Charu cha Paradayisu

Yehova wazamutuzgiyapu limu vinthu viheni vosi vo Satana wachita. Yehova waŵika Yesu kuja Fumu ya charu chosi. Mu muwusu waki, charu chosi chazamuja paradayisu.—Danyele 7:13, 14; Luka 23:43.

Yehova walayizga vinthu ivi:

• VAKURYA VINANDI: “Charu chapasi chapaska mwandanu waki; Chiuta, Chiuta widu, watitumbika.” “Mu charu muŵi kurya kwakuzara; mitunthu yiburumutizgiki ndi vipasu.”—Sumu 67:6; 72:16.

• KWAZAMUŴAVI NKHONDU: ‘Zaninga, wonani nchitu zaku Yehova, mo wachitiya vakuziziswa mu charu. Warekeska zinkhondu mpaka ku chigoti cha charu chapasi.’—Sumu 46:8, 9.

• KWAZAMUŴAVI ŴANTHU AHENI: “Chifukwa ŵaheni ŵakadumulikanga . . . Kwaja kanyengu kamanavi, muheni kuti wakaŵangapu so cha; nanga uwonapu umampha pa malu ngaki, iyu kuti wakaŵangapu cha.”—Sumu 37:9, 10.

• 

  KWAZAMUŴAVI MATENDA, CHITIMA PAMWENGA NYIFWA: “Sonu masu nga ŵachiburumutiya ngakabanukanga, ndi makutu nga ŵamgota kuti ngagotengi cha, ŵakupunduka ŵakawulukanga, uli ndi mphoyo, lilimi la wambuwu likambanga ndi likondwa.”—Yesaya 35:5, 6.

  “Ndipu Chiuta iyu waŵengi pamoza nawu, Chiuta wawu. Ndipu waleskengeku sozi losi ku masu ngawu, ndi nyifwa kuti yikaŵangapu so cha; chingana nchitenje, chingana ndi nkhuta, chingana mburwirwi, kuti vikaŵangapuso cha: chifukwa vakudankha vo valutapu.”—Chivumbuzi 21:3, 4.

Yehova wapusika cha nge mo Satana ndi viŵanda achitiya. Vosi vo wakulayizga vazamuchitika. (Luka 1:36, 37) Yehova watikuyanjani ndipu wakhumba kuti imwi muzije mu Paradayisu yo wazamupanga. Mwaviyo, kumanani ndi Akaboni aku Yehova kuti musambiri vinandi vakukwaskana ndi uneneska wo usanirika mu Mazu ngaku Chiuta. Asani mugwiriskiyengi nchitu fundu za uneneska pa umoyu winu, mufwatukengi ku ukapolu wa maboza, kugomezga mizimu, ndipuso kuchita vinthu mwachibulumutiya. Mukuluta kwa nyengu mwazamufwatulika ku ukapolu wa ubudi ndi nyifwa. Nge mo Yesu wangukambiya: “Muziŵengi uneneska, ndipu uneneska wo usanduskengi imwi ŵanangwa.”—Yohane 8:32.