Mo Umoyu Wazamuŵiya mu Charu Chifya cha Chimangu

Asani muwona chithuthuzi cho che pa kapepala yaka, kumbi mutijivwa wuli? Kumbi munweka kuzija ndi umoyu wa chimangu, likondwa ndi kukhupuka, vyo muwona pa chithuthuzi ichi? Kwambura kukayika munweka. Kweni kumbi ndi lotu waka kugomezga kuti vinthu ivi vyazamuchitika pacharu chapasi?

Umu ndimu ŵanthu anandi aŵanaŵaniya. Mu charu mazuŵa nganu mwe nkhondu, uchigaŵenga, nja, matenda ndi ukoti. Yapa tazumbuwapu vimanavi waka. Kweni tendi chigomezgu kuti vinthu vyazamukuŵa umampha kunthazi. Pakukamba vyakunthazi, Bayibolo lititi: ‘Kwakulingana ndi phanganu lake, tilereze machanya ngafya ndi charu chifya mwenimo muja urunji.’​—⁠2 Petro 3:13; Yesaya 65:⁠17.

‘Machanya ngafya’ ndi “charu chifya” vyo vikambika yapa, nkhuchanya chayiku ko tiwona cha pamwenga charu chayichu cho tijapu cha. Charu cho tijapu ndi kuchanya vikupangika umampha, ndipu Bayibolo likamba kuti vijaririyengi muyaya. (Sumu 89:​36, 37; 104:⁠5) “Charu chifya” ching’anamuwa ŵanthu arunji wo azamuja pacharu chapasi, ndipu ‘machanya ngafya’ mbufumu wakuchanya, pamwenga boma, lo lazamuwusa ŵanthu arunji. Kweni kumbi nchinthu chazeru kugomezga kuti “charu chifya” chazamuŵaku nadi?

Ziŵani kuti khumbu laku Chiuta pakwamba lenga lakuti charu chiŵi mo palili pa chithuthuzi cho che pa kapepala yaka. Wanguŵika ŵanthu ŵakwamba mu munda wakutowa wa Edeni ndipu wanguŵakambiya kuti: “Papanani ndi mwandane, ndi muzaze charu ndi muchithereske.” (Chiyambo 1:28) Khumbu laku Chiuta lenga lakuti abali ŵana ndi kusambuska charu chosi kuŵa Paradayisu. Kweni pavuli paki, angupandukiya Chiuta. Mwaviyo, ŵenga ambula kwenele kuja ndi umoyu wamuyaya. Kweni ndipuwuli, Chiuta wechendasinthi khumbu laki lapakwamba. Ndipu khumbu laki litenele kufiskika mu charu chifya.​—⁠Yesaya 55:⁠11.

Ndipu asani muromba rombu la Ambuya, kupempha ufumu waku Chiuta kuti uzi, mupempha boma lakuchanya kuti lizituzgepu uheni ndi kuwusa charu chifya. (Mateyu 6:​9, 10) Tendi chigomezgu kuti Chiuta wazamumuka rombu ili, pakuti Mazu ngaki ngatiti: “Ŵakurunjika ŵaherenge charu, ndipo ŵakajanga pakucho muyaya.”​—⁠Sumu 37:⁠29.

Mo Umoyu Wazamuŵiya mu Charu Chifya Chaku Chiuta

Ŵanthu pacharu chapasi azamupinduwa ukongwa ndi Ufumu waku Chiuta. Ufumu uwu wazamuchita vyosi vyo Chiuta wakhumbanga kuti ŵanthu akondwengi navu pacharu chapasi. Kwazamuŵavi kutinkhana ndi kusankhana mitundu, ndipu ŵanthu wosi pacharu azamuyanjananga. Bayibolo lititi Chiuta ‘wazamurekeska zinkhondu mpaka ku chigoti cha charu chapasi.’ “Mtundu kuti wazamsoske lipanga pa mtundu cha; chingana nkhusambira nkhondu naku so cha.”​—⁠Sumu 46:9; Yesaya 2:⁠4.

Pavuli paki, charu chosi chazamukuŵa Paradayisu. Bayibolo lititi: ‘Bozwa lo ndi charu chiyumu vikakondwanga, bozwa lo likasekerenga ndi kupasa. . . . Pakuti maji ngakatuwanga mu bozwa ndi timisinji mu charu cha chiparamba; muchenga wakocha ukasambukanga thaŵali, ndi charu chiyumu chikaŵanga [visimi vya] maji.’​—⁠Yesaya 35:​1, 6, 7.

Ŵanthu azamukuŵa ndi vifukwa vinandi vyakuŵiya alikondwa mu Paradayisu pacharu chapasi. Ŵanthu azamujangaso ndi nja cha chifukwa chakusoŵa vyakurya. Bayibolo lititi: ‘Charu chapasi chazamupasa mwandanu waki,’ pamwenga kuti vyakurya. (Sumu 67:6; 72:16) Ŵanthu wosi azamukondwa ndi nchitu ya manja ngawu, ngemo Mlengi widu wakambiya. Watiti: ‘Ŵakapandanga minda ya mphereska ndi kurya vipasi vyake. . . ŵakapandanga kuti waryengi ndi munyaki cha.’​—⁠Yesaya 65:​21, 22.

Mu charu chifya chaku Chiuta, ŵanthu azamujangaso mwakufinyikizgana cha mu nyumba, pamwenga kuja mu nyumba zawuliwuli, pakuti khumbu laku Chiuta ndakuti ŵanthu ‘ŵazizengengi nyumba ndi kujamu . . .ŵazizengengi ndi kujamu munyake cha.’ Bayibolo likambaso kuti: “Ŵakatakatakanga kwa ŵaka cha.” (Yesaya 65:​21-23) Mwaviyo, ŵanthu ŵazamukhorwa ndi nchitu yawu. Umoyu wazamukuŵa wakuvukisa cha.

Ufumu waku Chiuta wazamuwezgiyapu chimangu cho chenga mu munda wa Edeni pakati pa ŵanthu ndi nyama, ndipuso pakati pa nyama zija zija. Bayibolo lititi: ‘Mphumphi yikajanga pamoza ndi mwana wa mberere, ndipu nyalubwe wakagonanga pasi ndi mwana wa mbuzi, thole, nkharamu pamoza ndi viŵetu vyakututuŵa; ndipu mwana mumanavi wakavirongozganga.’​—⁠Yesaya 11:​6-9; Hoseya 2:⁠18.

Aŵanaŵanani waka, matenda ngosi ngazamumala mu Paradayisu pa charu chapasi! Mazu ngaku Chiuta ngatitisimikizgiya kuti: “Pakaŵangavi wakujamo mu muzi wo yo wakakambanga kuti, ‘Ndatama.’ ” (Yesaya 33:24) ‘[Chiuta] waleskengeko sozi lose ku maso ngawo, ndi nyifwa kuti yikaŵangapo so cha; chingana nchitenje, chingana ndi nkhuta, chingana mburwirwi, kuti vikaŵangapo so cha: chifukwa vyakudanga vyo vyarutapo.’​—⁠Chivumbuzi 21:⁠4.

Namwi Mungazijamu

Kwambura kukayika, mtima winu utenele kuti wakopeka ndi charu chifya cha urunji cho Chiuta wapangana nasi. Ŵanthu anyaki angaŵanaŵana kuti vitumbiku ivi vyamampha ukongwa mwakuti vingazichitika cha. Kweni palivi chinthu, kwali chiŵi chamampha wuli, cho Mlengi widu wangatondeka kuchita.​—⁠Sumu 145:16; Mika 4:⁠4.

Kweni pe vinthu vinyaki vyo titenele kuchita kuti tizije mu Paradayisu pacharu chapasi kwamuyuya. Po warombanga kwaku Chiuta, Yesu wanguzumbuwapu chinthu chikuru chimoza cho titenele kuchita. Wanguti: “Chenichi mbumoyo wamuyaya, kuti ŵanthu ŵakuziŵeni imwe, Chiuta yija muneneska ndi so Yesu Kristu mweniyo mungutuma.”​—⁠Yohane 17:⁠3.

Mwaviyo, asani tikhumba nadi kuzija mu charu chifya chaku Chiuta, chakwamba titenele kuziŵa khumbu laku Chiuta ndi kulichita. Ichi nchakwenele chifukwa ‘charu chazamukungunuka, ndi chilakalaka chake; kweni mweniyo wachita khumbo laku Chiuta, wazamujaririya muyaya,’ ndi kuzikondwa ndi vitumbiku vyo Mlengi widu wazamupereka.​—⁠1 Yohane 2:⁠17.