiya mumalu ngakupaturika*+ chifukwa ntchigaŵa chinu kweniso cha ŵana ŵinu anthulumi chakutuliya pa sembi zakotcha ndi motu zakuperekeka kwaku Yehova, pakuti venivi ndivu Chiuta wandilamula. 14 Yimwi, ŵana ŵinu anthulumi ndi ŵana ŵinu anthukazi,+ muryengi so nganga ya sembi yakuzungunya* kweniso chiŵa cho ntchigaŵa chakupaturika+ ndipu muryiyengi mumalu ngambula kufipiskika, chifukwa vaperekeka kuti vije chigaŵa chinu ndipuso cha ŵana ŵinu anthulumi kutuliya pa sembi za chimangu zo Ayisirayeli apereka. 15 Yiwu azengi ndi chiŵa cho ntchigaŵa chakupaturika kweniso nganga ya sembi yakuzungunya* limoza ndi sembi za mafuta zakotcha ndi motu, kuti aviyendesi uku ndi uku pa masu paku Yehova nge sembi yakuzungunya.* Ndipu nganga kweniso chiŵa cho, vijengi chigaŵa chaku ndipuso cha ŵana ŵaku anthulumi kwamuyaya,+ nge mo Yehova walamuliya.”

16 Sonu Mozesi wangupenjapenja mbuzi ya sembi ya ubudi+ ndipu wangusaniya kuti yosi yawotcheka. Mwaviyo Mozesi wangukwiyiya Eliyazara ndi Itamara, ŵana anthulumi aku Aroni wo angujaku, ndipu wangukamba kuti: 17 “Ntchifukwa wuli mwaleka kurya sembi ya ubudi mumalu ngakupaturika,*+ pakuti ntchinthu chakupaturika ukongwa ndipu Chiuta wakupaskani kuti mutuzgepu maubudi nga Ayisirayeli wosi* kweniso kuti mubenekere maubudi ngawu pa masu paku Yehova? 18 Awonani! Ndopa zaki mwasere nazu cha mumalu ngakupaturika.+ Mwakhumbikanga kurya nyama yeniyi mumalu ngakupaturika* nge mo Chiuta wakundilamuliya.” 19 Aroni wangumuka Mozesi kuti: “Awonani! Msanawale yiwu apereka sembi yawu ya ubudi ndipuso sembi yawu yakupiriza pa masu paku Yehova,+ kweni ivi ndivu vandichitikiya. Asani ndingurya sembi ya ubudi msanawale, kumbi Yehova watingi wakondwengi?” 20 Mozesi wati wavwa venivi, wangukhorwa.*

11 Pavuli paki, Yehova wangukambiya Mozesi ndi Aroni kuti: 2 “Kambiyani Ayisirayeli kuti, ‘Vamoyu va pacharu chapasi vo mungarya ndi ivi:*+ 3 Nyama yeyosi yo ye ndi chakukandiya chakugaŵikana kweniso chamuphwaphwa pakati, ndipuso yo yitafunya so chakurya cho yameza kali, mungarya.

4 “‘Kweni pa nyama zo zitafunya so chakurya cho zameza kali ndipuso zo ze ndi chakukandiya chakugaŵikana, mungaryanga cha nyama izi: ngamila, yo yitafunya so chakurya cho yameza kali, kweni yilivi chakukandiya chakugaŵikana. Njakufipiskika kwaku yimwi.+ 5 Mbira zamumajarawi,+ chifukwa yitafunya so chakurya cho yameza kali, kweni yilivi chakukandiya chakugaŵikana. Njakufipiskika kwaku yimwi. 6 Kalulu, chifukwa watafunya so chakurya cho wameza kali, kweni walivi chakukandiya chakugaŵikana. Ngwakufipiskika kwaku yimwi. 7 Ndipuso nkhumba,+ chifukwa ye ndi chakukandiya chakugaŵikana kweniso chamuphwaphwa pakati, kweni yitafunya so cha chakurya cho yameza kali. Njakufipiskika kwaku yimwi. 8 Mungaryanga cha nyama zenizi pamwenga kuzikwaska asani zafwa. Ndi nyama zakufipiskika kwaku yimwi.+

9 “‘Vamoyu va mumaji vo mungarya ndi ivi: Chamoyu chechosi cho che ndi viphyephyi ndi mamba, kwali ntchamunyanja pamwenga mumsinji, mungarya.+ 10 Kweni pa vamoyu vo vitenda vinandi ndipuso pa vamoyu vosi va mumaji, chamoyu chechosi cho chilivi viphyephyi ndi mamba kwali ntchamunyanja pamwenga mumsinji, ntchaukazuzi kwaku yimwi. 11 Vamoyu venivi vaukazuzi kwaku yimwi, mungaviryanga cha+ ndipu asani vafwa muviwonengi kuti vaukazuzi. 12 Chamoyu chechosi cha mumaji cho chilivi viphyephyi ndipuso mamba ntchaukazuzi kwaku yimwi.

13 “‘Viyuni vo mutenere kuviwona kuti vaukazuzi ndipu mukhumbika cha kurya chifukwa chakuti vaukazuzi ndi ivi: nombu,+ nkhwazi, nyamung’ombwa mufipa,+ 14 kaŵandu muyera ndipuso mtundu wewosi wa kaŵandu mufipa, 15 mtundu wewosi wa chaholi, 16 nthiŵatiŵa, mantchichi, ngandi, mtundu wewosi wa kabaŵi, 17 phululu, muswankhonu, phululu wa makutu ngatali, 18 chibaka cha mumaji, khuya, nyamung’ombwa, 19 kakoŵa, mtundu wewosi wa kataŵa, tedya, ndipuso kasuska. 20 Tividononu tosi tamapapa ndipuso tamalundi nganayi to titenda tinandi,* nthaukazuzi kwaku yimwi.

21 “‘Pa tividononu tamapapa ndipuso tamalundi nganayi to titenda tinandi, mungarya tija to te ndi malundi ngatalingatali ngaŵi ngakundwikiya. 22 Pa tividononu teniti mungaryapu iti: mitundu yakupambanapambana ya azombi wo asamasama, azombi+ anyaki wo ŵanthu aturya, nkhululu, ndi mphazi. 23 Tividononu tinyaki tosi ta mapapa ndipuso ta malundi nganayi to titenda tinandi, nthaukazuzi kwaku yimwi. 24 Tividononu teniti tingakufipiskani. Weyosi yo watikwaska asani tafwa wajengi wakufipiskika mpaka mazulu.+ 25 Weyosi yo wapinga tividononu teniti to tafwa, wachapengi vakuvwala vaki.+ Iyu wajengi wakufipiskika mpaka mazulu.

26 “‘Nyama yeyosi yo ye ndi chakukandiya chakugaŵikana kweni chilivi muphwaphwa pakati ndipuso yitafunya so cha chakurya cho yameza kali, njakufipiskika kwaku yimwi. Weyosi yo wakwaska nyama yo, wajengi wakufipiskika.+ 27 Pa vamoyu va malundi nganayi, chamoyu chechosi cho chitende vikufi ntchakufipiskika kwaku yimwi. Weyosi yo wakwaska chamoyu cha viyo cho chafwa, wajengi wakufipiskika mpaka mazulu. 28 Weyosi yo wanyamuwa nyama zenizi zo zafwa, wachapengi vakuvwala vaki+ ndipu wajengi wakufipiskika mpaka mazulu.+ Nyama zenizi zakufipiskika kwaku yimwi.

29 “‘Pa vamoyu vo vikwaŵa pacharu chapasi, vakufipiskika ndi ivi: muzumi, mbeŵa,+ mitondoni ya mitundu yakupambanapambana, 30 bulumuti, kaŵaŵa, bulumuti yo waja kufupi ndi maji, mtondoni yo waja mumchenga ndipuso rwenda. 31 Vamoyu venivi vo vikwaŵa vakufipiskika kwaku yimwi.+ Weyosi yo wakwaska vamoyu venivi vo vafwa, wajengi wakufipiskika mpaka mazulu.+

32 “‘Chinthu chechosi cho pawiya vamoyu venivi asani vafwa, chijengi chakufipiskika, kwali ntchiyaŵi chavimiti, chakuvwala, chikopa, pamwenga chigudulu. Chiyaŵi chechosi cho mutichigwiriskiya ntchitu chitenere kubizgika mumaji, ndipu chijengi chakufipiskika mpaka mazulu, pavuli paki ndipu chijengi chambula kufipiskika. 33 Asani vamoyu venivi vawiya muchiyaŵi chadongu mutenere kuswa chiyaŵi cho, ndipu chinthu chechosi cho chenga mukati mwaki chijengi chakufipiskika.+ 34 Chakurya chechosi cho chakwaska maji ngakutuliya muchiyaŵi chenichi, chijengi chakufipiskika ndipu chakumwa chechosi cho chenga muchiyaŵi cha viyo, chijengi chakufipiskika. 35 Chinthu chechosi cho pawiya vamoyu venivi vo vafwa, chijengi chakufipiskika. Kwali ndi uvunu pamwenga chakujalikapu mimphika,* mutenere kuswa. Ndi vinthu vakufipiskika, ndipu vijengi vakufipiskika kwaku yimwi. 36 Kasupi pe ndipuso chisimi chakusungamu maji ndivu vilutirizgengi kuja vambula kufipiskika kweni weyosi yo wakwaska vamoyu venivi asani vafwa wajengi wakufipiskika. 37 Asani vamoyu venivi vo vafwa vawiya pa mbewu zo zamupandika, mbewu zo zijengi zambula kufipiskika. 38 Kweni asani mu mbewu zo, adilamu maji ndipu mwawiya chiŵalu cha chamoyu cho chafwa, mbewu zo zijengi zakufipiskika.

39 “‘Asani nyama yeyosi yo mukuzomerezeka kurya yafwa yija, weyosi yo wayikwaska wajengi wakufipiskika mpaka mazulu.+ 40 Weyosi yo warya nyama yakufwa yo, wachapengi vakuvwala vaki. Iyu wajengi wakufipiskika mpaka mazulu.+ Weyosi yo wanyamuwa nyama yakufwa yo, wachapengi vakuvwala vaki. Iyu wajengi wakufipiskika mpaka mazulu. 41 Vamoyu vosi vo vitenda vinandi pacharu chapasi vaukazuzi.+ Mungaryanga cha. 42 Vamoyu vosi vo vikwaŵiya lufu, vamoyu vo vitende malundi nganayi kweniso vamoyu vo vitenda vinandi ndipu ve ndi malundi nganandi, mungaryanga cha chifukwa vaukazuzi.+ 43 Mungajikazuzganga cha pamwenga kujifipiska ndi vamoyu vo vitenda vinandi.+ 44 Pakuti ini ndini Yehova Chiuta winu,+ ndipu mujitowesi ndi kuja atuŵa+ chifukwa ini nde mtuŵa.+ Mwaviyo, mungajifipiskanga cha ndi vamoyu vosi vo vitenda vinandi pacharu chapasi. 45 Pakuti ini ndini Yehova yo wangukulongozgani kutuwa mucharu cha Ijipiti kuti ndikulongoni kuti ndini Chiuta winu,+ ndipu mutenere kuja atuŵa+ chifukwa ini nde mtuŵa.+

46 “‘Ili ndi dangu lakukwaskana ndi nyama, viyuni, vamoyu vosi vo vitenda mumaji ndipuso vamoyu vosi vo vitenda vinandi pacharu chapasi, 47 kuti mupambanisengi pakati pa vamoyu vakufipiskika ndi vamoyu vambula kufipiskika kweniso pakati pa vamoyu vo mungarya ndi vo mutenere cha kurya.’”+

12 Yehova wangulutirizga kulongoro ndi Mozesi, ndipu wangukamba kuti: 2 “Kambiya Ayisirayeli kuti, ‘Asani munthukazi wame nthumbu ndipu wabala mwana munthulumi, munthukazi yo wajengi wakufipiskika kwa mazuŵa 7. Wajengi wakufipiskika, nge mo wajaliya wakufipiskika asani we ku mwezi.+ 3 Pa zuŵa la 8, khungu lakusongu la mwana yo lidumulikengi.*+ 4 Munthukazi yo, walutirizgengi kujitowesa ku ndopa zaki kwa mazuŵa 33. Wangakwaskanga cha chinthu chechosi chakupaturika ndipu wangaserenga cha mumalu ngakupaturika mpaka po mazuŵa ngaki ngakujitowese ngamaliya.

5 “‘Asani wabala mwana munthukazi, wajengi wakufipiskika kwa mazuŵa 14 nge mo wajaliya wakufipiskika asani we ku mwezi. Walutirizgengi kujitowesa ku ndopa zaki kwa mazuŵa 66. 6 Asani mazuŵa ngaki ngakujitowese chifukwa cha kubala mwana munthulumi pamwenga mwana munthukazi ngamala, wazengi ndi mwana wa mbereri munthulumi wambula kujumpha chaka chimoza kuti wapereki sembi yakupiriza+ ndipuso chiwunda* pamwenga njiŵa kuti wapereki sembi ya ubudi. Wazengi navu kwa wasembi pafupi ndi khomu la chihema chakukumanaku. 7 Wasembi yo, waviperekengi pa masu paku Yehova ndi kubenekere maubudi nga munthukazi yo, ndipu watowesekengi ku ndopa zaki. Lenili ndi dangu lakukwaskana ndi munthukazi yo wabala mwana munthulumi pamwenga mwana munthukazi. 8 Kweni asani wangafiska cha kupereka mbereri, mbwenu waperekengi njiŵa ziŵi pamwenga viwunda* viŵi,+ chiyuni chimoza ntcha sembi yakupiriza, chinyaki ntcha sembi ya ubudi. Wasembi wabenekeriyengi maubudi ngaki ndipu munthukazi yo watowesekengi.’”

13 Yehova wangulutirizga kulongoro ndi Mozesi kweniso Aroni, ndipu wanguŵakambiya kuti: 2 “Asani munthu we ndi chakutupa, ganamba pamwenga chiŵawu pakhungu laki, ndipu chiwoneka kuti chingasambuka nthenda ya makhati*+ pakhungu laki, amutoliyengi kwaku Aroni wasembi pamwenga ku yumoza mwa ŵana ŵaki anthulumi wo so mbasembi.+ 3 Wasembi wawonengi nthenda yo ye pakhungu la munthu yo. Asani cheya cho che pamalu po, chasambuka chituŵa ndipu viwoneka kuti chilonda cho chasere ukongwa pakhungu, mbwenu ndi nthenda ya makhati. Wasembi wawoni nthenda yo ndipu wapharazgi kuti munthu yo ngwakufipiskika. 4 Kweni asani chiŵawu cho che pakhungu laki ntchituŵa, ndipu chiwoneka kuti chasere ukongwa cha pakhungu kweniso asani cheya cho che pamalu po chasambuka chituŵa cha, wasembi waŵikengi munthu yo kwakuyija kwa mazuŵa 7.+ 5 Pa zuŵa la 7, wasembi wawonengi munthu yo, ndipu asani wawona kuti nthenda yo yamala kweniso yasapaliya cha pakhungu, wasembi wamuŵikengi kwakuyija kwa mazuŵa nganyaki 7.

6 “Wasembi wamuwonengi so munthu yo pa zuŵa la 7, ndipu asani nthenda yo yamala kweniso yasapaliya cha pakhungu laki, wasembi wapharazgengi kuti munthu yo ngwambula kufipiskika,+ lenga ŵaka ganamba. Pavuli paki munthu yo wachapengi vakuvwala vaki ndipu wajengi wambula kufipiskika. 7 Kweni asani nthenda yo yasapaliya* pakhungu la munthu yo, pavuli pakuti wanguchiwoneke kwa wasembi ndipu wangusimikiza kuti ngwambula kufipiskika, mbwenu wakawoneke so* kwa wasembi. 8 Wasembi wawonengi munthu yo, ndipu asani wawona kuti nthenda yo yasapaliya* pakhungu, mbwenu wapharazgengi kuti munthu yo ngwakufipiskika. We ndi nthenda ya makhati.+

9 “Asani munthu wayamba nthenda ya makhati, amutoliyengi kwa wasembi, 10 ndipu wasembi yo wamuwonengi.+ Asani we ndi chakutupa chituŵa pakhungu laki ndipu chakutupa cho chachitiska kuti cheya cho che pamalu po chisambuki chituŵa ndipuso asani chakutupa cho chasambuka chilonda,+ 11 ndikuti pakhungu la munthu yo pe makhati ngambula kumala liŵi, ndipu wasembi wapharazgengi kuti munthu yo ngwakufipiskika. Pakuti ngwakufipiskika palivi chifukwa chakumuŵikiya kwakuyija+ kuti wamuwoniyepu. 12 Asani makhati ngabuka pakhungu losi, mwakuti wasembi wawona kuti ngasapaliya kutuwa kumutu mpaka kuphazi, 13 ndipu wasembi yo wamuwona ndi kusimikiza kuti we ndi makhati pakhungu laki losi, wapharazgengi kuti munthu yo ngwambula kufipiskika. Khungu laki losi lasambuka lituŵa, mwaviyo ngwambula kufipiskika. 14 Kweni asani pakhungu laki pabuka chilonda, waŵengi wakufipiskika. 15 Asani wasembi wawona chilonda cho, wapharazgengi kuti munthu yo ngwakufipiskika.+ Iyu ngwakufipiskika chifukwa cha chilonda cho we nachu. We ndi nthenda ya makhati.+ 16 Kweni asani chilonda cho chasambuka chituŵa, wazengi kwa wasembi. 17 Wasembi wamuwonengi munthu yo+ ndipu asani chilonda cho chasambuka chituŵa, wasembi wapharazgengi kuti ngwambula kufipiskika. Munthu yo ngwambula kufipiskika.

18 “Asani munthu watupa chitufya pakhungu laki, ndipu pavuli paki chamala, 19 kweni pamalu po penga chitufya pabuka chakutupa chituŵa pamwenga chiŵawu chituŵa chakukiya ku uyera, munthu yo wakawonekiyengi kwa wasembi. 20 Wasembi wawonengi chakutupa cho+ ndipu asani chasere ukongwa pakhungu ndipuso asani cheya cho che pamalu po chasambuka chituŵa, wasembi wapharazgengi kuti munthu yo ngwakufipiskika. Yeniyi ndi nthenda ya makhati yo yabuka pachitufya. 21 Kweni asani wasembi wamuwona ndipu wasaniya kuti cheya cha pamalu po chasambuka chituŵa cha kweniso chakutupa cho chasere ukongwa cha pakhungu ndipu chiwoneka kuti chimala, wasembi wamuŵikengi kwakuyija kwa mazuŵa 7.+ 22 Ndipu asani chakutupa cho chiwoneke limu kuti chasapaliya pakhungu, wasembi wapharazgengi kuti munthu yo ngwakufipiskika. Munthu yo, we ndi nthenda ya makhati. 23 Kweni asani chiŵawu che pamalu ngamoza pe ndipu chasapaliya kunyaki cha, ndikuti patupa ŵaka chifukwa chakuti penga chitufya. Wasembi wapharazgengi kuti ngwambula kufipiskika.+

24 “Asani munthu wafya ndi motu ndipu chilonda chamotu chasambuka chiŵawu chituŵa chakukiya ku uyera pamwenga chiŵawu chituŵa, 25 wasembi wachiwonengi. Asani cheya cha pamalu po pe chiŵawu chasambuka chituŵa ndipu chiŵawu cho chasere ukongwa pakhungu, ndikuti ndi nthenda ya makhati yo yabuka pachilonda chamotu, ndipu wasembi wapharazgengi kuti munthu yo ngwakufipiskika. Munthu yo, we ndi nthenda ya makhati. 26 Kweni asani wasembi wachiwona ndipu wasaniya kuti cheya cha pachiŵawu cho ntchituŵa cha ndipu chiŵawu cho chasere ukongwa cha pakhungu kweniso chimala, wasembi waŵikengi munthu yo kwakuyija kwa mazuŵa 7.+ 27 Pa zuŵa la 7, wasembi wawonengi munthu yo, ndipu asani viwoneke limu kuti chiŵawu cho chasapaliya pakhungu laki, wasembi wapharazgengi kuti munthu yo ngwakufipiskika. Yeniyi ndi nthenda ya makhati. 28 Kweni asani chiŵawu che pamalu ngamoza pe ndipu chasapaliya cha pakhungu laki kweniso chimala, ndikuti patupa ŵaka chifukwa chakuti penga chilonda chamotu. Mwaviyo, wasembi wapharazgengi kuti munthu yo ngwambula kufipiskika. Pamalu po patupa ŵaka chifukwa chakuti penga chilonda chamotu.

29 “Asani munthulumi pamwenga munthukazi wayamba nthenda pamutu pamwenga kuchilezu, 30 wasembi wawonengi nthenda yo.+ Asani nthenda yo yasere ukongwa pakhungu ndipu sisi laki ndantcheti kweniso ndakupepeluka, wasembi wapharazgengi kuti munthu yo ngwakufipiskika. Yeniyi ndi nthenda yo yako kumutu pamwenga kuchilezu. Ndi makhati ngo ngabuka kumutu pamwenga kuchilezu. 31 Kweni asani wasembi wawona kuti nthenda yo yasere ukongwa cha pakhungu kweniso palivi sisi lifipa, wasembi waŵikengi munthu yo kwakuyija kwa mazuŵa 7.+ 32 Pa zuŵa la 7, wasembi wawonengi nthenda yo. Asani yasapaliya cha ndipu palivi sisi lantcheti ndipuso viwoneka kuti nthenda yo yasere ukongwa cha pakhungu, 33 munthu yo wameti kweni po pe nthenda yo wangametangapu cha. Pavuli paki, wasembi wamuŵikengi kwakuyija kwa mazuŵa 7.

34 “Wasembi wawonengi so po pe nthenda yo pa zuŵa la 7, ndipu asani nthenda yo ye pamutu pamwenga kuchilezu yasapaliya cha pakhungu kweniso asani yiwoneka kuti yasere ukongwa cha pakhungu, wasembi wapharazgengi kuti ngwambula kufipiskika. Munthu yo wachapengi vakuvwala vaki ndipu wajengi wambula kufipiskika. 35 Kweni asani nthenda yo yiwoneke limu kuti yasapaliya pakhungu, pavuli pakuti wasembi wamukambiya kuti ngwambula kufipiskika, 36 wasembi wawonengi munthu yo ndipu asani nthenda yo yasapaliya pakhungu laki, palivi chifukwa chakuti wasembi walimbiyi kuwona dankha sisi la ntcheti, munthu yo ngwakufipiskika. 37 Kweni asani wasembi wawona kuti nthenda yo yasapaliya cha ndipu pame sisi lifipa ndikuti nthenda yo yamala. Munthu yo ngwambula kufipiskika, wasembi wapharazgengi kuti ngwambula kufipiskika.+

38 “Asani munthulumi pamwenga munthukazi wafwapuka viŵawu vituŵa pakhungu laki, 39 wasembi waviwonengi.+ Asani viŵawu vo vachita tuu, ndikuti pakhungu laki pabuka viŵawu vambula kofya. Munthu yo ngwambula kufipiskika.

40 “Asani sisi la munthulumi lamala pamutu ndipu pachita phala, munthu yo ngwambula kufipiskika. 41 Asani sisi lamala panthazi pa mutu ndipu pachita phala, munthu yo ngwambula kufipiskika. 42 Kweni asani paphala laki pamwenga pachisku chaki pabuka chilonda chituŵa chakukiya ku uyera ndikuti paphala laki pamwenga pachisku chaki, pabuka nthenda ya makhati. 43 Wasembi wawonengi munthu yo ndipu asani paphala laki pamwenga pachisku chaki pabuka chilonda chituŵa chakukiya ku uyera, ndipu chilonda cho chiwoneka nge kuti ndi makhati ngo ngabuka pakhungu laki, 44 ndikuti munthu yo we ndi nthenda ya makhati. Iyu ngwakufipiskika ndipu wasembi wapharazgengi kuti munthu yo ngwakufipiskika chifukwa cha nthenda yo ye pamutu waki. 45 Ndipu munthu yo we ndi nthenda ya makhati, wakeruwengi vakuvwala vaki, waleki kuphwere sisi laki, wabenekeriyengi mwembi waki wapamphunu ndipu wadanirizengi kuti, ‘Wakufipiskika, wakufipiskika!’ 46 Nyengu yosi yo iyu we ndi nthenda yeniyi, wajengi wakufipiskika. Pakuti iyu ngwakufipiskika, wajengi kwakuyija. Wajengi kubwalu kwa msasa.+

47 “Asani nthenda ya makhati yabuka pavakuvwala, kwali ntchakuvwala chaweya wa mbereri pamwenga chakuvwala cha salu, 48 kwali yabuka pawuzu wasalu yakuluka pamwenga pawuzu wa chinthu chaweya wa mbereri, kwali yabuka pachikopa pamwenga pachinthu chechosi chachikopa, 49 ndipu asani nthenda yo yachitiska kuti pachakuvwala, pachikopa, pawuzu wasalu yakuluka pamwenga pachinthu chechosi chachikopa pabuki chibanga chagirini chakukiya ku ntcheti pamwenga chibanga chiyera, ndikuti chinthu cho che ndi makhati, ndipu aluti nachu kwa wasembi kuti wakachiwoni. 50 Wasembi wawonengi nthenda yo ye pachinthu cho ndipu wachiŵikengi pakuchija kwa mazuŵa 7.+ 51 Asani wasembi wawona nthenda yo pa zuŵa la 7, ndipu wasaniya kuti yasapaliya pachakuvwala, pawuzu wasalu yakuluka, pachikopa (kwali chikopa cho chigwira ntchitu wuli), ndikuti chinthu cho che ndi makhati ngakofya ndipu ntchakufipiskika.+ 52 Watenere kotcha chakuvwala, wuzu wasalu yakuluka pamwenga wuzu wa chinthu chaweya wa mbereri pamwenga chinthu chechosi chachikopa cho che ndi nthenda yo, pakuti ndi makhati ngakofya. Chitenere kuwotcheka ndi motu.

53 “Kweni asani wasembi wawona kuti nthenda yo yasapaliya cha pachakuvwala, pawuzu wasalu yakuluka pamwenga pachinthu chechosi chachikopa, 54 wasembi walamulengi kuti chinthu cho chichapiki ndipu wachiŵikengi pakuchija kwa mazuŵa nganyaki 7. 55 Wasembi wawonengi chinthu cho che ndi nthenda yo pavuli pakuti chosi chachapika. Asani po pe nthenda yo pasintha cha mo pawoneke, chinanga kuti nthenda yasapaliya cha, chinthu cho ntchakufipiskika. Mutenere kuchiwotcha ndi motu chifukwa charyika mukati pamwenga kubwalu ndi nthenda yo.

56 “Kweni asani wasembi wachiwona ndipu wasaniya kuti po penga nthenda yo palivi chifukwa chakuti chinthu cho chachapika, wakeruwengi chigaŵa cho chenga ndi nthenda pachakuvwala, pachikopa pamwenga pawuzu wasalu yakuluka. 57 Kweni asani wasaniya kuti nthenda yo yeche kuwoneka pamalu nganyaki nga chakuvwala, nga wuzu wasalu yakuluka pamwenga chinthu chechosi chachikopa ndipu yisapaliya, mutenere kotcha chinthu cho ndi motu.+ 58 Kweni asani nthenda yo yamala pachakuvwala, pawuzu wasalu yakuluka pamwenga pachinthu chechosi chachikopa cho mwachichapa, chitenere kuchapika so kachiŵi ndipu chijengi chambula kufipiskika.

59 “Ili ndi dangu lakukwaskana ndi nthenda ya makhati yo yabuka pachakuvwala chaweya wa mbereri, pachakuvwala cha salu, pawuzu wasalu yakuluka pamwenga pachinthu chechosi chachikopa. Dangu lenili liwovyengi wasembi kuziŵa asani chinthu cho ntchakufipiskika pamwenga ntchambula kufipiskika.”

14 Yehova wangulutirizga kulongoro ndi Mozesi ndipu wangukamba kuti: 2 “Pa zuŵa lo munthu yo we ndi nthenda ya makhati watowesekiyengi, mutenere kulondo dangu ili. Mulutengi nayu kwa wasembi.+ 3 Wasembi walutengi kubwalu kwa msasa kuti wakamuwoni. Asani nthenda yaki ya makhati yamala, 4 wasembi walamulengi munthu yo kuti wazi ndi viyuni viŵi vamoyu vambula kufipiskika, kamiti ka sidara,* wuzu uyera ndi kamiti ka hisopi* kuti azivigwiriskiyi ntchitu pakumutowesa.+ 5 Wasembi walamulengi kuti chiyuni chimoza chibayikiyi pachanya pa maji ngamampha nga mumsinji, ngo nge muchiyaŵi chadongu. 6 Kweni watongi chiyuni chamoyu limoza ndi kamiti ka sidara,* wuzu uyera ndi kamiti ka hisopi* ndipu wavibizgengi mundopa za chiyuni cho chabayikiya pachanya pa maji ngamampha nga mumsinji. 7 Wasembi wanthonyezengi ndopa maulendu 7 pamunthu yo watijitowesa ku nthenda ya makhati ndipu wapharazgengi kuti munthu yo ngwambula kufipiskika. Pavuli paki, chiyuni chamoyu wachiphululusiyengi kudondu.+

8 “Munthu yo watijitowesa ku nthenda ya makhati wachapengi vakuvwala vaki, wametengi sisi laki kweniso wasambengi ndipu wajengi wambula kufipiskika. Asani wachita venivi, wangasere mumsasa kweni wajengi kubwalu kwa hema laki kwa mazuŵa 7. 9 Pa zuŵa la 7, wametengi sisi losi kumutu kwaki, mwembi ndipuso nkhopi. Asani wameta sisi laki losi, wachapengi vakuvwala vaki ndi kusamba, ndipu wajengi wambula kufipiskika.

10 “Pa zuŵa la 8, watongi ŵana a mbereri ŵaŵi anthulumi ambula kalema, mwana wa mbereri munthukazi wambula kalema wambula+ kujumpha chaka chimoza, mafuta ngakukwana mwesu umoza wa logu*+ ndipuso ufwa wakusilirika wakudaku mafuta wakukwana vigaŵa vitatu mwa vigaŵa 10 va mwesu wa efa* kuti uje sembi ya mbewu.+ 11 Wasembi yo wapharazga kuti munthu yo ngwambula kufipiskika, wazengi nayu pa masu paku Yehova, pakhomu la chihema chakukumanaku limoza ndi vinthu vo waza navu kuti viperekeki sembi. 12 Wasembi watongi mwana wa mbereri yumoza munthulumi ndipu wamuperekengi nge sembi ya mulandu+ limoza ndi mafuta ngakukwana mwesu umoza wa logu,* ndipu waviyendesengi uku ndi uku pa masu paku Yehova+ nge sembi yakuzungunya.* 13 Pavuli paki, wabayengi mwana wa mbereri munthulumi pamalu po abayiya nyama ya sembi ya ubudi ndipuso ya sembi yakupiriza,+ mumalu ngakupaturika,* pakuti nge mo viliri ndi sembi ya ubudi, sembi ya mulandu nayu nja wasembi.+ Ndi sembi yakupaturika ukongwa.+

14 “Pavuli paki, wasembi watongi zinyaki mwa ndopa za sembi ya mulandu ndipu wazipakengi pagutu lakumaryi la munthu yo watijitowesa, kuchikumbu chikulu cha janja laki lakumaryi kweniso kuchikumbu chikulu cha phazi laki lakumaryi. 15 Ndipu pa mafuta ngakukwana mwesu umoza wa logu,+ wasembi watongepu nganyaki ndipu wangadirengi pachikufi chaki cha janja lamazge. 16 Pavuli paki, wasembi wabizgengi chikumbu chaki chakumaryi mumafuta ngo nge pachikufi cha janja laki lamazge ndipu wanganthonyezengi pasi ndi chikumbu chaki maulendu 7 pa masu paku Yehova. 17 Pavuli paki, wasembi wapakengi nganyaki mwa mafuta ngo ngaja pachikufi chaki pagutu lakumaryi la munthu yo watijitowesa, kuchikumbu chikulu cha janja laki lamaryi kweniso kuchikumbu chikulu cha phazi laki lakumaryi pachanya pa ndopa za sembi ya mulandu. 18 Pavuli paki, mafuta ngo ngaja pachikufi cha wasembi, wasembi yo wangapunguliyengi pamutu wa munthu yo watijitowesa, ndipu wabenekeriyengi maubudi nga munthu yo pa masu paku Yehova.+

19 “Wasembi waperekengi sembi ya ubudi+ ndi kubenekere maubudi nga munthu yo watijitowesa kuti waje wambula kufipiskika. Pavuli paki, wasembi wabayengi nyama ya sembi yakupiriza. 20 Wasembi waperekengi sembi yakupiriza ndipuso sembi ya mbewu+ paguŵa la sembi kuti wabenekere maubudi nga munthu yo,+ ndipu wajengi wambula kufipiskika.+

21 “Kweni asani ndi mukavu ndipu wangafiska cha kusaniya vinthu venivi, watongi mwana wa mbereri yumoza munthulumi kuti yije sembi ya mulandu ndipu wayiyendesi uku ndi uku kuti wabenekere maubudi ngaki. Watongi so ufwa wakusilirika wakudaku mafuta wakukwana chimoza mwa vigaŵa 10 va mwesu wa efa* kuti uje sembi ya mbewu, mafuta ngakukwana mwesu umoza wa logu,* 22 ndipuso njiŵa ziŵi pamwenga viwunda* viŵi, mwakukoliyana ndi vo wangafiska. Chiyuni chimoza chiŵengi cha sembi ya ubudi ndipu chinyaki chiŵengi cha sembi yakupiriza.+ 23 Pa zuŵa la 8,+ wazengi ndi vinthu venivi kwa wasembi pa masu paku Yehova, pakhomu la chihema chakukumanaku kuti watoweseki.+

24 “Wasembi wazengi ndi mwana wa mbereri munthulumi kuti yije sembi ya mulandu+ limoza ndi mafuta ngakukwana mwesu umoza wa logu, ndipu waviyendesengi uku ndi uku pa masu paku Yehova nge sembi yakuzungunya.*+ 25 Pavuli paki, wasembi wabayengi mwana wa mbereri munthulumi kuti yije sembi ya mulandu ndipuso watongi zinyaki mwa ndopa za sembi ya mulandu ndipu wazipakengi pagutu lakumaryi la munthu yo watijitowesa, kuchikumbu chikulu cha janja laki lakumaryi kweniso kuchikumbu chikulu cha phazi laki lakumaryi.+ 26 Wasembi wadirengi nganyaki mwa mafuta pachikufi cha janja laki lamazge,+ 27 ndipu nganyaki mwa mafuta ngo nge pachikufi cha janja laki lamazge, wanganthonyezengi pasi ndi chikumbu cha janja laki lamaryi maulendu 7 pa masu paku Yehova. 28 Ndipu nganyaki mwa mafuta ngo nge pachikufi cha wasembi, wasembi yo wangapakengi pagutu lakumaryi la munthu yo watijitowesa, kuchikumbu chikulu cha janja laki lamaryi kweniso kuchikumbu chikulu cha phazi laki lakumaryi, mo wapaka ndopa za sembi ya mulandu. 29 Pavuli paki, mafuta ngo ngaja pachikufi cha wasembi, wasembi yo wangapunguliyengi pamutu wa munthu yo watijitowesa kuti wabenekere maubudi ngaki pa masu paku Yehova.

30 “Wasembi waperekengi yimoza mwa njiŵa pamwenga chimoza mwa viwunda,* mwakukoliyana ndi vo munthu yo wangafiska.+ 31 Waperekengi chiyuni chinyaki nge sembi ya ubudi, chinyaki nge sembi yakupiriza+ limoza ndi sembi ya mbewu, mwakukoliyana ndi vo munthu yo wangafiska. Wasembi wabenekeriyengi maubudi nga munthu yo watijitowesa pa masu paku Yehova.+

32 “Ili ndi dangu lakukwaskana ndi munthu yo wenga ndi nthenda ya makhati kweni watondeka kusaniya vinthu vo vikhumbika kuti watoweseki.”

33 Pavuli paki, Yehova wangukambiya Mozesi ndi Aroni kuti: 34 “Asani mwasere mucharu cha Kanani,+ cho nditikupaskani kuti chije chinu,+ ndipu ndaŵika nthenda ya makhati munyumba mucharu cho,+ 35 mweneku wa nyumba yo wazilutengi kwa wasembi ndi kumukambiya kuti, ‘Ndiwona nge kuti munyumba mwangu mwabuka nthenda.’ 36 Wasembi wazilamulengi kuti atuzgemu vinthu vosi munyumba yo, iyu wechendazi kuziwona nthenda yo, kuti wazileki kupharazga kuti chinthu chechosi cho che munyumba yo ntchakufipiskika. Pavuli paki, wasembi waziserengi munyumba yo kuti wayiwoni. 37 Iyu waziwonengi malu ngo nge ndi nthenda, asani vimati va nyumba yo ve ndi maŵanga ngagirini ngakukiya ku ntcheti pamwenga ngayera ndipu ngawoneka kuti ngayambiya mukati mwa chimati, 38 wasembi wazituwengi munyumba yo ndi kuza pakhomu ndipu waziyijalengi kwa mazuŵa 7.+

39 “Pavuli paki, wasembi wazizengi so pa zuŵa la 7 kuziwona nyumba yo. Asani nthenda yasapaliya muvimati va nyumba yo, 40 wasembi wazilamulengi kuti mya yo ye ndi nthenda yigumuliki kuchimati cho ndi kuponyeka kumalu ngakufipiskika, kubwalu kwa tawuni. 41 Pavuli paki waziŵakambiyengi kuti apali mukati mosi mwa nyumba yo, ndipu dongu lo apala akalitayengi kumalu ngakufipiskika, kubwalu kwa tawuni. 42 Aziŵikengemu mya yinyaki mumalu mo agumuwamu ndipuso azitongi* dongu linyaki ndi kuyichita so pulasitala.

43 “Kweni asani nthenda yabuka so munyumba yo pavuli pakuti agumuwamu mya, apala vimati va nyumba yo ndi kuyichita so pulasitala, 44 wasembi waziserengi munyumba yo kuti wayiwoni. Asani nthenda yo yasapaliya, ndikuti munyumba yo mwe makhati+ ngakofya. Nyumba yo njakufipiskika. 45 Wasembi wazilamulengi kuti yiwisiki. Ndipu mya yaki, mathabwa ngaki kweniso dongu laki losi, vikatayikengi kumalu ngakufipiskika, kubwalu kwa tawuni.+ 46 Weyosi yo wasere munyumba yo pa mazuŵa ngosi ngo yajalika,+ wazamujanga wakufipiskika mpaka mazulu.+ 47 Weyosi yo wagona munyumba yo, wazichapengi vakuvwala vaki, ndipuso weyosi yo waryiyamu, wazichapengi vakuvwala vaki.

48 “Kweni asani wasembi waza ndipu wasaniya kuti nthenda yasapaliya cha munyumba yo pavuli pakuti ayichita so pulasitala, wazipharazgengi kuti nyumba yo njambula kufipiskika chifukwa chakuti nthenda yo yamala. 49 Kuti wasembi watowesi nyumba yo, wazitongi viyuni viŵi, kamiti ka sidara,* wuzu uyera ndi kamiti ka hisopi.*+ 50 Iyu wazibayengi chiyuni chimoza pachanya pa maji ngamampha nga mumsinji, ngo nge muchiyaŵi chadongu. 51 Pavuli paki, wazitongi kamiti ka sidara,* kamiti ka hisopi,* wuzu uyera ndi chiyuni chamoyu ndipu wazivibizgengi mundopa za chiyuni cho chabayikiya pachanya pa maji ngamampha nga mumsinji. Pavuli paki, waziwazengi ndopa zo kunyumba yo maulendu 7.+ 52 Iyu wazitowesengi nyumba yo mwakugwiriskiya ntchitu ndopa za chiyuni, maji ngamampha nga mumsinji, chiyuni chamoyu, kamiti ka sidara, kamiti ka hisopi ndipuso wuzu uyera. 53 Pavuli paki, waziphululusiyengi chiyuni chamoyu kudondu kubwalu kwa tawuni, wazitowesengi* nyumba yo ndipu yazamuja yambula kufipiskika.

54 “Ili ndi dangu lakukwaskana ndi nthenda yeyosi ya makhati, nthenda yo yabuka kumutu pamwenga kuchilezu,*+ 55 makhati ngo ngabuka pavakuvwala+ pamwenga munyumba,+ 56 ndipuso lakukwaskana ndi vakutupa, viganamba kweniso viŵawu,+ 57 kuti muziŵengi asani chinthu ntchakufipiskika pamwenga ntchambula kufipiskika.+ Lenili ndi dangu lakukwaskana ndi nthenda ya makhati.”+

15 Yehova wangulutirizga kulongoro ndi Mozesi kweniso Aroni, ndipu wanguŵakambiya kuti: 2 “Mulongoro ndi Ayisirayeli ndipu muŵakambiyi kuti, ‘Asani munthulumi we ndi nthenda yakusuluwa kunkhuli, waja wakufipiskika chifukwa cha nthenda yakusuluwa.+ 3 Iyu ngwakufipiskika chifukwa cha nthenda yo, kwali vinthu vo vilutiriya kusuluwa kunkhuli pamwenga vajalikiya mukati, ngwakufipiskika mbwenu.

4 “‘Bedi lelosi lo munthu yo we ndi nthenda yakusuluwa wagonapu, lijengi lakufipiskika ndipu chinthu chechosi cho wajapu chijengi chakufipiskika. 5 Munthu yo wakwaska bedi laki, wachapengi vakuvwala vaki kweniso wasambengi. Iyu wajengi wakufipiskika mpaka mazulu.+ 6 Munthu weyosi yo waja pachinthu cho munthu yo we ndi nthenda yakusuluwa wangujapu, wachapengi vakuvwala vaki kweniso wasambengi. Iyu wajengi wakufipiskika mpaka mazulu. 7 Weyosi yo wakwaska liŵavu la munthu yo we ndi nthenda yakusuluwa, wachapengi vakuvwala vaki kweniso wasambengi. Iyu wajengi wakufipiskika mpaka mazulu. 8 Asani munthu yo we ndi nthenda yakusuluwa wafunyiya mata munthu wambula kufipiskika, munthu yo wachapengi vakuvwala vaki kweniso wasambengi. Iyu wajengi wakufipiskika mpaka mazulu. 9 Chakujapu cha pachiŵetu cho munthu yo we ndi nthenda yakusuluwa wajapu chijengi chakufipiskika. 10 Weyosi yo wakwaska chinthu cho munthu yo wangujapu, wajengi wakufipiskika mpaka mazulu, ndipu weyosi yo wanyamuwa vinthu venivo, wachapengi vakuvwala vaki kweniso wasambengi. Iyu wajengi wakufipiskika mpaka mazulu. 11 Asani munthu yo we ndi nthenda yakusuluwa+ wasamba cha mumanja ndipu wakwaska munthu munyaki, munthu yo wachapengi vakuvwala vaki kweniso wasambengi. Iyu wajengi wakufipiskika mpaka mazulu. 12 Asani munthu yo we ndi nthenda yakusuluwa wakwaska chiyaŵi chadongu, aswengi chiyaŵi cho ndipu asani wakwaska chiyaŵi chechosi chachimiti, achisukengi ndi maji.+

13 “‘Asani nthenda yakusuluwa yamala ndipu munthu yo wachira, pajumphengi mazuŵa 7 kuti watoweseki. Iyu wachapengi vakuvwala vaki kweniso wasambengi ndi maji ngamampha nga mumsinji, ndipu wajengi wambula kufipiskika.+ 14 Pa zuŵa la 8, watongi njiŵa ziŵi pamwenga viwunda*+ viŵi ndipu wazengi pa masu paku Yehova, pakhomu la chihema chakukumanaku ndipu waperekengi viyuni vo kwa wasembi. 15 Wasembi waperekengi sembi viyuni vo. Chinyaki wachiperekengi nge sembi ya ubudi, chinyaki nge sembi yakupiriza, ndipu wasembi wabenekeriyengi maubudi nga munthu yo pa masu paku Yehova chifukwa cha nthenda yaki yakusuluwa.

16 “‘Asani munthulumi watuzga unthulumi, wasambengi liŵavu losi. Iyu wajengi wakufipiskika mpaka mazulu.+ 17 Iyu wachapengi chakuvwala pamwenga chikopa cha nyama cho pawiya unthulumi, ndipu vinthu vo vijengi vakufipiskika mpaka mazulu.

18 “‘Asani munthulumi wagonana ndi munthukazi ndipu munthulumi yo watuzga unthulumi, wosi ŵaŵi asambengi ndipu ajengi akufipiskika mpaka mazulu.+

19 “‘Asani munthukazi wasuluwa ndopa muliŵavu laki chifukwa chakuti we ku mwezi, wajengi wakufipiskika kwa mazuŵa 7.+ Ndipu munthu weyosi yo wakwaska munthukazi yo, wajengi wakufipiskika mpaka mazulu.+ 20 Chechosi cho wagonapu pa nyengu yo ngwakufipiskika chifukwa chakuti we ku mwezi, chijengi chakufipiskika, ndipuso chechosi cho wajapu, chijengi chakufipiskika.+ 21 Weyosi yo wakwaska bedi laki, wachapengi vakuvwala vaki kweniso wasambengi. Iyu wajengi wakufipiskika mpaka mazulu. 22 Weyosi yo wakwaska chinthu cho munthukazi yo wangujapu, wachapengi vakuvwala vaki kweniso wasambengi. Iyu wajengi wakufipiskika mpaka mazulu. 23 Asani munthukazi yo waja pabedi pamwenga pachinthu chinyaki, munthu yo wachikwaska wajengi wakufipiskika mpaka mazulu.+ 24 Asani munthulumi wagona ndi munthukazi yo, ndipu ndopa zaki za ku mwezi zamukwaska,+ munthulumi yo wajengi wakufipiskika kwa mazuŵa 7, ndipu bedi lelosi lo munthulumi yo wagonapu lijengi lakufipiskika.

25 “‘Asani munthukazi wasuluwa ndopa kwa mazuŵa+ nganandi kweni ndi nyengu yaki cha yakusambiya,+ pamwenga asani walutiriya ŵaka kusuluwa ndopa kujumpha mazuŵa ngo wasambiya, wajengi wakufipiskika mazuŵa ngosi ngo wasuluwa ndopa, nge mo wajaliya pa nyengu yo we ku mwezi. 26 Bedi lelosi lo wagonapu pa nyengu yo wasuluwa ndopa lijengi nge bedi lo wagonapu asani we ku mwezi,+ ndipu chinthu chechosi cho wajapu chijengi chakufipiskika nge mo viŵiya pa nyengu yo we ku mwezi. 27 Weyosi yo wakwaska vinthu vo, wajengi wakufipiskika ndipu wachapengi vakuvwala vaki kweniso wasambengi. Iyu wajengi wakufipiskika mpaka mazulu.+

28 “‘Kweni asani ndopa zaleka kusuluwa, pajumphengi mazuŵa 7, ndipu pavuli paki wajengi wambula kufipiskika.+ 29 Pa zuŵa la 8, watongi njiŵa ziŵi pamwenga viwunda*+ viŵi ndipu wazengi navu kwa wasembi, pakhomu la chihema chakukumanaku.+ 30 Wasembi waperekengi chiyuni chinyaki nge sembi ya ubudi, chinyaki nge sembi yakupiriza ndipu wabenekeriyengi maubudi nga munthukazi yo pa masu paku Yehova chifukwa cha kusuluwa ndopa ko kwamufipiska.+

31 “‘Ndipu mutenere kovya Ayisirayeli kuti aleki kufipiskika ndipuso kuti aleki kufwa chifukwa chakufipiska chihema changu, cho che pakati pawu.+

32 “‘Ili ndi dangu lakukwaskana ndi munthulumi yo we ndi nthenda yakusuluwa, munthulumi yo ngwakufipiskika chifukwa chakutuzga unthulumi,+ 33 munthukazi yo we ku mwezi,+ munthulumi pamwenga munthukazi yo wasuluwa vinthu muliŵavu+ ndipuso munthulumi yo wagona ndi munthukazi wakufipiskika.’”

16 Yehova wangulongoro ndi Mozesi ŵana ŵaŵi anthulumi aku Aroni ŵati afwa chifukwa chakuti anguza kufupi ndi Yehova mu nthowa yambula kwenere.+ 2 Yehova wangukambiya Mozesi kuti: “Kambiya Aroni mku waku kuti wangaserengamu nyengu zosi cha mumalu ngakupaturika+ kuseri kwa ketani,+ kunthazi kwa chibenekeleru cha bokosi la Ukaboni kuti waleki kufwa,+ chifukwa ini ndiwonekiyengi mumtambu+ pachanya pa chibenekeleru.+

3 “Asani Aroni wasere mumalu ngakupaturika, wazengi ndi vinthu ivi: tholi* linthulumi la sembi ya ubudi+ ndi mbereri yinthulumi ya sembi yakupiriza.+ 4 Wavwalengi mkhanju wakupaturika wasalu+ ndipuso akabuthu asalu+ kuti abisengi* liŵavu laki, wamangengi lamba wasalu+ ndipuso wavwalengi mphumphu yasalu kumutu kwaki.+ Venivi vakuvwala vakupaturika.+ Wasambengi+ ndipu pavuli paki wavwalengi vakuvwala venivi.

5 “Iyu watongi ŵana a mbuzi ŵaŵi anthulumi a sembi ya ubudi ndi mbereri yinthulumi ya sembi yakupiriza kutuliya kwa Ayisirayeli.+

6 “Aroni waperekengi ng’ombi yinthulumi ya sembi ya ubudi kuti yije sembi yaki ndipu wabenekeriyengi maubudi ngaki+ ndi nga ŵanthu a munyumba yaki.

7 “Pavuli paki, watongi mbuzi ziŵi ndipu wazimikengi pa masu paku Yehova, pakhomu la chihema chakukumanaku. 8 Aroni wachitengi mayeri pa mbuzi ziŵi zo, yinyaki yaku Yehova, yinyaki ya Azazeli.* 9 Aroni wazengi ndi mbuzi yo mayeri ngalongo+ kuti njaku Yehova, ndipu wayiperekengi nge sembi ya ubudi. 10 Kweni mbuzi yo mayeri ngalongo kuti nja Azazeli wazengi nayu yamoyu ndi kuyimika pa masu paku Yehova kuti mwambu wakubenekere maubudi uchitiki pambuzi yo, ndipu pavuli paki yitumizikengi kuchipululu nge mbuzi ya Azazeli.+

11 “Aroni wazengi ndi ng’ombi yinthulumi ya sembi ya ubudi kuti wapereki sembi yaki ndipu wabenekeriyengi maubudi ngaki kweniso nga ŵanthu a munyumba yaki. Pavuli paki wabayengi ng’ombi yinthulumi ya sembi ya ubudi kuti yije sembi yaki.+

12 “Pavuli paki, watongi chakupaliyapu motu+ chakuzaza maka ngamotu ngakutuliya paguŵa la sembi+ lo le pa masu paku Yehova, ndipuso watongi vakununkhira+ vakuzaza manja ngaŵi ndipu waserengi navu kuseri kwa ketani.+ 13 Kweniso waŵikengi vakununkhira pamotu pa masu paku Yehova,+ ndipu josi la vakununkhira vo libenekeriyengi chibenekeleru+ cho che pabokosi la Ukaboni,+ kuti waleki kufwa.

14 “Watongi zinyaki mwa ndopa za ng’ombi yo+ ndipu wazinthonyezengi ndi chikumbu chaki panthazi pa chibenekeleru kuvuma* kwaki, ndipu wanthonyezengi ndopa zo ndi chikumbu chaki maulendu 7 panthazi pa chibenekeleru.+

15 “Pavuli paki, wabayengi mbuzi ya sembi ya ubudi kuti yije sembi ya ŵanthu wosi,+ ndipu waserengi ndi ndopa za mbuzi yo kuseri kwa ketani.+ Ndopa zo,+ wachitengi nazu nge mo wanguchitiya ndi ndopa za ng’ombi yinthulumi. Wazinthonyezengi pafupi ndi chibenekeleru, kunthazi kwaki.

16 “Iyu wabenekeriyengi maubudi nga malu ngakupaturika chifukwa cha vinthu vakufipiska vo Ayisirayeli achita ndipuso chifukwa cha mphulupulu zawu ndi maubudi ngawu.+ Venivi ndivu so wachitengi ndi chihema chakukumanaku cho che pakati pa ŵanthu wo achita vinthu vakufipiska.

17 “Muchihema chakukumanaku mungajanga munthu weyosi cha pa nyengu yo iyu waseremu kuti wakabenekere maubudi mumalu ngakupaturika mpaka po watuliyamu. Iyu wabenekeriyengi maubudi ngaki, nga ŵanthu a munyumba yaki+ ndipuso nga Ayisirayeli wosi.*+

18 “Pavuli paki, iyu watuwengi muchihema chakukumanaku ndi kuluta paguŵa la sembi+ lo le pa masu paku Yehova, ndipu wabenekeriyengi maubudi nga guŵa la sembi. Watongi zinyaki mwa ndopa za ng’ombi yinthulumi ndi zinyaki mwa ndopa za mbuzi ndipu wazipakengi kumasengwi ngosi nga guŵa la sembi. 19 Kweniso wanthonyezengi zinyaki mwa ndopa zo paguŵa la sembi ndi chikumbu chaki maulendu 7, ndipu walitowesengi ku vinthu vakufipiska vo Ayisirayeli achita kweniso walipatuwengi.

20 “Asani wamaliza kubenekere maubudi+ nga malu ngakupaturika, nga chihema chakukumanaku ndipuso nga guŵa la sembi,+ wazengi so ndi mbuzi yamoyu.+ 21 Aroni waŵikengi manja ngaki pamutu pa mbuzi yamoyu, ndipu wasumuliyengi pa mbuzi yo vosi vo Ayisirayeli anangisa, mphulupulu zawu zosi kweniso maubudi ngawu ngosi, ndipu waviŵikengi pamutu pa mbuzi yo.+ Pavuli paki, watumengi munthu yo wasankhikiya limu* kuti waluti ndi mbuzi yo kuchipululu. 22 Mbuzi yo, yipingiyengi kucharu chachipalamba+ vosi vo Ayisirayeli anangisa+ ndipu wayitumizengi kuchipululu.+

23 “Pavuli paki, Aroni waserengi muchihema chakukumanaku ndipu wazuwengi vakuvwala vasalu vo wanguvwala pa nyengu yo wangusere mumalu ngakupaturika ndi kuvileka mwenimo. 24 Wasambengi+ mumalu ngakupaturika* ndi kuvwala vakuvwala vaki.+ Pavuli paki watuwengemu ndipu waperekengi sembi yaki yakupiriza+ ndipuso sembi yakupiriza ya ŵanthu wosi.+ Iyu wabenekeriyengi maubudi ngaki kweniso nga ŵanthu wosi.+ 25 Wawotchengi mafuta nga sembi ya ubudi paguŵa la sembi kuti ngasunkhi josi.

26 “Munthu yo wanguluta ndi mbuzi ya Azazeli+ kuchipululu, wachapengi vakuvwala vaki kweniso wasambengi, pavuli paki wazengi mumsasa.

27 “Ndipu ng’ombi yinthulumi ya sembi ya ubudi kweniso mbuzi ya sembi ya ubudi, vo ndopa zaki angusere nazu mumalu ngakupaturika kuchibenekere maubudi, avitoliyengi kubwalu kwa msasa, ndipu vikopa vaki, nyama yaki, ndi mavi ngaki aviwotchengi ndi motu.+ 28 Munthu yo wawotcha vinthu venivi, wachapengi vakuvwala vaki ndipuso wasambengi. Pavuli paki wazengi mumsasa.

29 “Mu mwezi wa 7, pa zuŵa la 10, mujisuzgengi.* Ndipu mungagwiranga ntchitu yeyosi cha,+ kwali ndimwi mwaŵeni pamwenga mulendu yo waja pakati pinu. Lenili lijengi dangu lamuyaya kwaku yimwi. 30 Pa zuŵa lenili, maubudi nginu ngabenekerekengi+ kuti mutoweseki. Mutowesekengi ku maubudi nginu ngosi pa masu paku Yehova.+ 31 Mupumuwengi pa zuŵa ili chifukwa ndi sabata, ndipu mujisuzgengi.+ Lenili ndi dangu lamuyaya.

32 “Wasembi yo wasankhika+ ndi kuŵikika kuti wateŵetiyengi nge wasembi*+ mumalu mwa awisi,+ wabenekeriyengi maubudi, ndipu wavwalengi vakuvwala vasalu,+ vakuvwala vakupaturika.+ 33 Iyu wabenekeriyengi maubudi nga malu ngakupaturika,+ nga chihema chakukumanaku+ ndipuso nga guŵa la sembi.+ Ndipu wabenekeriyengi maubudi nga asembi kweniso nga Ayisirayeli wosi.*+ 34 Lenili lijengi dangu lamuyaya kwaku yimwi,+ kuti mubenekeriyengi maubudi ngosi nga Ayisirayeli kamoza pa chaka.”+

Mwaviyo, iyu wanguchita nge mo Yehova wangulamuliya Mozesi.

17 Yehova wangulutirizga kulongoro ndi Mozesi, ndipu wangukamba kuti: 2 “Ulongoro ndi Aroni, ŵana ŵaki anthulumi kweniso Ayisirayeli wosi ndipu uŵakambiyi kuti, ‘Yehova walamula kuti:

3 “‘“Asani munthu weyosi wa munyumba yaku Isirayeli wabaya ng’ombi yinthulumi pamwenga mwana wa mbereri munthulumi pamwenga mbuzi mumsasa, pamwenga asani wayibayiya kubwalu kwa msasa, 4 mumalu mwakuza nayu pakhomu la chihema chakukumanaku, kuti yiperekeki kwaku Yehova nge sembi panthazi pa chihema chaku Yehova, munthu yo wajengi ndi mulandu wa ndopa. Iyu wadira ndopa, ndipu watenere kubayika kuti waleki kuja pakati pa ŵanthu a mtundu waki. 5 Ve viyo kuti Ayisirayeli aleki kubayiya nyama zawu kudondu kweni azengi nazu kwaku Yehova pakhomu la chihema chakukumanaku, kwa wasembi. Aperekengi nyama zenizi kwaku Yehova nge sembi za chimangu.+ 6 Wasembi wawazengi ndopa za nyama yo paguŵa la sembi laku Yehova, pakhomu la chihema chakukumanaku ndipuso wawotchengi mafuta nga nyama yo kuti ngasunkhi josi nge sembi ya kafungu kamampha* kwaku Yehova.+ 7 Mwaviyo, aleki kupereka sembi ku viŵanda vakukozgana ndi mbuzi,*+ vo achita navu uhuli.+ Lenili lijengi dangu lamuyaya kwaku yimwi mu migonezi yinu yosi.”’

8 “Uŵakambiyi kuti, ‘Munthu weyosi wa munyumba yaku Isirayeli pamwenga mulendu yo waja pakati pinu, yo wapereka sembi yakupiriza pamwenga sembi yinyaki, 9 ndipu waza nayu cha pakhomu la chihema chakukumanaku kuti yiperekeki kwaku Yehova, watenere kubayika kuti waleki kuja pakati pa ŵanthu a mtundu waki.+

10 “‘Asani munthu weyosi wa munyumba yaku Isirayeli pamwenga mulendu yo waja pakati pinu warya ndopa zezosi,+ ndimukanengi* ndipu ndimubayengi kuti waleki kuja pakati pa ŵanthu a mtundu waki. 11 Pakuti umoyu wa nyama we mundopa+ ndipu ini ndapereka ndopa kwaku yimwi paguŵa la sembi+ kuti mubenekeriyengi maubudi nginu, pakuti ndopa ndizu zibenekere maubudi+ chifukwa umoyu we mundopa. 12 Ndichu chifukwa chaki ndakambiya Ayisirayeli kuti: “Weyosi waku yimwi pamwenga mulendu yo waja pakati pinu+ wangaryanga cha ndopa.”+

13 “‘Asani Myisirayeli pamwenga mulendu yo waja pakati pinu waŵinga ndipu wako nyama yamudondu pamwenga chiyuni cho mukuzomerezeka kurya, wadirengi pasi ndopa zaki+ ndipu wawundengepu dongu. 14 Pakuti umoyu wa nyama yeyosi ndi ndopa zaki chifukwa umoyu we mundopa. Ndichu chifukwa chaki ndakambiya Ayisirayeli kuti: “Mungaryanga cha ndopa za nyama yeyosi chifukwa umoyu wa nyama yeyosi ndi ndopa zaki. Weyosi yo warya ndopa wabayikengi.”+ 15 Asani munthu weyosi, kwali ndi Myisirayeli pamwenga mulendu, warya nyama yo yafwa yija pamwenga yo yapalurika ndi chinyama chamudondu,+ wachapengi vakuvwala vaki kweniso wasambengi. Iyu wajengi wakufipiskika mpaka mazulu.+ Pavuli paki ndipu wajengi wambula kufipiskika. 16 Kweni asani wachapa cha vakuvwala vaki ndipuso asani wasamba cha, watenere kulangika chifukwa cha kunanga kwaki.’”+

18 Yehova wangulutirizga kulongoro ndi Mozesi ndipu wangukamba kuti: 2 “Longoro ndi Ayisirayeli ndipu uŵakambiyi kuti, ‘Ini ndini Yehova Chiuta winu.+ 3 Mungachitanga nge mo achitiya ŵanthu a ku Ijipiti cha, ko mwajanga. Mungachitanga cha vinthu vo achita ŵanthu a mucharu cha Kanani, ko ndiluta namwi.+ Ndipuso mungalondonga marangu ngawu cha. 4 Mulondongi vyeruzgu vangu, musungengi marangu ngangu kweniso mungalondongi.+ Ini ndini Yehova Chiuta winu. 5 Musungengi marangu ngangu ndipuso vyeruzgu vangu, ndipu weyosi yo wativisunga, wazamuja ndi umoyu chifukwa cha vinthu venivi.+ Ini ndini Yehova.

6 “‘Munthu weyosi pakati pinu wanganderenga kufupi ndi mubali waki cha kuti wagonani nayu.*+ Ini ndini Yehova. 7 Ungagonananga ndi awusu cha ndipuso ungagonananga ndi anyoku cha. Ungagonananga nawu cha chifukwa chakuti mbanyoku.

8 “‘Ungagonananga ndi muwolu wa awusu cha.+ Chifukwa asani ungachita viyo, ulengesengi awusu.*

9 “‘Ungagonananga ndi mzichi waku cha, kwali ndi mwana munthukazi wa awusu pamwenga mwana munthukazi wa anyoku. Kwali mukuwa nyumba yimoza pamwenga cha.+

10 “‘Ungagonananga ndi mwana munthukazi wa mwana waku munthulumi cha pamwenga mwana munthukazi wa mwana waku munthukazi, chifukwa asani ungachita viyo, ujilengesengi.

11 “‘Ungagonananga ndi mwana munthukazi wa muwolu wa awusu cha, chifukwa ndi mzichi waku. Iyu ndi mphapu ya awusu.

12 “‘Ungagonananga ndi mzichi wa awusu cha chifukwa ndi mubali wa awusu.+

13 “‘Ungagonananga ndi mvurwa wa anyoku cha pamwenga mku wawu, chifukwa ndi mubali wa anyoku.

14 “‘Ungalengesanga* awusu amana cha pamwenga awusu ara, mwakugonana ndi muwolu wawu, chifukwa chakuti mbanyoku.+

15 “‘Ungagonananga ndi mkumwana waku cha+ chifukwa chakuti ndi muwolu wa mwana waku. Ungagonananga nayu cha.

16 “‘Ungagonananga ndi muwolu wa mvurwa waku cha pamwenga wa mku waku,+ chifukwa asani ungachita viyo, ulengesengi mubali waku.*

17 “‘Asani wato munthukazi, ungagonananga ndi mwana waki munthukazi cha.+ Ungatonga mwana munthukazi wa mwana waki munthulumi cha pamwenga mwana munthukazi wa mwana waki munthukazi kuti ugonani nayu. Ungagonananga nawu cha, chifukwa chakuti mbabali ŵaki. Kuchita viyo, mbukazuzi.*

18 “‘Asani wato munthukazi, ungatonga so mvurwa waki cha pamwenga mku waki kuti waje muwolu waku wachiŵi.+ Ungagonananga nayu cha, muwolu waku weche wamoyu.

19 “‘Unganderenga kufupi ndi munthukazi yo we ku mwezi cha kuti ugonani nayu.+

20 “‘Ungagonananga ndi muwolu wa munyaku* cha chifukwa asani ungachita viyo, ujifipiskengi.+

21 “‘Ungaperekanga* mwana waku* kwaku Moleki cha.+ Ungafipiskanga zina laku Chiuta waku mu nthowa yeniyi cha.+ Ini ndini Yehova.

22 “‘Ungagonananga ndi munthulumi cha, nge mo ugone ndi munthukazi.+ Kuchita viyo, mbukazuzi.

23 “‘Munthulumi wangagonanga ndi nyama cha kuti waleki kufipiskika. Munthukazi wangajiperekanga ku nyama cha kuti wagoni nayu.+ Chifukwa kuchita viyo, nkhuchita vinthu mwakupambana ndi mo ŵanthu akulengeke.

24 “‘Mungajifipiskanga cha ndi vinthu venivi, pakuti mitundu yo nditiyidikisa pa masu pinu yajifipiska ndi vinthu vosi venivi.+ 25 Mwaviyo, charu chawu chafipiskika ndipu ndilangengi ŵanthu a mucharu cho chifukwa cha kunanga kwawu. Ŵanthu wo aja mwenimo adikisikengi mucharu chawu.*+ 26 Kweni yimwi musungengi marangu ngangu ndi vyeruzgu vangu+ ndipu mungachitanga cha vinthu vaukazuzi venivi, kwali ndimwi mwaŵeni pamwenga mulendu yo waja pakati pinu.+ 27 Pakuti ŵanthu wo aja mucharu cho yimwi mwamusere,+ achita vinthu vaukazuzi venivi ndipu charu cho ntchakufipiskika. 28 Asani mundivwiyengi, mwazamudikisika cha mucharu cho chifukwa cha kuchifipiska, nge mo yidikisikiyengi mitundu yo yija mucharu cho mwamusere. 29 Munthu weyosi yo wachita vinthu vaukazuzi venivi, watenere kubayika kuti waleki kuja pakati pa ŵanthu a mtundu waki. 30 Mundivwiyengi ndipu mungachitanga cha midawuku yaukazuzi yo ŵanthu a mucharu cho mwamusere achita,+ kuti muleki kujifipiska. Ini ndini Yehova Chiuta winu.’”

19 Yehova wangulutirizga kulongoro ndi Mozesi, ndipu wangukamba kuti: 2 “Longoro ndi Ayisirayeli wosi* ndipu uŵakambiyi kuti, ‘Mujengi atuŵa, chifukwa ini Yehova Chiuta winu nde mtuŵa.+

3 “‘Weyosi waku yimwi watumbikengi* anyina ndi awisi+ ndipuso musungengi masabata ngangu.+ Ini ndini Yehova Chiuta winu. 4 Mungang’anamukiyanga kwa achiuta ambula fundu cha+ ndipuso mungajipangiyanga achiuta avisulu vakusongono cha.+ Ini ndini Yehova Chiuta winu.

5 “‘Asani mupereka sembi ya chimangu kwaku Yehova,+ mutenere kuyipereka mwakwenere kuti Chiuta wakuyanjeni.+ 6 Muryengi nyama ya sembi yeniyi pa zuŵa lo mutiyipereke ndipuso pa zuŵa lachiŵi, kweni yo yaja mpaka kufika pa zuŵa lachitatu muyiwotchengi ndi motu.+ 7 Kweni asani nyama yo yaryika pa zuŵa lachitatu, njaukazuzi ndipu sembi yo yizomerezekengi cha. 8 Munthu yo warya nyama yo, watenere kulangika chifukwa cha kunanga kwaki, pakuti wafipiska chinthu chakupaturika chaku Yehova ndipu watenere kubayika kuti waleki kuja pakati pa ŵanthu a mtundu waki.

9 “‘Asani muvuna vakurya mucharu chinu, mungavunanga vosi cha mumphepeti mwa minda yinu ndipuso mungatondonga cha vo vajaku pa kuvuna.+ 10 Mungaponthonga cha mphereska zo zajaku muminda yinu ya mphereska ndipuso mungatondonga cha mphereska zo zawa pasi. Musiliyengi akavu*+ kweniso alendu wo aja pakati pinu. Ini ndini Yehova Chiuta winu.

11 “‘Mungabanga cha,+ mungapusikanga anyinu cha,+ ndipuso mungachitiyananga chinyengu cha. 12 Mungalapizganga vinthu vaboza cha mu zina langu+ ndi kufipiska zina laku Chiuta winu. Ini ndini Yehova. 13 Mungamuryiyanga vinthu vaki cha munyinu+ ndipuso mungabanga cha.+ Munthu waganyu mungamukoliyanga cha malipiru ngaki usiku wosi mpaka mlenji.+

14 “‘Mungatembanga munthu wambula kuvwa cha ndipuso mungaŵikanga chinthu panthowa cha kuti munthu wachibulumutiya waguŵemu.+ Muwopengi Chiuta winu.+ Ini ndini Yehova.

15 “‘Mungayeruzganga mwambula urunji cha. Ungayanjiyanga akavu cha pamwenga akukhupuka.+ Uyeruzgengi munyaku mwaurunji.

16 “‘Ungayendangayendanga pakati pa ŵanthu ŵaku cha kuti uwandisengi vinthu viheni vakukwaskana ndi ŵanthu anyaki.+ Ungachitanga chechosi cha cho chingabayisa munyaku.*+ Ini ndini Yehova.

17 “‘Ungamutinkhanga cha mubali waku mumtima mwaku.+ Ungatondekanga cha kuchenya munyaku+ kuti nawi uleki kusanirika ndi mulandu nge iyu.

18 “‘Ungaweziyanga nduzga cha+ pamwenga kusungiya chifukwa ŵanthu amtundu waku, ndipu uyanjengi munyaku nge mo utijiyanjiya wamweni.+ Ini ndini Yehova.

19 “‘Musungengi marangu ngangu:Mungazomerezanga cha kuti chiŵetu cha mtundu unyaki chikweri chiŵetu cha mtundu unyaki kuti vibalani. Mumunda umoza mungapandangamu mbewu za mitundu yiŵi cha+ ndipuso mungavwalanga cha chakuvwala chakupangika ndi wuzu wa mitundu yiŵi wakulukika pamoza.+

20 “‘Asani munthulumi wagonana ndi munthukazi, ndipu munthukazi yo ndi kapolu, yo munthu munyaki wakumulayizga kuti wamutongi nthengwa kweni wakuwomboleka cha pamwenga kufwatulika, wosi ŵaŵi atenere kulangika. Chinanga kuti ve viyo, yiwu atenere cha kubayika, pakuti munthukazi yo wenga wechendafwatuliki. 21 Munthulumi yo, wazengi ndi nyama ya sembi ya mulandu kwaku Yehova pakhomu la chihema chakukumanaku, wazengi ndi mbereri yinthulumi ya sembi ya mulandu.+ 22 Wasembi wabenekeriyengi maubudi nga munthu yo mwakugwiriskiya ntchitu mbereri yinthulumi ya sembi ya mulandu pa masu paku Yehova chifukwa cha ubudi wo wachita ndipu Chiuta wamugowokiyengi ubudi waki.

23 “‘Asani mwazisere mucharu cho ndikupaskeningi ndipu mwapanda chimiti cha vipasu, muziwonengi kuti vipasu vaki vakufipiskika ndipuso vakukanizika. Vipasu vo vazamujanga vakukanizika kwaku yimwi kwa vyaka vitatu. Mwaviyo mungaziryanga cha. 24 Kweni mu chaka chachinayi, vipasu vo vazamuja vakupaturika ndipu yazamuja nyengu yakukondwe pa masu paku Yehova.+ 25 Mu chaka chachinkhondi muziryengi vipasu vaki ndipu vazamusazgika pa vinthu vinyaki vosi vo mwavuna. Ini ndini Yehova Chiuta winu.

26 “‘Mungaryanga cha chechosi cho cheche ndi ndopa.+

“‘Mungawombezanga cha pamwenga kuchita masenga.+

27 “‘Mungametanga* cha sisi la mumphepeti mwa mutu winu ndipuso mungacheketerezanga* cha mwembi winu.+

28 “‘Mungachekanga liŵavu linu cha chifukwa cha munthu wakufwa+ ndipuso mungajambulanga vinthu* cha paliŵavu linu. Ini ndini Yehova.

29 “‘Ungalengesanga mwana waku munthukazi cha mwakumusambusa huli,+ kuti charu chinu chileki kuchita uhuli kweniso kuzaza ndi mijalidu yabwekabweka.+

30 “‘Musungengi masabata ngangu+ ndipuso mutumbikengi* malu ngangu ngakupaturika. Ini ndini Yehova.

31 “‘Mungalutanga cha ku ŵanthu wo alongoro ndi mizimu+ pamwenga ku ŵanthu wo aloska vinthu vo vichitikengi kunthazi+ kuti muleki kufipiskika ndi ŵanthu ŵenaŵa. Ini ndini Yehova Chiuta winu.

32 “‘Munthu yo we ndi nyivu,* umupaskengi ulemu+ ndipuso utumbikengi munthu mura.+ Uwopengi Chiuta waku.+ Ini ndini Yehova.

33 “‘Mulendu yo waja mucharu chinu mungamuchitiyanga nkhaza cha.+ 34 Mulendu yo waja pakati pinu mumuwonengi nge mweneku charu+ ndipu mumuyanjengi nge mo mutijiyanjiya mwaŵeni, pakuti namwi mwenga alendu mucharu cha Ijipiti.+ Ini ndini Yehova Chiuta winu.

35 “‘Pakupima utali wa vinthu, uzitu pamwenga unandi, mungagwiriskiyanga ntchitu miyesu yachinyengu cha.+ 36 Mugwiriskiyengi ntchitu masikelu ngauneneska, mwesu wauneneska wa uzitu wa vinthu, mwesu wauneneska wa vinthu vakumira* ndipuso mwesu wauneneska wa vinthu vamaji.*+ Ini ndini Yehova Chiuta winu yo wakukutuzgani mucharu cha Ijipiti. 37 Mwaviyo, musungengi marangu ngangu ngosi ndipuso vyeruzgu vangu vosi, ndipu muvilondongi.+ Ini ndini Yehova.’”

20 Yehova wangulutirizga kulongoro ndi Mozesi, ndipu wangukamba kuti: 2 “Kambiya Ayisirayeli kuti, ‘Myisirayeli ndipuso mulendu yo waja mucharu cha Isirayeli yo wapereka ŵana ŵaki* kwaku Moleki, watenere kubayika kwambula kutondeka.+ Ŵanthu a mucharu cho amuponyi ndi mya kuti wafwi. 3 Munthu yo ndimukanengi* ndipu ndimubayengi kuti waleki kuja pakati pa ŵanthu a mtundu waki chifukwa wapereka anyaki mwa ŵana ŵaki kwaku Moleki. Iyu wafipiska malu ngangu ngakupaturika+ kweniso zina langu lakupaturika. 4 Asani munthu wapereka ŵana ŵaki kwaku Moleki, kweni ŵanthu a mucharu cho amulereska ŵaka kwambula kuchitapu kanthu ndipu amubaya cha,+ 5 ndimukanengi limoza ndi banja laki.+ Ndimubayengi kuti waleki kuja pakati pa ŵanthu a mtundu waki ndipuso ndibayengi ŵanthu wosi wo akoliyana nayu pakuchita uhuli ndi Moleki.

6 “‘Munthu yo waluta ku ŵanthu wo alongoro ndi mizimu+ kweniso ku ŵanthu wo aloska vinthu vo vichitikengi kunthazi+ kuti wachiti nawu uhuli, ndimukanengi ndipu ndimubayengi kuti waleki kuja pakati pa ŵanthu a mtundu waki.+

7 “‘Mujitowesengi ndipu mujengi atuŵa,+ chifukwa ini ndini Yehova Chiuta winu. 8 Musungengi marangu ngangu ndi kungalondo.+ Ini ndini Yehova, yo watikutowesani.+

9 “‘Munthu weyosi yo watemba awisi pamwenga anyina, wabayikengi kwambula kutondeka.+ Pakuti watemba awisi pamwenga anyina, ndopa zaki zijengi pa mutu waki.

10 “‘Asani munthu wachita chigololu ndi muwolu wamweni, muchitengi ivi: Munthu yo wachita chigololu ndi muwolu wa munyaki wabayikengi kwambula kutondeka, wosi ŵaŵi munthulumi ndi munthukazi atenere kubayika.+ 11 Munthu yo wagonana ndi muwolu wa awisi, walengesa* awisi.+ Wosi ŵaŵi abayikengi kwambula kutondeka. Ndopa zawu zijengi pa mutu wawu. 12 Asani munthu wagonana ndi mkumwana waki, wosi ŵaŵi abayikengi kwambula kutondeka. Yiwu achita vinthu mwakupambana ndi mo ŵanthu akulengeke. Ndopa zawu zijengi pa mutu wawu.+

13 “‘Asani munthulumi wagonana ndi munthulumi munyaki, wosi ŵaŵi achita chinthu chaukazuzi.+ Yiwu atenere kubayika kwambula kutondeka. Ndopa zawu zijengi pa mutu wawu.

14 “‘Asani munthulumi wato munthukazi kweniso anyina a munthukazi yo, mbukazuzi.*+ Iyu ndi anthukazi wo, awotchekengi ndi motu+ kuti nkharu yakuchitiska soni yileki kulutiriya pakati pinu.

15 “‘Asani munthulumi wagona ndi nyama, watenere kubayika kwambula kutondeka, ndipu nyama yo nayu muyibayengi.+ 16 Asani munthukazi wajipereka ku nyama kuti wagoni nayu,+ mumubayi munthukazi yo ndi nyama viyo. Mungatondekanga cha kubaya munthukazi yo kweniso nyama yo. Ndopa zawu zijengi pa mutu wawu.

17 “‘Asani munthulumi wagonana ndi mzichi waki, kwali ndi mwana munthukazi wa awisi pamwenga mwana munthukazi wa anyina, ndipu munthulumi yo wawona nkhuli yaki kweniso munthukazi yo wawona nkhuli ya munthulumi yo, ntchinthu chakuchitiska soni.+ Wosi ŵaŵi atenere kubayika pa masu pa ŵanthu a mtundu wawu. Iyu walengesa* mzichi waki. Ndipu watenere kulangika chifukwa cha kunanga kwaki.

18 “‘Asani munthulumi wagonana ndi munthukazi yo we ku mwezi, wosi ŵaŵi ayuyuwa ndopa za munthukazi yo.+ Ndipu wosi atenere kubayika kuti aleki kuja pakati pa ŵanthu a mtundu wawu.

19 “‘Ungagonananga ndi mvurwa wa anyoku cha pamwenga mku wawu ndipuso ungagonananga ndi mzichi wa awusu cha, chifukwa asani wachita viyo ulengesengi mubali waku.+ Yiwu atenere kulangika chifukwa cha kunanga kwawu. 20 Asani munthu wagonana ndi muwolu wa awisi ara pamwenga awisi amana, walengesa* awisi ara pamwenga awisi amana.+ Yiwu atenere kulangika chifukwa cha ubudi wawu. Atenere kufwa kwambula kubala ŵana. 21 Asani munthu wato muwolu wa mku waki pamwenga wa mvurwa waki, ntchinthu chaukazuzi.+ Iyu walengesa* mku waki pamwenga mvurwa waki. Yiwu ajengi kwambula ŵana.

22 “‘Musungengi marangu ngangu ngosi, vyeruzgu vangu vosi+ ndipu muvilondongi+ kuti muzileki kudikisika mucharu cho ndiluta namwi.+ 23 Mungalondonga marangu nga mitundu yinyaki cha, yo nditiyidikisa pa masu pinu.+ Pakuti mitundu yo yichita vinthu vosi venivi ndipu nditiyitinkha.+ 24 Ndichu chifukwa chaki ndikukukambiyani kuti: “Mutongi charu chawu kuti chije chinu, ndipu ndichiperekengi kwaku yimwi kuti chije chinu, charu chakwenda mkaka ndi uchi.+ Ini ndini Yehova Chiuta winu mweniyo wakupatuwani ku ŵanthu anyaki wosi.”+ 25 Mupambanisengi pakati pa nyama zambula kufipiskika ndi nyama zakufipiskika, pakati pa viyuni vakufipiskika ndi viyuni vambula kufipiskika.+ Mungajifipiskanga cha ndi nyama, chiyuni pamwenga chinthu chechosi chakukwaŵa pacharu cho ndachipatuwa kuti chije chakufipiskika kwaku yimwi.+ 26 Muje atuŵa kwaku ini chifukwa ini Yehova nde mtuŵa+ ndipu nditikupatuwani ku ŵanthu anyaki wosi kuti muje ŵanthu ŵangu.+

27 “‘Munthulumi pamwenga munthukazi weyosi yo walongoro ndi mizimu pamwenga yo waloska vinthu vo vichitikengi kunthazi,* watenere kubayika kwambula kutondeka.+ Ŵanthu atenere kuŵaponya ndi mya kuti afwi. Ndopa zawu zijengi pa mutu wawu.’”

21 Yehova wangulutirizga kulongoro ndi Mozesi ndipu wangukamba kuti: “Longoro ndi asembi, ŵana anthulumi aku Aroni ndipu uŵakambiyi kuti, ‘Weyosi waku yiwu wangajifipiskanga cha chifukwa cha munthu wakufwa pakati pa ŵanthu a mtundu waki.+ 2 Kweni wangajifipiska asani yo wafwa ndi mubali waki wa ndopa zimoza, anyina, awisi, mwana waki munthulumi, mwana waki munthukazi, mku waki pamwenga mvurwa waki. 3 Kweniso wangajifipiska asani yo wafwa ndi mzichi waki chayiyu, yo ndi mwali* kweniso wechendayirwi. 4 Wangajifipiskanga cha chifukwa cha munthukazi yo mulumu waki njumoza wa ŵanthu a mtundu waki. 5 Angametanga phala cha+ ndipuso angacheketerezanga* cha mwembi wawu pamwenga kujicheka paliŵavu lawu.+ 6 Atenere kuja atuŵa kwaku Chiuta wawu,+ ndipu atenere cha kufipiska zina laku Chiuta wawu+ pakuti yiwu ndiwu apereka sembi zakotcha ndi motu kwaku Yehova, chiŵandi* chaku Chiuta wawu. Mwaviyo, akhumbika kuŵa atuŵa.+ 7 Angatonga huli cha+ pamwenga munthukazi yo wafipiskika ndipuso munthukazi yo mulumu waki wakumupata,+ chifukwa wasembi ndi mtuŵa kwaku Chiuta waki. 8 Wasembi umutowesengi+ chifukwa ndiyu wapereka chiŵandi chaku Chiuta. Umuwonengi kuti ndi mtuŵa chifukwa ini Yehova, yo watikutowesani nde mtuŵa.+

9 “‘Sonu asani mwana munthukazi wa wasembi wajifipiska chifukwa chakuti wachita uhuli, wafipiska awisi. Iyu watenere kuwotcheka ndi motu.+

10 “‘Wasembi mura yo wakusankhika pakati pa abali ŵaki ndipu angumudira mafuta ngakuŵikiya munthu pa udindu pamutu waki+ ndipuso yo wakuŵikika kuti wavwalengi vakuvwala va asembi,+ wangalekanga cha kuphwere sisi laki ndipuso wangakeruwanga cha vakuvwala vaki.+ 11 Wanganderenga pafupi ndi munthu wakufwa cha,+ wangajifipiskanga cha, kwali wo afwa mbawisi pamwenga anyina. 12 Wangatuwangamu cha mumalu ngakupaturika ndipu malu ngakupaturika ngaku Chiuta waki wangangafipiskanga cha,+ chifukwa pamutu waki pe chisimikizu chakupaturika cha kujipereka kweniso mafuta ngaku Chiuta waki ngakuŵikiya munthu pa udindu.+ Ini ndini Yehova.

13 “‘Iyu watongi munthukazi yo ndi mwali* kuti waje muwolu waki.+ 14 Wangatonga choko cha, pamwenga munthukazi yo mulumu waki wakumupata, munthukazi yo wakufipiskika pamwenga huli, kweni watongi mwali pakati pa ŵanthu a mtundu waki kuti waje muwolu waki. 15 Wangafipiskanga mphapu* yaki cha, pakati pa ŵanthu a mtundu waki,+ pakuti ini ndini Yehova yo watimutowesa.’”

16 Yehova wangulutirizga kulongoro ndi Mozesi ndipu wangukamba kuti: 17 “Kambiya Aroni kuti, ‘Munthu weyosi wa mphapu* yaku yo we ndi chilema, wangazanga cha pafupi ndi guŵa la sembi kuti wapereki chiŵandi chaku Chiuta waki, mu migonezi yawu yosi. 18 Munthu weyosi yo we ndi chilema, wangazanga cha pafupi ndi malu ngakupaturika. Kwali ndi munthu wachibulumutiya, wakupunduka, yo we ndi chilema kumasu,* yo we ndi lundi pamwenga janja litali kuluska linyaki, 19 munthu yo wakupwetekeka lundi pamwenga janja, 20 yo we ndi gonyu, yo ndi mufupi ukongwa,* yo we ndi nthenda kujisu, yo we ndi viŵawu pakhungu laki, yo we ndi vipheri pamwenga yo we ndi matongu ngakuphwanyika.+ 21 Munthulumi wa mphapu* yaku Aroni wasembi yo we ndi chilema wangazanga cha pafupi ndi guŵa la sembi kuti wapereki sembi zaku Yehova zakotcha ndi motu. Iyu wangazanga cha pafupi ndi guŵa la sembi kuti wapereki chiŵandi chaku Chiuta waki, chifukwa we ndi chilema. 22 Iyu wangarya viŵandi vaku Chiuta waki vakutuliya pa vinthu vakupaturika ukongwa+ ndipuso vakutuliya pa vinthu vakupaturika.+ 23 Kweni wangazanga cha pafupi ndi ketani,+ ndipuso wangazanga cha pafupi ndi guŵa la sembi+ chifukwa we ndi chilema. Iyu wangafipiskanga cha malu ngangu ngakupaturika+ pakuti ini ndini Yehova, yo watiŵatowesa.’”+

24 Mwaviyo, Mozesi wangukamba vinthu venivi kwaku Aroni, ŵana anthulumi aku Aroni ndipuso Ayisirayeli wosi.

22 Yehova wangulutirizga kulongoro ndi Mozesi, ndipu wangukamba kuti: 2 “Kambiya Aroni ndi ŵana ŵaki anthulumi kuti achitengi vinthu mwakuphwere ndi* vinthu vakupaturika vo Ayisirayeli ativitowesa ndi kuvipereka kwaku ini,+ kuti aleki kufipiska zina langu lakupaturika.+ Ini ndini Yehova. 3 Uŵakambiyi kuti, ‘Mu migonezi yinu yosi, munthu weyosi wakufipiskika wa mphapu yinu, yo waza pafupi ndi vinthu vakupaturika vo Ayisirayeli avitowesa kuti avipereki kwaku Yehova, watenere kubayika kuti waleki kuja pa masu pangu.+ Ini ndini Yehova. 4 Munthulumi wa mphapu yaku Aroni yo we ndi nthenda ya makhati+ ndipuso yo we ndi nthenda yakusuluwa,+ wangaryanga cha vinthu vakupaturika mpaka po wajaliya wambula kufipiskika.+ Ndimu so vitenere kuŵiya ndi munthulumi yo wakwaska munthu yo wakufipiskika ndi munthu wakufwa,+ munthulumi yo watuzga unthulumi,+ 5 munthulumi yo wakwaska vamoyu vakufipiskika vo vitenda vinandi+ ndipuso munthulumi yo wakwaska munthu wakufipiskika.+ 6 Munthu yo wakwaska vinthu venivi, wajengi wakufipiskika mpaka mazulu ndipu wangaryanga cha vinthu vakupaturika kweni watenere kusamba.+ 7 Asani lumwi lasere, wajengi wambula kufipiskika ndipu pavuli paki wangarya vinyaki mwa vinthu vakupaturika chifukwa ntchakurya chaki.+ 8 Kweniso wangaryanga cha nyama yo yafwa yija pamwenga yo yapalurika ndi vinyama vamudondu kuti waleki kufipiskika ndi nyama yo.+ Ini ndini Yehova.

9 “‘Yiwu atenere kuvwiya marangu ngangu kuti aleki kubuda ndipuso kufwa chifukwa cha kuleka kuvwiya marangu kweniso kufipiska vinthu vakupaturika. Ini ndini Yehova yo watiŵatowesa.

10 “‘Munthu wambula kuzomerezeka* wangaryanga cha chinthu chechosi chakupaturika.+ Mulendu yo waza kunyumba kwa wasembi pamwenga munthu waganyu wangaryangaku cha chinthu chechosi chakupaturika. 11 Kweni asani wasembi wagula munthu ndi ndalama zaki, munthu yo wangaryaku vinthu vakupaturika. Akapolu wo akuwiya munyumba yaki nawu angaryaku chakurya chaki.+ 12 Asani mwana munthukazi wa wasembi watorana ndi munthulumi yo ngwasembi cha,* mwana yo wangaryangaku cha vinthu vakupaturika vo vaperekeka. 13 Kweni asani mwana munthukazi wa wasembi waja choko pamwenga asani mulumu waki wamupata ndipu walivi mwana kweniso wawere kunyumba ya awisi ko wajanga weche msungwana, wangaryaku vinyaki mwa vakurya,+ kweni munthu wambula kuzomerezeka* wangaryangaku cha.

14 “‘Asani munthu warya chinthu chakupaturika mwangozi watenere kuweziyapu ndipu wasazgiyengepu chimoza mwa vigaŵa vinkhondi va mtengu waki. Waperekengi vinthu vakupaturika vo kwa wasembi.+ 15 Vichitikengi viyo kuti asembi angafipiskanga cha vinthu vakupaturika vo Ayisirayeli apereka kwaku Yehova,+ 16 ndi kuchitiska kuti Ayisirayeli alangiki chifukwa cha mulandu wakuti arya vinthu vawu vakupaturika. Pakuti ini ndini Yehova yo watiŵatowesa.’”

17 Yehova wangulutirizga kulongoro ndi Mozesi, ndipu wangukamba kuti: 18 “Longoro ndi Aroni, ŵana ŵaki anthulumi ndipuso Ayisirayeli wosi ndipu uŵakambiyi kuti, ‘Asani Myisirayeli pamwenga mulendu yo waja mucharu cha Isirayeli wakhumba kupereka sembi yakupiriza+ kwaku Yehova kuti wafiski vo wangulapizga pamwenga asani wakhumba kupereka sembi mwakukhumba yija,+ 19 watenere kupereka ng’ombi yinthulumi yambula kalema,+ ŵana a mbereri anthulumi ambula kalema pamwenga phongu wambula kalema kuti Chiuta wamuyanji. 20 Mungaperekanga cha nyama yeyosi yo ye ndi kalema*+ chifukwa sembi yaviyo yingachitiska cha kuti Chiuta wakuyanjeni.

21 “‘Asani munthu wakhumba kupereka sembi ya chimangu+ kwaku Yehova kuti wafiski vo wakulapizga pamwenga asani wakhumba kupereka sembi mwakukhumba yija, watenere kupereka ng’ombi pamwenga mbereri yambula kalema kuti Chiuta wamuyanji. Nyama yo yijengi yambula kalema. 22 Yingajanga nyama yachibulumutiya cha, pamwenga yo yikufyoka, yo yikutemeka, yo ye ndi kamukonu, yo ye ndi vilonda ndipuso yo ye ndi vipheri. Mungaperekanga cha nyama zaviyo kwaku Yehova ndipuso mungawotchiyanga Yehova cha nyama zaviyo paguŵa la sembi. 23 Mungapereka ng’ombi yinthulumi pamwenga mbereri yo lundi laki nditali kuluska linyaki kuti yije sembi yakuperekeka mwakukhumba mwija, kweni yizomerezekengi cha asani muyiperekengi nge sembi yakulapizga. 24 Mungaperekanga cha kwaku Yehova nyama yo matongu ngaki ngakunangika, akungaphwanya, akungadoso pamwenga akungacheketa. Mungaperekanga cha nyama zaviyo mucharu chinu. 25 Nyama zaviyo zakutuliya ku mulendu mungaziperekanga cha nge chakurya chaku Chiuta winu, chifukwa chakuti zamampha cha ndipuso ze ndi kalema. Chiuta wazizomerezengi cha.’”

26 Yehova wangulutirizga kulongoro ndi Mozesi, ndipu wangukamba kuti: 27 “Asani ng’ombi, mbereri pamwenga mbuzi yawaku, yitenere kuja ndi nyina kwa mazuŵa 7,+ kweni kwambiya pa zuŵa la 8 mungayipereka kwaku Yehova nge sembi yakotcha ndi motu, ndipu wayizomerezengi. 28 Kweni mungabayanga cha ng’ombi pamwenga mbereri pamoza ndi mwana waki pa zuŵa limoza.+

29 “Asani mupereka sembi yakuwonga kwaku Yehova,+ muyiperekengi mwakwenere kuti wakuyanjeni. 30 Muryengi nyama yaki pa zuŵa lo mwapereke sembi. Mungasiyangaku cha kuti yifiki mpaka mlenji.+ Ini ndini Yehova.

31 “Musungengi marangu ngangu ndipu mungalondongi.+ Ini ndini Yehova. 32 Mungafipiskanga cha zina langu lakupaturika+ ndipu nditenere kutoweseka pakati pa Ayisirayeli.+ Ini ndini Yehova yo watikutowesani,+ 33 yo wakukutuzgani mucharu cha Ijipiti kuti ndikulongoni kuti ndini Chiuta winu.+ Ini ndini Yehova.”

23 Yehova wangulutirizga kulongoro ndi Mozesi ndipu wangukamba kuti: 2 “Longoro ndi Ayisirayeli ndipu uŵakambiyi kuti, ‘Maphwandu+ ngaku Yehova ngo mutenere kumemeza+ ndi maunganu ngakupaturika. Maphwandu ngangu ndi yanga:

3 “‘Mungagwira ntchitu kwa mazuŵa 6, kweni pa zuŵa la 7 lo ndi sabata mupumuwengi,+ ndi zuŵa la unganu wakupaturika. Mungagwiranga ntchitu yeyosi cha. Lenili lijengi sabata laku Yehova kwekosi ko muja.+

4 “‘Maphwandu ngaku Yehova ngo ndi maunganu ngakupaturika, ngo mutenere kumemeza pa nyengu yaki yakuŵikika ndi yanga: 5 Mu mwezi wakwamba, pa zuŵa la 14 la mwezi wo,+ ndi mazulu mdima wechendayambi* muperekengi sembi ya Pasika+ kwaku Yehova.

6 “‘Pa zuŵa la 15 la mwezi wenuwu muchitiyengi Yehova Phwandu la Viŵandi Vambula Chakutupisa.+ Muryengi viŵandi vambula chakutupisa kwa mazuŵa 7.+ 7 Pa zuŵa lakwamba muchitengi unganu wakupaturika.+ Mungagwiranga cha ntchitu yeyosi yakuvukisa. 8 Kweni kwa mazuŵa 7, muperekengi sembi zakotcha ndi motu kwaku Yehova. Pa zuŵa la 7, muchitengi unganu wakupaturika. Mungagwiranga cha ntchitu yeyosi yakuvukisa.’”

9 Yehova wangulutirizga kulongoro ndi Mozesi ndipu wangukamba kuti: 10 “Longoro ndi Ayisirayeli ndipu uŵakambiyi kuti, ‘Asani mwazisere mucharu cho nditikupaskani ndipu mwazivuna vakurya, muzizengi kwa wasembi+ ndi ntchinda ya vipasu vakwamba+ va mbewu zo mwavuna. 11 Ndipu wasembi wazamuyendesanga ntchinda yo uku ndi uku pa masu paku Yehova, kuti Chiuta wakuyanjeni. Wasembi yo, wazamuyendesa ntchinda yo uku ndi uku pa zuŵa lamawa laki asani zuŵa la Sabata lajumphapu. 12 Pa zuŵa lo mwazamuyendesiyanga ntchinda uku ndi uku, muziperekengi kwaku Yehova mwana wa mbereri munthulumi wambula kalema wambula kujumpha chaka chimoza, nge sembi yakupiriza. 13 Muchipereka sembi yeniyi, muziperekengi so sembi ya mbewu ya ufwa wakusilirika wakudaku mafuta wakukwana vigaŵa viŵi mwa vigaŵa 10 va mwesu wa efa* nge sembi yakotcha ndi motu ya kafungu kamampha* kwaku Yehova. Muziperekengi so sembi ya chakumwa ya vinyu wakukwana chigaŵa chimoza mwa vigaŵa vinayi va mwesu wa hini.* 14 Mungaziryanga chiŵandi chechosi cha, tirigu wakukazinga pamwenga mbewu zasonu, mpaka pa zuŵa lenili, mpaka po mwazipereke sembi yaku Chiuta winu. Lenili lazamuja dangu lamuyaya kwaku yimwi mu migonezi yinu yosi kwekosi ko muja.

15 “‘Kutuliya pa zuŵa lamawa laki asani zuŵa la Sabata lajumphapu, zuŵa lo mwapereke ntchinda ya sembi yakuzungunya,* muziŵerengengi masabata 7.+ Ngazijengi masabata ngamphumphu. 16 Muziŵerengengi mazuŵa 50,+ mpaka pa zuŵa lamawa laki asani masabata 7 ngajumphapu. Pa zuŵa lenili, muziperekengi sembi ya mbewu zasonu kwaku Yehova.+ 17 Muzizengi ndi viŵandi viŵi kutuliya kunyumba zinu kuti viziperekeki nge sembi yakuzungunya.* Muzipangengi viŵandi venivi mwakugwiriskiya ntchitu ufwa wakusilirika wakukwana vigaŵa viŵi mwa vigaŵa 10 va mwesu wa efa.* Vizijengi viŵandi vakusazgaku chakutupisa+ ndipu viziperekekengi kwaku Yehova nge vipasu vakwamba kucha.+ 18 Muchipereka viŵandi venivi, muziperekengi so ŵana a mbereri anthulumi 7 ambula kalema ndipu kamwana ka mbereri kekosi kazijengi ka chaka chimoza. Muziperekengi so tholi* limoza linthulumi ndi mbereri ziŵi zinthulumi.+ Nyama zenizi ziziperekekengi kwaku Yehova nge sembi yakupiriza limoza ndi sembi ya mbewu kweniso sembi za chakumwa kuti yizije sembi yakotcha ndi motu ya kafungu kamampha* kwaku Yehova. 19 Muziperekengi so mwana wa mbuzi nge sembi ya ubudi+ ndipuso ŵana a mbereri ŵaŵi anthulumi a chaka chimoza nge sembi ya chimangu.+ 20 Wasembi waziyendesengi ŵana a mbereri ŵaŵi limoza ndi viŵandi va vipasu vakwamba kucha, pa masu paku Yehova nge sembi yakuzungunya.* Vazamujanga vinthu vakupaturika kwaku Yehova ndipu vazamuperekekanga kwa wasembi.+ 21 Pa zuŵa lenili, mwazamumemezanga+ unganu wakupaturika. Mungazigwiranga cha ntchitu yeyosi yakuvukisa. Lenili lazamuja dangu lamuyaya kwekosi ko mwazamujanga mu migonezi yinu yosi.

22 “‘Asani muvuna vakurya mucharu chinu, mungazivunanga vosi cha mumphepeti mwa minda yinu ndipuso mungazitondonga cha vo vajaku pakuvuna.+ Muzisiliyengi akavu+ kweniso alendu* wo azamujanga pakati pinu.+ Ini ndini Yehova Chiuta winu.’”

23 Yehova wangulutirizga kulongoro ndi Mozesi ndipu wangukamba kuti: 24 “Kambiya Ayisirayeli kuti, ‘Mu mwezi wa 7, pa zuŵa lakwamba la mwezi wo, muzipumuwengi. Lenili ndi zuŵa lakuti muzilikumbukengi ndipu kwazamuvwikanga kumba kwa mbata.*+ Pa zuŵa lenili muzichitengi unganu wakupaturika. 25 Mungazigwiranga cha ntchitu yeyosi yakuvukisa ndipu muziperekengi sembi yakotcha ndi motu kwaku Yehova.’”

26 Yehova wangulutirizga kulongoro ndi Mozesi ndipu wangukamba kuti: 27 “Kweni zuŵa la 10 mu mwezi wa 7 ndi Zuŵa Lakubenekere Maubudi.+ Muchitengi unganu wakupaturika, mujisuzgengi*+ kweniso muperekengi sembi yakotcha ndi motu kwaku Yehova. 28 Pa zuŵa lenili, mungagwiranga ntchitu yeyosi cha chifukwa ndi zuŵa lakubenekere maubudi kuti maubudi nginu ngabenekereki+ pa masu paku Yehova Chiuta winu. 29 Weyosi yo walekengi kujisuzga* pa zuŵa ili wabayikengi kuti waleki kuja pakati pa ŵanthu a mtundu waki.+ 30 Munthu weyosi yo wagwirengi ntchitu pa zuŵa ili ndimubayengi kuti waleki kuja pakati pa ŵanthu a mtundu waki. 31 Mungagwiranga ntchitu yeyosi cha. Lenili ndi dangu lamuyaya mu migonezi yinu yosi kwekosi ko muja. 32 Zuŵa lenili ndi sabata ndipu mupumuwengi. Ndi mazulu, pa zuŵa la 9 la mwezi wenuwu, mujisuzgengi.+ Musungengi sabata kutuwa mazulu mpaka mazulu nganyaki.”

33 Yehova wangulutirizga kulongoro ndi Mozesi ndipu wangukamba kuti: 34 “Kambiya Ayisirayeli kuti, ‘Pa zuŵa la 15 la mwezi wa 7, muchitiyengi Yehova Phwandu la Misasa kwa mazuŵa 7.+ 35 Pa zuŵa lakwamba muchitengi unganu wakupaturika ndipu mungagwiranga cha ntchitu yeyosi yakuvukisa. 36 Kwa mazuŵa 7 muperekengi sembi yakotcha ndi motu kwaku Yehova. Pa zuŵa la 8 muchitengi unganu wakupaturika+ ndipu muperekengi sembi yakotcha ndi motu kwaku Yehova. Wenuwu ndi unganu wapade. Mungagwiranga cha ntchitu yeyosi yakuvukisa.

37 “‘Ngenanga ndingu maphwandu+ ngaku Yehova ngo mutenere kumemeza, nge maunganu ngakupaturika+ ngakupereke sembi zakotcha ndi motu kwaku Yehova. Sembi zaki ndi izi: sembi yakupiriza,+ sembi ya mbewu+ ndipuso sembi za chakumwa+ mwakukoliyana ndi ndondomeku ya zuŵa lelosi. 38 Muperekengi sembi zenizi kusazgiyapu pa sembi zo mutenere kupereka kwaku Yehova nge zo mupereka pa masabata ngaku Yehova,+ mphasu zinu,+ sembi zinu zakulapizga+ ndipuso sembi zo mupereka mwakukhumba mwija.+ 39 Kweni pa zuŵa la 15 mu mwezi wa 7, asani mwawunganisa vinthu vo mwavuna mucharu chinu, muchitengi phwandu laku Yehova kwa mazuŵa 7.+ Pa zuŵa lakwamba mupumuwengi, ndipu pa zuŵa la 8 mupumuwengi so.+ 40 Pa zuŵa lakwamba mutongi vipasu va vimiti vamampha ukongwa, mani nga vimiti va kantchindi,+ mphanda za vimiti va mani nganandi, kweniso mphanda za vimiti va arava va mudambu* ndipu mukondwengi+ pa masu paku Yehova Chiuta winu kwa mazuŵa 7.+ 41 Muchitiyengi Yehova phwandu kwa mazuŵa 7 pa chaka.+ Muchitengi phwandu ili mu mwezi wa 7, ndipu lenili ndi dangu lamuyaya mu migonezi yinu yosi. 42 Mujengi mumisasa kwa mazuŵa 7.+ Ayisirayeli wosi ajengi mumisasa, 43 kuti migonezi yakunthazi yiziziŵi+ kuti ndinguchitiska Ayisirayeli kuti ajengi mumisasa pa nyengu yo ndaŵatuzganga mucharu cha Ijipiti.+ Ini ndini Yehova Chiuta winu.’”

44 Mwaviyo, Mozesi wangukambiya Ayisirayeli vakukwaskana ndi maphwandu ngaku Yehova.

24 Yehova wangulutirizga kulongoro ndi Mozesi ndipu wangukamba kuti: 2 “Lamula Ayisirayeli kuti akupaski mafuta nga maolivi ngamampha ukongwa ngakuyengetulika ngakumbulikiya, kuti nyali zikoliyengi nyengu zosi.+ 3 Aroni wawonesesengi kuti nyengu zosi nyali zikole kutuwa mazulu mpaka mlenji pa masu paku Yehova, kubwalu kwa ketani yo ye pafupi ndi bokosi la Ukaboni muchihema chakukumanaku. Lenili ndi dangu lamuyaya mu migonezi yinu yosi. 4 Nyengu zosi Aroni waŵikengi nyali pachakuŵikapu nyali+ chagolidi chayiyu, pa masu paku Yehova.

5 “Uto ufwa wakusilirika ndipu upangi viŵandi 12 vazenji pakati. Chiŵandi chechosi uchipangi ndi ufwa wakukwana vigaŵa viŵi mwa vigaŵa 10 va mwesu wa efa.* 6 Uyereki viŵandi vo pathebulu lagolidi chayiyu pa masu paku Yehova.+ Uviyereki mu magulu ngaŵi ndipu pa gulu lelosi uyerekepu viŵandi 6.+ 7 Pa gulu lelosi la viŵandi uŵikepu libani, ndipu libani lo liperekekengi nge sembi yakotcha ndi motu yakuperekeka kwaku Yehova, kuti limiyi viŵandi.*+ 8 Nyengu zosi pa zuŵa la Sabata wayerekengi viŵandi venivi pa masu paku Yehova.+ Lenili ndi phanganu lamuyaya pakati paku ini ndi Ayisirayeli. 9 Viŵandi venivi viŵengi vaku Aroni ndi ŵana ŵaki anthulumi,+ ndipu aviryiyengi mumalu ngakupaturika*+ chifukwa chakuti vakupaturika ukongwa ndipu vaperekeka kwaku iyu kutuliya pa sembi yakotcha ndi motu yakuperekeka kwaku Yehova. Lenili ndi dangu lamuyaya.”

10 Sonu pakati pa Ayisirayeli penga mnyamata munyaki yo nyina wenga Myisirayeli kweni wisi wenga wa ku Ijipiti.+ Mnyamata uyu wangwamba kupumana ndi munthulumi munyaki yo wenga Myisirayeli mumsasa. 11 Mnyamata yo nyina wenga Myisirayeli, wangwamba kunyoza zina laku Chiuta* ndi kulitemba.+ Mwaviyo, anguza nayu kwaku Mozesi.+ Nyina wa mnyamata uyu wenga Shelomiti, mwana munthukazi waku Dibiri wa fuku laku Dani. 12 Mnyamata uyu angumusunga dankha mpaka po anguziŵiya cheruzgu chaku Yehova.+

13 Pavuli paki, Yehova wangukambiya Mozesi kuti: 14 “Munthu yo wangutemba zina laku Chiuta, muluti nayu kubwalu kwa msasa ndipu ŵanthu wosi wo angumuvwa wachitemba aŵiki manja ngawu pamutu waki, pavuli paki Ayisirayeli wosi amuponyi ndi mya.*+ 15 Ndipu kambiya Ayisirayeli kuti, ‘Asani munthu watemba Chiuta waki, watenere kulangika chifukwa cha ubudi waki. 16 Mwaviyo, munthu yo wanyoza zina laku Yehova watenere kubayika kwambula kutondeka.+ Ayisirayeli wosi amuponyengi* ndi mya kwambula kutondeka. Kwali ndi mulendu pamwenga mweneku charu, wosi atenere kubayika asani anyoza zina laku Chiuta.

17 “‘Asani munthu wabaya munthu munyaki, watenere kubayika kwambula kutondeka.+ 18 Munthu weyosi yo wapuma chiŵetu mpaka kuchibaya, watenere kuweziyapu chiŵetu cho, chiŵetu kulipa chiŵetu.* 19 Asani munthu wapweteka munyaki, nayu amuchitiyi vo wachitiya munyaki.+ 20 Kufyo chiwanga kulipa kufyo chiwanga, jisu kulipa jisu, jinu kulipa jinu. Nayu wapwetekeki nge mo iyu wapweteke munyaki.+ 21 Munthu yo wapuma chiŵetu mpaka kuchibaya watenere kuweziyapu chiŵetu cho,+ kweni munthu yo wapuma munthu munyaki mpaka kumubaya watenere kubayika.+

22 “‘Cheruzgu cho chiperekekengi ku mulendu ndichu so chitenere kuperekeka ku mweneku charu,+ chifukwa ini ndini Yehova Chiuta winu.’”

23 Pavuli paki, Mozesi wangulongoro ndi Ayisirayeli ndipu munthu yo wangutemba zina laku Chiuta anguluta nayu kubwalu kwa msasa ndipu angumuponya mya.+ Mwaviyo, Ayisirayeli anguchita nge mo Yehova wangulamuliya Mozesi.

25 Yehova wangulutirizga kulongoro ndi Mozesi pa Phiri la Sinayi, ndipu wangukamba kuti: 2 “Longoro ndi Ayisirayeli ndipu uŵakambiyi kuti, ‘Asani mwazisere mucharu cho nditikupaskani,+ charu cho, chazamusunganga sabata laku Yehova.+ 3 Kwa vyaka 6, muzipandengi mbewu muminda yinu, ndipuso kwa vyaka 6 muziphatiriyengi vimiti vinu va mphereska ndipu muziwunjikengi vo mwavuna mucharu cho.+ 4 Kweni chaka cha 7, chazamujanga chaka cha sabata laku Yehova ndipu charu chinu chizipumuwengi. Mungazipandanga cha mbewu muminda yinu pamwenga kuphatiriya vimiti vinu va mphereska. 5 Mungazivunanga cha vakurya vo vazamumenga vija kutuliya ku mbewu zo zajaliya muminda yo mwavunamu, ndipuso mungaziwunjikanga cha mphereska za muvimiti vo munguleka kuphatiriya. Mu chaka chenichi charu chizipumuwengi. 6 Kweni muziryengi chakurya cho chame mucharu cho mu chaka cha sabata. Yimwi, akapolu ŵinu anthulumi kweniso anthukazi, waganyu winu ndipuso alendu wo aja pakati pinu, muziryengi vakurya venivi. 7 Kweniso viŵetu ndi nyama zamudondu za mucharu chinu, viziryengi chakurya chenichi. Muziryengi chechosi cho chame chija mucharu cho.

8 “‘Muziŵerengengi masabata 7 nga vyaka, vyaka 7 tayimuzi 7 ndipu masabata 7 nga vyaka ngazamukwananga vyaka 49. 9 Mu mwezi wa 7 pa zuŵa la 10 la mwezi wo, lo ndi Zuŵa Lakubenekere Maubudi,+ muzimbengi mbata* mwakukweza ndipu yizivwikengi mucharu chinu chosi. 10 Chaka cha 50 chazamujanga chaka chakupaturika ndipu muzipharazgengi wanangwa ku ŵanthu wosi wo aja mucharu chinu.+ Chazamujanga Chaka cha Wanangwa kwaku yimwi. Weyosi wazamuweriyanga pamalu ngaki ndipuso weyosi wazamuweriyanga ku banja laki.+ 11 Chaka cha 50 chazamujanga Chaka cha Wanangwa kwaku yimwi. Mungazipandanga mbewu cha pamwenga kuvuna vakurya vo vazamumenga vija kutuliya ku mbewu zo zajaliya muminda ndipuso mungaziwunjikanga cha mphereska za muvimiti vo munguleka kuphatiriya.+ 12 Chaka ichi chizijengi chaka chakupaturika kwaku yimwi chifukwa ndi Chaka cha Wanangwa. Muziryengi vakurya vo vame vija pe mucharu chinu.+

13 “‘Mu Chaka cha Wanangwa chenichi, weyosi waziweriyengi pamalu ngaki.+ 14 Asani mugulisa chinthu chechosi ku munyinu pamwenga asani mugula chinthu kwaku iyu, mungaryiyananga masuku pamutu cha.+ 15 Asani ugula malu kwa munyaku uŵerengengi vyaka vo vajumphapu kutuliya mu Chaka cha Wanangwa. Iyu wakugulisi malu ngo mwakukoliyana ndi unandi wa vyaka vo uvunengemu vakurya.+ 16 Asani kwaja vyaka vinandi vo uvunengemu vakurya, munyaku wakusazgiyeku mtengu waki kweni asani kwaja vyaka vimanavi, wakutuzgiyeku mtengu waki, chifukwa chakuti watikugulisa vakurya vo wazamuvunangamu. 17 Weyosi waku yimwi wangaryiyanga masuku pamutu munyaki cha.+ Muwopengi Chiuta winu,+ pakuti ini ndini Yehova Chiuta winu.+ 18 Asani muvwiyengi marangu ngangu ndi kusunga vyeruzgu vangu, mwazamujanga mwakuvikilirika mucharu cho.+ 19 Charu cho chazakukupaskani vipasu vaki,+ mwazamuryanga ndi kuguta ndipu mwazamujanga mwakuvikilirika.+

20 “‘Kweni asani mwazikamba kuti: “Tazamuryanji mu chaka cha 7 asani tipandengi cha mbewu pamwenga kuwunganisa vakurya vidu?”+ 21 Ndazakukutumbikani mu chaka cha 6 ndipu charu chazakukupaskani chakurya chakukwana vyaka vitatu.+ 22 Mwazamupandanga mbewu mu chaka cha 8 ndipu mwazamuryanga vakurya vakali mpaka mu chaka cha 9. Mwazamulutirizga kurya vakurya vakali mpaka po mwavuniya vinyaki.

23 “‘Mungazigulisiyanga limu cha malu+ chifukwa charu cho ntchangu.+ Pakuti kwaku ini, yimwi mwazamuja mucharu cho nge alendu.+ 24 Mucharu chinu chosi munthu wazijengi ndi wanangwa wakuwombo malu ngaki.

25 “‘Asani mubali waku wakavuka ndipu wagulisa nganyaki mwa malu ngaki, wakuwombo yo ndi mubali waki wapafupi wazengi ndipu wawombongi malu ngo mubali waki wagulisa.+ 26 Asani munthu walivi mubali waki yo wangamuwombole malu ngaki, kweni wakhupuka ndipu wasaniya ndalama zakuwombole malu ngo, 27 waŵerengese unandi wa ndalama za vakurya vo vinguvunika mu vyaka vo malu ngo ngangugulisika, ndipu watuzgiyeku ku mtengu wo wangugulisiya malu ngo. Ndalama zo zajaku ndizu wapereki ku munthu yo wangumugulisa malu ngo. Pavuli paki, munthu yo wawere pamalu ngaki.+

28 “‘Kweni asani munthu yo watondeka kusaniya ndalama zakuwombole malu ngaki, malu ngo ngajengi nga munthu yo wangugula, mpaka mu Chaka cha Wanangwa.+ Mu Chaka cha Wanangwa, munthu yo atenere kumuweze malu ngaki ndipu iyu waweriyengi pamalu ngaki.+

29 “‘Asani munthu wagulisa nyumba yo ye mutawuni ya mpanda, wangawombo nyumba yo pechendajumphi chaka chimoza kutuliya po wanguyigulisiya. Iyu wajengi ndi wanangwa wakuwombo so malu ngo+ kwa chaka chimoza. 30 Kweni asani chaka champhumphu chamala ndipu munthu yo watondeka kuwombo nyumba yaki, nyumba yo yijengi ya munthu yo wanguyigula mu migonezi yaki yosi. Wangayiwezanga cha mu Chaka cha Wanangwa. 31 Kweni nyumba za mumizi yambula mipanda, muziwonengi ŵaka nge minda ya mucharu. Munthu we ndi wanangwa wakuwombo nyumba yo, ndipu yiwezekengi ku mweneku mu Chaka cha Wanangwa.

32 “‘Kweni nyumba za Alevi zo ze mumatawuni ngawu,+ Alevi ajengi ndi wanangwa wambula kumala wakuwombo nyumba zawu. 33 Asani Mlevi wagulisa nyumba mutawuni ya Alevi ndipu watondeka kuyiwombo, amuweziyengi nyumba yo mu Chaka cha Wanangwa,+ chifukwa nyumba za mumatawuni nga Alevi pakati pa Ayisirayeli, za Alevi.+ 34 Kweniso malu ngakuliskaku viŵetu+ ngo nge kubwalu kwa matawuni ngawu, ngangagulisikanga cha chifukwa chakuti ndi malu ngawu mpaka muyaya.

35 “‘Asani mubali waku yo uja nayu pafupi wakavuka ndipu watondeka kusaniya vakukhumbika pa umoyu, utenere kumuwovya+ nge mo ungawovye mulendu kweniso munthu yo waja pakati pinu.+ Uchitengi viyo kuti walutirizgi kuja ndi umoyu pakati pinu. 36 Ungachitanga katapira cha pamwenga kusaniriyapu phindu paku iyu.+ Uwopengi Chiuta waku+ ndipu mubali waku walutirizgengi kuja ndi umoyu pakati pinu. 37 Asani wamubwerekesa ndalama, ungalondiyanga yapachanya cha,+ ndipu asani wamupaska chakurya ungasaniriyangapu phindu cha. 38 Ini ndini Yehova Chiuta winu yo wakukutuzgani mucharu cha Ijipiti+ kuti ndikupaskeni charu cha Kenani. Ndinguchita venivi kuti ndikulongoni kuti ndini Chiuta winu.+

39 “‘Asani mubali waku yo uja nayu pafupi wakavuka ndipu wajigulisa kwaku yiwi,+ ungamuchichizganga cha kuti wagwirengi ntchitu ya ukapolu.+ 40 Umutongi nge waganyu+ ndipuso nge mulendu. Iyu wakuteŵete mpaka mu Chaka cha Wanangwa. 41 Mu chaka chenichi iyu wakulekengi ndipu waweriyengi ku banja laki limoza ndi ŵana ŵaki.* Iyu watenere kuwere pamalu nga apapi ŵaki akali.+ 42 Pakuti yiwu mbakapolu ŵangu wo ndikuŵatuzga mucharu cha Ijipiti.+ Angajigulisanga nge mo kapolu wagulisikiya cha. 43 Ungamuchitiyanga nkhaza cha+ ndipu uwopengi Chiuta waku.+ 44 Akapolu anthulumi ndipuso anthukazi atuliyengi mu mitundu yo yakuzunguliyani. Ku mitundu yeniyi ndiku mugulengi akapolu anthulumi ndi anthukazi. 45 Mungagula so akapolu kutuliya mu ŵana ŵa alendu wo aja pakati pinu+ ndipuso kutuliya mu ŵana ŵawu wo abaliya mucharu chinu ndipu ajengi ŵinu. 46 Ŵana ŵinu mungaŵasiliya akapolu wo kuti chije chihara chawu chambula kumala. Mungaŵagwiriska ntchitu, kweni Ayisirayeli anyinu mungaŵachitiyanga nkhaza cha.+

47 “‘Kweni asani mulendu pamwenga munthu yo waja pakati pinu wakhupuka kweni mubali winu yo waja pafupi ndi mulendu yo wakavuka, ndipu wajigulisa ku mulendu yo pamwenga ku munthu yo waja pakati pinu pamwenga ku munthu wa mubanja la mulendu yo, 48 mubali winu walutirizgengi kuja ndi wanangwa wakuwomboleka. Mubali waki wangamuwombo,+ 49 pamwenga awisi ara, awisi amana, mwana munthulumi wa awisi ara, mwana munthulumi wa awisi amana, mubali waki munyaki,* ndipuso munthu munyaki wa mubanja laki, wangamuwombo.

“‘Ndipu asani iyu mweneku wakhupuka, wangajiwombo yija.+ 50 Iyu waŵerengiyani ndi munthu yo wangumugula unandi wa vyaka kutuliya po wangujigulisiya kwaku iyu mpaka mu Chaka cha Wanangwa+ ndipu ndalama zo wangujigulisiya zikoliyani ndi unandi wa vyaka.+ Mazuŵa ngo wangugwira ntchitu ngaŵerengeseki mwakuyanana ndi mo aŵerengese mazuŵa ngo munthu waganyu wagwiriya ntchitu.+ 51 Asani kwaja vyaka vinandi, wapereki ndalama zakujiwombole mwakukoliyana ndi vyaka vo vajaku. 52 Kweni asani kwaja vyaka vimanavi kuti Chaka cha Wanangwa chifiki, waŵerengese mtengu wakujiwombole mwakukoliyana ndi vyaka vo vajaku ndipu wapereki ku munthu yo wangumugula. 53 Iyu walutirizgi kumuteŵete chaka ndi chaka nge waganyu ndipu uwonesesengi kuti watimuchitiya nkhaza cha.+ 54 Kweni asani wangajiwombo cha mu nthowa yeniyi, iyu limoza ndi ŵana ŵaki* afwatulikengi mu Chaka cha Wanangwa.+

55 “‘Pakuti Ayisirayeli mbakapolu ŵangu. Yiwu mbakapolu ŵangu wo ndikuŵatuzga mucharu cha Ijipiti.+ Ini ndini Yehova Chiuta winu.

26 “‘Mungajipangiyanga achiuta ambula fundu cha,+ mungamikanga chikozgu chakusema cha+ pamwenga chipilala chakupaturika ndipuso mungaŵikangamu mwa wakujobeka cha+ mucharu chinu kuti muvisindamiyengi,+ pakuti ini ndini Yehova Chiuta winu. 2 Musungengi masabata ngangu ndipuso mutumbikengi* malu ngangu ngakupaturika. Ini ndini Yehova.

3 “‘Asani mulutirizgengi kulondo marangu ngangu, kungasunga ndipuso kuchita vo ngakamba,+ 4 ndazakukuwisiyani vuwa pa nyengu yaki,+ charu chinu chazamubala vakurya+ ndipu vimiti va mucharu chinu vazamupasa vipasu vaki. 5 Nyengu yakukhweme mbewu yazamulutiriya mpaka nyengu yakuvuniya mphereska, ndipu nyengu yakuvuniya mphereska yazamulutiriya mpaka nyengu yakupandiya mbewu. Mwazamukurya chiŵandi mpaka kuguta ndipu mwazamujanga mwakuvikilirika mucharu chinu.+ 6 Ndazamuchitiska kuti mucharu chinu muje chimangu+ ndipu mwazamugonanga kwambula kuwofyeka ndi munthu weyosi.+ Ndazamudikisa vinyama vakofya vamudondu mucharu chinu ndipuso lipanga la nkhondu lazamujumphamu cha. 7 Mwazamudikisa arwani ŵinu ndipu mwazakuŵathereska ndi lipanga. 8 Mwaŵanthu ankhondi mwazamudikisa ŵanthu 100, mwaŵanthu 100 mwazamudikisa ŵanthu 10,000 ndipu mwazamuthereska arwani ŵinu ndi lipanga.+

9 “‘Ndazakukukumbukani ndipu ndazamuchitiska kuti mubalani ndi kuyandana+ ndipu ndazamusunga phanganu lo ndikuchita namwi.+ 10 Pa nyengu yo mwazamuryanga chakurya cha chaka chamala, mwazamutuzgamu chakurya chakali kuti muŵikemu chasonu. 11 Ndazamuŵika chihema changu pakati pinu+ ndipu ndazakukukanani cha. 12 Ndazamukwenda pakati pinu, ndazamuja Chiuta winu+ ndipu yimwi mwazamuja ŵanthu ŵangu.+ 13 Ini ndini Yehova Chiuta winu, yo wakukutuzgani mucharu cha Ijipiti kuti muleki kuja akapolu ŵaki. Ndingufyo goli linu ndipu ndingukuchitiskani kuti muyendi mwakunyoloka.

14 “‘Kweni asani mwazindivwiya cha, asani mwazileka kusunga marangu ngosi yanga,+ 15 asani mwazikana marangu ngangu+ ndi kutinkha vyeruzgu vangu kuti muleki kusunga marangu ngangu ngosi, kweniso asani mwaziswa phanganu langu,+ 16 ndazakukuchitiyani vinthu ivi: Ndazakukuchitiskani kuti muzije ndi mantha ngakulu, ndazakukulangani ndi chifuŵa chikulu kweniso kufunda muliŵavu, vo vazamuchitiska kuti masu nginu ngaleki kuwona kweniso kuti muŵevi nthazi. Mwazamupandanga mbewu kweni mwazamusuzgikiyanga paŵaka chifukwa arwani ŵinu ndiwu azamukurya vakurya vinu.+ 17 Ndazakukukanani* ndipu arwani ŵinu azakukuthereskani.+ Ŵanthu wo atikutinkhani azakukukandirizgani+ ndipu mwazamuthaŵa kwambula munthu wakukutchimbizani.+

18 “‘Asani venivi vazikuchitikiyani ndipu mutindivwiya mbwenu cha, ndazakukulangani maulendu 7 kujumpha po ndingukulangiyani pakwamba chifukwa cha maubudi nginu. 19 Ndazamuchitiska kuti muleki kujikuzga, ndazamuchitiska kuti kuchanya kwinu kuje nge chisulu+ ndipuso kuti charu chinu chije nge mkuŵa. 20 Mwazamumaliya nthazi zinu paŵaka chifukwa charu chinu chazakukubaliyani chakurya cha,+ ndipu vimiti va mucharu chinu vazamupasa vipasu cha.

21 “‘Kweni asani mwazamulutirizga kususkana nani ndi kukana kundivwiya, ndazakukulangani maulendu 7 kujumpha po ndingukulangiyani pakwamba chifukwa cha maubudi nginu. 22 Ndazamutumiza vinyama vamudondu pakati pinu+ ndipu vazamubaya ŵana ŵinu+ ndi viŵetu vinu, vazamuchitiska kuti muje amana ndipu mumisewu yinu mwazamuyendanga ŵanthu cha.+

23 “‘Asani venivi vazikuchitikiyani ndipu mukana mbwenu kundivwiya chinanga kuti ndakulangani+ ndipuso mulutirizga kususkana nani, 24 nani ndazakukususkani ndipu ndazakukulangani maulendu 7 chifukwa cha maubudi nginu. 25 Ndazakukutumiziyani lipanga kuti ndikuweziyeni chifukwa chakuti mwaswa phanganu langu.+ Asani mwaziwungana mumatawuni nginu, ndazamutumiza nthenda pakati pinu+ ndipuso ndazakukuperekani mu manja mwa murwani.+ 26 Asani ndazileka kukupaskani chiŵandi*+ chakukwana,* anthukazi 10 azamuwotchanga viŵandi mu uvunu yimoza pe. Azakukupimiyani chiŵandi chakuti muryi+ ndipu mwazamukurya kweni mwazamuguta cha.+

27 “‘Asani venivi vazikuchitikiyani kweni mutindivwiya mbwenu cha ndipuso mulutirizga kususkana nani, 28 ndazakukususkani ukongwa+ ndipu ndazakukulangani maulendu 7 chifukwa cha maubudi nginu. 29 Ndipu mwazamukurya ŵana ŵinu anthulumi ndipuso mwazamukurya ŵana ŵinu anthukazi.+ 30 Ndazamunanga malu nginu ngapachanya ngakupaturika+ ndi kudumuliya pasi malu nginu ngakuŵikapu vakununkhira. Ndazamuwunjika mathupi nginu pachanya pa mathupi nga angoza ŵinu akuseruska*+ ndipu ndazakukulekani chifukwa cha kuseruka namwi.+ 31 Ndazamunanga matawuni nginu ndi lipanga+ ndipu mumalu nginu ngakupaturika mwazamuŵavi ŵanthu. Ndazamukondwa cha ndi fungu la sembi zinu za kafungu kamampha.* 32 Ndazamuchitiska kuti charu chinu chije chambula ŵanthu+ ndipu arwani ŵinu wo aja mucharu cho azamuzizwa nachu ukongwa.+ 33 Ndazakukumbininiskiyani pakati pa ŵanthu amitundu yinyaki+ ndipu ndazamusolo lipanga ndi kukutchimbizani.+ Charu chinu chazamuja chambula ŵanthu+ ndipu ndazamubwanganduwa matawuni nginu.

34 “‘Pa nyengu yo, charu chazamuweziyapu masabata ngaki mu mazuŵa ngosi ngo chazamujaliya chambula ŵanthu, yimwi muchija mucharu cha arwani ŵinu. Pa nyengu yo, charu chazamupumuwa* kuti chiweziyepu masabata ngaki.+ 35 Charu chazamupumuwa mu mazuŵa ngosi ngo chazamujaliya chambula ŵanthu chifukwa chakuti chingupumuwa cha mu masabata nginu pa nyengu yo mwajanga mucharu cho.

36 “‘Ndazamuchitiska kuti ŵanthu wo apona+ azichitengi mantha muvyaru va arwani ŵawu ndipu azamuthaŵanga asani avwa ŵaka kuputa kwa jani. Azamuthaŵanga nge munthu yo wathaŵa lipanga ndipu azamukuwa pasi kwambula munthu wakuŵatchimbiza.+ 37 Chinanga kuti pazamuŵavi munthu wakuŵatchimbiza, weyosi wazamuguŵa mu munyaki nge ŵanthu wo athaŵa lipanga. Mwazamutondeka kujivikiliya kwa arwani ŵinu.+ 38 Mwazamumala pakati pa ŵanthu amitundu yinyaki+ ndipu charu cha arwani ŵinu chazakukumezani. 39 Yimwi mwazamujaku mwazamulekeka kuti muvundi mucharu cha arwani ŵinu+ chifukwa cha kunanga kwinu. Yiwu azamuvunda chifukwa cha kunanga kwa awusewu.+ 40 Pavuli paki, azamusumuwa kunanga kwawu+ kweniso kunanga ndi kuleka kugomezgeka kwa awusewu, ndipu azamuzomera kuti angugomezgeka cha chifukwa chakuti angususkana nani.+ 41 Nani ndazamususkana nawu+ mwakuluta nawu mucharu cha arwani ŵawu.+

“‘Kuti panyaki mitima yawu yambula kudumulika yingazijiyuyuwa.+ Ndipu yiwu azamulipira chifukwa cha kunanga kwawu. 42 Ndazamukumbuka phanganu lo ndinguchita ndi Yakobe,+ phanganu lo ndinguchita ndi Isaki+ kweniso ndazamukumbuka phanganu lo ndinguchita ndi Abrahamu+ ndipu charu cho ndazakuchikumbuka. 43 Pa nyengu yo azamusiya charu chawu, charu cho chazamuweziyapu masabata ngaki+ ndipu chazamuja chambula ŵanthu. Yiwu azamulipira chifukwa cha kunanga kwawu pakuti angukana vyeruzgu vangu kweniso atinkhanga marangu ngangu.+ 44 Chinanga kuti vinthu vosi ivi vazakuŵachitikiya, ndazakuŵakaniya limu cha mucharu cha arwani ŵawu+ pamwenga kuŵataya kuti amaliyi limu, vo vingazichitiska kuti ndiziswi phanganu+ lo ndinguchita nawu, pakuti ini ndini Yehova Chiuta wawu. 45 Chifukwa chaku yiwu, ndazamukumbuka phanganu lo ndinguchita ndi apapi ŵawu+ wo ndikuŵatuzga mucharu cha Ijipiti mitundu yinyaki yichiwona,+ kuti ndilongo kuti ndini Chiuta wawu. Ini ndini Yehova.’”

46 Zenizi ndizu fundu, vyeruzgu ndipuso marangu ngo Yehova wangujalikiska pakati paku iyu ndi Ayisirayeli pa Phiri la Sinayi kuziya mwaku Mozesi.+

27 Yehova wangulutirizga kulongoro ndi Mozesi, ndipu wangukamba kuti: 2 “Longoro ndi Ayisirayeli ndipu uŵakambiyi kuti, ‘Asani munthu walapizga mwapade+ kuti waperekengi kwaku Yehova mtengu wa munthu wo ukujalikiskika, 3 mtengu wa munthulumi wa vyaka 20 mpaka 60 ndi masekeli* 50 ngasiliva mwakukoliyana ndi sekeli ya mumalu ngakupaturika.* 4 Kweni asani ndi munthukazi, mtengu waki ndi masekeli 30 ngasiliva. 5 Asani munthu yo ngwa vyaka kwambiya vinkhondi mpaka 20, mtengu waki ndi masekeli 20 asani ndi munthulumi, ndipuso masekeli 10 asani ndi munthukazi. 6 Asani ngwa mwezi umoza mpaka vyaka vinkhondi, mtengu wa munthulumi ndi masekeli ngankhondi ngasiliva ndipu asani ndi munthukazi mtengu waki ndi masekeli ngatatu ngasiliva.

7 “‘Asani munthu yo we ndi vyaka 60 pamwenga kujumpha, mtengu waki ndi masekeli 15 asani ndi munthulumi ndipu asani ndi munthukazi mtengu waki ndi masekeli 10. 8 Kweni asani munthu yo wangafiska cha kupereka mtengu wo ukujalikiskika chifukwa chakuti ndi mukavu ukongwa,+ munthu yo wakami pa masu pa wasembi ndipu wasembi wamutchajengi mtengu unyaki. Wasembi watchajengi mwakukoliyana ndi vo munthu yo walapizga, wangafiska.+

9 “‘Asani munthu walapizga kuti waperekengi nyama yakwenere kuperekeka kwaku Yehova nge sembi, yeyosi yo wangapereka kwaku Yehova yijengi yakupaturika. 10 Wangayituzgangapu cha ndi kuŵikapu yinyaki ndipuso wangasinthisanga cha yamampha ndi yiheni pamwenga yiheni ndi yamampha. Kweni asani wayisinthisa ndi nyama yinyaki, nyama yo wasinthisa kweniso yakwamba, zosi zijengi zakupaturika. 11 Asani nyama yo wakhumba kupereka njakufipiskika+ ndipu njakuti yingaperekeka cha kwaku Yehova, munthu yo watenere kuza nayu pa masu pa wasembi. 12 Wasembi watchajengi mtengu waki mwakukoliyana ndi mo nyama yo yiliri, kwali njamampha pamwenga njiheni. Mtengu wo wasembi watchajengi ungasinthanga cha. 13 Kweni asani wakhumba kuyiwombo, watenere kupereka mtengu wa nyama yo, ndipu wasazgiyepu chigaŵa chimoza mwa vigaŵa vinkhondi va mtengu wo.+

14 “‘Asani munthu wapatuwa nyumba yaki kuti yije yakupaturika kwaku Yehova, wasembi watchajengi mtengu waki mwakukoliyana ndi mo nyumba yo yiliri, kwali njamampha pamwenga njiheni. Mtengu wo wasembi watchaja ndiwu ujengi mtengu wa nyumba yo.+ 15 Kweni asani munthu wakhumba kuwombo nyumba yo wakuyipatuwa, watenere kupereka mtengu wo ukujalikiskika ndi kusazgiyapu chimoza mwa vigaŵa vinkhondi va mtengu wo, ndipu nyumba yo yijengi yaki.

16 “‘Asani munthu wakhumba kupatuwa chigaŵa chinyaki cha munda waki kuti chije chakupaturika kwaku Yehova, mtengu waki utchajikengi mwakukoliyana ndi unandi wa mbewu zo zingakwana kupandika mumunda wo. Mbewu za balire zakukwana mwesu umoza wa homeri* mtengu waki ndi masekeli 50 ngasiliva. 17 Asani munda waki wawupatuwa mu Chaka cha Wanangwa,+ mtengu waki usinthengi cha. 18 Asani wapatuwa munda waki Chaka cha Wanangwa chajumphapu, wasembi waŵerengesiyengi mtengu waki mwakukoliyana ndi vyaka vo vajaku kuti Chaka cha Wanangwa chinyaki chifiki, ndipu watuzgiyengeku ku mtengu wo ukujalikiskika.+ 19 Kweni asani munthu wakhumba kuwombo munda wo wakuwupatuwa, watenere kupereka mtengu wo ukujalikiskika ndi kusazgiyapu chimoza mwa vigaŵa vinkhondi va mtengu wo, ndipu munda wo ujengi waki. 20 Asani munthu yo watondeka kuwombo munda waki ndipu munda wo wagulisika ku munthu munyaki, wangawuwombo so cha. 21 Mu Chaka cha Wanangwa munda wo uperekekengi kwaku Yehova ndipu ujengi wakupaturika kwaku iyu. Munda wo ujengi wa asembi.+

22 “‘Asani munthu wapatuwa munda wo wangugula kuti uje waku Yehova, munda wo wanguchita kuhara cha,+ 23 wasembi waŵerengesiyengi mtengu waki mwakukoliyana ndi unandi wa vyaka vo vajaku kuti Chaka cha Wanangwa chifiki. Munthu yo wapereki ndalama zo amutchaja pa zuŵa lenilo.+ Ndalama zo zakupaturika kwaku Yehova. 24 Mu Chaka cha Wanangwa, munthu yo waweziyengi munda wo ku munthu yo wangumugulisa. Wawuweziyengi ku mweneku wa malu ngo.+

25 “‘Mtengu wewosi utchajikengi mwakukoliyana ndi sekeli ya mumalu ngakupaturika. Sekeli yimoza yikwanengi magera* 20.

26 “‘Kweni paŵevi munthu yo watenere kupatuwa nyama yakwamba kuwaku chifukwa nyama yakwamba kuwaku njaku Yehova.+ Kwali ndi ng’ombi yinthulumi pamwenga mbereri, zaku Yehova.+ 27 Asani nyama yo njakufipiskika ndipu wayiwombo pa mtengu wo ukujalikiskika, wasazgiyepu chimoza mwa vigaŵa vinkhondi va mtengu wo.+ Asani wayiwombo cha, nyama yo yigulisikengi pa mtengu wo ukujalikiskika.

28 “‘Kweni chinthu cho munthu wachipereke limu kwaku Yehova kutuliya pa vinthu vaki, kwali ndi munthu, nyama pamwenga munda, vingagulisikanga cha pamwenga kuwomboleka. Chinthu chechosi cho chaperekeka kwaku Yehova ntchakupaturika kwaku iyu.+ 29 Kweniso munthu yo wayeruzgika kuti wabayiki wangawombolekanga cha.+ Iyu watenere kubayika kwambula kutondeka.+

30 “‘Chatchumi chechosi+ cha vinthu vo mwavuna mucharu cho, kwali ndi mbewu za muminda pamwenga vipasu va muminda, ntchaku Yehova. Ntchinthu chakupaturika kwaku Yehova. 31 Asani munthu wakhumba kuwombo chatchumi chaki, wapereki mtengu waki ndi kusazgiyapu chimoza mwa vigaŵa vinkhondi va mtengu wo. 32 Chatchumi chechosi cha ng’ombi pamwenga mbereri, kung’anamuwa ng’ombi pamwenga mbereri yeyosi ya nambala 10 pa nyama zo zijumpha kusi kwa nthonga ya mliska, yitenere kuja yakupaturika kwaku Yehova. 33 Wangayisandanga cha nyama yo kuti waziŵi asani njamampha pamwenga njiheni ndipu wangayisinthisanga ndi yinyaki cha. Kweni asani wayisinthisa ndi nyama yinyaki, zosi ziŵi, yakwamba ndipuso yo wayisinthisa, zijengi zakupaturika.+ Nyama zo zingawomboleka so cha.’”

34 Ngenanga ndingu marangu ngo Yehova wangupaska Mozesi pa Phiri la Sinayi+ kuti wakangapereki kwa Ayisirayeli.