8 Chakuwoniyapu Chamampha

KUMBI CHING’ANAMUWANJI?

Apapi wo aja chakuwoniyapu chamampha achita vo asambiza ŵana ŵawu. Mwakuyeruzgiyapu, vingaja vakusuzga kuti mwana wakambengi uneneska asani wakukuvwanipu muchikamba kuti, “Uŵakambiyi kuti ndatuwapu” asani mukhumba cha kuti mukambiskani ndi munthu munyaki yo waza kunyumba kwinu.

“Ŵanthu anandi akamba kuti, ‘Chita vo ndakukambiya, kuchita vo ini ndichita cha.’ Kweni kuchita viyo kutiŵawovya cha ŵana. Ŵana ŵe nge buwula yo watumwa chechosi cho mwamuŵikamu. Ŵana nawu atole chechosi cho apapi akamba kweniso kuchita. Ndipu angatikambiya asani vo tichita vikoliyana cha ndi vo titiŵasambiza.”—David.

FUNDU YA M’BAYIBOLU: “Yiwi wakupharazga kuti, ‘Ungabanga cha,’ kumbi nawi utuba?”—Aroma 2:21.

NTCHIFUKWA WULI NTCHAKUKHUMBIKA?

Ŵana anamana kweniso achinyamata atole ukongwa vo apapi ŵawu achita kuluska vo munthu munyaki weyosi kusazgapu anyawu angachita. Ivi vilongo kuti apapi ndimwi akwenere kulongozga ŵana ŵinu kuti aje ndi mijalidu yamampha. Yiwu angaja ndi mijalidu yeniyi asani namwi muchita vinthu mwakukoliyana ndi vo mutiŵasambiza.

“Isi apapi tingakamba chinthu chinyaki kananandi ŵaka ndipu tingaŵanaŵana nge kuti mwana waleka kuvwa. Kweni zuŵa lo tingachita chinthu chambula kukoliyana ndi vo tikamba, mwana widu wangaziŵa venivi ndipu wangatikambiya vo tachita. Ŵana awonesesa chechosi cho tichita chinanga kuti isi tingawona nge kuti atoliyaku kanthu cha.”—Nicole.

FUNDU YA M’BAYIBOLU: “Zeru yakutuwa kuchanya, . . . njambula chinyengu.”—Yakobe 3:17.

VO MUNGACHITA

Mutenere kuwona mo muchitiya vinthu. Kumbi mutanja kuwonere vakukondwesa va mtundu wuli? Kumbi muchita wuli vinthu ndi munthu yo mukutorana nayu kweniso ŵana ŵinu? Kumbi mwe ndi mabwezi nga mtundu wuli? Kumbi ŵanthu anyaki mutiŵaŵanaŵaniya? Mwakudumuwa, kumbi mijalidu yo mwe nayu ndiyu mukhumba kuti ŵana ŵinu atoliyeku?

“Ini ndi murumu wangu, tikhumba cha kuti ŵana ŵidu achitengi vinthu vo isi tileka kuchita.”—Christine.

Mupepesengi asani mwanangisa. Ŵana ŵinu aziŵa kali kuti mwe ambula kufikapu. Mwaviyo, asani mwanangisa ndipu mukambiya munthu yo mukutorana nayu pamwenga ŵana ŵinu kuti “pepani,” ndikuti mutiŵawovya kuti akambengi uneneska kweniso kuti aje akujiyuyuwa.

“Ŵana akhumba kuti nasi tizomerezengi asani tanangisa ndipuso kuti tipepesengi. Kweni asani tileka kuchita viyo, nawu angakamba cha asani anangisa.”—Robin.