Kumbi Mungagomezga Visopa pa Nkhani ya Ndalama?
Estellea walutanga ku chisopa ndi ŵana ŵaki 7 nyengu zosi. Iyu wangukamba kuti: “Ndingukambiya mura wa muchisopa changu kuti ndikhumba kusambira Bayibolo.” Kweni pengavi zuŵa limoza lo wangumusambizapu. Pavuli paki, Estelle wanguleka kusopa. Iyu wangukamba so kuti: “Ŵaraŵara a chisopa angundilembe kalata ndi kundikambiya kuti, pa zuŵa lo ndatondeka kuluta ku chisopa, nditumizengi ŵaka ndalama. Ndinguwona kuti, ‘Maŵanaŵanu ngawu ngenga kwaku ini cha kweni akhumbanga ŵaka ndalama zangu.’”
Angelina yo wayanjanga kuluta ku chisopa chaki, wakukamba kuti: “Zuŵa lelosi lo tasopanga, ayendesanga basiketi katatu mu tchalitchi mwidu, yiwu akhumbanga ŵaka kuti tiperekengi ndalama nyengu zosi. Ndinguwona kuti, ‘Ŵengavi mzimu waku Chiuta.’”
Kumbi visopa vo ve m’chigaŵa chinu vichichizga ŵanthu kuti aperekengi ndalama mwakugwiriskiya nchitu nthoŵa zakupambanapambana? Kumbi venivi vikoliyana ndi vo Bayibolo lisambiza?
VO BAYIBOLO LISAMBIZA
Yesu yo wakwambisa Chikhristu, wakukamba kuti: “Kwawezi mwaronde, kwawezi paskani.” (Mateyu 10:8) Uthenga wo we m’Bayibolo ngwakuzirwa ukongwa ndipu ukhumbika kuti ŵanthu wo atiwukhumba awusaniyi mwambula kugula.
Kumbi Akhristu akwambiriya asaniyanga wuli ndalama zakwendese mpingu?
Weyosi waperekanga “uli ndimo wajiteme mumtima waki; kwachigwinini cha, pamwenga kwakukakamizgika cha; chifukwa Chiuta watanja mupaski wamasangu.” (2 Ŵakorinte 9:7) Wakutumika Paulo wakukamba kuti: ‘Titakataka usiku ndi msana, alinga kuti tingamuzitiska yumoza waku imwi cha, tichikutawuliyani evangeli waku Chiuta.’ (1 Ŵatesalonika 2:9) Paulo wagwiranga nchitu yakusona mahema kuti wasaniyengi ndalama zakumuwovye pa uteŵeti waki.—Machitidu 18:2, 3.
KUMBI AKABONI AKU YEHOVA ACHITA WULI?
Akaboni aku Yehova wosi awungana munyumba zo zidanika kuti Nyumba za Ufumu, nyumba zenizi zikuluzikulu ukongwa cha. Kumbi ndalama zo agwiriskiya nchitu zituwa pani? Yiwu atendesa mbali cha pamwenga kupereka ma nevulupu kuti ŵanthu aŵikengemu ndalama. M’malu mwaki, yosi yo wawona kuti mawunganu ngidu ngakukhumbika, wangaponya ndalama m’bokosi lo lija mu Nyumba ya Ufumu kwambula kujiwonesa.
Pakhumbika ndalama zinandi kuti magazini yanga ngasindikiziki ndipuso ngatumiziki. Kweni mwazamuwonapu cha Akaboni aku Yehova achipempha ndalama. Chilatu chawu chikulu nkhupharazga uneneska wa m’Bayibolo.
Kumbi muŵanaŵana kuti venivi vikoliyana ndi mazu ngaku Yesu kweniso vo Akhristu akwambiriya achitanga?
[Mazu ngam’mphata]
a Mazina nganyaki tasintha mu nkhani izi.
[Chithuthuzi papeji 4]
[Fundo yo yakonkhoskeka papeji 4]
Kumbi Mungagomezga Visopa pa Nkhani ya Ndalama?