KALATA YACHIŴI YAKULUTA KWA AKORINTO

1 Ini Paulo, wakutumika waku Khristu Yesu chifukwa cha khumbu laku Chiuta, nde limoza ndi mubali widu Timote,+ ndilembe mpingu waku Chiuta wa ku Korinto kusazgapu akupaturika wosi wo ŵe muchigaŵa chosi cha Akaya+ kuti:

2 Wezi ukulu kweniso chimangu vakutuliya kwaku Chiuta Awusefwi, kweniso kwa Ambuya Yesu Khristu viŵi namwi.

3 Walumbiki Chiuta, kweniso Wusewu wa Ambuyafwi Yesu Khristu.+ Yiwu Mbada alisungu likulu+ kweniso ndi Chiuta wakupembuzga ukongwa,+ 4 mweniyo watitipembuzga* mu mayeseru* ngidu ngosi+ kuti nasi tifiski kupembuzga ŵanthu anyaki+ mu mayeseru* ngawu ngakupambanapambana mwakugwiriskiya ntchitu kupembuzgika ko tilonde kutuliya kwaku Chiuta.+ 5 Pakuti tikumana ndi masuzgu nganandi chifukwa chaku Khristu,+ tipembuzgika so ukongwa kuporote mwaku Khristu. 6 Sonu asani isi tikumana ndi mayeseru,* tikumana nangu kuti yimwi mupembuzgiki kweniso mutaskiki. Ndipu asani tipembuzgika, tipembuzgika kuti yimwi mupembuzgiki, ndipu venivi vitovya kuti mukunthiyepu masuzgu ngo isi nasi tikumana nangu. 7 Ndipu chigomezgu chidu mwaku yimwi ntchakukho, pakuti tiziŵa kuti yimwi musuzgika nge mo nasi tisuzgikiya, mwaviyo namwi mupembuzgikengi nge mo nasi tipembuzikiya.+

8 Pakuti tikhumba cha abali kuti muleki kuziŵa masuzgu ngo tingukumana nangu muchigaŵa cha Asia.+ Tingufyekeka ukongwa kujumpha nthazi zidu. Mwakuti tengavi chigomezgu chakuti tingaja amoyu.+ 9 Kukamba uneneska, tingujivwa nge kuti tayeruzgika kali kuti tibayiki. Venga viyo kuti tileki kujithemba taŵeni, kweni kuti tithembengi Chiuta+ yo wayuska akufwa. 10 Chinanga kuti tenga pa ngozi yikulu yeniyi yakuti tingafwa, wangutitaska, ndipu watitaskengi mbwenu, kweniso titimugomezga kuti walutirizgengi kutitaska.+ 11 Namwi so mungatiwovya mwakutiŵeyere kwaku Chiuta.+ Kuchita venivi kuwovyengi kuti mapempheru nganandi ngakuwonga ngaperekeki mumalu mwaku isi, chifukwa cha lisungu lo talongoreka pakumukika kwa mapempheru nga ŵanthu anandi.+

12 Pakuti chinthu cho timalikiya ntchakuti, njuŵi yidu yititichitiya ukaboni kuti tachita vinthu vosi mucharu ichi mwambula kufipiskika ndipuso mwauneneska, ukongwa kwaku yimwi. Tachita venivi ndi zeru za umunthu cha,+ kweni ndi wezi ukulu waku Chiuta. 13 Chifukwa titikulembiyani chinthu chechosi cha, kupatuwaku vo mungafiska kuŵerenga* ndi kuvivwisa. Kweniso ndigomezga kuti mulutirizgengi kuvwisa vinthu venivi mwakukwana,* 14 nge mo mwavivwisisiya mpaka isi takuchitiskani kuti mumaliki, nge mo so yimwi mwazakutichitiskiya kuti timaliki mu zuŵa la Ambuya Yesu.

15 Sonu ndi chigomezgu chenichi, ndakhumbanga kuza dankha kwaku yimwi kuti muŵi ndi chifukwa chachiŵi chakukondwe.* 16 Pakuti ndakhumbanga kuzikuwonani ndichiluta ku Makedoniya ndipuso kuti ndizipitiyeku so ndichituwa ku Makedoniya, pavuli paki muzindiperekezi ndichiluta ku Yudeya.+ 17 Po ndakhumbanga kuchita venivi, asi ndayiwonanga mwakupepuka cha nkhani yeniyi? Pamwenga ndakhumbanga kuchita vinthu mwa umunthu kuti asani ndakamba kuti “Hinya, hinya” mbwenu pavuli paki “Awa, awa”? 18 Kweni Chiuta ngwakugomezgeka mwakuti tingakukambiyani cha kuti “hinya” penipo ting’anamuwa kuti “awa.” 19 Pakuti Mwana waku Chiuta, Yesu Khristu, yo wangupharazgika pakati pinu kuporote mwaku isi, kung’anamuwa kuti kuporote mwaku ini, Silivano* ndi Timote,+ wanguŵa cha “hinya” pavuli paki “awa,” kweni “hinya” waŵa “hinya” kwaku iyu. 20 Pakuti malayizgu ngaku Chiuta chinanga ngangaŵa nganandi wuli, ngatuŵa “hinya” chifukwa chaku iyu.+ Mwaviyo, kuziya so mwaku iyu, kwaku Chiuta kukambika kuti “Ame,” venivo vichitiska kuti Chiuta+ wakankhuskiki kuporote mwaku isi. 21 Kweni Chiuta ndiyu watitisimikiziya kuti yimwi ndi isi te aku Khristu kweniso ndiyu wakutisankha.+ 22 Ndipuso waŵika chidindu paku isi,+ ndipu watipaska mzimu wakupaturika+ mumtima widu nge chikoli* cha vinthu vo vituza.

23 Sonu Chiuta waje kaboni wakususkana nani, kuti ndaza dankha cha ku Korinto kuti ndileki kukusuzgani ukongwa. 24 Kuti tichita ufumu cha pa chivwanu chinu,+ kweni te antchitu anyinu kuti mukondwengi, pakuti muja akukho chifukwa cha chivwanu chinu.

2 Pakuti ndasimikiza kuti ndileki kuza so kwaku yimwi ndi chitima. 2 Chifukwa asani ndingakuchitiskani chitima, ndiyani wazakundikondwesa, kupatuwaku yo ndamuchitiska chitima? 3 Ndingulemba vo ndinguchita kuti asani ndaza ndileki kuzichita chitima chifukwa cha ŵanthu wo ndikhumbika kuŵakondwesa, pakuti ndigomezga kuti vo vitindichitiska kuti ndikondwengi, vichitiska so mosi kuti mukondwengi. 4 Pakuti ndingukulembiyani kalata nde ndi masozi nganandi chifukwa cha kusuzgika ndi kupwetekeka ukongwa mtima, kuti ndikuchitiskeni chitima cha,+ kweni kuti muziŵi kuti nditikuyanjani ukongwa.

5 Sonu asani munthu munyaki wachita vinthu vakuchitiska chitima,+ wachitiska chitima ini cha, kweni pamalu panyaki wachitiska chitima yimwi mosi. Kweni ndakhumba cha kulongoro mwanthazi. 6 Kuchenya kwenuku ko kwachitika ndi ŵanthu anandi, nkhwakukwana ku munthu waviyo. 7 Kweni mumalu mwaki, mumugowoke ndi mtima wosi kweniso mumupembuzgi,+ kuti chitima chikulu chileki kumumeza.+ 8 Mwaviyo, nditikupemphani kuti mumusimikiziyi kuti mutimuyanja.+ 9 Pakuti ndichu chifukwa chaki so ndakulembiyani, kuti ndiziŵi asani mungalongo ukaboni wakuti muvwiya mu vinthu vosi. 10 Asani mugowoke munthu weyosi pa chechosi, nani so ndichita viyo. Kukamba uneneska, chechosi cho ndagowoka (asani ndagowokapu chinthu chechosi) ndachitiya chifukwa chaku yimwi pa masu paku Khristu, 11 kuti Satana waleki kutichenjere,+ pakuti mauryarya ngaki titingaziŵa* umampha.+

12 Sonu ndati ndafika ku Trowa+ kuchipharazga uthenga wamampha wakukwaskana ndi Khristu ndipuso khomu lati landijulikiya mwa Ambuya, 13 ndinguvwa umampha cha mumtima chifukwa mubali wangu Tito+ ndingumusaniya cha. Mwaviyo, ndingulayirana nawu ndipu ndingusoka kuluta ku Makedoniya.+

14 Kweni wawongeki Chiuta yo nyengu zosi watitilongozga kuti tigubiyengi limoza ndi Khristu. Kuziŵa Chiuta kwe nge fungu lamampha ndipu fungu lenili lisapaliya* kwekosi kuporote mwaku isi! 15 Pakuti kwaku Chiuta te fungu lamampha laku Khristu pakati paku wo ataskika, kweniso wo atufwa; 16 kwaku wo atufwa, te fungu la nyifwa lakulongozge ku nyifwa,+ kwaku wo ataskika, te fungu la umoyu lakulongozge ku umoyu. Ndipu ndiyani yo ngwakwenere kuchita vinthu venivi? 17 Isi ndisi te akwenere, pakuti tichita malonda cha ndi* mazu ngaku Chiuta+ nge mo ŵanthu anandi achitiya, kweni tilongoro mwakutuliya pasi pa mtima nge akutumika ndi Chiuta, pa masu paku Chiuta kweniso mwakukoliyana ndi Khristu.

3 Kumbi tayamba so kujisimikiziya taŵeni? Pamwenga tikhumbika makalata ngakutisimikiziya kwaku yimwi pamwenga ngakutuliya kwaku yimwi, nge mo ŵanthu anyaki achitiya? 2 Yimwi ndimwi makalata ngakulembeka pamitima yidu,+ ngeningo ngaziŵika kweniso ngaŵerengeka ndi ŵanthu wosi. 3 Pakuti yimwi mwalongoreka kuti ndimwi kalata yaku Khristu, yakulembeka ndi isi nge ateŵeti+ ndipuso njakulembeka ndi inki cha, kweni ndi mzimu waku Chiuta wamoyu. Njakulembeka pamya cha,+ kweni pamnofu, kung’anamuwa pamitima.+

4 Te ndi chigomezgu chenichi mwaku Chiuta kuporote mwaku Khristu. 5 Isi pakutija titijiwona kuti te akwenere cha kugwira ntchitu yeniyi, kweni Chiuta ndiyu watitiwovya kuti tije akwenere.+ 6 Iyu ndiyu watiwovya nadi kuti tije akwenere kuja ateŵeti a phanganu lifya,+ lakuchita kulembeka cha,+ kweni la mzimu, pakuti marangu ngakulembeka ngapereka cheruzgu cha nyifwa,+ kweni mzimu upaska umoyu.+

7 Sonu asani marangu ngo ngapereka nyifwa ndipuso ngakuchita kulembeka pamya,+ nganguza mwaunkhankhu ukulu, mwakuti Ayisirayeli angutondeka kulereseska chisku chaku Mozesi chifukwa cha unkhankhu wo wenga pachisku chaki,+ unkhankhu wo wazimalanga, 8 kumbi kuperekeka kwa mzimu+ kungatondeka kulongo unkhankhu ukulu ukongwa?+ 9 Pakuti asani marangu ngakulembeka ngo ngapereka cheruzgu cha nyifwa+ ngenga ngaunkhankhu,+ ndikuti kuperekeka kwa urunji kuŵengi ndi unkhankhu ukulu ukongwa!+ 10 Ndipu chinanga ntchinthu cho pakwamba chenga ndi unkhankhu, chikulondeka unkhankhu wo chifukwa cha unkhankhu ukulu ukongwa.+ 11 Sonu asani chinthu cho chazituzgikangapu chinguza mwaunkhankhu,+ ndikuti unkhankhu wa chinthu chambula kumala wazamukuŵa ukulu ukongwa!+

12 Chifukwa chakuti te ndi chilindizga chenichi,+ tilongoro ndi wanangwa ukulu ukongwa, 13 ndipu tichita cha vo Mozesi wanguchita, pakuti iyu wabenekeriyanga chisku chaki+ ndi salu kuti Ayisirayeli aleki kulereseska kumala kwa chinthu cho chazituzgikangapu. 14 Maŵanaŵanu ngawu ngangubulumutizgika.+ Pakuti mpaka msanawale, salu yeniyi yilutirizga kuja yambula kubenulika asani phanganu lakali liŵerengeka,+ chifukwa yituzgikapu mwakugwiriskiya ntchitu Khristu pe.+ 15 Ndipu mpaka msanawale, nyengu yeyosi yo vo Mozesi wakulemba viŵerengeka,+ salu yeniyi yibenekere mitima yawu.+ 16 Kweni asani munthu wang’anamukiya kwaku Yehova,* salu yo yibenulika.+ 17 Sonu Yehova* ndi Mzimu,+ ndipu po pe mzimu waku Yehova* pe wanangwa.+ 18 Ndipu isi tosi wo tabenulika salu kumasu tilongo unkhankhu waku Yehova* nge gilasi, ndipuso tasinthika kuja mu chikozgu chaki, kutuwa pa unkhankhu unyaki kufika pa unyaki, ndendende nge mo Yehova* yo ndi Mzimu watisinthiya.*+

4 Mwaviyo pakuti te ndi uteŵeti wenuwu chifukwa cha lisungu lo tikulongoreka, tiwere vuli cha. 2 Kweni tasiya vinthu vakuchitiska soni vo vichitika mwakubisa, ndipuso tichita cha vinthu mwauryarya pamwenga kutimbanyizga mazu ngaku Chiuta.+ Kweni pa masu paku Chiuta tilongo kuti te chakuwoniyapu chamampha ku njuŵi ya ŵanthu wosi mwakuchitiska kuti uneneska uwoneki.+ 3 Asani uthenga wamampha wo tipharazga ubenekereka, ndikuti ubenekereka ku ŵanthu wo anangika. 4 Pakati pa ŵanthu ŵenaŵa, chiuta wa mu nyengu yinu*+ wabulumutizga maŵanaŵanu nga ŵanthu ambula kugomezga,+ kuti kuŵala kwa* uthenga wamampha waunkhankhu wakukamba vaku Khristu yo ntchikozgu chaku Chiuta,+ kuleki kuŵaŵaliya.+ 5 Pakuti tipharazga vakukwaskana ndi taŵeni cha, kweni vakukwaskana ndi Yesu Khristu kuti ndi Mbuya kweniso kuti isi te akapolu ŵinu chifukwa chaku Yesu. 6 Pakuti Chiuta ndiyu wakukamba kuti: “Ukweru uŵali kutuwa mu mdima,”+ ndipu iyu wambulika mumitima yidu kuti tiŵaŵaliyi+ ndi unkhankhu wa kuziŵa Chiuta, mwakugwiriskiya ntchitu chisku chaku Khristu.

7 Kweni te ndi chuma chenichi+ muviyaŵi vadongu,+ kuti nthazi yakujumpha yo tituŵa nayu, yingatuliyanga kwaku isi cha, kweni yituliyi kwaku Chiuta.+ 8 Tikandirizgika mu nthowa yeyosi, kweni tifinyikizika mpaka kutondeka kutukuluka cha. Timala zeru, kweni tisoŵe limu chakuchita cha.*+ 9 Titombozgeka, kweni tijowoleka cha,+ tiwisikiya pasi, kweni tinangika cha.+ 10 Nyengu zosi mumaliŵavu ngidu, tikunthiyapu masuzgu ngakuti tingafwa nangu nge ngo Yesu wangukumana nangu,+ kuti umoyu waku Yesu nawu so uwoneke mumaliŵavu ngidu. 11 Pakuti isi amoyu, nyengu zosi tituŵa pa ngozi yakuti tingafwa+ chifukwa chaku Yesu, kuti umoyu waki uwoneke so mumaliŵavu ngidu ngo ngatufwa. 12 Mwaviyo nyifwa yigwira ntchitu kwaku isi, kweni kwaku yimwi mbumoyu.

13 Sonu chifukwa te ndi mtima umoza wachivwanu, ndipu chivwanu chenichi ndichu chikulembeka kuti: “Ndenga ndi chivwanu, mwaviyo ndingulongoro”;+ nasi te ndi chivwanu, mwaviyo tilongoro, 14 chifukwa tiziŵa kuti Yo wakuyuska Yesu, wazamuyuska so isi nge mo wakuyuskiya Yesu, ndipu wazakutipereka limoza ndi yimwi.+ 15 Pakuti vosi ivi vichitika chifukwa chaku yimwi, kuti kusazgikiyaku kwa wezi ukulu ukongwa kusapaliyi, chifukwa anandi apemphera mwakuwonga ndipu venivi vichitiska kuti Chiuta wakankhuskiki.+

16 Mwaviyo, tiwere vuli cha, kweni chinanga kuti wunthu widu wakubwalu umala, kweni wunthu widu wamukati uja wufya zuŵa ndi zuŵa. 17 Pakuti chinanga kuti masuzgu* ngakanyengu kamanavi ndipuso ngapepu, ngatitiwovya kuti tije ndi unkhankhu wo ulutirizga kuja ukulu ukongwa* ndipu ngwamuyaya.+ 18 Venivi vichitika asani tilutirizga kulereska pa vinthu vambula kuwoneka,+ mumalu mwa kulereska pa vinthu vakuwoneka, kweni. Pakuti vinthu vakuwoneka vakanyengu kamanavi, kweni vambula kuwoneka, vamuyaya.

5 Pakuti tiziŵa kuti asani nyumba yidu ya pacharu chapasi, pamwenga kuti hema lenili, yabwanganduka,+ tazamuja ndi nyumba yakutuliya kwaku Chiuta, nyumba yakuzengeka ndi manja cha,+ kweni yamuyaya kuchanya. 2 Pakuti munyumba iyi,* titamantha nadi, ndipu tikhumbisiska kuvwala nyumba yidu yakuchanya,+ 3 kuti asani tayivwala, tingazisanirikanga nkhuli cha. 4 Ndipu isi tija muhema lenili, titamantha, tizitiskika, chifukwa tikhumba cha kulizuwa, kweni tikhumba kuvwala linyaki,+ kuti umoyu umezi cho chingafwa.+ 5 Sonu yo wakutinozgekeresa kuti tizilonde venivi, ndi Chiuta+ mweniyo wakutipaska mzimu nge chikoli cha vinthu vo vituza.*+

6 Mwaviyo, nyengu zosi tisimikiza ndipu tiziŵa kuti po teche aliŵavu, tija kutali ndi Ambuya,+ 7 pakuti titenda mwachivwanu, mwavakuwoneka ndi masu cha. 8 Kweni tisimikiza ndipu tingayanja kuja kutali ndi liŵavu, kuti tikaje ndi Ambuya.+ 9 Kwali tija ndi yiwu, kwali tija kutali ndi yiwu, chilatu chidu ntchakuti tije akuzomerezeka ndi yiwu. 10 Pakuti tosi titenere kuwoneke panthazi pa mpandu wakuyeruzgiyapu milandu waku Khristu, kuti weyosi walonde mphotu mwakukoliyana ndi vo wachitanga po wenga mu liŵavu, kwali vamampha pamwenga viheni.*+

11 Mwaviyo pakuti titopa Ambuya, tilutirizga kukopa ŵanthu, kweni tiziŵika umampha* kwaku Chiuta. Ndipu ndigomezga kuti tiziŵika so umampha* ku njuŵi zinu. 12 Titijisimikiziya so cha kwaku yimwi, kweni titikuchiskani kuti mumalikengi chifukwa chaku isi, kuti mufiski kumuka ŵanthu wo amalika chifukwa cha vo ve mumtima cha, kweni chifukwa cha kawonekeru kakubwalu.+ 13 Asani mitu yidu yayendanga umampha cha,+ ndikuti chenga chifukwa chaku Chiuta, ndipu asani tiŵanaŵana umampha, mbwenu ntchifukwa chaku yimwi. 14 Pakuti chanju cho Khristu we nachu chititichichizga, ndipu tasimikiza kuti munthu yumoza wangufwiya ŵanthu wosi+ chifukwa wosi ŵenga akufwa kali. 15 Ndipu wangufwa kuti ŵanthu wosi wo mbamoyu aleki kuja umoyu wakujikondwesa ŵeneku,+ kweni wakukondwesa yo wakuŵafwiya ndi kuyuskika.

16 Kwamba sonu taleka kuziŵa munthu weyosi mwakuliŵavu.+ Ndipu chinanga vingaŵa kuti kali Khristu tamuziŵanga mwakuliŵavu, kweni sonu tasimikiza kuleka kumuziŵa mu nthowa yeniyi.+ 17 Mwaviyo, asani munthu munyaki wakoliyana ndi Khristu, ndikuti iyu ntchakulengeka chifya,+ vinthu vakali vamalapu. Awonani! vinthu vifya vaŵapu. 18 Kweni vinthu vosi vituliya kwaku Chiuta, yo watitiyanjanisiya kwaku iyu mweneku kuporote mwaku Khristu,+ ndipu wakutipaska uteŵeti wakuyanjanisa.+ 19 Uteŵeti waki ngwakuti Chiuta wayanjanisiyi charu kwaku iyu mweneku kuporote mwaku Khristu+ kwambula kuŵaŵerengese maubudi ngawu,+ ndipu wakutipaska udindu wakuti tipharazgi uthenga wakuyanjanisa.+

20 Mwaviyo te akazembi+ mumalu mwaku Khristu.+ Ve nge kuti Chiuta waŵeyere ŵanthu kuporote mwaku isi. Ndipu isi nge akumiya Khristu, tipempha kuti: “Yanjanani so ndi Chiuta.” 21 Munthu yo wakuchitapu cha ubudi, wangupangika kuja ubudi*+ chifukwa chaku isi, kuti mwakugwiriskiya ntchitu iyu, tije arunji pa masu paku Chiuta.+

6 Pakuti tigwira ntchitu limoza ndi Chiuta,+ titikupemphani so kuti mungalondiyanga wezi ukulu waku Chiuta ndi kumbwita chilatu chaki cha.+ 2 Pakuti iyu wakamba kuti: “Mu nyengu yakuzomerezeka ndingukuvwisiya, ndipu mu zuŵa la utaski ndingukuwovya.”+ Awonani! Iyi ndi nyengu yakuzomerezeka. Awonani! Ili ndi zuŵa la utaski.

3 Tichita cha chinthu chechosi chakuguŵiska, kuti uteŵeti widu uleki kusanirika ndi chifukwa.+ 4 Kweni mu nthowa yeyosi titijisimikiziya taŵeni kuti te ateŵeti aku Chiuta.+ Tichita venivi mwakukunthiyapu vinthu vinandi, mwakukumana ndi masuzgu, mwakusoŵa vakukhumbika pa umoyu, mwakukumana ndi mawunononu,+ 5 mwakupumika, mwakuŵikika mujeri,+ mwakutichitiya vivulupi, mwakugwira ntchitu mwaphamphu, mwakuleka kugona usiku, mwakuja ndi nja.+ 6 Tichita so venivi mwakuja akutowa, mwakuja akuziŵa vinthu, mwakuzikira,+ mwakuja alisungu,+ mwakuja ndi mzimu wakupaturika, mwakuja ndi chanju chambula chinyengu,+ 7 mwakukamba uneneska, mwakugwiriskiya ntchitu nthazi zaku Chiuta;+ kuporote mu vidya vaurunji+ kujanja lamaryi* ndi kujanja lamazge.* 8 Ŵanthu atititumbika kweniso atitiyuyuwa, ndipuso akamba viheni vaku isi kweniso atitilumba. Ŵanthu atitiwona nge aboza kweni te aneneska, 9 nge ambula kuziŵika kweni tiziŵika, nge ŵanthu wo atufwa* kweni awonani! te amoyu,+ nge akulangika kweni titoleke ku nyifwa cha,+ 10 nge achitima kweni tikondwa nyengu zosi, nge akavu kweni tipereka chuma chinandi ku ŵanthu, nge ambula kanthu kweni te ndi vinthu vosi.+

11 Talongoro namwi kwambula kubisa* yimwi Akorinto, ndipu tasanuzga mtima widu. 12 Chanju chidu ntchifinyi cha* kwaku yimwi,+ kweni chanju chinu ndichu chifinyi kwaku isi. 13 Sonu ndilongoro namwi nge ŵana ŵangu, namwi so sanuzgani mitima yinu.+

14 Mungamangikanga cha mugoli limoza ndi ŵanthu ambula kugomezga,+ chifukwa mwe akupambana. Pakuti pe kukoliyana wuli pakati pa urunji ndi kuleka kuvwiya marangu?+ Pamwenga pe ubali wuli pakati pa ukweru ndi mdima?+ 15 Kweniso pe kukoliyana wuli pakati paku Khristu ndi Beliyali?*+ Pamwenga pe kuyanana wuli pakati pa munthu wakugomezga* ndi wambula kugomezga?+ 16 Ndipu pe kukoliyana wuli pakati pa nyumba yakusopiyamu yaku Chiuta ndi angoza?+ Pakuti isi te nyumba yakusopiyamu yaku Chiuta wamoyu,+ nge mo Chiuta wakukambiya kuti: “Ndazamuja pakati pawu+ kweniso ndazamukwenda pakati pawu, ndazamuja Chiuta wawu ndipu yiwu azamuja ŵanthu ŵangu.”+ 17 “Yehova* watiti, ‘Mwaviyo, tuwanipu pakati pawu ndipu mujipatuwi, kweniso lekani kukwaska chinthu chakufipiskika’”;+ “‘ndipu ndazakukulonderiyani.’”+ 18 “Yehova* Wanthazizosi watiti, ‘Ini ndazamuja wusemwi+ ndipu yimwi mwazamuja ŵana ŵangu anthulumi ndi anthukazi.’”+

7 Mwaviyo akwanjiwa, pakuti te ndi malayizgu ngenanga,+ tiyeni tijitowesi ku chinthu chechosi chakukazuza liŵavu ndi mzimu,+ kuti tifiki pa kutowa chayiku tichiwopa Chiuta.

2 Tipaskeni malu mumitima yinu.+ Tanangiya munthu weyosi cha, tapwetekapu munthu weyosi cha ndipuso tagolore munthu weyosi cha.+ 3 Ndikamba vinthu venivi kuti ndikususkeni cha. Pakuti ndakambapu kali kuti yimwi mwe mumitima yidu kuti tifwiyi limoza ndipuso tijaliyi limoza amoyu. 4 Ndilongoro namwi mwawanangwa ukongwa. Ndimalika ukongwa chifukwa chaku yimwi. Ndipembuzgika ukongwa kweniso ndikondwa ukongwa mu masuzgu ngidu ngosi.+

5 Ndipu tati tafika ku Makedoniya,+ maliŵavu ngidu ngangupumuwa cha,* kweni tingulutirizga kukumana ndi masuzgu mu nthowa zakupambanapambana, kubwalu kwidu kwenga kulimbana ndipu mukati mwenga mantha. 6 Kweni Chiuta yo wapembuzga wo asuzgika mumtima,+ watipembuzga chifukwa cha kuza kwaku Tito. 7 Tapembuzgika chifukwa cha kuza kwaki pe cha, kweni chifukwa so chakuti yimwi mungumupembuzga. Iyu wangutikonkhoske kuti mukhumbisiska kuzindiwona, mwe ndi chitima chikulu kweniso mutindiŵanaŵaniya.* Mwaviyo ndingukondwa ukongwa.

8 Pakuti chinanga kuti kalata yangu yingukuchitiskani chitima,+ ndidandawulapu cha. Ndipu chinanga kuti pakwamba ndingudandawula (ndati ndawona kuti kwa kanyengu kamanavi kalata yangu yingukuchitiskani chitima), 9 kweni sonu ndikondwa. Ndikondwa chifukwa chakuti munguchita chitima cha, kweni chifukwa chakuti chitima cho chingukuwovyani kuti mulapi. Pakuti munguchita chitima mwakukoliyana ndi khumbu laku Chiuta, mwakuti mukupwetekekapu cha chifukwa chaku isi. 10 Pakuti kuchita chitima mwakukoliyana ndi khumbu laku Chiuta kutovya kuti munthu walapi ndi kutaskika ndipu venivi vakudandawulisa cha.+ Kweni kuchita chitima mwakukoliyana ndi charu kulongozge ku nyifwa. 11 Sonu wonani mo chitima chinu chakukoliyana ndi khumbu laku Chiuta chakuwovyiyani kuti muchitengi vinthu ndi mtima wosi! Chakuwovyani kuti mujitowesi, mutinkhengi viheni, muwopengi, mukhumbisiskengi ndi mtima wosi, muje aphamphu ndipuso munozgengi po panangika.+ Mu nthowa yeyosi, mwalongo kuti mwe akutowa* pa nkhani iyi. 12 Chinanga kuti ndingukulembiyani, kweni ndingulemba chifukwa cha munthu yo wangunanga cha+ pamwenga chifukwa cha ŵanthu wo wanguŵanangiya, kweni kuti phamphu linu kwaku isi liwoneke pa masu paku Chiuta. 13 Ndichu chifukwa chaki tapembuzgika.

Kweni kusazgiyapu pa kupembuzgika kwidu, takondwa so ukongwa chifukwa chakuti Tito ngwakukondwa pakuti mosi mungusisipuwa mtima waki. 14 Pakuti asani ndingumumalikiya vakukwaskana ndi yimwi, ndikuti ndalengeseka cha. Kweni vinthu vosi vo tingukukambiyani venga vauneneska, mwaviyo vo tingumalikiya Tito navu vasimikizika kuti vauneneska. 15 Ndipuso iyu watikuyanjani ukongwa chifukwa wakumbuka kuvwiya kwinu mosi,+ mo mungumulondere ndi mantha kweniso mwakumbwambwanthiya. 16 Ndikondwa kuti mu nthowa yeyosi ndija ndi chigomezgu mwaku* yimwi.

8 Sonu abali, tikhumba kuti muziŵi vakukwaskana ndi wezi ukulu waku Chiuta wo waperekeka ku mipingu ya ku Makedoniya.+ 2 Pa nyengu yo ayesekanga ukongwa chifukwa cha masuzgu, likondwa lawu likulu kweniso ukavu wawu, vinguŵachitiska kuti aje akupaska ukongwa. 3 Pakuti angupereka mwakukoliyana ndi mo asaniriyanga+ ndipu ndipereka ukaboni kuti angupereka vinandi kuluska mo asaniriyanga.+ 4 Mwakukhumba kwawu atiŵeyeriyanga kuti aŵi ndi mwaŵi wakupereka mphasu zawezi, kuti achiteku uteŵeti wakovya akupaturika.+ 5 Yiwu anguchita vo taŵanaŵananga pe cha, kweni chakwamba angujipereka ŵija kwa Ambuya kweniso kwaku isi kuporote mu khumbu laku Chiuta. 6 Mwaviyo, tinguchiska Tito+ kuti nge mo wangwambiyapu kali ntchitu yeniyi pakati pinu, wamalizi so kulonde mphasu zinu zawezi. 7 Muchita umampha ukongwa mu vinthu vosi, chivwanu chinu ntchakukho, mukuziŵa kulongoro, muziŵa vinthu ukongwa, vinthu vosi mutivichita mwaphamphu ndipuso mutanja ukongwa anyinu nge mo isi titikuyanjiyani. Mwaviyo, namwi so lutirizgani kuja ndi mtima wakupaska.+

8 Ndikamba venivi kuti ndikulamuleni cha, kweni kuti ndikuwovyeni kuziŵa phamphu la ŵanthu anyaki kweniso kuti ndiwoni asani chanju chinu ntchauneneska. 9 Pakuti muziŵa wezi ukulu wa Ambuyafwi Yesu Khristu, kuti chinanga kuti ŵenga akukhupuka, anguja akavu chifukwa chaku yimwi,+ kuti yimwi muje akukhupuka kuziya mu ukavu wawu.

10 Pa nkhani yeniyi ndipereka maŵanaŵanu ngangu:+ Ndikamba venivi kuti muyanduwi, pakuwona kuti chaka chajumphapu kutuliya po mungwambisiya venivi ndipu mungwambisa ŵaka cha, kweni mungulongo so kuti mukhumbisiska kuchitapu kanthu. 11 Mwaviyo, malizani vo mukwamba kuchita, kuti khumbu linu lakuti muchitepu kanthu lifiskiki mwakukoliyana ndi vo mwe navu. 12 Pakuti asani mphasu yaperekeka mwakukhumbisiska, njakuzomerezeka kwaku Chiuta, ndipu yitenere kuperekeka mwakukoliyana ndi vo munthu walivi cha, kweni mwakukoliyana ndi vo we navu.+ 13 Pakuti ndikhumba cha kuti kwa anyaki vije vambula kusuzga, kweni kwaku yimwi vije vakusuzga. 14 Kweni ndikhumba kuti vinandi vo mwe navu pasonu panu viwovyi pa kupeleŵere kwawu, kuti vinandi vo ŵe navu viwovyi so pa kupeleŵere kwinu, ndi chilatu chakuti paŵi kuyanana. 15 Nge mo vikulembeke kuti: “Munthu yo wenga ndi vinandi, wenga ndi vinandi ukongwa cha, ndipu munthu yo wenga ndi vimana wenga ndi vimana ukongwa cha.”+

16 Sonu wawongeki Chiuta, chifukwa wachitiska kuti Tito waje ndi mtima wakukuŵanaŵaniyani nge mo isi tichitiya,+ 17 chifukwa tati tamuchiska, wanguchitapu kanthu, kweniso mwakukhumba kwaki ngwakunozgeka kuza kwaku yimwi. 18 Kweni limoza ndi iyu tatumiza mubali yo mipingu yosi yitimulumba chifukwa cha vo wachita vakukwaskana ndi uthenga wamampha. 19 Ndi venivi pe cha, kweni wakusankhika ndi mipingu kuti tiyendengi nayu, tichiwonere mphasu zakuperekeka chifukwa cha chanju, kuti Ambuya akankhuskiki kweniso kuti tilongo ukaboni wakuti tikhumbisiska kovya anyaki. 20 Mwaviyo, tiphwere kuti munthu weyosi waleki kutisaniya chifukwa pa nkhani ya vakupereka vawanangwa vo isi tiwonere.+ 21 Pakuti ‘tiphwere vinthu vosi mwauneneska, pa masu paku Yehova,* ndi pa masu pa ŵanthu.’+

22 Ndipuso titikutumiziyani mubali widu limoza ndi yiwu, mweniyo tamuyesa mwakuwerezawereza ndipu wasanirika kuti ngwaphamphu pa vinthu vinandi, kweni sonu wachita phamphu ukongwa chifukwa chakuti watikugomezgani ukongwa. 23 Asani mukayikiya vakukwaskana ndi Tito, iyu ndi munyangu* kweniso yo ndigwira nayu ntchitu pakovya yimwi, pamwenga asani mukayikiya vakukwaskana ndi abali ŵidu, yiwu mbakutumika a mipingu kweniso mbunkhankhu waku Khristu. 24 Mwaviyo, longoni kuti mutiŵayanja+ ndipuso longoni mpingu chifukwa cho tingumalikiya vakukwaskana ndi yimwi.

9 Sonu vakukwaskana ndi uteŵeti wakovya akupaturika,+ mphakwenere cha kuti ndichiti kukulembiyani, 2 pakuti ndiziŵa kukhumbisiska kwinu ndipu ndimalikiya ŵanthu a ku Makedoniya kuti ŵanthu a ku Akaya aja akunozgeka kwa chaka sonu, ndipu phamphu linu lachiska anandi mwaku yiwu. 3 Kweni ndatuma abali kuti kumalika kwidu chifukwa chaku yimwi kuleki kuja kwaŵaka pa nkhani iyi, ndipuso kuti muje akunozgeka nge mo ndingukambiya kuti muchitiyi. 4 Kweni asani ndingaza ndi ŵanthu a ku Makedoniya ndi kusaniya kuti mwechendanozgeki, ini ndi yimwi tazamuchita soni ukongwa chifukwa chakuti titikugomezgani. 5 Sonu ndawona kuti mphakwenere kuchiska abali kuti azi kweche nyengu kuzito mphasu zinu zinandi zo mwanozge limu zo mukulayizga, ndi chilatu chakuti venivi vichitikiyi limu, kuti zizileki kuja nge vinthu vakuchita kuphanga, kweni nge mphasu zakukhumba mwija.

6 Kweni pa nkhani yeniyi, weyosi yo wamija mwakasu, wazamuvuna timanavi, ndipu weyosi yo wamija vinandi, wazamuvuna vinandi.+ 7 Weyosi wachiti nge mo wasimikiziya mumtima mwaki, mwakudinginyika* cha pamwenga mwakuchichizgika,+ pakuti Chiuta watanja munthu yo wapereka mwakukondwa.+

8 Kweniso Chiuta wangafiska kukusazgiyaniku wezi waki ukulu kuti nyengu zosi mujengi ndi vinthu vakukwana vakuti vikuwovyeningi, kweniso kuti mujengi ndi vinthu vinandi vakovya pa ntchitu zosi zamampha.+ 9 (Nge mo vikulembeke kuti: “Wagaŵa vinthu mwamasangu; wavipereka kwa akavu. Urunji waki ulutiriyengi mpaka muyaya.”+ 10 Sonu Yo wapereka mbewu yinandi ku wakumija kweniso yo wapereka chiŵandi kuti munthu waryi, wazamupereka ndi kuyandanisa mbewu kuti yimwi mumiji, ndipuso wazamusazgiyaku vipasu va urunji winu.) 11 Mu vinthu vosi, muwovyeka kuja akupaska mu nthowa zakupambanapambana, ndipu venivi vichitiska kuti ŵanthu awongengi Chiuta kuporote mu vakuchita vidu. 12 Pakuti uteŵeti wakovya ŵanthu wosi wenuwu, ngwakovya akupaturika pa vo akhumbika pe cha,+ kweni utovya so kuti paŵi mapempheru nganandi ngakuwonga Chiuta. 13 Chifukwa cha ukaboni wo uteŵeti wenuwu upereka, yiwu akankhuska Chiuta pakuti mutijithereska ku uthenga wamampha wakukwaskana ndi Khristu weniwo mutiwupharazga pakweru, ndipuso pakuti mupereka mwamasangu kwaku yiwu kweniso ku ŵanthu wosi.+ 14 Yiwu atikupempheriyani mwakuŵeyere, ndipuso alongo kuti atikuyanjani chifukwa cha wezi ukulu ukongwa waku Chiuta wo mwalongoreka.

15 Wawongeki Chiuta chifukwa cha mphasu yaki yawezi yambula makambika.

10 Sonu ini Paulo, chinanga kuti ndiwoneka wambula kuzirwa asani nde namwi pa masu ndi pa masu+ kweni wachiganga asani nde kunyaki,+ nditikudandawuliyani chifukwa cha kuzika kwaku Khristu kweniso wezi waki.+ 2 Ndipempha kuti asani ndaza, ndileki kuzichita vinthu mwachiganga kweniso mwanthazi nge mo ndikhumba kuzichitiya ndi ŵanthu wo atitiwona nge kuti tichita vinthu mwakuliŵavu. 3 Pakuti chinanga kuti tichita vinthu mwakuliŵavu, kweni tichita nkhondu mwakukoliyana ndi mo tiliri mwakuliŵavu cha. 4 Pakuti vidya vankhondu yidu vakuliŵavu cha,+ kweni vanthazi chifukwa chaku Chiuta,+ ndipu vigadabuwa vinthu vakujinthika mwanthazi. 5 Chifukwa tigadabuwa maŵanaŵanu kweniso vinthu vapachanya vo visuskana ndi kuziŵa Chiuta,+ ndipu titole maŵanaŵanu ngengosi ku ukapolu kuti ngavwiyengi Khristu. 6 Ndipuso te akunozgeka kulanga munthu weyosi wambula kuvwiya,+ asani yimwi mwafikapu kuja akuvwiya ndi mtima wosi.

7 Muwona vinthu mwakukoliyana ndi mo viwoneke kubwalu. Asani munthu munyaki wasimikiza kuti ngwaku Khristu, waŵanaŵaniyi so fundu iyi: Nge mo iyu waliri waku Khristu, nasi ndimu tiliri. 8 Pakuti chinanga ndingamalika ukongwaku chifukwa cha mazaza ngo Ambuya akutipaska ngakuti tikuzengeni, mumalu mwa kukupasuwani,+ ndingachita soni cha. 9 Chifukwa ndikhumba cha kuti mundiwoni nge kuti ndakhumbanga kukuwofyani ndi makalata ngangu. 10 Pakuti akamba kuti: “Makalata ngaki ngakungota ndipuso nganthazi, kweni iyu asani we pakati pidu wawoneka wambula nthazi ndipu vo walongoro vilivi fundu.” 11 Munthu waviyo waziŵi kuti vo tikamba* mumakalata asani te kunyaki, ndivu so tazamuchita* asani taza kweniko.+ 12 Pakuti tingayese dala cha kujikuzga nge ŵanthu wo atijilumba ŵija pamwenga kujiyeruzgiya ndi yiwu.+ Kweni asani atijipima ŵija mwakugwiriskiya ntchitu fundu zawu ndipuso atijiyeruzgiya ŵija ndi yiwu ŵeneku, ndikuti avwisa vinthu cha.+

13 Kweni timalikengepu cha kubwalu kwa mphaka yo tapaskika, mumalu mwaki timalikiyengi mukati mwa mphaka yo Chiuta watipimiya,* yeniyo yifika mpaka kwaku yimwi.+ 14 Ndipu tijumpha cha mphaka zidu nge kuti tinguleka kufika kwaku yimwi, pakuti isi tenga akwamba kufika mpaka kwinu ndi uthenga wamampha wakukwaskana ndi Khristu.+ 15 Timalikiya kubwalu kwa mphaka ya chigaŵa cho tikupaskika cha, pakuti chigaŵa cho ndi ntchitu ya munthu munyaki, kweni tilindizga kuti po chivwanu chinu chikuwa, vo tachita visazgikiyeku mukati mwa chigaŵa chidu. Ndipu tichitengi so vinandi 16 kuti tipharazgi uthenga wamampha muvyaru vinyaki kujumpha kwinu, ndi chilatu chakuti tileki kumalikiya vo vachitika kali muchigaŵa cha munthu munyaki. 17 “Kweni yo wamalika, wamalikiyi mwaku Yehova.”*+ 18 Pakuti munthu yo watijilumba yija wazomerezeka cha,+ kweni yo walumbika ndi Yehova* ndiyu wazomerezeka.+

11 Ndingayanja kuti mundizizipizgi chinanga kuti ndingawoneka nge muzereza. Kweni kukamba uneneska, mutindizizipizga! 2 Nditikuchitiyani sanji nge mo Chiuta wachitiya,* pakuti ini ndini ndikukulayizgani nthengwa ku munthulumi yumoza, kuti ndikuperekeni kwaku Khristu nge mwali wambula kufipiskika.*+ 3 Kweni nditopa kuti panyaki nge mo njoka yingunyenge Heva ndi uryarya waki,+ maŵanaŵanu nginu nganganangika ndi kuleka kuchita vinthu mwauneneska kweniso kuja akutowa, vo mutenere kulongo pa masu paku Khristu.+ 4 Pakuti nge mo viliri, asani munthu munyaki watuza ndi kupharazga Yesu wakupambana ndi yo tingukupharazgiyani, pamwenga asani mwalonde mzimu wakupambana ndi wo mungulonde, pamwenga asani mwalonde uthenga wamampha wakupambana ndi wo mungulonde,+ musuzgika cha kumuzizipizga munthu waviyo. 5 Mu kanthu kekosi ndiwona kuti nde mumana cha kwa akutumika ŵinu wo mutiŵawona nge mbapachanya ukongwa.+ 6 Kweni chinanga kuti nde mujira kulongoro,+ kuti ndileka kuziŵa vinthu cha; tingulongo venivi kwaku yimwi mu nthowa yeyosi ndipuso mu vinthu vosi.

7 Pamwenga kumbi ndingubuda po ndingujiyuyuwa kuti yimwi mukwezeki, chifukwa ndingukupharazgiyani mwakukondwa uthenga wamampha waku Chiuta kwambula kulipirika?+ 8 Mipingu yinyaki ndinguyiphanga* vinthu vawu mwa kuzomera chovyu chawu kuti nditeŵete yimwi.+ 9 Kweni po ndenga kwinu, ndati ndasoŵa chovyu, ndinguja mphingu cha ku munthu weyosi, chifukwa abali wo angutuwa ku Makedoniya angundipaska vinthu vinandi vo ndakhumbikanga.+ Kukamba uneneska, mu nthowa yeyosi ndayesesa kuleka kuja mphingu kwaku yimwi, ndipu ndilutirizga kuchita viyo.+ 10 Nge mo uneneska waku Khristu uliri mwaku ini, ndilekengi cha kumalika+ muvigaŵa va Akaya. 11 Chifukwa wuli? Kumbi ntchifukwa chakuti ndileka kukuyanjani? Chiuta waziŵa kuti nditikuyanjani.

12 Kweni vo ndichita, ndilutirizgengi kuvichita,+ kuti ndituzgepu chinyengu cha ŵanthu wo akhumba chifukwa chakuti* aje akuyanana ndi isi, pa vinthu vo amalika navu.* 13 Chifukwa ŵanthu aviyo mbakutumika aboza, mbantchitu aryarya ndipuso atijisambusa ŵija kuja nge akutumika aku Khristu.+ 14 Ndipu ntchakuziziswa cha, pakuti chinanga ndi Satana walutirizga kujisambusa yija kuja nge mungelu wa ukweru.+ 15 Mwaviyo, ntchachilendu cha asani ateŵeti ŵaki nawu alutirizga kujisambusa ŵija kuja nge ateŵeti a urunji. Kweni umaliru wawu wazamuja wakukoliyana ndi ntchitu zawu.+

16 Ndiwerezapu so kukamba kuti: Munthu weyosi wangaŵanaŵananga cha kuti nde muzereza. Ndipu asani muŵanaŵana viyo, mbwenu ndilondiyeni nge munthu wambula zeru, kuti nani ndimalikeku kamanavi. 17 Vo ndikamba sonu, ndikamba nge munthu yo wayezga chakuwoniyapu cha Ambuya cha, kweni nge mo wangachitiya munthu muzereza yo wamalika mwakujithemba. 18 Pakuti ŵanthu anandi amalika mwakukoliyana ndi liŵavu,* ini nani ndimalikengi. 19 Chifukwa yimwi mwe “azeru” ukongwa, mukondwa kuzizipizga azereza. 20 Kukamba uneneska, muzizipizga munthu yo watikusambusani akapolu, yo wameza katundu winu, yo waphanga vinthu vinu, yo watijikuzga paku yimwi ndipuso yo watikupumani kumasu.

21 Ndikamba venivi kuti tiyuyuliki, pakuti viwoneka nge kuti tachita vinthu nge ambula nthazi.

Kweni asani anyaki achita vinthu mwachiganga, ndikamba mwambula zeru, ini nani ndichita vinthu mwachiganga. 22 Kumbi yiwu Mbaheberi? Ini nani nde Mheberi.+ Kumbi yiwu Mbayisirayeli, ini nani nde Myisirayeli. Kumbi yiwu ndi mphapu* yaku Abrahamu? Ini nani so viyo.+ 23 Kumbi yiwu mbateŵeti aku Khristu? Ndimuka nge munthu wakufuntha, ini ndini ndiluska wosi: ndagwira ntchitu ukongwa,+ ndamangika kananandi ŵaka,+ ndapumika maulendu nganandi ndipu nyengu zinandi ndajanga kamanavi kufwa.+ 24 Maulendu ngankhondi Ayuda angundipuma vikoti 40 kutuzgaku chimoza,+ 25 maulendu ngatatu ndingupumika ndi nthonga,+ kamoza ndinguponyeka mya,+ katatu sitima yingundisweke+ ndipu ndinguja mukati munyanja msana ndi usiku, 26 ndayendapu maulendu kaŵikaŵi, ndakumanapu ndi vakofya mumisinji, vakofya kutuliya kwa ankhungu, vakofya kutuliya ku ŵanthu amtundu wangu,+ vakofya kutuliya ku ŵanthu amitundu yinyaki,+ vakofya mumatawuni,+ vakofya muchipululu, vakofya panyanja, ndipuso vakofya kutuliya kwa abali aboza, 27 ndagwirapu ntchitu ndi kuvuka, kusoŵa tulu ndi usiku kananandi ŵaka,+ ndajapu ndi nja kweniso nyota,+ kusoŵa chakurya kananandi ŵaka,+ kweniso kupima ndi kusoŵa vakuvwala.*

28 Kusazgiyapu pa vinthu va kubwalu kwa liŵavu venivi, pe so chinthu chinyaki cho chitindisuzga maŵanaŵanu zuŵa lelosi: ndifipiya mtima mipingu yosi.+ 29 Ndiyani wakulopwa, kwambula ini kuja wakulopwa? Ndiyani yo waguŵa, kwambula ini kukwiya?

30 Asani nditenere kumalika, ndimalikengi ndi vinthu vo vilongo kuti nde wambula nthazi. 31 Chiuta kweniso Awusewu ŵa Ambuya Yesu, Mweniyo watenere kulumbika kwamuyaya, waziŵa kuti ndipusika cha. 32 Ku Damasiko, nduna yo yenga pasi pa fumu Areta, yinguvikiliya tawuni ya ŵanthu a ku Damasiko kuti yindiko. 33 Kweni angundisisiya pasi mwakugwiriskiya ntchitu chiteti kuporote pawindu la mpanda wa tawuni yo,+ ndipu ndingupona mu manja mwaki.

12 Nditenere kumalika. Kumalika kulivi phindu, kweni ndilutirizgengi kuwona vakuziziswa+ ndipuso vinthu vakuvumbulika ndi Ambuya.+ 2 Ndiziŵa munthu munyaki wakukoliyana ndi Khristu, mweniyo vyaka 14 kuvuli uku, wangukwamphulikiya kuchanya kwachitatu, kwali wenga muliŵavu pamwenga kubwalu kwa liŵavu, ndiziŵa cha, kweni Chiuta ndiyu waziŵa. 3 Hinya, nditimuziŵa munthu mwenuyu, kwali wenga muliŵavu pamwenga kubwalu kwa liŵavu, ndiziŵa cha; Chiuta ndiyu waziŵa. 4 Munthu mwenuyu wangukwamphulikiya kuparadayisu ndipu wanguvwa mazu ngo ngangakambika cha kweniso ngambula kwenere kuti munthu wangakambi. 5 Ndimalikengi chifukwa cha munthu mwenuyu, kweni ndimalikengi chifukwa chaku ndamweni cha, kupatuwaku kulopwa kwangu. 6 Pakuti chinanga ndingakhumba kumalika, ndijengi muzereza cha, chifukwa ndikambengi uneneska. Kweni ndichitengi cha venivi, kuti paŵevi munthu wakundilumba ukongwa kuluska vo wawona mwaku ini pamwenga vo watuvwa kwaku ini, 7 chifukwa cha vinthu vapade vo Chiuta wandivumbuliya.

Kuti ndileki kujikuzga ukongwa, ndingupaskika munga muliŵavu,+ mungelu waku Satana, kuti walutirizgi kundiwomba makofi* ndi chilatu chakuti ndileki kuja wakujikuzga ukongwa. 8 Katatu kosi ndingupempha Ambuya pa nkhani yeniyi, kuti munga wenuwu utuwemu mwaku ini. 9 Kweni angundikambiya kuti: “Wezi wangu ukulu ngwakukwana kwaku yiwi, pakuti nthazi yangu yija yakufikapu mu kulopwa.”+ Mwaviyo ndikondwengi ukongwa kweniso ndimalikengi chifukwa cha kulopwa kwangu, kuti nthazi yaku Khristu yijaliriyi paku ini nge hema. 10 Mwaviyo, chifukwa chaku Khristu ndikondwa asani ndilopwa, ndinyozeka, ndisoŵa vinthu vakukhumbika, nditombozgeka kweniso ndikumana ndi masuzgu. Pakuti asani ndalopwa, penipo ndipu ndija ndi nthazi.+

11 Ndaŵa muzereza. Yimwi ndimwi mwandichichizga, pakuti mwakhumbikanga kundilumba. Ve viyo chifukwa chakuti mu kanthu kekosi ndingulongo kuti nde mumana cha kwa akutumika ŵinu wo mutiŵawona kuti mbapachanya ukongwa chinanga kuti nde munthu ŵaka.+ 12 Kukamba uneneska, ukaboni wakuti nde wakutumika unguwoneka pakati pinu mwakukunthiyapu kukulu,+ mwa visimikizu, mwa vakuziziswa ndipuso mwa ntchitu zanthazi.+ 13 Kumbi ntchifukwa wuli yimwi munguyanjika kamanavi kuluska mipingu yosi? Kumbi panyaki chingaŵa chifukwa chakuti ndinguja mphingu cha kwaku yimwi?+ Chondi mundigowoke chifukwa cha kunanga kwenuku.

14 Awonani! Yaka nkhachitatu kunozgeka kuti ndizi kwinu, ndipu ndazamukuŵa mphingu cha. Pakuti ndipenja katundu winu cha,+ kweni yimwi. Chifukwa ntchakwenere cha kuti ŵana+ asungiyi chuma apapi ŵawu, kweni apapi ndiwu atenere kusungiya ŵana ŵawu. 15 Pakuti ini ndikondwengi ukongwa kugwiriskiya ntchitu vinthu vangu, ndipu ndijiperekengi ukongwa chifukwa chaku yimwi.+ Sonu asani ini nditikuyanjani ukongwa viyo, kumbi ini ndini nditenere kwanjika kamanavi? 16 Chinanga kuti vingaŵa viyo, ndinguŵa mphingu cha kwaku yimwi.+ Kweni mukamba kuti ndenga “muryarya” ndipuso ndakuwonjaningi “mwakuchenje.” 17 Ndingukugololiyani cha kuporote mwaku wo ndinguŵatuma, asi viyo? 18 Ndingupempha Tito ndipuso ndingutuma mubali limoza ndi iyu. Tito wangukugololiyani cha, asi viyo?+ Asi tingwenda mu mzimu umoza? Ndipuso asi tingwenda mumaphazi ngamoza?

19 Kumbi nyengu yosi iyi mwaja muchiŵanaŵana kuti titijivikiliya kwaku yimwi? Tilongoro venivi pa masu paku Chiuta mwakukoliyana ndi Khristu. Kweni akwanjiwa, vosi venivi titivichita kuti tikuzengeni. 20 Pakuti nditopa kuti panyaki asani ndaza, ndingazileka kukusaniyani mo ndikhumbiya, ndipuso kuti ndingazileka kuchita vinthu nge mo mukhumbiya, kweni mumalu mwaki ndingazisaniya ndewu, sanji, ukali, mphindanu, kunenana kwambula mweneku kuziŵa, mitokutoku,* kujikuzga kweniso chimtimbaheka. 21 Panyaki asani ndaza so ko, Chiuta wangu wazakundilengesa ndipuso ndingaziliriya ŵanthu anandi wo kuvuli uku akuchita ubudi kweni akulapa cha unyakazi wawu, ureŵi* kweniso kuchita jalidu liheni mwambula soni,* vo achitanga.

13 Yaka nkhachitatu, ndituza kwaku yimwi. “Nkhani yeyosi yisimikizikengi asani pe ukaboni* wa ŵanthu ŵaŵi pamwenga atatu.”+ 2 Chinanga kuti nde kutali namwi, kweni mazu ngangu mungawoni nge kuti nde namwi limoza kachiŵi. Ndipu nditcheŵeske limu ŵanthu wo kuvuli uku akuchitapu ubudi kweniso anyaki wosi, kuti asani ndaza so, ndazakuŵalekere cha, 3 pakuti mupenja ukaboni wakulongo kuti Khristu, mweniyo ngwakulopwa cha kwaku yimwi, kweni ngwanthazi pakati pinu, ndiyu walongoro nadi kuporote mwaku ini. 4 Pakuti mbuneneska kuti wangubayikiya pachimiti chifukwa cha kulopwa, kweni ngwamoyu chifukwa cha nthazi yaku Chiuta.+ Isi nasi te akulopwa limoza ndi iyu, kweni tamuja limoza ndi iyu+ chifukwa cha nthazi yo Chiuta wakukupaskani.+

5 Lutirizgani kujiyesa kuti muwoni asani mwe mu chivwanu. Lutirizgani kusimikiza kuti ndimwi munthu wamtundu wuli.+ Pamwenga kumbi muziŵa cha kuti Yesu Khristu ngwakukoliyana ndi yimwi? Kupatuwaku asani mwe ambula kuzomerezeka. 6 Ndisimikiza kuti muziŵa kuti te akuzomerezeka.

7 Sonu tipemphera kwaku Chiuta kuti muleki kuchita chinthu chechosi chiheni. Tichita venivi kuti tiwoneki akuzomerezeka cha, kweni kuti yimwi muchitengi vinthu vamampha chinanga kuti isi tingawoneka nge ambula kuzomerezeka. 8 Pakuti tingachita chinthu chechosi cha chakususkana ndi uneneska, kweni chakukoliyana ndi uneneska pe. 9 Nyengu zosi asani isi te akulopwa kweni yimwi mwe anthazi, tikondwa. Ndipu cho tipemphere ntchakuti yimwi munyoloski po mukhumbika kunyoloska. 10 Ndichu chifukwa chaki ndalemba vinthu venivi ndechendazi kwaku yimwi kuti asani ndaza ndizileki kugwiriskiya ntchitu mwanthazi mazaza ngo Ambuya akundipaska+ ngakuti ndizengengi, mumalu mwa kupasuwa.

11 Pakumaliya abali, lutirizgani kukondwa, kunyoloskeka, kupembuzgika,+ kuŵanaŵana mwakukoliyana+ ndipuso kuja mwachimangu,+ ndipu Chiuta wachanju ndipuso wachimangu+ waŵengi namwi. 12 Tawuzganani ndi kufyofyonthana mwakupaturika. 13 Akupaturika wosi atikutawuzgani.

14 Wezi ukulu wa Ambuya Yesu Khristu ndi chanju chaku Chiuta kweniso mzimu wakupaturika wo mwapaskika, viŵi namwi mosi.