Tiyanduwa Asani Titijithereska ku vo Chiuta Wakunozga

TIKHUMBIKA kuvwiya Yehova, Fumu ya Chilengedu Chosi, asani tikhumba kuchita khumbu laki. Tiziŵa kuti Mwana waki ndiyu mutu wa mpingu wachikhristu ndipuso titijithereska ku ŵanthu wo alongozga pa vigaŵa vinyaki va umoyu widu. Kujithereska ku vo Chiuta wakunozga, kungayandulisa weyosi yo wakwaskika.

² Kuvwiya yo we ndi mazaza kungwamba mumunda wa Edeni. Fundu yeniyi yikonkhoskeka mu marangu ngaku Chiuta ngo nge pa Genezesi 1:28 ndi Genezesi 2:16, 17. Vakulengeka vimanavimana vakhumbikanga kujithereska kwaku Adamu ndi Heva, ndipu yiwu akhumbikanga kujithereska kwaku Chiuta ndipuso kuchita khumbu laki. Asani anguvwiya Chiuta atingi ajengi ndi chimangu ndipuso vinthu vatingi viŵayendiyengi umampha. Pavuli paki, dangu lakuvwiya yo ndi mutu lingukonkhoskeka pa 1 Akorinto 11:3. Wakutumika Paulo wakulemba kuti: “Ndikhumba kuti muziŵi kuti mutu wa munthulumi weyosi ndi Khristu, ndipu mutu wa munthukazi ndi munthulumi, kweniso mutu waku Khristu ndi Chiuta.” Ivi vilongo kuti kupatuwaku Yehova, weyosi wakhumbika kujithereska kwaku yo ndi mutu waki.

³ Ŵanthu anandi mazuŵa nganu avwiya cha pamwenga kujithereska kwaku yo ndi mutu wawu. Ntchifukwa wuli ve viyo? Chifukwa chakuti apapi ŵidu akwamba, angusankhiya dala kuleka kuvwiya ulongozgi waku Chiuta. (Gene. 3:4, 5) Chinanga kuti anguchita viyo, yiwu ŵengavi wanangwa. M’malu mwaki, anguja akapolu aku Satana Dyaboli. Kugaruka kwenuku kunguchitiska kuti ŵanthu aje patali ndi Chiuta. (Ako. 1:21) Venivi vachitiska kuti ŵanthu anandi mazuŵa nganu alamulikengi ndi muheni yo.—1 Yoha. 5:19.

⁴ Kusambira uneneska wakutuliya m’Mazu ngaku Chiuta ndipuso kulondo vo tasambira, kwatiwovya kuti tileki kulandizgika ndi Satana. Nge Akaboni akujipatuliya kwaku Yehova, tizomereza kuti iyu ndiyu watilongozgengi pa umoyu widu. Tikoliyana ndi Fumu Davidi, yo yinguzomereza kuti Yehova ndi “mulongozgi wa chechosi.” (1 Mbiri 29:11) Nasi tikamba kuti: “Ziŵani kuti Yehova ndi Chiuta. Iyu ndiyu wakutipanga, ndipu isi te ŵanthu ŵaki. Isi te ŵanthu ŵaki ndipuso mbereri za mumskambu waki.” (Sali. 100:3) Tiziŵa kuti Yehova ngwanthazi ndipu ngwakwenere kumuvwiya ndi mtima wosi chifukwa ndiyu wakulenga vinthu vosi. (Chivu. 4:11) Nge ateŵeti aku Chiuta wauneneska, tilondo Yesu Khristu, yo ntchakuwoniyapu chidu chamampha pa nkhani yakujithereska kwaku Chiuta.

⁵ Kumbi Yesu wangusambiranjipu pa masuzgu ngo wangukumana nangu pa nyengu yo wenga pacharu chapasi? Lemba la Aheberi 5:8 likamba kuti: “Chinanga kuti wenga mwana waki, wangusambira kuvwiya chifukwa cha masuzgu ngo wangukumana nangu.” Iyu wangulutirizga mbwenu kuvwiya Awisi akuchanya chinanga kuti wangukumana ndi masuzgu ngakulu. Kusazgiyapu pa fundu yeniyi, wachitanga vinthu mwa khumbu laki cha. Vo iyu wakambanga vatuwanga kwaku Chiuta ndipu wangujipenje unkhankhu cha. (Yoha. 5:19, 30; 6:38; 7:16-18) Pa nyengu ya uteŵeti waki, wayanjanga kuchita khumbu la Awisi chinanga kuti vinguchitiska kuti wasuskiki kweniso watombozgeki. (Yoha. 15:20) Chinanga kuti wangukumana ndi masuzgu, Yesu wangujithereska kwaku Chiuta. Iyu “wangujiyuyuwa ukongwa . . . mpaka nyifwa, nyifwa yaki nayu yapachimiti chakutombozgekiyapu.” Chifukwa chakuti wanguvwiya Yehova ndi mtima wosi, vikuchitiska kuti ŵanthu alonde utaski wamuyaya, iyu wakwezeki ndipuso Awisi alonde unkhankhu.—Afi. 2:5-11; Ahe. 5:9.

KUMBI TIKHUMBIKA KUJITHERESKA KWAKU YANI?

⁶ Asani tivwiya Chiuta mwakuchita khumbu laki, tikhwecha vinthu vinandi vakufipiska mtima ndipuso vakuguŵiska vo ŵanthu wo akana kujithereska ku ulamuliru waku Yehova akumana navu. Murwani widu mura Dyaboli, wakhumbisiska kutimeza. Yehova watitaskengi ku muheni mwenuyu asani titijithereska ndi mtima wosi kwaku iyu kweniso asani titesesa kulimbana ndi Satana.—Mate. 6:10, 13; 1 Petu. 5:6-9.

⁷ Tiziŵa kuti Khristu ndi mutu ndipuso wapaska udindu “kapolu wakugomezgeka ndi wazeru” mu mpingu wachikhristu. Kuziŵa venivi kutitiwovya kuja ndi maŵanaŵanu ngakwenere kweniso kuchita vinthu umampha ndi Akhristu anyidu. Asani titijithereska mu mpingu, vitichitiskengi kuti tivwiyengi Mazu ngaku Chiuta pa vigaŵa vosi va kusopa kwidu. Tingalongo kuti tivwiya asani tipharazga, tisanirika pa maunganu ndi kumukapu, tikoliyana ndi ŵara ndipuso vo gulu likunozga.—Mate. 24:45-47; 28:19, 20; Ahe. 10:24, 25; 13:7, 17.

⁸ Kuvwiya marangu ngaku Chiuta, kuchitiska kuti mu mpingu wachikhristu muje chimangu, vinthu viyendengi umampha kweniso uje wakuvikilirika. Ateŵeti aku Yehova alongo mijalidu yaki. (1 Akori. 14:33, 40) Vo vititichitikiya mugulu laku Yehova, vititichitiska kuti tikambengi mazu ngakuyanana ndi ngo Davidi yo wenga fumu wangukamba wati wawona kupambana ko kulipu pakati pa ŵanthu wo ateŵete Yehova ndi ŵanthu aheni. Iyu wanguti: “Mbakukondwa ŵanthu wo Chiuta wawu ndi Yehova!”—Sali. 144:15.

⁹ Mu banja, “mutu wa munthukazi ndi munthulumi.” Penipo munthulumi wakhumbika kujithereska kwaku Khristu ndipu mutu waku Khristu ndi Chiuta. (1 Akori. 11:3) Anthukazi atenere kujithereska kwa alumu ŵawu ndipu ŵana akhumbika kuvwiya apapi ŵawu. (Aefe. 5:22-24; 6:1) Mu banja muja chimangu asani weyosi watijithereska kwaku yo ndi mutu waki.

¹⁰ Munthulumi wakhumbika kulongozga mwachanju banja laki. Iyu wangafiska kuchita viyo asani wayezga Khristu. (Aefe. 5:25-29) Asani munthulumi wagwiriskiya ntchitu udindu waki mwakwenere ndipuso watiwufiska, kutuŵa kwambula kusuzga kuti muwolu waki ndi ŵana amuvwiyengi. Munthukazi wakhumbika kovya mulumu waki. (Gene. 2:18) Asani munthukazi wazikira, walutirizga kovya ndi kutumbika mulumu waki, iyu watanjika ndi mulumu waki ndipuso watumbika Chiuta. (1 Petu. 3:1-4) Asani anthulumi ndi anthukazi alondo ulongozgi wa m’Bayibolu pakuvwiya yo ndi mutu, alongo ŵana ŵawu chakuwoniyapu chamampha pa nkhani yakujithereska kwaku Chiuta.

¹¹ Asani titijithereska kwaku Chiuta, vitiwovyengi kuŵawona mwakwenere “ŵaraŵara amazaza,” wo “ŵe mumalu mwawu chifukwa akuzomerezeka ndi Chiuta.” (Aro. 13:1-7) Nge zika zakuvwiya marangu nga boma, Akhristu apereka msonkhu. Yiwu apereka “vinthu vaku Kayisara kwaku Kayisara, ndipu vaku Chiuta kwaku Chiuta.” (Mate. 22:21) Asani tipharazga, tikoliyana ndi fundu zo gulu lilondo pa nkhani ya kusunga chisisi. Chifukwa chakuti titijithereska ndipuso tivwiya ŵara a boma pa chechosi cho akamba cho chileka kususkana ndi dangu la urunji laku Yehova, vitovya kuti tigwiriskiyengi ntchitu nthazi zidu pa ntchitu yakupharazga.—Mariko 13:10; Machi. 5:29.

¹² Tikhumbika kuvwiya marangu ngaku Chiuta pa vigaŵa vosi va umoyu widu. Ndi chigomezgu, tilindizga zuŵa lo ŵanthu wosi azakujithereska kwaku Yehova Chiuta. (1 Akori. 15:27, 28) Ŵanthu wosi wo azomereza ulamuliru waku Yehova ndipuso alutirizgengi kumuvwiya mpaka muyaya, azamutumbikika kweniso kuyanjika ndi iyu!