MO MUNGAYAMBIYA KUKAMBISKANA NDI ŴANTHU
SAMBIRU 6
Mungachitanga Mantha Cha
Fundu ya mu Bayibolu: “Tinguchita chiganga chifukwa chaku Chiuta widu kuti tikukambiyeni uthenga wamampha waku Chiuta.”—1 Ate. 2:2.
Vo Yesu Wanguchita
1. Woneriyani VIDIYO, pamwenga ŵerengani Luka 19:1-7. Pavuli paki ŵanaŵaniyani mafumbu yanga:
Ntchifukwa wuli ŵanthu anyaki amutinkhanga Zakeyu?
Nanga ndi vinthu wuli vo vinguchitiska Yesu kuti wamupharazgiyi uthenga wamampha?
Kumbi Tisambiranji Kwaku Yesu?
2. Tikhumbika cha kuchita mantha kuti tifiski kupharazga uthenga wa Ufumu ku munthu weyosi.
Muyezgengi Yesu
3. Muthembengi Yehova. Mzimu waku Chiuta ungumuwovya Yesu kuti wapharazgengi, ndipu nasi ungatiwovya. (Mate. 10:19, 20; Luka 4:18) Mupemphengi Yehova kuti wakuwovyeni kuja ndi chiganga kuti mupharazgiyi ŵanthu wo muchita nawu mantha kuŵapharazgiya.—Machi. 4:29.
4. Mungayeruzganga munthu cha. Tingatondeka kupharazgiya munthu chifukwa cha mo wawoneke, vinthu vakuliŵavu vo wenavu, vo watanja pa umoyu waki pamwenga chifukwa cha vo wagomezga. Kweni mukumbukengi kuti:
Yehova ndi Yesu awona mumtima, mo isi tingawonamu cha.
Palivi munthu yo Yehova wangatondeka kumulongo lisungu laki.
5. Tikhumbika kuchita vinthu mwambula mantha, mwaulemu ndipuso mwakuphwere. (Mate. 10:16) Mungapindananga ndi ŵanthu cha. Mutuwengepu mwaulemu asani munthu yo wakhumba cha kuvwisiya uthenga wamampha pamwenga asani muwona kuti mwe ambula kuvikilirika.—Nthanthi 17:14.