Sambiru 12
Kuzirwiska Umoyu ndi Ndopa
Kumbi titenele kuwuwona wuli umoyu? (1) kutuzga nthumbu? (1)
Kumbi Akhristu alongo wuli kuti aphwere umoyu wawu ndi wa anyawu kuti uleki kuŵa pangozi? (2)
Kumbi nkhunanga kubaya nyama? (3)
Kumbi ndi vinthu wuli vinyaki vyo vingalongo kuti tileka kuzirwiska umoyu? (4)
Kumbi dangu laku Chiuta pa nkhani ya ndopa ndakuti wuli? (5)
Kumbi dangu ili lisazgapu kulonde ndopa? (6)
1. Yehova ndiyu Chisimi cha umoyu. Vinthu vyosi vyamoyu viliku chifukwa chaku Chiuta. (Sumu 36:9) Umoyu ngwakupaturika pamasu paku Chiuta. Chinanga mbumoyu wa mwana yo weche mu nthumbu ya anyina, ngwakuzirwa kwaku Yehova. Kutuzgiya dala nthumbu nkhunangiya Chiuta.—Chituwa 21:22, 23; Sumu 127:3.
2. Akhristu awuneneska aphwere kuti aleki kuŵika umoyu wawu ndi wa anyawu pangozi. Awoneseska kuti galimotu, njinga, maboti, ndi nyumba zawu zingapangiska ngozi cha. (Marangu 22:8) Ateŵeti ŵaku Chiuta aŵikiya dala umoyu wawu pangozi cha kuti asangaluki. Mwaviyo, achitaku nawu cha masaza nga viwawa ngo ngangapweteke dala ŵanthu anyaki. Akhwecha vyakusangaluska vyo vilimbikiska viwawa.—Sumu 11:5; Yohane 13:35.
3. Umoyu wa nyama nawuso ngwakupaturika pamasu pa Mlengi. Mukhristu wangabaya nyama kuti wasaniyi dendi, vyakuvwara, pamwenga kujivikiriya ku matenda ndi ngozi. (Chiyambo 3:21; 9:3; Chituwa 21:28) Kweni nkhunanga kuchitiya nkhaza nyama pamwenga kuzibaya chifukwa chakukhumba kuseŵe.—Nthanthi 12:10.
4. Akhristu atenele cha kukweŵa chamba ndi foja munyaki weyosi. Kweniso atenele cha kumwa munkhwala wakutimbanyizga wongu. Kuchita vinthu ivi nkhunanga chifukwa (1) tija akapolu ŵa vinthu ivi, (2) vinanga maliŵavu ngidu, ndipu (3) vyaukazuzi. (Ŵaroma 6:19; 12:1; 2 Ŵakorinte 7:1) Chingaŵa chakusuzga kuleka vinthu ivi. Kweni titenele kuleka kuti tikondweski Yehova.
5. Ndopa nazuso zakupaturika pamasu paku Chiuta. Chiuta watiti umoyu wemu ndopa. Mwaviyo, nkhunanga kurya ndopa. Kurya nyama ya chibudu nakuso nkhunanga. Asani nyama yafwiya mu chiŵana pamwenga achita kuyinyongolo, yingaryikanga cha. Asani mwayilasa ndi wuta pamwenga futi, mutenele kuyichinja liŵi epa mukhumba kuti muryi.—Chiyambo 9:3, 4; Ŵalevi 17:13, 14; Machitidu 15:28, 29.
6. Kumbi mbuheni kulonde ndopa? Kumbukani kuti Yehova wakhumba kuti tikani ndopa. Ichi ching’anamuwa kuti titenele cha kuŵikika ndopa za ŵanthu anyaki munthowa yeyosi, nanga zingaŵa zidu zo zasungika. (Machitidu 21:25) Ndichu chifukwa chaki Akhristu awuneneska akana kulonde ndopa. Azomera mitundu yinyaki ya munkhwala yambula kusazgaku ndopa. Yiwu akhumba nadi kuja ndi umoyu, kweni ataska umoyu wawu mwakuswa malangu ngaku Chiuta cha.—Mateyu 16:25.
[Vithuzithuzi papeji 25]
Kuti tikondweski Chiuta, titenele kukana kulonde ndopa, vinthu vyaukazuzi ndi kutcheŵa ngozi zadala