Chigaŵa 10
Chiuta Wazamupanga Charu Chifya Chamampha Ukongwa
1, 2. Kumbi nchinthu wuli cho chazamuchitika asani nkhondu ya Aramagedoni yamala?
KUMBI nchinthu wuli cho chazamuchitika pavuli pa nkhondu yaku Chiuta ya Aramagedoni? Nyengu yakukondweska ukongwa yazamukwamba. Ŵanthu wo azamupozomoka pa Aramagedoni azamusere mu charu chifya chifukwa chakuti alongo kugomezgeka ku muwusu waku Chiuta. Nyengu iyi yazamuja yakukondweska ukongwa chifukwa chakuti mtundu wa ŵanthu wazamulonde vitumbiku vinandi ukongwa kutuliya kwaku Chiuta!
2 Ŵanthu wo azamupozomoka azamukwamba kunozga charu kuti chizije paradayisu mwakulongozgeka ndi Ufumu waku Chiuta. Azamugwiriskiya nchitu nthazi zawu pakugwira nchitu yo yazamuyanduliska weyosi yo wazamuŵaku pa nyengu yo. Pavuli paki, charu chazamukwamba kusinthika kuti chizije malu ngakutowa, ngachimangu ndipuso ngakukondweska ngakuti ŵanthu azijepu.
Urunji Wazamusere M’malu mwa Uheni
3. Kumbi ŵanthu azamuja ndi umoyu wuli asani Armagedoni yamala waka?
3 Vosi ivi vazamuchitika asani charu chaku Satana chazituzgikapu. Kwazamuŵavi vinthu vakupatuska ŵanthu nge visopa vaboza, mawupu nga ŵanthu kweniso maboma nga ŵanthu. Kwazamuŵavi so muwusu waku Satana wo unyenga ŵanthu; ŵanthu wosi ndipuso angelu aheni wo akolerana nayu azamunangikiya limoza ndi mgonezi waki. Vazamuja vakukondweska ukongwa kuwona kuti charu chiheni chaku Satana chatuwapu! Taŵanthu tazamupumuwa nadi!
4. Konkhoskani vo vazamusintha pa nkhani yakusambiza.
4 Pavuli paki, ŵanthu azamusambira vinthu vamampha ukongwa vakutuliya kwaku Chiuta m’malu mwakusambira zeru ziheni za ŵanthu. “Ŵana ŵaku wosi ŵakasambizikanga ndi Ambuya [Yehova].” (Yesaya 54:13) Vinthu vamampha vo ŵanthu azamusambira chaka chechosi vazamuchitiska kuti ‘charu chapasi chizizazi ndi zeru za Ambuya [Yehova] nge mo maji ngazaziya nyanja.’ (Yesaya 11:9) Ŵanthu azamusambira so vinthu viheni cha, kweni ‘ŵakuja mu charu ŵazamusambira urunji.’ (Yesaya 26:9) Zuŵa lelosi ŵanthu azamuŵanaŵananga ndi kuchita vinthu vamampha pe.—Machitidu 17:31; Ŵafilipi 4:8.
5. Kumbi nchinthu wuli cho chazamuchitikiya vinthu vosi viheni ndipuso ŵanthu aheni?
5 Mwaviyo, kwazamuŵavi kubayana, viwawa, kukolere ŵanthu, kuba ndipuso kuswa marangu kwa mtundu wewosi. Palivi yo wazamusuzgika chifukwa cha vakuchitika va ŵanthu aheni. Lemba la Nthanthi 10:30 likamba kuti: “Murunji kuti wakanderezgekangapu cha, kweni wamphurupuru kuti wakajanga mu charu cha.”
Tazamuja ndi Umoyu Wambula Matenda
6, 7. (a) Kumbi ndi masuzgu nanga ngo Ufumu waku Chiuta wazamutuzgapu? (b) Kumbi Yesu wangulongo wuli venivi pa nyengu yo wenga pacharu chapasi?
6 Mu charu chifya, mwazamuŵavi vinthu vosi viheni vo vikuza chifukwa cha kugaruka ko kunguchitika pakwamba. Mwakuyeruzgiyapu, Ufumu wo wazamuwusa pa nyengu iyi, wazamutuzgapu matenda ndi ukoti. Chinanga kuti mazuŵa nganu mungaja ndi liŵavu lambula kutamatama, kweni asani mukuwa, masu nginu ngaleka kuwona umampha, minyu ngatamba kuvunda, mutamba kuvwa mwakusuzgikiya, liŵavu linu litamba kuchita mankhwinya, viŵalu va mkati mwa liŵavu vileka kugwira nchitu umampha ndipu pakumaliya pa vosi ivi mutufwa.
7 Kweni pambula kuswera yapa, masuzgu ngosi ngo tikuhara kwa apapi ŵidu akwamba ngajengi mbiri yamwaka. Kumbi mukumbuka vinthu vo Yesu wanguchita ndi matenda po wenga pacharu chapasi? Bayibolo likamba kuti: “Ndipu kungumuziya mizinda yikuru, yakuŵa nawu pamoza ŵakuganthiya, ŵachiburumutiya, ŵambuwu, ŵakupunduka, ndi ŵanyaki ŵanandi, ndipu ŵanguŵaponya pa marundi ngaki; iyu wanguŵachizga; viyo kuti mzinda wo unguzizwa ŵachiwona ŵambuwu kurongoro, ŵakupunduka kuŵa ŵanthazi, ŵakuganthiya kwenda, ndi ŵachiburumutiya kulereska.”—Mateyu 15:30, 31.
8, 9. Konkhoskani vinthu vakukondweska vo vazamuŵaku mu charu chifya asani umoyu wakufikapu waziwezgekiyapu.
8 Tazamukondwa ukongwa mu charu chifya asani matenda ngidu ngosi ngazituzgikapu. Tazamusuzgika so cha chifukwa cha matenda. “Pakaŵangavi wakujamu mu muzi wo yo wakakambanga kuti, ‘Ndatama.’” “Sonu masu nga ŵachiburumutiya ngakabanukanga, ndi makutu nga ŵamgota kuti ngagotengi cha, ŵakupunduka ŵakaurukanga, uli ndi mphoyo, lilimi la wambuwu likambanga ndi likondwa.”—Yesaya 33:24; 35:5, 6.
9 Kumbi vazamuja vakukondweska cha kuziyukanga ndipuso kukondwa ndi umoyu wamampha mulenji wewosi? Kumbi ŵanthu akukota azamukondwa cha kuwona kuti nthazi zo ŵenganazu pa unamana wawu zaweriyamu ndipuso kuti asaniya umoyu wakufikapu wo Adamu ndi Eva ŵenga nawu pakwamba? Bayibolo lilayizga kuti: “Munofu waki uŵi nge ngwa uhurwa; wawere ku mazuŵa nga uhurwa waki.” (Jobu 33:25) Vazamuja vakukondweska ukongwa kutaya magilasi ngakuwone, vinthu vakovya kuti munthu wavwengi umampha, nthonga zakwende, njinga za akupuduka, ndi minkhwala yakupambanapambana. Pazamuŵavi chifukwa chakujaliya ndi vipatala kweniso madokotala ngengosi.
10. Kumbi nchinthu wuli cho chazamuchitikiya nyifwa?
10 Ŵanthu wo azamukondwa ndi umoyu wamampha uwu, azamukhumba so kufwa cha. Ndipu ŵanthu azamukufwa cha, chifukwa azamufwatuka ku ukapolu wa kuleka kufikapu ndi nyifwa vo tikuhara. Khristu ‘watenere kuwusa nge fumu mpaka po Chiuta waŵikiyengi ŵamawongu wosi kusi ku malundi ngaki. Wamawongu wakumaliya kwachiwayulika ndi nyifwa.’ “Chawezi chaku Chiuta mbumoyu wamuyaya.”—1 Ŵakorinte 15:25, 26; Ŵaroma 6:23; wonani so Yesaya 25:8.
11. Kumbi buku la Chivumbuzi likonkhoska kuti ndi vitumbiku nivi vo vazamuŵaku mu charu chifya?
11 Pakukonkhoska vitumbiku vo Chiuta wazamupaska mtundu wa ŵanthu mu Paradayisu, buku lakumaliya la m’Bayibolo likamba kuti: “Ndipu [Chiuta] waleskengeku sozi losi ku masu ngawu, ndi nyifwa kuti yikaŵangapu so cha; chingana nchitenje, chingana ndi nkhuta, chingana mburwirwi, kuti vikaŵangapu so cha: chifukwa vakudankha vo varutapu.”—Chivumbuzi 21:3, 4.
Akufwa Awere ku Umoyu
12. Kumbi Yesu wangulongo wuli nthazi zakuyuskiya ŵanthu zo wangupaskika ndi Chiuta?
12 Yesu wanguchizga akutama ndi akupunduka pe cha. Iyu wanguyuska so ŵanthu akufwa. Yapa wangulongo nthazi zo wangupaskika ndi Chiuta zakuyuskiya ŵanthu akufwa. Kumbi mukumbuka vo vinguchitika nyengu yinyaki Yesu wati waluta ku nyumba ya munthu munyaki yo mwana waki munthukazi wangufwa? Yesu wangukambiya msungwana yo wangufwa kuti: “Msungwana we, ndikunene, yuka.” Nchinthu wuli cho chinguchitika wati wakamba viyo? “Sosonukweni wanguyuka msungwana, ndipu wendayendanga.” Ndipu pakuwona ivi, ŵanthu wo ŵengapu panyengu iyi “ŵangurwita ndi chirwitu chikuru.” Ŵanthu angukondwa ukongwa!—Marko 5:41, 42; Luka 7:11-16; Yohane 11:1-45.
13. Kumbi mbanthu naŵa wo azamuyuskika?
13 Mu charu chifya ‘kwazamuja chiyuka cha ŵarunji ndi ŵaziraurunji.’ (Machitidu 24:15) Pa nyengu iyi Yesu wazamugwiriskiya nchitu nthazi zo wakupaskika ndi Chiuta kuti waziyuski ŵanthu akufwa, chifukwa iyu wangukamba kuti, “Ini ndini Chiyuka ndi umoyu; wakuvwana mwaku ini, chingana wangafwa, waŵengi wamoyu.” (Yohane 11:25) Wangukamba so kuti: “Wosi ŵamu miunda [wo Chiuta watiŵakumbuka] ŵakavwanga liu laki [laku Yesu]. Ndipu ŵakatuwangamu.”—Yohane 5:28, 29.
14. Kumbi ndi vinthu wuli vo kwazamuŵavi chifukwa chakuti nyifwa yatuzgikapu?
14 Vazamuja vakukondweska ukongwa kuwona magulu nganandi nga ŵanthu ngachiyuka ndi kujaliya so limoza ndi abali ŵawu. Ŵanthu wo azamupozomoka azamukuvwa cha nkhani pamwenga mauthenga ngachitima. M’malu mwaki, azamukondwanga waka ndi vipharazgu vakuti ŵanthu ayuskika. Kwazamuŵavi maliru ndi masanu.
Charu cha Chimangu Cheneku
15. Kumbi uchimi waku Mika wazamufiskika ukongwa munthowa wuli?
15 Pazamuja nadi chimangu mu vakuchitika vosi va umoyu wa ŵanthu. Kwazamuŵavi nkhondu, ŵanthu akwambisa nkhondu, ndipuso kwazamuŵavi ŵanthu akupanga vidya va nkhondu. Chifukwa wuli? Chifukwa chakuti kwazamuŵavi kusankhana mitundu, mafuku ndipuso maboma ngakugaŵikana. Mwaviyo, fundu yikulu njakuti, ‘Mtundu wazamuleka kuponya nkhondu pa mtundu unyaki, ndipu wazamusambira nkhondu so cha.’—Mika 4:3.
16. Kumbi Chiuta wazamuchita wuli kuti nkhondu zizimaliyi limu?
16 Ivi vingaja vakuziziswa nadi chifukwa ŵanthu akwamba kali ukongwa kubayana pa nkhondu zo zachitika mu nyengu yosi iyi. Ivi vichitika chifukwa chakuti ŵanthu awusika ndi ŵanthu anyawu ndipuso viŵanda. Mu Ufumu wo wazamuwusa mu charu chifya mwazamuchitika ivi: “Zaninga, wonani nchitu za Ambuya [Yehova] . . . Arekeska zinkhondu mpaka ku chigoti cha charu chapasi; uta afyo, ndi kuwaruwa mkondu; magareta [nga nkhondu] atocha ndi motu!”—Sumu 46:8, 9.
17, 18. Kumbi ŵanthu ndi nyama azamuja wuli mu charu chifya?
17 Ŵanthu azamuja so pa chimangu ndi nyama zakofya za mudondu nge mo venge mu Edene. (Chiyambo 1:28; 2:19) Chiuta wakamba kuti: “Ndipu mu zuŵa lo ndamukukuchitiya phanganu ndi nyama zamu dondu, ndi viyuni va mude, ndi vinthu vakukwaŵa pasi . . . ndi nkhamugonekanga kwakufwasa.”—Hoseya 2:18.
18 Kumbi chimangu ichi chazamuja chikulu wuli? “Mphumphi yikajanga pamoza ndi mwana wa mbereri, ndipu nyalubwi wakagonanga pasi ndi mwana wa mbuzi, tholi, nkharamu pamoza ndi viŵetu vakututuŵa mwana mumanavi wakavirongozganga.” Nyama zazamukofya so ŵanthu cha pamwenga kupwetekana zijazija. Ndipu “nkharamu yikaryanga uteka nge ndi ng’ombi.”—Yesaya 11:6-9; 65:25.
Charu Chazamusinthika Kuja Paradayisu
19. Kumbi charu chazamusinthika kuja vinthu wuli?
19 Charu chosi chazamusinthika kuja muzi wa paradayisu wakuti ŵanthu azijengemu. Ndichu chifukwa chaki Yesu wangulayizga munthu yo wangugomezga mwaku iyu kuti: “Uŵengi mu Paradisu pamoza nani.” Bayibolo likamba kuti “Bozwa lo ndi charu chiyumu vikakondwanga, bozwa lo likasekerenga ndi kupasa . . . Pakuti maji ngakatuwanga mu bozwa, ndi timisinji mu charu cha chiparamba.”—Luka 23:43; Yesaya 35:1, 6.
20. Nchifukwa wuli ŵanthu azamusuzgika so cha ndi nja?
20 Ŵanthu azamusuzgika so cha ndi nja mu Ufumu waku Chiuta. “Mu charu muŵi kurya kwakuzara; mithunthu yiburumutizgiki ndi vipasu.” “Miti ya mudondu yipasengi vipasu vawu. Ndipu charu chapasi chipaskengi mwandanu waki, ndipu zikajanga kwakufwasa.”—Sumu 72:16; Ezekiele 34:27.
21. Kumbi nchinthu wuli cho chazamuchitikiya ŵanthu wo asoŵa pakuja, nyumba zo zigwiriskikiya nchitu pa vinthu viheni ndipuso ŵanthu akuswa marangu?
21 Kwazamuŵavi ukavu, ŵanthu akusoŵa pakuja, nyumba zakuchitiyamu vinthu viheni pamwenga kuja ndi ŵanthu akuswa marangu. “Ŵakazenganga zinyumba ŵakajanga mwaku zo; ŵakapandanga minda ya mphereska ndi kurya vipasu vaki. Kuti ŵakazenganga ndi kujamu munyaki cha; kuti ŵakapandanga kuti waryengi ndi munyaki cha.” “Kweni wakajanga yosi musi mu mphereska yaki ndi musi mwa mkuyu waki, ndipu pakaŵangavi yumoza wakuŵatenthemeska.”—Yesaya 65:21, 22; Mika 4:4.
22. Kumbi Bayibolo litivikonkhoska wuli vitumbiku vo vazamuŵaku mu muwusu waku Chiuta?
22 Ŵanthu azamulonde vitumbiku vosi ivi, ndi vinthu vinyaki so vinandi mu Paradayisu. Lemba la Sumu 145:16 likamba kuti: “Mutivipaska [Chiuta] kurya kunandi, ndi kugutiska khumbiru la chakututa che chosi.” Mwaviyo, nchakuziziswa cha kuti Bayibolo likamba kuti: . “Kweni ŵakuzika ndiwu ŵakaharanga charu, ŵakondwengi mu chimangu chikuru. . . . Ŵakurunjika ŵaharengi charu, ndipu ŵakajanga paku cho muyaya.”—Sumu 37:11, 29.
Kutuzgapu Vinthu Vosi Vakali
23. Kumbi Ufumu waku Chiuta wazamutuzgapu wuli masuzgu ngo takumana nangu nyengu yosi iyi?
23 Ufumu waku Chiuta wazamutuzgapu vinthu vosi viheni vo vachitikiya mtundu wa ŵanthu kwa vyaka 6,000. Ŵanthu azamukondwa ukongwa m’malu mwa masuzgu ngo akumananga nangu. Umoyu wazamutimbanyizgika cha chifukwa cha kukumbuka masuzgu ngo ngajumphapu. Maŵanaŵanu ngamampha, ndipuso nchitu zamampha zo ŵanthu azamuchita zuŵa lelosi zazakuŵachitiska kuti alekengi kukumbuka masuzgu ngakali.
24, 25. (a) Kumbi ndi vinthu wuli vo Yesaya wangukambiya limu kuti vazamuchitika? (b) Nchifukwa wuli tisimikizga kuti masuzgu ngakali ngazamukumbukika so cha?
24 Chiuta yo watitiŵanaŵaniya wakamba kuti: “Ndilenga machanya ngafya [boma lifya lakuchanya lo liwusengi ŵanthu] ndi charu chapasi chifya [gulu la ŵanthu arunji]; ndipu vinthu vakudankha kuti vikakumbukikanga cha, pamwenga kuviŵanaŵana. Kweni mukasekerenga ndi kukondwere muyaya mwaku cho ndilenga.” ‘Charu chosi chapasi chapumuwa che bata, ŵanthu abangula mwakukondwa.’—Yesaya 14:7; 65:17, 18.
25 Mwaviyo, kuziya mu Ufumu waki, Chiuta wazamutuzgapu vinthu viheni vosi vo vachitika kwa nyengu yitali. Iyu wazamulekapu cha kulongo kuti watitiphwere mwakutipaska vitumbiku vinandi ukongwa vo vazamusere m’malu mwa masuzgu ngo takumananga nangu kali. Masuzgu ngosi ngo tikumana nangu sonu ngazamuluwika, ndipu tazakungakumbuka so cha.
26. Kumbi nchifukwa wuli Chiuta wazakutichitiya vinthu vamampha chifukwa cha kukunthiyapu masuzgu ngo tikumana nangu sonu?
26 Ivi ndivu Chiuta wazakutichitiya chifukwa chakuti takunthiyapu masuzgu ngo takumana nangu mu charu ichi. Iyu waziŵa kuti tingukhumba tija cha kuti tibaliki ambula kufikapu, kweni kuti tikuchita kuhara ubudi kwa apapi ŵidu akwamba. Waziŵa so kuti tingukhumba tija cha kuti tibalikiyi mu charu chaku Satana, ndipu asani Adamu ndi Eva angugomezgeka, mphanyi tikuwiya mu paradayisu. Mwaviyo, chifukwa cha lisungu laki, Chiuta wazamuwonesesa kuti wamaliska ubudi wakali wo tikuyambuwa.
27. Kumbi ndi mauchimi nanga ngo ngazamufiskika mwakuziziswa ukongwa mu charu chifya?
27 Mu charu chifya, ŵanthu azamukondwa ndi wanangwa wo ukukambikiya limu pa Ŵaroma 8:21, 22 kuti: “Ulengi nawu ufwatulikengeku ku uŵanda wa chivuzi kwachisere mu wanangwa wa unkhankhu wa ŵana ŵaku Chiuta. Chifukwa tiziŵa kuti ulengi wosi utamanthiya ndi ulangiya pamoza mpaka ku sonu.” Pa nyengu iyi, ŵanthu azamuwona kufiskika chayiku kwa rombu lakuti: “Ufumu winu uzi. Khumbu linu lichitiki, panupasi nge ndiko kuchanya.” (Mateyu 6:10) Vinthu vamampha vo vazumukuŵa mu Paradayisu vazamulongo chithuthuzi cha mo vinthu viliri kuchanya.
[Vithuzi papeji 23]
Mu charu chifya, ŵanthu akukota azamuwere so ku unamana
[Chithuzi papeji 24]
Matenda ngosi ndi kupunduka vazamumala mu charu chifya
[Chithuzi papeji 25]
Mu charu chifya, ŵanthu akufwa azamuyuskika kuti aje so ndi umoyu
[Chithuzi papeji 26]
‘Ŵanthu azamusambira so nkhondu cha’
[Vithuzi papeji 27]
Ŵanthu azamuja pa chimangu chikulu ndi nyama mu Paradayisu
[Chithuzi papeji 27]
‘Chiuta wazamudambasuwa janja laki ndi kugutiska khumbiru la chamoyu chechosi’
[Chithuzi papeji 28]
Ufumu waku Chiuta wazamutuzgapu masuzgu ngosi ngo tikumana nangu